Apocalipsi 3:1-22
3 “Djabarã Sardi puruɗebema wagabari bajãnebema nezoca itea cartaɗe nãwã ɓʉdua:
Ãcõrẽ quĩrãpita jaureda siete panʉa.* Ãdji zocabariba chĩdauda idji jʉwaɗe siete eroɓʉa. Idjia nãwã jara ɓʉa:
Bãrãba o panʉra mʉ̃a cawa ɓʉa. Ẽberãrãba jara panʉa bãrãba Ãcõrẽra bio ĩjã panʉ bẽrã zocai ɓeada. Baribʉrʉ wãrã arada bãrãba Ãcõrẽra ĩjãnaẽ́ panʉ bẽrã dji beuɗarãa.
2 ¡Quĩrãcuitaɗadua! Mʉ̃a unu ɓʉa bãrãba o panʉra Ãcõrẽ quĩrãpita jipa ɓʉẽ́da. Bãrãba bia o panʉra jũma idu ɓʉboɗoɗaa. Baribʉrʉ maʉ̃gʉra wayacusa bia ẽpẽnadua.
3 Wãrã beɗea bãrãba ũrĩpeɗaɗara quĩrãnebaɗadua. Maʉ̃gʉra bio ĩjãnadua. Cadjiruada igaraɗapeɗa Ãcõrẽmaa zeɗadua. Bãrãra quĩrãcuita ɓeaɗaẽ́bʉrʉ, ne drʉabari quĩrãca mʉ̃ra cawaẽ́ne zeya bãrã cawa oi carea.
4 Baribʉrʉ bãrã Sardiɗebemarã zocãrãẽ́be cadjiruaɗe nĩnaẽ́a bãrãba cacuaɗe jʉ̃ panʉra mititiabiɗaẽ́ panʉ quĩrãca. Bãrãdrʉ mʉ̃ ume ãbaa nĩbaɗi carea bia panʉ bẽrã totroa quiru jʉ̃ panʉda mʉ̃ ume ãbaa nĩbaɗia.
5 Cadjirua poyapeɗaɗaba ara maʉ̃ quĩrãca totroa quiruda jʉ̃nia. Ãdji trʉ̃ra ewariza zocai ɓeaɗi cartaɗe eɗa ɓʉ́ ɓea bẽrã mʉ̃a ãyã ɓʉẽ́a. Ãtebʉrʉ mʉ̃ Zeza quĩrãpita, idji nezocarã bajãnebema quĩrãpita biɗa ãdjirãra mʉ̃reana aya.
6 Dji cʉwʉrʉ bara ɓʉba ũrĩdua Ãcõrẽ Jaureba djabarãa jara ɓʉra.”
Critoba djabarã Piladelpia puruɗebema itea ɓʉbiɗa
7 “Djabarã Piladelpia puruɗebema wagabari bajãnebema nezoca itea cartaɗe nãwã ɓʉdua:
Ãcõrẽ quĩrãpita Bio Biya Quirura, Wãrãda Beɗea Aɓa Ɓʉra Davi puru boroa.* Idjia ewabʉrʉra ni aɓaʉba poya jũãtrʉ ɓʉɗaẽ́a. Idjia jũãtrʉ ɓʉbʉrʉra ni aɓaʉba poya ewaɗaẽ́a.
8 Idjia nãwã jara ɓʉa:
Bãrãba o panʉra mʉ̃a cawa ɓʉa. ¡Ũrĩnadua! Eɗa wãbadada mʉ̃a bãrã na ewa nũmʉsia. Maʉ̃gʉra ni aɓaʉba poya jũãtrʉ ɓʉɗaẽ́a. Bãrãra mãcua ʉɓʉaẽ́ panʉmĩna mʉ̃ beɗeara bio ĩjã panʉa. Mʉ̃ra igaraɗaẽ́ panʉa.
9 ¡Ũrĩnadua! Bãrã jĩrũ caita mʉ̃a diauru ẽberãrãda chĩrãboroɗe copanebiya.* Maʉ̃ne ãdjirãba cawaɗia mʉ̃a bãrãra quĩrĩã ɓʉda. Ãdjirãra Ãcõrẽ ẽberãrãana abadamĩna wãrãẽ́a.* Ãdjirãra sewaiɗa ɓeaa.
10 Bãrã mʉ̃ carea bia mĩga panʉra jũma droa panʉa mʉ̃a jaraɗa quĩrãca. Maʉ̃ bẽrã naʉ̃ ẽjũãnebemarã bia mĩgaɗi ewari zebʉrʉɗe mʉ̃a bãrãra wagaya. Maʉ̃ ewariɗe mʉ̃a jũma naʉ̃ ẽjũãne ɓeara bia mĩgabiya sãwã oɗi cawaya.
11 Mʉ̃ra dãrãẽ́ne zeya. Maʉ̃ bẽrã bãrãba iɗi ĩjã panʉ quĩrãca ĩjã pananadua. Mãwã ni aɓaʉba bãrã nepeda jãrĩnaẽ́a.
12 Cadjirua poyapeɗaɗara mʉ̃ Ãcõrẽ deɗebema de jĩrũ quĩrãca ɓʉya. Mãwã idji deɗebemada ãyã wãnaca baya. Ãdji dratuɗe mʉ̃ Ãcõrẽ trʉ̃da ɓʉya idjiɗerãda cawabi carea. Idjaɓa mʉ̃ Ãcõrẽ puru trʉ̃ Jerusaleʉ̃ Djiwiɗi abada siɗa ãdji dratuɗe ɓʉya maʉ̃ puruɗebemada cawabi carea. Maʉ̃ purura bajãneba mʉ̃ Ãcõrẽ ɓʉmaʉba zeya. Idjaɓa ãdji dratuɗe mʉ̃ trʉ̃ djiwiɗida ɓʉya mʉ̃reda cawabi carea.
