Apocalipsi 18:1-24
18 Mãwãnacarea mʉ̃a bajãnebema nezocada unusia bajãneba eɗaa zebʉrʉda. Maʉ̃ra dji droma basía. Idji dorrodorroaba naʉ̃ ẽjũãra ʉ̃naga nũmesia.
2 Idjia nãwã jĩgua jarasia:
¡Babilonia puru dromara ãrĩsia! ¡Wãrãda jũma ãrĩsia! Ẽberãrã neẽ́a, ãtebʉrʉ jairãda mama panabadaa.
Jũma jai cadjirua ɓeara mama panabadaa. Jũma ĩbana Ãcõrẽ quĩrãpita mititia ɓeara mama panabadaa.*
3 Maʉ̃ puruɗebemarãba auɗua o duanʉba druazabemarãa aɓarica cadjiruada obisiɗaa itua õgo diabʉda quĩrãca.
Druazabema bororãba aɓari quĩrãca obadjiɗaa wẽrã auɗua ume daunemabʉda quĩrãca.
Maʉ̃ carea Babilonia purura jũma ãrĩsia.
Maʉ̃ puruba ne bia waiɓʉada jũmawãyã eda quĩrĩã ɓaɗa bẽrã naʉ̃ ẽjũãnebema ne nẽdobuebadarãda ne barasiɗaa.
4 Maʉ̃be mʉ̃a ũrĩsia aɓaʉba bajãneba nãwã jarabʉrʉda:
Mʉ̃ ẽberãrã, Babilonia puruɗebemada ãyã wãbʉrʉɗadua jãʉ̃ puruba cadjirua o ɓʉ quĩrãca orãnamãrẽã.
Mãwãra Ãcõrẽba jãʉ̃ puru cawa obʉrʉɗe bãrãra cawa oẽ́a.
5 Jãʉ̃ puruba jũmawãyã cadjiruada o ɓʉa. Ãdji cadjiruara mõgara pã buebʉda quĩrãca bajãnaa jũẽsia.
Jũma ãdjia cadjirua opeɗaɗara Ãcõrẽba quĩrãdoaẽ́ ɓʉa.
6 Jãʉ̃ purura biẽ́ oɗadua djãrã biẽ́ oɗa quĩrãca.
Idjia djãrã biẽ́ oɗa cãyãbara ɓarima umé biẽ́ara oɗadua.
Idjia djãrãra biẽ́ osia uva ɓa asega ɓʉ õgo diabʉrʉ quĩrãca.
Maʉ̃ bẽrã idjira ɓarima umé biẽ́ara oɗadua uva ɓa asega ɓʉ ɓarima umé õgo diabʉda quĩrãca.
7 Jãʉ̃ purura bio bia mĩgabiɗadua idjaɓa bio sopuabiɗadua ãdji
purura dji dromaana a panʉ bẽrã idjaɓa ne biada aɗuba eropanʉana a panʉ bẽrã.
Jãʉ̃ puruba nãwã crĩcha ɓʉa: “Mʉ̃ra wẽrã dji droma idji bugueɗe chũmʉ quĩrãca ɓʉa.
Mʉ̃ra pẽdra wẽrã quĩrãca ɓʉẽ́a. Mʉ̃ra sopua ɓaẽ́a.”
8 Mãwã crĩcha ɓʉ bẽrã dãrãẽ́ne jãʉ̃ puruɗebemarãra quininia, sopuaba jĩãnia, idjaɓa jarrababa biẽ́ duanania.*
Dadjirã Boro Ãcõrẽ jũma poya ɓʉba cawa obʉrʉɗe jãʉ̃ purura babueya.
9 Jãʉ̃ puru ume druazabema bororãba cadjiruada obadjiɗaa daunemabʉda quĩrãca. Idjaɓa jãʉ̃ puruba ne bia aɗuba eroɓʉɗebemada edapeɗaɗa bẽrã ne barasiɗaa. Maʉ̃ carea jãʉ̃ puru bá nũmʉ cowaa unubʉdaɗe jĩãnia.
10 Waya panania Ãcõrẽba Babilonia puru cawa oɗa quĩrãca ãdjirã siɗa cawa oida. Maʉ̃ carea tʉmʉba acʉ panʉne nãwã jaraɗia:
¡Mĩã djuburi, mĩã djuburi Babilonia puru droma ne jũma obari baɗara!
Ãcõrẽba jãʉ̃ purura isabe cawa osia.
11 Naʉ̃ ẽjũãnebema ne nẽdobuebadara maʉ̃ puru carea aujĩãnia ãdjia nẽdobue panʉ nẽdoɗira neẽ́ ɓai bẽrã.
12 Maʉ̃ puruɗe ne jũmada nẽdobuebadjiɗaa: oroda, paratada, mõgara nẽbʉa ɓeada, neta nẽbʉa ɓeada, dji biara ɓʉ lino wuada, seda wuada, wua pursupursua ɓʉda, wua purea ɓʉda, bacuru tũã queɗeada, elepante quiɗa oɗada, bacuru nẽbʉa ɓʉ oɗada, bronce oɗada, jiorro oɗada, marmol mõgara oɗa siɗa nẽdobuebadjiɗaa.*
13 Idjaɓa canelada, ne jũma tũãpa queɗeada, incienso querada, mirra querada, olibano querada, uva ɓada, olivo dragada, harina biada, trigoda, pacada, ovejada, cawayoda, carreta siɗa nẽdobuebadjiɗaa. Ẽberãrã siɗa nẽdobuebadjiɗaa nezocada ɓeaɗamãrẽã.
