Apocalipsi 2:1-29
2 Idjia mʉ̃́a nãwã jarasia: “Djabarã Epeso puruɗebema wagabari bajãnebema nezoca itea cartaɗe nãwã ɓʉdua:
Idji jʉwa araarebemane chĩdau siete eroɓʉba, siete ĩbĩrã oro oɗa tãẽna nĩba nãwã jara ɓʉa:
2 Bãrãba o panʉra mʉ̃a cawa ɓʉa. Mʉ̃ itea bio traja panʉda idjaɓa bia mĩga panʉne jũma droa panʉda cawa ɓʉa. Bãrãba dji cadjirua obadarãa iduaribiɗacada cawa ɓʉa. Ʉ̃cʉrʉ bãrãmaa wãnapeɗa Jesucritoba diabuesiaɗa abadjiɗaa.* Baribʉrʉ bãrãba quĩrãcuita acʉ panʉneba cawasiɗaa ãdjirãra sewaiɗa ɓeada.
3 Bãrã mʉ̃ carea bia mĩga panʉne jũma droa panʉa idjaɓa sẽnaẽ́ mʉ̃ itea bia traja panʉa.
4 Baribʉrʉ naʉ̃gʉda mʉ̃a biẽ́ unu ɓʉa: bãrãba naãrã quĩrĩã eroɓeaɗara iɗira mãcua neẽ́ panʉa.
5 Maʉ̃ bẽrã quĩrãnebaɗadua bãrãba naãrã quĩrĩã eropananada.* Wayacusa Ãcõrẽmaa zeɗadua. Oɗadua bãrãba naãrã bia o panana quĩrãca. Bãrãda wayacusa Ãcõrẽmaa zeɗaẽ́bʉrʉ, mʉ̃a bãrã cawa oɗe wãya.* Maʉ̃ne bãrã ĩbĩrãra ãyã ɓʉya.
6 Baribʉrʉ naʉ̃gʉda bia o panʉa: Nicolá ẽpẽ ɓeaba biẽ́ obadara bãrãba quĩrĩãnacaa. Mʉ̃a biɗa quĩrĩãcaa.
7 Dji cʉwʉrʉ bara ɓʉba ũrĩdua Ãcõrẽ Jaureba djabarãa jara ɓʉra. Cadjirua poyapeɗaɗarãa mʉ̃a bacuru zocai ɓai diabariɗebema nejõda idu jõbiya. Maʉ̃ bacurura Ãcõrẽ ẽjũã biya quiruɗe ɓʉa.”
Critoba djabarã Esmirna puruɗebema itea ɓʉbiɗa
8 “Djabarã Esmirna puruɗebema wagabari bajãnebema nezoca itea cartaɗe nãwã ɓʉdua:
Dji beupeɗa wayacusa zocai ɓʉra dji naãrãbemaa idjaɓa jĩrũarebemaa. Idjia nãwã jara ɓʉa:
9 Bãrãba o panʉra mʉ̃a cawa ɓʉa.* Bia mĩga panʉda idjaɓa ne neẽ́ ɓeada cawa ɓʉa. Mãwãmĩna Ãcõrẽneba bãrãra ne bara ɓeaa. Mʉ̃a cawa ɓʉa ʉ̃cʉrʉ judiorãba bãrãnebemada biẽ́ beɗeabadada. Ãdjirãra Ãcõrẽ ẽberãrãana abadamĩna mãwãẽ́a.* Ãtebʉrʉ diauru ẽberãrãa.*
10 Bãrã dãrãẽ́ne bia mĩgaɗira wayarãnadua. ¡Ũrĩnadua! Diauruba ʉ̃cʉrʉ bãrãnebemada preso jidabiya ĩjã panani cawaya. Bãrãra dãrãnaẽ́ bia mĩgaɗia.* Baribʉrʉ bãrã beabʉda siɗa ĩjã pananadua. Maʉ̃be mʉ̃a bãrãra ewariza zocai ɓʉya.*
11 Dji cʉwʉrʉ bara ɓʉba ũrĩdua Ãcõrẽ Jaureba djabarãa jara ɓʉra. Cadjirua poyapeɗaɗara ewariza Ãcõrẽnebemada jĩga ɓeaɗaẽ́a.”*
Critoba djabarã Pergamo puruɗebema itea ɓʉbiɗa
12 “Djabarã Pergamo puruɗebema wagabari bajãnebema nezoca itea cartaɗe nãwã ɓʉdua:
Djõbada neco quiɗa umena peweɗea era eroɓʉba nãwã jara ɓʉa:
13 Bãrãba o panʉra mʉ̃a cawa ɓʉa.* Idjaɓa cawa ɓʉa bãrã panabadama diaurura dji droma chũmebada bugueɗe chũmʉda. Mãwãmĩna bãrãba mʉ̃da waɗibiɗa ẽpẽ panʉa. Bãrã puruɗe diauru ɓabarima djaba Antipa mʉ̃ carea beasiɗaɗe bãrãba mʉ̃ ĩjã panʉra igaraɗaẽ́ basía. Djaba Antipaba ne jũmane mʉ̃nebemada beɗeabadjia.
