Apocalipsi 20:1-15
20 Mãwãnacarea mʉ̃a bajãnebema nezocada eɗaa zebʉrʉda unusia. Idjia uria dau cʉre ɓʉ jũãtrʉ ɓʉ ewabarida eroɓasia. Idjaɓa carena omoga chũmʉda idji jʉwaɗe eroɓasia.
2 Jera jidapeɗa mil poa jʉ̃ ɓʉsia. Maʉ̃ jera drõã naẽnabema damaa, diauru idjaɓa Satana abadaa.
3 Bajãnebema nezocaba idjira uria dau cʉre ɓʉɗe eɗaa ɓatabuepeɗa jũãtrʉ nũmʉsia ni aɓaʉba poya ewarãnamãrẽã. Maʉ̃ba diauruba druazabemarãda waa cũrũgaẽ́a aɓa mil poa jõbʉrʉɗaa. Mil poa baɗacarea idjira ẽrã ɓʉya naʉ̃ ẽjũãne dãrãẽ́ ɓamãrẽã.
4 Maʉ̃be mʉ̃a bugueda zocãrã unusia. Maʉ̃ ʉ̃rʉ̃ chũmeara Ãcõrẽba ɓʉsia Crito ume dji bororãda ɓeaɗamãrẽã. Idjaɓa mʉ̃a ẽberãrã oɓʉá tʉpeɗaɗa jaureda unusia. Mãwã oɓʉá tʉsiɗaa Jesuba jaradiaɗa ĩjã panʉ carea idjaɓa Ãcõrẽ beɗea jaradia panʉ carea. Ãdjirãba animarã minijĩchia ɓʉ́a, idji za quĩrãca ɓʉ jʉwaba oɗaa biɗa bia beɗeaɗaẽ́ basía. Idji sẽyãra ãdji dratuɗe, jʉwaɗe biɗa idu ɓʉbiɗaẽ́ basía. Ãdjirãra ʉ̃rẽbaɗapeɗa Crito ume dji bororãda mil poa panesiɗaa.
5 Maʉ̃ ʉ̃rẽbapeɗaɗara Ãcõrẽba naãrã ʉ̃rẽbabiɗa basía. Dewara beuɗarãra ʉ̃rẽbaɗaẽ́ basía aɓa mil poa jõnacarea.
6 Ãcõrẽba naãrã ʉ̃rẽbabi ẽberãrãra bio bia ɓeaɗia. Ãdjirãra waa beuɗaẽ́a, ãtebʉrʉ Ãcõrẽ sacerdoterãda, Crito sacerdoterã siɗa ɓeaɗia.* Idjaɓa mil poa Crito ume dji bororãda ɓeaɗia.
Ãcõrẽba diauru tʉbʉ uruaɗe ɓatabueɗa
7 Mil poa jõnacarea diaurura jʉ̃ ɓaɗada ẽrã ɓʉya.
8 Maʉ̃ne idjia jũma druaza cũrũgaɗe wãya. Gog druaɗebemarãda, Magog druaɗebemarã siɗa cũrũgaya. Maʉ̃ druaɗebema sordaorãda pusa ĩbʉ quĩrãca zocãrã panʉda edeya Ãcõrẽ ẽberãrã ume djõnamãrẽã.
9 Jũma naʉ̃ ẽjũãra ãdjirãba biraya. Maʉ̃ne Ãcõrẽba quĩrĩã ɓʉ puruda, idji ẽberãrã duanʉmaa auɗu jũrã edaɗia. Baribʉrʉ Ãcõrẽba uruada bajãneba ɓaebiya. Maʉ̃ba ãdjirãra jũma bá quenaya.
10 Mãwãnacarea Ãcõrẽba diaurura ẽberãrã cũrũga eroɓaɗada tʉbʉ urua azupre bara uruga nũmʉne ɓatabueya. Naẽna Ãcõrẽba animarã minijĩchia ɓʉda, Ãcõrẽneba beɗeabari dji wãrãẽ́ siɗa maʉ̃ tʉbʉ uruaɗe ɓatabuesia. Mama ãdjira, diauru siɗa ewariza ãsa, diamasi biɗa bio bia mĩga panania.
Ãcõrẽba bugue waiɓʉa torroa ɓʉɗeba cawa oi
11 Mãwãnacarea mʉ̃a bugue waiɓʉa torroa ɓʉda unusia. Maʉ̃ bugueɗe chũmʉ siɗa unusia. Idji quĩrãpita jũma naʉ̃ ẽjũãra, bajã siɗa nẽbasiɗaa. Ni aɓaʉba waa ununaẽ́ basía.
12 Idjaɓa mʉ̃a unusia beupeɗaɗarã dji dromarãda, dji eɗaara queɗea siɗa Ãcõrẽ quĩrãpita duanʉda. Maʉ̃ne cartada ewaracuasia. Maʉ̃ cartaɗe jũma ẽberãrãba opeɗaɗada ɓʉ́ ɓeasia. Dewara carta siɗa ewarasia. Maʉ̃ cartaɗe ewariza zocai ɓeaɗi ẽberãrã trʉ̃da ɓʉ́ ɓeasia. Jũma beupeɗaɗara Ãcõrẽba cawa osia ãdjirãba opeɗaɗa quĩrãca. Jũma ãdjia opeɗaɗara cartaɗe ɓʉ́ ɓasia.
13 Jũma pusaɗe beupeɗaɗara Ãcõrẽ quĩrãpita zesiɗaa. Aɓeɗa jũma beupeɗaɗa jaurera ãdji panabadamaʉba Ãcõrẽ quĩrãpita zesiɗaa.* Maʉ̃be Ãcõrẽba ãdjiza cawa osia ãdjia opeɗaɗa quĩrãca.
14 Beuɗira Ãcõrẽba jõbisia tʉbʉ uruaɗe ɓatabuebʉrʉ quĩrãca. Beupeɗaɗa panabada ẽjũã siɗa tʉbʉ uruaɗe ɓatabuesia. Ãcõrẽba bariduada tʉbʉ uruaɗe ɓatabueibʉrʉ, ɓarima umé beusiaɗa abadaa.
15 Ẽberãrã ewariza zocai ɓeaɗi cartaɗe trʉ̃ ɓʉẽ́ ɓeara Ãcõrẽba tʉbʉ uruaɗe ɓatabuesia.
