Colosa 2:1-23
2 Mʉ̃a quĩrĩã ɓʉa bãrãba naʉ̃da cawaɗida: mʉ̃ra bio traja ɓʉa bãrã Colosaɗebemarãda, djabarã Laodicea puruɗebemada, jũma djabarã mʉ̃ ununaca siɗa carebai carea.
2 Mʉ̃a quĩrĩã ɓʉa jũmarãda soɗeba zarea ɓeaɗida, quĩrĩãneba ãbaa bia duananida, idjaɓa wãrã crĩcha cawaa eropanʉneba bia duananida. Mãwãbʉrʉ Ãcõrẽba naẽna cawabiẽ́ ɓaɗara cawaɗia. Maʉ̃ra Critoa.
3 Idjiabʉrʉ Ãcõrẽ necawaada, crĩcha cawaa siɗa poya diaya. Maʉ̃ necawaara, crĩcha cawaa siɗa bio bia panʉa.
4 Jũma maʉ̃gʉra mʉ̃a jara ɓʉa ni aɓaʉba sewa jaradia panʉneba bãrãra cũrũgarãnamãrẽã.
5 Mʉ̃ra bãrã ume ɓʉẽ́mĩna crĩchaɗeba bãrã ume ɓʉa. Mʉ̃a cawa ɓʉa bãrãra ãbaa bia duanʉda idjaɓa Critora bio ĩjã panʉda. Maʉ̃ carea ɓʉsriɗa ɓʉa.
Zocai ɓai djiwiɗi Critoɗeba eropanʉa
6 Bãrãba dadjirã Boro Jesucritora ĩjãpeɗaɗa bẽrã idjiɗeba nĩbaɗadua.
7 Idjiɗeba zarea pananadua bio carra jida panʉ quĩrãca, de ɓauɓawa ɓʉ quĩrãca. Idjira bio ĩjã pananadua djabarãba jaradiapeɗaɗa quĩrãca. Maʉ̃ awara ewariza Ãcõrẽa bia ɓʉaɗa aɗadua.
8 Quĩrãcuita ɓeaɗadua ni aɓaʉba bãrãra cũrũgarãnamãrẽã dadji carebaca wãrãẽ́ crĩchaɗeba. Jũma maʉ̃gʉra drõã naẽnabema crĩchaa, naʉ̃ ẽjũãnebema crĩchaa. Beɗea Critoɗebemaẽ́a.
9 Critora naʉ̃ djaraɗe ɓasimĩna wãrãda Ãcõrẽ basía.
10 Bãrãra Crito ẽberãrã bẽrã idjiɗeba ne jũmada eropanʉa Ãcõrẽ ume bia ɓeaɗi carea. Idjidrʉ jũma dadjia ununaca dji droma ɓea Boroa.
11 Bãrãra idji ẽberãrã bẽrã cacua wẽãgopeɗaɗa quĩrãca panʉa. Baribʉrʉ maʉ̃gʉra jʉwaba oɗaẽ́a. Ãtebʉrʉ jara ɓʉa bãrãra naʉ̃ djaraba cadjirua o quĩrĩã ɓʉɗebemada ẽdrʉsiɗada. Maʉ̃gʉ cacua wẽãgoɗara Critobʉrʉ osia.
12 Ãcõrẽba idji ʉɓʉaɗeba Critora ʉ̃rẽbabisia. Bãrãba Ãcõrẽra mãwã ʉɓʉa ɓʉda ĩjãpeɗaɗa bẽrã borocuesiɗaɗe unubisiɗaa Crito ume jousiɗada idjaɓa Ãcõrẽba bãrãra idji ume ʉ̃rẽbabisida.