14 Baribʉrʉ naʉ̃gʉda mʉ̃a biẽ́ unu ɓʉa. Ʉ̃cʉrʉ bãrã tãẽnabemaba Balaaʉ̃ba jaradiaɗara ẽpẽ panʉa.* Balaaʉ̃ba Baláa jaradiasia sãwã israelerãra cadjiruaɗe ɓaebida. Jʉwaba oɗa ãcõrẽa nedjara diaɗada cobibadjia idjaɓa auɗuada obibadjia.
15 Idjaɓa ʉ̃cʉrʉ bãrã tãẽnabemaba Nicolá ẽpẽ ɓeaba jaradiabadara ẽpẽ panʉa. Maʉ̃ jaradiabadara mʉ̃a quĩrĩãcaa.*
16 Maʉ̃ bẽrã wayacusa Ãcõrẽmaa zeɗadua. Mãwã oɗaẽ́bʉrʉ, mʉ̃a dãrãẽ́ne bãrã cawa oɗe wãya. Maʉ̃ne neco mʉ̃ iteɗeba odja nũmʉba maʉ̃ ẽberãrã ume djõya.
17 Dji cʉwʉrʉ bara ɓʉba ũrĩdua Ãcõrẽ Jaureba djabarãa jara ɓʉra. Cadjirua poyapeɗaɗarãa mʉ̃a maná mẽrã ɓaɗara cobiya idjaɓa mõgara zaque totroa quiruda diaya.* Maʉ̃ mõgara zaqueɗe trʉ̃ djiwiɗida ɓʉ́ ɓʉa. Ni aɓaʉba maʉ̃ trʉ̃ra adua ɓʉa. Baribʉrʉ dji edabʉrʉba cawaya.”
Critoba djabarã Tiatira puruɗebema itea ɓʉbiɗa
18 “Djabarã Tiatira puruɗebema wagabari bajãnebema nezoca itea cartaɗe nãwã ɓʉdua:
Ãcõrẽ Warra daura tʉbʉ urua quĩrãca ɓʉa, idji jĩrũra bronce ʉraɗa uruabari quĩrãca ɓʉa. Idjia nãwã jara ɓʉa:
19 Bãrãba o panʉra mʉ̃a cawa ɓʉa. Bãrã quĩrĩãnebemada, mʉ̃ ĩjã panʉnebemada, mʉ̃ itea o panʉnebemada, idjaɓa jũma droa panʉnebema siɗa cawa ɓʉa. Bãrãba naãrã o panana cãyãbara iɗi biara o panʉda cawa ɓʉa.
20 Baribʉrʉ naʉ̃gʉda mʉ̃a biẽ́ unu ɓʉa. Wẽrã Jezabel abadaba sewa jaradia ɓʉra bãrãba iduaribi panʉa.* Idjira Ãcõrẽneba beɗeabariaɗa abaria. Maʉ̃ne idjia jaradia ɓʉɗeba mʉ̃ nezocarãra cũrũgabaria auɗua nĩbaɗamãrẽã idjaɓa nedjara jʉwaba oɗa ãcõrẽa diaɗada coɗamãrẽã.
21 Mʉ̃a jʉ̃ã ɓasia idjia cadjiruara igarapeɗa Ãcõrẽmaa zemãrẽã baribʉrʉ idji auɗua nĩra igara quĩrĩãẽ́ basía.
22 Maʉ̃ bẽrã mʉ̃a idjira cacua piraba cʉɗaɗe ɓʉya. Maʉ̃be jũma idji ume daunemabadaba idji quĩrãca cadjirua o panʉda igaraɗaẽ́bʉrʉ, mʉ̃a bia mĩgabiya.
23 Idji warrarãra mʉ̃a quinibiya. Mãwã djabarã duanʉza cawaɗia mʉ̃a jũmarã crĩchara, jũmarãba soɗeba o quĩrĩã panʉ siɗa cawa ɓʉda. Bãdjiza opeɗaɗa quĩrãca mʉ̃a cawa oya.
