Apocalipsi 5:1-14
5 Maʉ̃be mʉ̃a unusia bugue biya quiruɗe chũmʉba carta tuyaɗada jʉwa araare eroɓʉda. Maʉ̃ cartara quĩrã umena ɓʉ́ ɓasia. Dji quĩrã tẽũne siete ceraba cara panasiɗaa ni aɓaʉba ewararãnamãrẽã.
2 Maʉ̃ne mʉ̃a bajãnebema nezoca dji dromada unusia. Idjia jĩgua iwiɗisia: “¿Caida bia ɓʉ naʉ̃ cartaɗe cara ɓeara oguecuapeɗa ewarai carea?”
3 Baribʉrʉ ni aɓaʉda bia ɓaẽ́ basía maʉ̃ carta ewarapeɗa acʉi carea. Bajãne, naʉ̃ ẽjũãne, beuɗarã panabadama biɗa neẽ́ basía.*
4 Maʉ̃ne mʉ̃ra dji quĩãne jĩã ɓesia ẽberã biada neẽ́ baɗa bẽrã maʉ̃ carta ewarapeɗa acʉi carea.
5 Baribʉrʉ veinticuatro drõãrãnebema aɓaʉba mʉ̃́a nãwã jarasia: “Waa jĩãrãdua. Acʉdua, Juda ẽberãrãnebema Imama abadaba idji ume dji quĩrũda poyasia. Idjira Daviɗeba zeɗaa. Idjiabʉrʉ naʉ̃ cartaɗe siete cara ɓeara oguecuapeɗa ewaraida ɓʉa.”
6 Maʉ̃ne Ãcõrẽ bugue biya quiru caita, animarã zaca zocai ɓea quĩmãrẽ panʉ caita, idjaɓa veinticuatro drõãrã panʉ ẽsi mʉ̃a Oveja Zaqueda ʉ̃ta nũmʉda unusia. Idjira beapeɗaɗa quĩrãca ɓasia. Idjia cachuda siete eroɓasia. Dau siɗa siete eroɓasia. Maʉ̃ siete dauba jara ɓʉa Ãcõrẽ quĩrãpita siete jaure panʉda. Maʉ̃gʉrãra Ãcõrẽba jũma naʉ̃ ẽjũãne diabuebaria.
7 Maʉ̃ne Oveja Zaquera bugue biya quiruɗe chũmʉmaa wãpeɗa carta idji jʉwa araare eroɓʉra edasia.
8 Maʉ̃ carta edaɗacarea animarã zaca zocai ɓea quĩmãrẽ panʉra idjaɓa veinticuatro drõãrã siɗa idji quĩrãpita chĩrãboroɗe copanesiɗaa. Jũma ãdjirãba arpada, epeɗeco jũgurua siɗa eropanasiɗaa. Maʉ̃ epeɗeco jũguruara incienso queraba bira ɓeasia. Maʉ̃ incienso queraba jara ɓʉa Ãcõrẽ ẽberãrãba idjía iwiɗibʉdada.
9 Veinticuatro drõãrãba, animarã zaca zocai ɓea quĩmãrẽ panʉ biɗa naʉ̃ trʉ̃ãbi djiwiɗida trʉ̃ãsiɗaa:
Bʉra beapeɗaɗa bẽrã bʉdrʉ bia ɓʉa maʉ̃ carta edapeɗa dji cara ɓeara oguecuaida.
Bʉ oa erozoaɗaba ẽberãrãda Ãcõrẽ itea nẽdosia.
Beɗeazabemada, puruzabemada, jũma druazabema siɗa ʉ̃cʉrʉ nẽdosia.
10 Bʉa ãdjirãra ɓʉsia dadji Ãcõrẽ puruɗe sacerdoterãda ɓeaɗamãrẽã.
Idjaɓa naʉ̃ ẽjũãne dji bororãda ɓeaɗia.
11 Maʉ̃be mʉ̃a acʉbʉrʉɗe bajãnebema nezocarãda trʉ̃ã duanʉda unusia. Maʉ̃gʉrãra zocãrã panʉ bẽrã mʉ̃a poya juachaẽ́ basía.* Ãdjirãra Ãcõrẽ bugue biya quiru, dji animarã zaca zocai ɓea, idjaɓa veinticuatro drõãrã auɗu jũrã panasiɗaa.
12 Nãwã jĩgua trʉ̃ã panasiɗaa:
¡Oveja Zaque beapeɗaɗada bio bia ɓʉa!
Jũmarãba idjía bia beɗeaɗida panʉa ne jũma poya eroɓʉ bẽrã, ne jũmada eroɓʉ bẽrã, jũma cawa ɓʉ bẽrã idjaɓa bio ʉɓʉa ɓʉ bẽrã.
Idjidrʉ dji dromaara ɓʉaɗa aɗida panʉa idjaɓa bio bia quiruaɗa aɗida panʉa.
13 Maʉ̃ne mʉ̃a ũrĩsia jũma Ãcõrẽba oɗa bajãne ɓeaba, naʉ̃ ẽjũãne ɓeaba, beuɗarã jaureba, pusaɗe ɓea biɗa nãwã trʉ̃ã duanʉda:*
Jũmarãba dji bugue biya quiruɗe chũmʉ́a, Oveja Zaquea biɗa ewariza bia beɗeaɗida panʉa.
Ãdjida dji dromaana aɗida panʉa, bio bia quiruaɗa aɗida panʉa, idjaɓa ãdjia jũma poya eropananida bia ɓʉaɗa aɗida panʉa.
14 Maʉ̃be animarã zaca zocai ɓea quĩmãrẽ panʉba nãwã jarasiɗaa: “Bia ɓʉa mãwã ɓaida.” Ara maʉ̃da veinticuatro drõãrãda chĩrãboroɗe copanenapeɗa dji ewariza zocai ɓʉ́a bia beɗeasiɗaa.*
Beɗea eɗaare
^ 5:3. Beuɗarã panabadama. Griego beɗeaɗe ɓʉ́ ɓʉa: “Naʉ̃ ẽjũã edre.”
^ 5:11. Zocãrã. Griego beɗeaɗe ɓʉ́ ɓʉa “diez miles de diez miles, y miles de miles.” Cãpũrĩã beɗeaɗe jara ɓʉa “millones de millones.”
^ 5:13. Beuɗarã jaureba. Griego beɗeaɗe ɓʉ́ ɓʉa: “Naʉ̃ ẽjũã edrecare ɓeaba.”
^ 5:14. Dji ewariza zocai ɓʉá. Griego beɗeaɗe ʉ̃cʉrʉ cartaɗe maʉ̃ra neẽ́a.
