Apocalipsi 8:1-13
8 Oveja Zaqueba cartaɗe siete cara ɓeaɗa jĩrũarebema ogasiɗe bajãne dãrã chupea nũmesia.*
2 Mãwãnacarea mʉ̃a unusia bajãnebema nezocarãda Ãcõrẽ quĩrãpita siete ʉ̃ta duanʉda. Siete cachiruda ãdjirãa diasia.
3 Maʉ̃be dewara nezoca bajãnebemada zepeɗa Ãcõrẽa quera babadama ʉ̃ta nũmesia. Maʉ̃ quera babada oro oɗara Ãcõrẽ bugue quĩrãpita ɓʉa. Bajãnebema nezocaba idji jʉwaɗe quera babada epeɗecoda eroɓasia. Maʉ̃ epeɗecora oro oɗa basía. Aɓaʉba idjía incienso querada waiɓʉa diasia jũma Ãcõrẽ ẽberãrãba iwiɗipeɗaɗa ume ãbaa bá diamãrẽã. Ara maʉ̃da quera babada ʉ̃rʉ̃ incienso querara bá nũmʉsia.
4 Ãcõrẽ ẽberãrãba iwiɗipeɗaɗara maʉ̃ bajãnebema nezocaba incienso quera bá nũmʉ cowaa ume ãbaa Ãcõrẽmaa tũãpa cowasia.
5 Maʉ̃be bajãnebema nezocaba quera babada epeɗecoda edapeɗa quera babada ʉ̃rʉ̃ tʉbʉdau urua ɓʉba birasia. Maʉ̃ tʉbʉdau uruara naʉ̃ ẽjũãnaa peatasia. Maʉ̃ba baada jururuasia, dji cãbãyã jĩgua ɓae nũmesia, purewa eda nũmesia, idjaɓa naʉ̃ ẽjũãra ure nũmesia.
Bajãnebema nezocarãba cachiru zapeɗaɗa
6 Maʉ̃be bajãnebema nezocarã siete panʉba ãdji siete cachiru edapeɗaɗara zaɗi carea eronũpanesiɗaa.
7 Aɓaʉba idji cachiruda zásia. Ara maʉ̃da hieloda cue quĩrãca naʉ̃ ẽjũãnaa jurrusia. Idjaɓa uruada oa ume puera ɓʉda naʉ̃ ẽjũãnaa jurrusia. Maʉ̃ba naʉ̃ ẽjũãra, bacuru siɗa berara ẽsidra bá wãsia.* Mama chiruara jũma bá wãsia.
8 Mãwãnacarea dewarabema nezocaba idji cachiruda zásia. Ara maʉ̃da eya waiɓʉa quĩrãca ɓʉda purega jida nũmʉda aɓaʉba pusaɗe ɓatabuesia. Maʉ̃ba pusara berara ẽsidra oa babisia.
9 Maʉ̃ne pusaɗebema animarãda berara ẽsidra quinisiɗaa idjaɓa barcora berara ẽsidra jũma ãrĩsiɗaa.
10 Mãwãnacarea dewarabema nezocaba idji cachirura zásia. Ara maʉ̃ne chĩdau waiɓʉa uruga jida nũmʉda bajãneba ɓaesia.* Berara ẽsidra naʉ̃ ẽjũãne ɓea doɗe, baido bogadrʉ ɓeaɗe biɗa ɓaesia.
11 Maʉ̃ chĩdau trʉ̃ra Asea abadaa. Idji ɓaeɗama baidora jũma aseasia. Maʉ̃ baidoba ẽberãrãra zocãrã quinisiɗaa.
12 Mãwãnacarea dewarabema nezocaba idji cachirura zásia. Ara maʉ̃da ʉ̃mãdaura, jeɗeco siɗa berara ẽsidra pãĩma nũmesia. Chĩdau ɓea siɗa berara ẽsidra pãĩmacuasiɗaa. Maʉ̃ bẽrã ãsa ɓaida ɓaɗada berara ẽsidra pãĩma nũmasia. Diamasi biɗa jeɗecora, chĩdau ɓea siɗa ʉ̃na ɓaida ɓaɗada berara ẽsidra ʉ̃naẽ́ basía.
13 Mʉ̃a ʉ̃taa acʉbʉrʉɗe ũrĩsia nejõbʉ ʉ̃tʉ wãɓari ɓʉba jĩgua jara ɓʉda:* “¡Mĩã djuburi ɓeaɗia! ¡Mĩã djuburi ɓeaɗia! ¡Mĩã djuburi ɓeaɗia naʉ̃ ẽjũãne ɓeara dewarabema nezoca ũbea panʉba ãdji cachiru zabʉdaɗe!”
Beɗea eɗaare
^ 8:1. Dãrã. Griego beɗeaɗe ɓʉ́ ɓʉa “media hora.”
^ 8:7. Naʉ̃ ẽjũãra. Griego beɗeaɗe ʉ̃cʉrʉ cartaɗe maʉ̃ra neẽ́a. Berara ẽsidra. Griego beɗeaɗe ɓʉ́ ɓʉa “la tercera parte.” Maʉ̃ beɗeara versículo 7ɗeba aɓa 12ɗaa odja ɓʉa.
^ 8:10. Uruga jida nũmʉda. Griego beɗeaɗe ɓʉ́ ɓʉa: “Ĩbĩrã quĩrãca uruga jida nũmʉda.”
^ 8:13. Nejõbʉ. Griego beɗeaɗe ʉ̃cʉrʉ cartaɗe ɓʉ́ ɓʉa “bajãnebema nezoca.”