13 2:13-14 Naẽna cadjirua o panʉneba bãrãra beu ɓeasia. Maʉ̃ne naʉ̃ djaraba cadjirua o quĩrĩã ɓʉra ẽpẽbadjiɗaa.* Baribʉrʉ Ãcõrẽba bãrãra Crito ume zocai ɓʉsia. Wãrãda cadjirua o panʉ carea dadjirãba Ãcõrẽa ne diai bara panasiɗaa. Ãcõrẽ leyɗe ɓʉ́ ɓʉa dadjirãra beuɗida panʉda. Baribʉrʉ Crito cruɗe beusiɗe Ãcõrẽba maʉ̃ diai bara pananara jũma jõbisia. Jũma dadjia cadjirua opeɗaɗara idjia quĩrãdoasia.
15 Crito cruɗe beusiɗe Ãcõrẽba jũma dadjia ununaca dji droma ɓeara poyasia. Mãwã poyaɗara idjia jũmarãa cawabisia.
16 Maʉ̃ bẽrã bãrãba cobada carea, dobada carea biɗa ẽberãrãba biẽ́ jaraɗibʉrʉ, ãdji beɗeara ĩjãrãnadua. Bãrãba ewari droma wagaɗaca carea, jeɗeco djiwiɗi wagaɗaca carea, ʉ̃nãũbada ewari wagaɗaca carea biɗa ãdjirãba biẽ́ jaraɗibʉrʉ, ĩjãrãnadua.
17 Jũma maʉ̃gʉba Ãcõrẽba oiɗebemada jarijaria unubi ɓasia. Baribʉrʉ Ãcõrẽba oi jaraɗara Critoɗeba jũma osia.
18 Maʉ̃ carea aɓaʉba bãrãba nebiada bajãne edaɗaẽ́ana aɗibʉrʉ, ĩjãrãnadua.* Mãwã beɗeabadara djãrã cãyãbara eɗaara ɓea quĩrãca nĩbabadamĩna dji dromarãda crĩchabadaa. Ãdjirãba bajãnebema nezocarãa bia beɗeabadaa. Cãĩmocara quĩrãca unupeɗaɗada biara jaradiabadaa. Baribʉrʉ ara ãdji crĩchaɗeba mãwã jaradiabadaa idjaɓa mãwã crĩcha panʉneba djãrã cãyãbara biara ɓeada crĩchabadaa.
19 Ãdjirãra dadjirã Boro Crito ume panʉẽ́a. Baribʉrʉ Crito ẽberãrãba idjiɗeba ne jũmada eropanʉa idji ume ãbaa bia panani carea. Idjiɗeba dadjirãra waribadaa Ãcõrẽba waribi ɓʉ quĩrãca.
20 Bãrãra Crito ume ãbaa beusiɗa bẽrã naʉ̃ ẽjũãnebema crĩchara ẽpẽniẽ́ panʉa. Maʉ̃da ¿cãrẽ cãrẽã waɗibiɗa maʉ̃ crĩchara ẽpẽ panʉ naʉ̃ ẽjũãnebemarãba ẽpẽbada quĩrãca?
21 Nãwã jarabadaa: “Jãʉ̃gʉra tãrãnadua, jari ɓʉra corãnadua, jidarãnadua.”
22 Jũma maʉ̃ra naʉ̃ ẽjũãnebema crĩchaa. Maʉ̃ crĩcha ɓeara ẽpẽniẽ́ panʉa jũma dadjia copeɗaɗara, dopeɗaɗa siɗa jõbari bẽrã.
23 Wãrãda maʉ̃ crĩcha ẽpẽ ɓeara ne cawa ɓeaca ɓeaa. Ãdjia jarabadaa ara dadjiduɓa ne obi panʉneba Ãcõrẽra poya bia ẽpẽnida, djãrã cãyãbara eɗaara nĩbaɗida panʉda, idjaɓa ara daduɓa puaɗeba bia mĩga ɓeaɗida panʉda. Baribʉrʉ jũma maʉ̃gʉba dadji cacuaba cadjirua o quĩrĩã ɓʉra jõbicaa.
