Apocalipsi 4:1-11
4 Mãwãnacarea wayacusa cãĩmocara quĩrãca mʉ̃a unusia bajãne eɗa wãbadada ewa nũmʉda. Maʉ̃ne mʉ̃a naãrã ũrĩna cachiru jĩgua quĩrãca beɗea ɓʉba jarasia: “Nama ʉ̃taa zedua. Mʉ̃a cawabiya nocoarebema ewariɗe cãrẽda sãwãida.”
2 Ara maʉ̃da mʉ̃ra Ãcõrẽ Jaureɗeba ɓesia. Maʉ̃ne mʉ̃a unusia bugue biya quiru bajãne ɓʉda. Maʉ̃ bugueɗe aɓa chũmasia.
3 Maʉ̃ bugueɗe chũmʉra urua ɓasia jaspe mõgara quĩrãca idjaɓa cornalina mõgara urua ɓabari quĩrãca. Eumada maʉ̃ bugue biya quiru auɗu jũrã ɓasia. Maʉ̃ eumara esmeralda mõgara quĩrãca urua ɓasia.
4 Bugue biya quiru auɗu veinticuatro bugue biya queɗeaba jũrã ɓasia. Maʉ̃ bugue biya queɗeaɗe veinticuatro drõãrãda chũpanasiɗaa. Ãdjia cacuaɗe jʉ̃ panʉra totroa querasia. Idjaɓa oro oɗa nepeda jʉ̃ panasiɗaa.
5 Maʉ̃ne Ãcõrẽ bugue biya quiru ẽsi ɓʉɗeba baada purewa eda nũmabadjia, jururua nũmabadjia, dji cãbãyã ɓae nũmabadjia. Maʉ̃ bugue quĩrãpita ĩbĩrãda siete urua nũpanasiɗaa. Siete jaure Ãcõrẽ quĩrãpita ɓeada mãwã panʉa.
6 Maʉ̃ bugue quĩrãpe pusa pãpãrã ɓʉ quĩrãca ɓasia. Maʉ̃ra vidrio ẽsã quiru quĩrãca ɓasia. Bugue jʉwa araare, jʉwa acʉare, jẽdaare, nocoare biɗa animarã zaca zocai ɓeada quĩmãrẽ panasiɗaa. Ãdjirãra jãare, ẽcarraare biɗa dauba bira panasiɗaa.
7 Aɓa imama zaca ɓasia. Aɓa paca zaca ɓasia. Aɓa dji quĩrãdarrara ẽberã quĩrãca ɓasia. Idjaɓa aɓa nejõbʉ waiɓʉa wãɓari ɓʉ zaca ɓasia.
8 Maʉ̃ quĩmãrẽbema zocai panʉba ida sei eropanasiɗaa. Ãdji cacuara jũma dauba bira panasiɗaa. I edre biɗa dauba bira panasiɗaa. Ãsa, diamasi biɗa ãdjirãba ʉ̃nãũnaẽ́ nãwã jarabadaa:
Bio bia quirua, bio bia quirua, bio bia quirua dadjirã Boro Ãcõrẽra.
Idjia jũma poya o ɓʉa. Idjira ɓasia, iɗi ɓʉa, idjaɓa ewariza ɓaya.
9 4:9-10 Ãcõrẽ ewariza zocai ɓʉra idji bugue biya quiruɗe chũmabaria. Maʉ̃ne dji animarã zaca zocai ɓeaba idjía bio bia quiruaɗa abadaa, bia beɗeabadaa, idjaɓa bia ɓʉaɗa abadaa. Mãwã jarabʉdaza veinticuatro drõãrãda Ãcõrẽ ewariza zocai ɓʉ quĩrãpita chĩrãboroɗe copanenapeɗa bia beɗeabadaa. Maʉ̃be ãdji nepeda dji bugueɗe chũmʉ quĩrãpita ɓʉɗapeɗa nãwã jarabadaa:
11 Dairã Boro Ãcõrẽ, bʉdrʉ bia ɓʉa jũmarãba bio biya quiruaɗa aɗida, wayaɗida, idjaɓa bʉa jũma poya eroɓaida bia ɓʉaɗa aɗida.
Bʉa ne jũmada oɗa bẽrã bia ɓʉa jũmarãba mãwã jaraɗida.
Wãrãda bʉa quĩrĩãna bẽrã ne jũmada osia idjaɓa ne jũmada bʉɗeba ɓʉa.