24 2:24-25 Baribʉrʉ ʉ̃cʉrʉ bãrã Tiatiraɗebemaba maʉ̃ wẽrãba jaradia ɓʉra ẽpẽnaẽ́ panʉa. Maʉ̃ awara diauruba idjiɗerãa cawabiɗa mẽrã eroɓʉra jʉrʉɗaẽ́ panʉa cawaɗi carea. Mʉ̃a aɓabe jaraya bãrãba naʉ̃ ewariɗe ĩjã panʉ quĩrãca ĩjã pananamãrẽã aɓa mʉ̃ zebʉrʉɗaa. Dewara beɗeada ĩjã obiẽ́a.
26 2:26-27 Cadjirua poyapeɗaɗara idjaɓa mʉ̃a quĩrĩã ɓʉ ewariza opeɗaɗara mʉ̃a druazabema bororãda ɓeaɗamãrẽã ɓʉcuaya mʉ̃ Zezaba mʉ̃ra jũmarã boroda ɓʉɗa quĩrãca. Maʉ̃be ãdjirãba quĩrã djuburia neẽ́ jũmarãa ĩjã obiɗia.* Zoco toɗozoabibʉda quĩrãca jũmarãda poyaɗia.*
28 Mʉ̃a diapeɗabema chĩdauda ãdjirãa diaya.*
29 Dji cʉwʉrʉ bara ɓʉba ũrĩdua Ãcõrẽ Jaureba djabarãa jara ɓʉra.”
Beɗea eɗaare
^ 2:2. Jesucritoba diabuesiaɗa abadjiɗaa. Griego beɗeaɗe ɓʉ́ ɓʉa “apóstoles.”
^ 2:5. Griego beɗeaɗe nãwã ɓʉ́ ɓʉa: “Quĩrãnebaɗadua sãmaʉba ɓaesiɗada.”
^ 2:5. Bãrã cawa oɗe wãya. Griego beɗeaɗe ʉ̃cʉrʉ cartaɗe nãwã ɓʉ́ ɓʉa: “Dãrãẽ́ne mʉ̃a bãrã cawa oɗe wãya.”
^ 2:9. Bãrãba o panʉra mʉ̃a cawa ɓʉa. Griego beɗeaɗe ʉ̃cʉrʉ cartaɗe maʉ̃ra neẽ́a.
^ 2:9. Ãcõrẽ ẽberãrã. Griego beɗeaɗe ɓʉ́ ɓʉa “judiorã.”
^ 2:9. Diauru ẽberãrã. Griego beɗeaɗe ɓʉ́ ɓʉa: “Diauru ume dji jʉrebada deɗebemarãa.”
^ 2:10. Dãrãnaẽ́. Griego beɗeaɗe “die ewari” ɓʉ́ ɓʉa.
^ 2:10. Ewariza zocai ɓʉya. Griego beɗeaɗe nãwã ɓʉ́ ɓʉa: “Mʉ̃a boroɓari zocai ɓaiɗebemada bãrãa diaya.”
^ 2:11. Ewariza Ãcõrẽnebemada jĩga ɓeaɗaẽ́a. Griego beɗeaɗe ɓʉ́ ɓʉa: “Ɓarima umé beuɗaẽ́a.”
^ 2:13. Bãrãba o panʉra mʉ̃a cawa ɓʉa. Griego beɗeaɗe ʉ̃cʉrʉ cartaɗe maʉ̃ra neẽ́a.
^ 2:14. Numero 22:1ɗeba aɓa 25:3ɗaa; 31:16.
^ 2:15. Maʉ̃ jaradiabadara mʉ̃a quĩrĩãcaa. Griego beɗeaɗe ʉ̃cʉrʉ cartaɗe maʉ̃ra neẽ́a.
^ 2:17. Manára Ãcõrẽba diabueɗa paʉ̃ basía. Exodo 16:31-34.
^ 2:20. Jezabel. 1 Reye 16:29-31; 18:4,19; 2 Reye 9:22.
^ 2:26-27. Quĩrã djuburia neẽ́ jũmarãa ĩjã obiɗia. Griego beɗeaɗe ɓʉ́ ɓʉa: “Jiorroba ĩjã obiya.”
^ 2:26-27. Salmo 2:9.
^ 2:28. Diapeɗeɗabema chĩdauba jara ɓʉa Critoda. Apocalipsi 22:16.
