Apocalipsi 19:1-21
19 Mãwãnacarea mʉ̃a bajãnaa zocãrã nãwã beɗea duanʉda ũrĩsia.
¡Biya quirua dadjirã Boro Ãcõrẽra! Idjiabʉrʉ ẽberãrãra ẽdrʉ edasia. Idjidrʉ dji dromaara ɓʉa idjaɓa dji ʉɓʉara ɓʉa.
2 Idjia jipa ariɗe cawa obaria. Wẽrã auɗua trʉ̃ ɓʉga ɓaɗara cawa osia maʉ̃ wẽrãba cadjirua o ɓʉɗeba jũma naʉ̃ ẽjũãnebemarãa aɓarica cadjiruada obiɗa bẽrã.
Ãcõrẽba maʉ̃ wẽrãra biẽ́ ɓʉsia idji nezocarãda quenana bẽrã.
3 Wayacusa nãwã jĩgua jarasiɗaa:
¡Biya quirua dadjirã Boro Ãcõrẽra! Jãʉ̃ puru bá nũmʉ cowaara ewariza cowa nũmaya.
4 Maʉ̃ne veinticuatro drõãrãda, animarã zaca zocai ɓea quĩmãrẽ panʉ siɗa chĩrãne ɓarru copanesiɗaa Ãcõrẽa bia beɗeaɗi carea. Ãcõrẽ idji bugue biya quiruɗe chũmʉne ãdjirãba nãwã bia beɗeasiɗaa:
¡Maʉ̃gʉra wãrãa!* ¡Dadjirã Boro Ãcõrẽra biya quirua!
5 Idjaɓa mʉ̃a ũrĩsia Ãcõrẽ bugue biya quirumaʉba aɓa nãwã beɗeabʉrʉda:
¡Jũma Ãcõrẽ nezocarã, dadjirã Ãcõrẽa bia beɗeaɗadua!
¡Ãcõrẽ waya ɓearã, idjía bia beɗeaɗadua! ¡Dji droma ɓeaba, dji eɗaara ɓea biɗa bia beɗeaɗadua!
Oveja Zaque quima edai ewari
6 Maʉ̃be zocãrã jĩgua beɗea duanʉda mʉ̃a ũrĩsia. Maʉ̃ra do jururuga nũmʉ quĩrãca ɓasia, baa dji cãbãyã ɓaebʉrʉ quĩrãca ɓasia. Ãdjirãba nãwã jara duanasiɗaa:
¡Biya quirua dadjirã Boro Ãcõrẽra!
¡Dadjirã Boro Ãcõrẽba jũma poya o ɓʉa! ¡Idjidrʉ jũmarã Boroa!
7 ¡Ɓʉsriɗaɗia! ¡Capipiaɗia! Idjidrʉ dji Dromaana aɗia, Oveja Zaque quima edai ewarira jũẽna bẽrã. Idji quima baira djiosia.
8 Ãcõrẽba idjira dji biara ɓʉ lino wua totroa dorrodorroa quiruba djiobisia.
(Maʉ̃ biara ɓʉ lino wuaba jara ɓʉa Ãcõrẽ ẽberãrãba jipa obadaɗebemada.)
9 Bajãnebema nezocaba mʉ̃́a jarasia: “Cartaɗe nãwã ɓʉdua: Oveja Zaque quima edabʉrʉ carea ne cobʉdamaa jʉreɗarãda bio bia ɓeaa.” Idjaɓa jarasia: “Maʉ̃gʉra wãrã beɗea Ãcõrẽba jaraɗaa.”
10 Ara maʉ̃da mʉ̃ra bajãnebema nezoca jĩrũ caita chĩrãne ɓarru coɓesia idjía bia beɗeai carea. Baribʉrʉ idjia mʉ̃́a jarasia: “Jãwã orãdua, ãtebʉrʉ Ãcõrẽabʉrʉ bia beɗeadua. Mʉ̃ra Ãcõrẽ nezocada jãwã quirua bʉ quĩrãca idjaɓa djabarã Jesuba jaradiaɗa ĩjã ɓea quĩrãca.”
Jesuba jaradiaɗara Ãcõrẽ Jaureba idji nezocarãa beɗeabibaria.*
Cawayo torro ʉ̃rʉ̃ zeɗa
11 Mãwãnacarea mʉ̃a unusia bajãne eɗa wãbadada ewa nũmʉda. Cawaẽ́ne cawayo torroda odjasia. Maʉ̃ cawayo ʉ̃rʉ̃ chũmʉra “Beɗea Aɓa Ɓʉ” idjaɓa “Wãrã Ara” abadaa. Idjia ẽberãrãra jipa cawa obaria idjaɓa jipa o ɓʉɗeba dji quĩrũ ume djõbaria.
