Apocalipsi 6:1-17
6 Maʉ̃be mʉ̃a unusia Oveja Zaqueba cartaɗe cara ɓeada aɓa ogabʉrʉda. Idjaɓa ũrĩsia animarã zaca zocai ɓea quĩmãrẽ panʉnebema aɓaʉba nãwã jara ɓʉda: “Acʉɗe zedua.” Idji beɗeara baa jĩguabʉrʉ quĩrãca ɓasia.
2 Araa acʉɗe wãsiɗe cawayo torroda unusia. Maʉ̃ cawayo ʉ̃rʉ̃ chũmʉba idji jʉwaɗe enedrʉmada eroɓasia. Aɓaʉba idjía nepeda diasia. Ara maʉ̃da ʉ̃cʉrʉ poyapeɗa dewararã poyai carea wãsia.
3 Mãwãnacarea Oveja Zaqueba wayacusa cartaɗe cara ɓeada aɓa ogabʉrʉɗe mʉ̃a ũrĩsia dewarabema animarã zaca zocai ɓʉba nãwã jara ɓʉda: “Acʉɗe zedua.”
4 Araa acʉɗe wãsiɗe cawaẽ́ne cawayo purea ɓʉda odjasia. Aɓaʉba maʉ̃ cawayo ʉ̃rʉ̃ chũmʉ́a djõbada neco waiɓʉada diasia. Ãcõrẽba idjía idu ãrĩbisia ẽberãrã naʉ̃ ẽjũãne ãbaa necai duanʉda, mãwã djõ duanʉba dji quena duananamãrẽã.
5 Mãwãnacarea Oveja Zaqueba wayacusa cartaɗe cara ɓeada aɓa ogabʉrʉɗe mʉ̃a ũrĩsia dewarabema animarã zaca zocai ɓʉba nãwã jara ɓʉda: “Acʉɗe zedua.” Araa acʉɗe wãsiɗe mʉ̃a cawayo pãĩmada unusia. Maʉ̃ cawayo ʉ̃rʉ̃ chũmʉba ne zʉgʉa zabadada idji jʉwaɗe eroɓasia.
6 Maʉ̃ne mʉ̃a ũrĩsia animarã zaca zocai ɓea ẽsi aɓa beɗea ɓʉda. Maʉ̃ba dji cawayo ʉ̃rʉ̃ chũmʉ́a nãwã jarasia: “Trigoda idu bia zaubirãdua. Mãwã trigo libra ume nẽdoi carea ẽberãda ewari aɓa trajaida ɓʉa. Cebada siɗa idu bia zaubirãdua. Mãwã cebada sei libra nẽdoi carea ẽberãda ewari aɓa trajaida ɓʉa. Baribʉrʉ nedraga diabarida, uva siɗa idu bia zaubidua nedragada, uva ɓa siɗa baramãrẽã.”
7 Mãwãnacarea Oveja Zaqueba wayacusa cartaɗe cara ɓeada aɓa ogabʉrʉɗe mʉ̃a ũrĩsia dewarabema animarã zaca zocai ɓʉba nãwã jara ɓʉda: “Acʉɗe zedua.”
8 Araa acʉɗe wãsiɗe mʉ̃a unusia cawayo cuaracuara ɓʉda. Maʉ̃ cawayo ʉ̃rʉ̃ chũmʉ trʉ̃ra “Beuiɗebema” abadaa. Idji caiɗu aɓa nĩbabadjia “Beuɗarã panabada ẽjũã” abadada.* Jũma naʉ̃ ẽjũãne ẽberãrã quĩmãrẽ ɓeaza Ãcõrẽba ãdjía aɓa idu beabisia. Maʉ̃ ẽberãrãra beasiɗaa djõ duanʉba, jarrababa, cacua biẽ́ duanʉba, idjaɓa animarã naʉ̃ ẽjũãnebema minijĩchia ɓea biɗa.
9 Mãwãnacarea Oveja Zaqueba wayacusa cartaɗe cara ɓeada aɓa ogabʉrʉɗe mʉ̃a unusia Ãcõrẽ beɗea jaradia panʉ carea beapeɗaɗarã jaureda. Ãdjirãra bajãne Ãcõrẽa ne babue diabada edrecare duanasiɗaa.
10 Nãwã jĩgua jarasiɗaa: “Jũmarã Boro, bʉra bio bia quirua idjaɓa wãrãda beɗea aɓa ɓʉa. ¿Bʉa sãʉ̃be duɗabemarãra cawa oi dairã beapeɗaɗa carea?”
11 Ãcõrẽba ãdjiza wua torroda jʉ̃namãrẽã diasia. Maʉ̃be nãwã panusia: “Waɗi necai jʉ̃ãnadua aɓa ẽberãrãba bãrã beapeɗaɗa quĩrãca bãrã djabarã Crito nezocarãda jũma daucha beabʉdaɗaa.”
12 Mãwãnacarea Oveja Zaqueba wayacusa cartaɗe cara ɓeada aɓa ogabʉrʉda mʉ̃a acʉ ɓasia. Maʉ̃ne de uremiada dji cãbãyã uresia. Sopua carea jʉ̃bada pãĩma ɓʉ quĩrãca ʉ̃mãdaura pãĩmasia. Jeɗecora oa quĩrãca jũma pureasia.
13 Nãũrã dji cãbãyã puábʉrʉɗe nejõ dji ca jurrubari quĩrãca chĩdaura bajãneba egoroɗaa jurrusia.
14 Bajãra carta bʉratʉbʉrʉ quĩrãca nẽbasia. Jũma eyara, pusaɗe ɓea morro siɗa naãrã ɓeaɗama panenaẽ́ basía.
15 Maʉ̃be naʉ̃ ẽjũãnebema bororãda, ãdjiarebemada, zarrarã bororãda, ne bara ɓeada, naʉ̃ ẽjũãne dji dromarãda, nezoca ɓeada, nezocaẽ́ ɓea siɗa eya uriaɗe idjaɓa eyaɗe mõgara coɓeaɗe mĩrũcuasiɗaa.
16 Ãdjirãba nãwã jarasiɗaa: “Eya, mõgara, dai ʉ̃rʉ̃ ɓaeɗadua. Daida mẽrãnadua jãʉ̃ bugue biya quiruɗe chũmʉ quĩrãpitabemada idjaɓa Oveja Zaqueba cawa oiɗebemada.
17 Ãdjia cawa oɗi ewari dromada jũẽsia. ¿Caiba maʉ̃gʉra droai?”
Beɗea eɗaare
^ 6:8. Beuɗarã panabada ẽjũã. Griego beɗeaɗe ɓʉ́ ɓʉa “Hades.”