13 Dji cʉwʉrʉ bara ɓʉba ũrĩdua Ãcõrẽ Jaureba djabarãa jara ɓʉra.”
Critoba djabarã Laodicea puruɗebema itea ɓʉbiɗa
14 “Djabarã Laodicea puruɗebema wagabari bajãnebema nezoca itea cartaɗe nãwã ɓʉdua:
Wãrã Beɗea trʉ̃ jarabadaba Ãcõrẽnebemada wãrãda jũma ariɗe jarabaria.* Idjiɗeba Ãcõrẽba ne jũmada osia.* Idjia nãwã jara ɓʉa:
15 Bãrãba o panʉra mʉ̃a cawa ɓʉa. Mʉ̃ra igaraɗaẽ́ panʉa baribʉrʉ soɗeba ẽpẽnaẽ́ panʉa. Mãwã bãrãra baido cũrãsa quĩrãca panʉẽ́a ni baido jʉ̃wʉ̃rʉ̃ã quĩrãca panʉẽ́a. Soɗeba wãrãda ẽpẽnaẽ́bʉrʉ, mʉ̃maarã biara ɓacasia mʉ̃ra aɓeɗa ẽpẽnaẽ́da.
16 Baribʉrʉ baido jʉ̃wʉ̃rʉ̃ãjʉ̃wʉ̃rʉ̃ã ɓʉ quĩrãca panʉa; mʉ̃ra igaraɗaẽ́ panʉmĩna soɗeba wãrãda ẽpẽnaẽ́ panʉa. Maʉ̃ bẽrã mʉ̃a bãrãra igaraya baido jʉ̃wʉ̃rʉ̃ãjʉ̃wʉ̃rʉ̃ã ɓʉ mʉ̃ iteɗeba webʉrʉ quĩrãca.
17 Bãrãba jara panʉa ne jũma eropanʉda, ne jũmada edasiɗada. Bãrãba edaɗida panʉra waa neẽ́ana a panʉa. Baribʉrʉ adua panʉa mĩã djuburi panʉda, biẽ́ panʉda, ne neẽ́ panʉda, dauɓerrea panʉda, idjaɓa ãcaɗa panʉda.
18 Maʉ̃ bẽrã mʉ̃a bãrãa crĩcha biada diaya: oro tʉbʉɗe dorraɓariɗa idji awa quiruda mʉ̃neba nẽdoɗadua. Mãwã bãrãra wãrã arada ne bara ɓeaɗia. Idjaɓa wua totroa quiruda mʉ̃neba nẽdoɗadua jʉ̃ni carea. Mãwã bãrã ãcaɗa panana carea quĩrã peraɗaẽ́a. Idjaɓa dau tada mʉ̃neba nẽdoɗadua bãrã dauɗe taɗapeɗa bia ununi carea.
19 Mʉ̃a quĩrĩã ɓʉ ẽberãrãra quẽãbaria idjaɓa ubaria mʉ̃ beɗea ĩjã oɗamãrẽã. Maʉ̃ bẽrã wayacusa mʉ̃maa zeɗapeɗa soɗeba wãrãda ẽpẽ pananadua.
20 ¡Ũrĩnadua! Mʉ̃ra deɗe eɗa wãbadama ɓʉa. Dajadaareba trʉ̃ ɓʉa bãrãba ewaɗapeɗa mʉ̃ra idu eɗa wãbiɗamãrẽã. Bariduaba mʉ̃ beɗeada ũrĩpeɗa dji eɗa wãbadara ewaibʉrʉ, mʉ̃ra eɗa wãpeɗa idji ume ne coya.
21 Mʉ̃a cadjiruara poyaɗa bẽrã mʉ̃ Zeza ume idji bugue biya quiruɗe chũmesia. Ara maʉ̃ quĩrãca cadjirua poyapeɗaɗara mʉ̃ bugue biya quiruɗe mʉ̃ ume chũmebiya.
22 Dji cʉwʉrʉ bara ɓʉba ũrĩdua Ãcõrẽ Jaureba djabarãa jara ɓʉra.”
Beɗea eɗaare
^ 3:1. Ʉ̃cʉrʉmaarã maʉ̃ siete jaure panʉba jara ɓʉa Ãcõrẽ Jaureda. Idjaɓa ʉ̃cʉrʉmaarã jara ɓʉa bajãnebema nezocarã dji dromada.
^ 3:7. Davi puru. Maʉ̃ba jara ɓʉa “Ãcõrẽ puru.” Puru boroa. Griego beɗeaɗe nãwã ɓʉ́ ɓʉa: “Idjia Davi yavera eroɓʉa.” Ãdji tãẽna dji yave eroɓʉra puru boroa.
^ 3:9. Diauru ẽberãrã. Griego beɗeaɗe ɓʉ́ ɓʉa: “Diauru ume dji jʉrebada deɗebemarãa.”
^ 3:9. Ãcõrẽ ẽberãrã. Griego beɗeaɗe ɓʉ́ ɓʉa “judiorã.”
^ 3:14. Wãrã beɗea. Griego beɗeaɗe ɓʉ́ ɓʉa: “Amén.”
^ 3:14. Griego beɗeaɗe maʉ̃ba idjaɓa nãwã jara ɓʉa: “Idjira ne jũma Ãcõrẽba oɗa Boroa.”