12 Idji daura tʉbʉ quĩrãca urua ɓasia. Nepeda zocãrã jʉ̃ ɓasia. Idji boroɗe trʉ̃da ɓʉ́ eroɓasia baribʉrʉ aɓabe idjiabʉrʉ maʉ̃ trʉ̃ra cawa ɓasia.
13 Idjia cacuaɗe jʉ̃ ɓʉra oaɗe tʉ edaɗa basía. Idji trʉ̃ra Ãcõrẽ Beɗea abadaa.*
14 Idji caiɗu bajãnebema sordaorãda cawayo torro ɓea ʉ̃rʉ̃ zesiɗaa. Ãdjia cacuaɗe jʉ̃ ɓeara dji biara ɓʉ lino wua totroa quiru basía. Ni maãrĩ biɗa mititiaẽ́ ɓeasia.
15 Ãcõrẽ Beɗea abada iteɗeba djõbada neco peweɗea ɓʉda odja ɓasia druazabemarã poyai carea. Idji jʉwaɗe eroɓʉ jiorro oɗaba ãdjirãa ĩjã obiya.* Uva biwadʉgabʉrʉ quĩrãca ãdjirãra cawa oya Ãcõrẽ jũma poya ɓʉba quĩrũbiɗeba mãwã cawa obi bẽrã.
16 Idjia ʉ̃rʉ̃ jʉ̃ ɓʉɗe idji ɓacara ʉ̃rʉ̃ naʉ̃ trʉ̃da ɓʉ́ eroɓʉa: “Jũmarã bororã cãyãbara dji dromaara ɓʉ, idjaɓa jũma dji droma ɓea Boro.”
17 Maʉ̃be mʉ̃a unusia bajãnebema nezocada ʉ̃mãdau ʉ̃rʉ̃ nũmʉda. Idjia jũma ne mĩguia cobada ʉ̃tʉ wãɓaribadarãa nãwã jĩgua jarasia: “Zeɗadua. Ãbaa dji jʉreɗadua ne coɗi waiɓʉa Ãcõrẽba o ɓʉma.
18 Mama ẽberãrã boro djarada, sordaorã boro djarada, mẽsrã ɓea djarada, cawayo djarada, cawayo ʉ̃rʉ̃ wãbada djara siɗa coɗia. Jũma ẽberãrã djarada coɗia: nezocaẽ́ djarada, nezoca djarada, dji eɗaara queɗea djarada, idjaɓa dji dromarã ɓea djara siɗa coɗia.”
19 Maʉ̃be mʉ̃a unusia animarã minijĩchia ɓʉda, naʉ̃ ẽjũãnebema bororãda, jũma ãdji sordaorã siɗa ãbaa dji jʉre duanʉda. Cawayo ʉ̃rʉ̃ chũmʉ ume, idjiare panʉ sordaorã ume djõni carea duanasiɗaa.
20 Djõbʉdaɗe cawayo ʉ̃rʉ̃ chũmʉba animarã minijĩchia ɓʉra, Ãcõrẽneba beɗeabari dji wãrãẽ́ siɗa jidasia. Maʉ̃ Ãcõrẽneba beɗeabari dji wãrãẽ́ba animarã minijĩchia ɓʉ trʉ̃neba ne ununaca waiɓʉa ɓeada obadjia. Mãwã animarã minijĩchia ɓʉ sẽyã idu ɓʉbipeɗaɗara jũma cũrũgabadjia. Maʉ̃ animarã za quĩrãca ɓʉ jʉwaba oɗaa bia beɗeapeɗaɗara cũrũgabadjia. Cawayo ʉ̃rʉ̃ chũmʉba maʉ̃ animarã minijĩchia ɓʉra, Ãcõrẽneba beɗeabari dji wãrãẽ́ siɗa zocai panʉda tʉbʉ urua azupre bara uruga nũmʉne ɓatabuesia.
21 Djõbada neco idji iteɗeba odja ɓʉba dewararãda jũma quenasia. Maʉ̃be jũma ne mĩguia cobada ʉ̃tʉ wãɓaribadara maʉ̃ djara co duanʉba jãwũãsiɗaa.
