Apocalipsi 7:1-17
7 Mãwãnacarea mʉ̃a bajãnebema nezocarãda quĩmãrẽ unusia. Ãdjira naʉ̃ ẽjũã iquiɗaza nũmeasia. Ãdjia nãũrãda ni aɓaʉareba naʉ̃ ẽjũãne, pusaɗe, ni aɓaʉ bacurumaa biɗa idu puabiɗaẽ́ basía.
2 7:2-3 Maʉ̃ne mʉ̃a unusia dewara nezoca bajãnebemada ʉ̃mãdau odjabariareba zebʉrʉda. Maʉ̃gʉba dji zocai ɓʉ Ãcõrẽ sẽyã ɓʉbarida eroɓasia. Idjia bajãnebema nezocarã quĩmãrẽ panʉ́a nãwã jĩgua jarasia: “Naʉ̃ ẽjũãra, pusara, bacuru siɗa ãrĩrãnadua aɓa daiba Ãcõrẽ sẽyãra idji nezocarã dratuɗe jũma ɓʉbʉdaɗaa.” Mãwã jarasia Ãcõrẽba ʉɓʉada bajãnebema nezocarã quĩmãrẽ panʉ́a diaɗa bẽrã naʉ̃ ẽjũãra, pusa siɗa ãrĩnamãrẽã.
3 –
4 Maʉ̃ne mʉ̃a ũrĩsia Ãcõrẽ sẽyã eroɓeara jũmasãwã panʉda. 144 mil panasiɗaa. Jũma ãdjirãra Israel ẽberãrãnebema basía.
5 Israel warra Judaɗeba yõpeɗaɗada doce mil panasiɗaa. Rubeʉ̃neba yõpeɗaɗada doce mil panasiɗaa. Gaɗeba yõpeɗaɗada doce mil panasiɗaa.
6 Aserɗeba yõpeɗaɗada doce mil panasiɗaa. Neptaliɗeba yõpeɗaɗada doce mil panasiɗaa. Manaseɗeba yõpeɗaɗada doce mil panasiɗaa.
7 Simeoʉ̃neba yõpeɗaɗada doce mil panasiɗaa. Leviɗeba yõpeɗaɗada doce mil panasiɗaa. Isacarɗeba yõpeɗaɗada doce mil panasiɗaa.
8 Zabuloʉ̃neba yõpeɗaɗada doce mil panasiɗaa. Joseɗeba yõpeɗaɗada doce mil panasiɗaa. Idjaɓa Benjamiʉ̃neba yõpeɗaɗada doce mil panasiɗaa.
Ẽberãrã zocãrã Ãcõrẽ quĩrãpita ɓea
9 Mãwãnacarea wayacusa cãĩmocara quĩrãca mʉ̃a ẽberãrãda zocãrã unusia. Ni aɓaʉba ãdjirãra poya juachaɗaẽ́ basía. Druazabemada, puruzabemada, beɗeazabema siɗa ʉ̃cʉrʉ duanasiɗaa. Jũmarãba cacuaɗe jʉ̃bada torroada jʉ̃ ɓeasia idjaɓa ɓʉsriɗa panʉ bẽrã uruta queduaca ɓeada ãdji jʉwaɗe eroɓeasia. Ãdjirãra Ãcõrẽ bugue biya quiru quĩrãpita idjaɓa Oveja Zaque quĩrãpita biɗa ʉ̃ta duanasiɗaa.
10 Maʉ̃ne jũmarãba nãwã jĩgua jarasiɗaa: “¡Dai Ãcõrẽ naʉ̃ bugue biya quiruɗe chũmʉba, Oveja Zaque biɗa dairãra ẽdrʉ edasiɗaa!”
11 Maʉ̃ne animarã zaca ɓea quĩmãrẽ panʉra, veinticuatro drõãrã siɗa Ãcõrẽ bugue biya quiru caita panasiɗaa. Jũma bajãnebema nezocarãda ãdjirã auɗu jũrã ʉ̃ta duanasiɗaa. Maʉ̃ne bugue biya quiru quĩrãpita maʉ̃ bajãnebema nezocarãra chĩrãboroɗe quĩrã eɗaa ɓarru copanenapeɗa Ãcõrẽa bia beɗeasiɗaa.
12 Nãwã jarasiɗaa:
¡Bãrãba jara panʉ quĩrãca wãrãa!* Ewariza jũmarãba dairã Ãcõrẽa bia beɗeaɗida panʉa dji dromaara ɓʉ bẽrã,
ne cawaara ɓʉ bẽrã, ne jũma poya eroɓʉ bẽrã idjaɓa bio ʉɓʉa ɓʉ bẽrã.
Idjía bia ɓʉaɗa aɗida panʉa idjaɓa bio biya quiruaɗa aɗida panʉa. ¡Wãrãda bia ɓʉa mãwã ɓaida!*
13 Maʉ̃be veinticuatro drõãrãnebema aɓaʉba mʉ̃́a iwiɗisia: “¿Bʉa cawa ɓʉca za cacuaɗe jʉ̃bada torroa jʉ̃ ɓeara cairãda jãwã ɓeada? ¿Cawa ɓʉca sãmaʉba zesiɗada?”
14 Mʉ̃a panusia: “Bʉabʉrʉ cawa ɓʉa.”
Maʉ̃ne idjia jarasia: “Naʉ̃ ẽberãrãra jĩrũarebema ewari bio minijĩchia ɓʉɗebema ẽdrʉpeɗaɗarãa. Oveja Zaque oaba ãdjia cacuaɗe jʉ̃badara totroa tãtosiɗaa.
15 Maʉ̃ bẽrã Ãcõrẽ bugue biya quiru quĩrãpita duanʉa. Idji deɗe ãsa, diamasi biɗa idji itea ne o panʉa. Maʉ̃ bugue biya quiruɗe chũmʉba ãdjirãra waga ɓaya.*
16 Waa jarra ɓeaɗaẽ́a ni opichia ɓeaɗaẽ́a. Beseaba waa baẽ́ ɓeaɗia idjaɓa jʉ̃wʉ̃rʉ̃ãba mĩã sẽẽ́a.
17 Oveja Zaqueba ãdjirãra Ãcõrẽ bugue biya quiruma waga ɓaya. Ãdjirãra edeya zocai ɓai dia ɓʉ baido bogadrʉ nũmeamaa doɗamãrẽã. Maʉ̃ne Ãcõrẽba ãdjirã dauɓara jũma jareya.”