14 Jũma maʉ̃ nẽdobuebadarãba nãwã jaraɗia: “Ne jũma jãʉ̃ puruba awua ɓaɗara neẽ́ ɓesia. Jãʉ̃ puruba parata waiɓʉa eroɓaɗara, ne biya queɗea aɗuba eroɓaɗa siɗa jũma jõsia. Waa edaɗaẽ́a.”
15 Wãrãda maʉ̃ puruɗaa ne jũma nẽdobueɗe wãbadapeɗaɗara bio ne barasiɗaa. Ãdjirãba waya panania Ãcõrẽba maʉ̃ puru cawa oɗa quĩrãca ãdjirã siɗa cawa oida. Maʉ̃ carea tʉmʉba acʉ panʉne nãwã aujĩãnia:
16 ¡Mĩã djuburi, mĩã djuburi jãʉ̃ puru droma ɓaɗara!
Jãʉ̃ purura wẽrã lino wua dji biara ɓʉba djio ɓʉ quĩrãca ɓasia.
Wua pursupursua ɓʉba idjaɓa purea ɓʉba djio ɓʉ quĩrãca ɓasia.
Oro oɗaba, neta nẽbʉa ɓʉba, mõgara nẽbʉa queɗeaba djio ɓʉ quĩrãca ɓasia.*
17 Baribʉrʉ jãʉ̃ puruba ne bara ɓaɗara isabe jõsia.
Jũma barcoɗebema bororãba, barcoɗe wãbadaba, barcoɗe trajabadaba, pusaɗe trajabada biɗa tʉmʉba acʉ duanania.
18 Maʉ̃ puru bá nũmʉ cowaa unubʉdaɗe nãwã jĩgua jaraɗia: “¿Sãʉ̃gʉ puruda jãʉ̃ puru quĩrãca ɓʉ?”
19 Maʉ̃be sopuaba ãdji boro ʉ̃rʉ̃ egoro porada jãmãpoɗapeɗa nãwã jĩgua aujĩãnia:
¡Mĩã djuburi, mĩã djuburi jãʉ̃ puru droma ɓaɗara! Jãʉ̃ purura ne bara ɓaɗa bẽrã, barco eroɓeara
jãma ne barasiɗaa. Baribʉrʉ jãʉ̃ purura isabe jũma ãrĩsia.
20 ¡Jũma bajãne ɓeara ɓʉsriɗaɗadua jãʉ̃ purura ãrĩna bẽrã!
Ãcõrẽ ẽberãrã, Jesuba diabueɗarã, Ãcõrẽneba beɗeabadarã siɗa ɓʉsriɗaɗadua.
Jãʉ̃ puruba bãrã biẽ́ oɗa carea Ãcõrẽba cawa osia.
21 Maʉ̃be bajãnebema nezoca dji dromaba mõgara waiɓʉada yu droma quĩrãca ɓʉda edapeɗa ɓatabuesia. Mãwã obʉrʉɗe nãwã jarasia:
Maʉ̃ mõgara juerza pusaɗaa ɓatabueɗa quĩrãca Babilonia puru dromara isabe jũma ãrĩya. Maʉ̃ purura waa ununaẽ́a.
22 Maʉ̃ puruɗe arpa, chiru, cachiru zá duanʉ siɗa waa ũrĩnaẽ́a. Ẽberãrãra trʉ̃ã duanʉ siɗa waa ũrĩnaẽ́a.
Maʉ̃ puruɗe ne obadara waa ununaẽ́a. Yuɗe ne ɓa duanʉ jĩguada waa ũrĩnaẽ́a.
23 Maʉ̃ puruɗe ĩbĩrã uruara waa ununaẽ́a. Quima edabʉdaɗe ɓʉsriɗa ɓʉga nũmʉra waa ũrĩnaẽ́a.
Mamabema ne nẽdobuebadara naʉ̃ ẽjũãne dji dromada ɓeasia.
Mamabema jãĩbanarãba druazabemarãda jũma cũrũgabadjiɗaa. Maʉ̃ carea purura jũma ãrĩsia.
24 Ãcõrẽneba beɗeabadarã beapeɗaɗa carea, Ãcõrẽ ẽberãrã beapeɗaɗa carea, idjaɓa jũma naʉ̃ ẽjũãne beapeɗaɗa carea biɗa maʉ̃ purura beɗeaɗe ɓʉa.
Beɗea eɗaare
^ 18:2. Griego beɗeaɗe ʉ̃cʉrʉ cartaɗe naʉ̃ siɗa ɓʉ́ ɓʉa: “Jũma animarã Ãcõrẽ quĩrãpita mititia ɓeara mama panabadaa.”
^ 18:8. Dãrãẽ́ne. Griego beɗeaɗe ɓʉ́ ɓʉa: “Ewariɗe aɓaʉɗe.”
^ 18:12. Elepante quiɗa. Cãpũrĩã beɗeaɗe ɓʉ́ ɓʉa “marfil.”
^ 18:16. Neta nẽbʉa ɓʉ. Cãpũrĩã beɗeaɗe ɓʉ́ ɓʉa “perla.”
