Apocalipsi 22:1-21
22 22:1-2 Mãwãnacarea bajãnebema nezocaba do pãpãrã quiruda mʉ̃́a unubisia. Ẽsã querasia vidrio quĩrãca. Maʉ̃ baidoba zocai ɓaida diabaria. Ãcõrẽ idjaɓa Oveja Zaque bugue biya quiruɗeba maʉ̃ dora puruɗebema o jeɗea ɓʉ ẽsi wea ɓʉa. Do orroza bacuru nejõ zocai ɓai diabarida ɓasia. Maʉ̃ bacurura jeɗecoza zaubaria. Maʉ̃ba jara ɓʉa poaza ɓarima doce zaubarida. Maʉ̃ bacuru queduada ɓʉa druazabemarã cacua bia pananamãrẽã.
2 –
3 Ãcõrẽba biẽ́ ɓai jaraɗada maʉ̃ puruɗe neẽ́ baya. Ãcõrẽ idjaɓa Oveja Zaque bugue biya quirura maʉ̃ puruɗe ɓaya. Mama Ãcõrẽ nezocarãba idjía bia beɗeaɗia.
4 Idji quĩrãra ununia idjaɓa idji trʉ̃ra ãdjirã dratuɗe ɓʉ́ eroɓeaɗia.
5 Diamasira neẽ́ baya. Dadji Boro Ãcõrẽba ʉ̃naada diai bẽrã, ĩbĩrã neẽ́ idjaɓa ʉ̃mãdau neẽ́ biɗa ẽberãrãra bia ɓeaɗia. Ewariza ãdjirãra idji ume ãbaa dji bororãda ɓeaɗia.
Crito dãrãẽ́ne zeiɗebema
6 Maʉ̃be bajãnebema nezocaba mʉ̃́a jarasia: “Jũma naʉ̃ beɗeara wãrãa idjaɓa wãrãda mãwãya. Dadjirã Boro Ãcõrẽba idjiɗeba beɗeabadarãa beɗeabibaria. Idjiabʉrʉ bajãnebema nezocada diabuesia idji nezocarãa cawabimãrẽã dãrãẽ́ne cãrẽda sãwãida.”
7 Jesuba jarasia: “¡Ũrĩnadua, mʉ̃ra isabe zeya! Naʉ̃ cartaɗe ɓʉ́ ɓʉa dãrãẽ́ne cãrẽda sãwãida. Bio bia ɓʉa jũma naʉ̃ cartaɗe jara ɓʉ ĩjã ɓʉra.”
8 Mʉ̃ra Juaʉ̃a. Jũma maʉ̃gʉra unusia idjaɓa ũrĩsia. Mãwãnacarea mʉ̃ra bajãnebema nezoca jĩrũ caita chĩrãne ɓarru coɓesia bia beɗeai carea. Mãwã osia idjia jũma maʉ̃gʉra unubiɗa bẽrã.
9 Baribʉrʉ idjia jarasia: “Jãwã orãdua, ãtebʉrʉ Ãcõrẽabʉrʉ bia beɗeadua. Mʉ̃ra Ãcõrẽ nezocada jãwã quirua bʉ quĩrãca, djabarã Ãcõrẽneba beɗeabadarã quĩrãca, idjaɓa jũma naʉ̃ cartaɗe jara ɓʉ ĩjã ɓea quĩrãca.”
10 Idjaɓa jarasia: “Naʉ̃ cartaɗe ɓʉ́ ɓʉa dãrãẽ́ne cãrẽda sãwãida. Maʉ̃ra mẽrã eroɓarãdua jũma dãrãẽ́ne mãwãi bẽrã.
11 Cadjirua o ɓʉra idji cawa cadjiruaɗe ɓadua. Ne jũma Ãcõrẽba quĩrĩãca o ɓʉra idji cawa maʉ̃ne ɓadua. Baribʉrʉ jipa o ɓʉba ewariza jipa o ɓaida ɓʉa. Idjaɓa Ãcõrẽ itea bia ɓʉra ewariza Ãcõrẽ itea bia ɓaida ɓʉa.”
12 Jesuba jarasia: “¡Ũrĩnadua, mʉ̃ra isabe zeya! Zebʉrʉɗe mʉ̃a jũmarãa ne diai carea eneya ãdjia opeɗaɗa quĩrãca.
13 Mʉ̃ra dji Alpaa idjaɓa dji Omegaa.* Maʉ̃ba jara ɓʉa mʉ̃ra dji naãrãbemada idjaɓa dji jĩrũarebemada.
14 Bio bia ɓeaa cacuaɗe jʉ̃bada tãto eroɓeara. Ãdjirãra puruɗe eɗa wãnida panʉa nejõ zocai ɓai diabarida jõni carea.
15 Baribʉrʉ cadjirua obadara, jãĩbanara, auɗua obadara, mĩã beabadara, jʉwaba oɗa ãcõrẽ ẽpẽbadara, idjaɓa sewa oya ɓeara jũma dajadaare duanenia.*
16 Mʉ̃ra Jesua. Bajãnebema nezocada diabuesia jũma maʉ̃gʉra djabarã ɓeaza jaramãrẽã. Mʉ̃ra Daviɗeba zeɗaa, idjiɗeba tununaa.* Mʉ̃ra Diapeɗabema Chĩdau Uruga Ɓʉ abadaa.”
17 Ãcõrẽ Jaureba, Oveja Zaque quima abada biɗa nãwã jara panʉa: “¡Zedua!” Maʉ̃ ũrĩ ɓʉba jaraida ɓʉa: “¡Zedua!” Dji opichia ɓʉra zeida ɓʉa baido zocai ɓai diabarida domãrẽã. Maʉ̃ baido do quĩrĩã ɓʉba bari doida ɓʉa.
18 22:18-19 Naʉ̃ cartaɗe ɓʉ́ ɓʉa dãrãẽ́ne cãrẽda sãwãida. Naʉ̃ cartaɗe ɓʉ́ ɓʉ ũrĩ ɓearãa mʉ̃a jaraya: bariduaba naʉ̃ cartaɗe ɓʉ́ ɓʉda auɗu jaraibʉrʉ, Ãcõrẽba naʉ̃ cartaɗe bia mĩgai jara ɓʉba idjira bia mĩgabiya. Idjaɓa bariduaba naʉ̃ cartaɗe ɓʉ́ ɓʉda maãrĩ awara jaraibʉrʉ, Ãcõrẽba idjía nejõ zocai ɓai diabariɗebemada idu jõbiẽ́a idjaɓa Ãcõrẽ puruɗe eɗa idu wãbiẽ́a. Maʉ̃ nejõnebemada, maʉ̃ puruɗebema siɗa naʉ̃ cartaɗe ɓʉ́ ɓʉa.
20 Jũma naʉ̃ cartaɗe ɓʉ́ ɓʉda Jesuba wãrãana a ɓʉa. Nãwã jara ɓʉa: “¡Wãrãda mʉ̃ra isabe zeya!”
Bia ɓʉa isabe zeida.* ¡Zedua dairã Boro Jesu!
21 Mʉ̃a quĩrĩã ɓʉa dadjirã Boro Jesuba idji biaɗeba jũma bãrãra careba ɓaida.
