Colosa 3:1-25
3 Bãrãra Crito ume ʉ̃rẽbapeɗaɗa bẽrã bajãnebemada jʉrʉ pananadua. Mama Critora Ãcõrẽ jʉwa araare chũmʉa.
2 Bajãnebemada crĩcha pananadua. Naʉ̃ ẽjũãnebemada crĩcharãnadua.
3 Bãrãra Crito ume beupeɗaɗa bẽrã idji ume zocai panʉa. Maʉ̃ zocai ɓaiɗebemada ẽberãrãba cawaɗacaa. Baribʉrʉ Critora Ãcõrẽ ume zocai ɓʉ bẽrã, bãrã siɗa Ãcõrẽ ume zocai panʉa.
4 Bãrãba Critoɗeba zocai ɓaira eropanʉa.* Ara idjida waya unubibʉrʉɗe bãrãra idji ume panania. Maʉ̃ne idji quĩrãca quĩrãwãrẽã panania.
Critoɗeba dadjirã djiwiɗida panena
5 Maʉ̃ bẽrã jũma naʉ̃ ẽjũãnebema crĩcha bãrã soɗe ɓʉra igaraɗadua. Auɗua nĩbarãnadua, mĩã perada orãnadua, bãrã cacuaba cadjirua o awua ɓʉra orãnadua, crĩcha cadjiruara ẽpẽrãnadua, idjaɓa ne awua ɓearãnadua. Ne awua ɓʉba Ãcõrẽ cãyãbara maʉ̃da biara ẽpẽbari bẽrã jʉwaba oɗa ãcõrẽ ẽpẽ ɓʉ quĩrãca ɓʉa.
6 Jũma maʉ̃ cadjirua carea Ãcõrẽba idji ĩjãẽ́ ɓeara cawa oya.*
7 Bãrã siɗa naẽna mãwã nĩbabadjiɗaa.
8 Jãʉ̃be bãrã soɗeba quĩrũbadara, quẽguea beɗeabadara, djãrã biẽ́ obadara, djãrã biẽ́ jarabadara, beɗea cadjirua jarabada siɗa jũma igaraɗadua.
9 Djãrãa sewa orãnadua. Bãrãra naẽna cadjiruaɗe pananada ẽdrʉsiɗaa. Bãrãba cadjirua obadapeɗaɗara idu ɓʉsiɗaa.
10 Wua djiwiɗi jʉ̃bʉda quĩrãca bãrãra djiwiɗida panesiɗaa. Ãcõrẽba mãwã osia. Maʉ̃ awara bãrãra biara o wãa idji quĩrãca ɓeaɗamãrẽã idjaɓa idjida biara cawaɗamãrẽã.
11 Ãcõrẽba mãwã oɗa bẽrã idji quĩrãpita griegora judio ume aɓaria. Cacua wẽãgo ɓeara cacua wẽãgoẽ́ ɓea ume aɓaria. Drua ãĩbemada, ne adua ɓʉ ẽberãda, nezocada, nezocaẽ́ siɗa aɓaria. Critoda dji biara ɓʉa. Idjira jũmarã soɗe ɓʉa.
12 Ãcõrẽba bãrãra quĩrĩãneba edasia idji itea bia ɓeaɗamãrẽã. Maʉ̃ bẽrã djãrãra quĩrã djuburia ɓeaɗadua. Ẽberã biada ɓeaɗadua. Bãrãra djãrã cãyãbara biara ɓeada crĩcharãnadua. Jũmarã ume crĩcha biaɗeba ɓeaɗadua. Ne jũmane droaɗadua.
13 Jũmarã ume droa cawa ɓeaɗadua. Aɓaʉba biẽ́ osira maʉ̃ biẽ́ oɗara quĩrãdoaɗadua. Bãrãba biẽ́ opeɗaɗara dadjirã Boroba quĩrãdoaɗa quĩrãca bãrã biɗa quĩrãdoaɗadua.
14 Maʉ̃ awara biara jũmarã ume dji quĩrĩã duananadua. Mãwã bãrãra jũmarã ume ãbaa bia duanania.
15 Bãrãra cacua aɓa ɓʉ quĩrãca panʉ bẽrã Ãcõrẽba bãrãra trʉ̃sia ãbaa necai duananamãrẽã. Critoba necai ɓaira bãrã soɗe dia ɓʉa.* Maʉ̃ba cawabiya cãrẽda oɗida panʉda. Maʉ̃neba ɓeaɗadua. Idjaɓa Ãcõrẽa bia ɓʉaɗa aɗadua.
16 Beɗea Critoɗebemara bãrã soɗe eroɓeaɗadua. Jũma Ãcõrẽ necawaaɗeba dji jaradiaɗadua idjaɓa dji carebaɗadua biara ĩjãni carea. Ãcõrẽ Beɗeaɗe ɓʉ trʉ̃ãbida, djabarãba trʉ̃ãbadada, Ãcõrẽ Jaureba trʉ̃ãbi ɓʉ siɗa Ãcõrẽa trʉ̃ãnadua. Soɗeba bia jara panʉneba trʉ̃ãnadua.
17 Bãrã beɗeabʉdaɗe, ne obʉdaɗe biɗa jũma oɗadua dadjirã Boro Jesuba quĩrĩã ɓʉ quĩrãca. Idjiɗeba dadjirã Zeza Ãcõrẽa bia ɓʉaɗa aɗadua.
Djabarã ãdji ẽberãrã ume sãwã ɓeaɗida panʉ
18 Wẽrã quima bara ɓea, bãrã quimaba jara ɓʉra ĩjã oɗadua. Dadjirã Boro Jesu ume panʉ bẽrã mãwã oɗida panʉa.
19 Umaquĩrã quima bara ɓea, bãrã quimada quĩrĩãnadua. Ãdjirã ume quĩrũ ɓearãnadua.
20 Warrarã, bãrã djibarirã beɗeara ne jũmane ĩjãnadua. Ãcõrẽba maʉ̃gʉra bia unu ɓʉa.
21 Zezarã, bãrã warrarãra quĩrũbirãnadua so ãrĩrãnamãrẽã.
22 Nezocarã, bãrã boro naʉ̃ ẽjũãnebemaba obibʉrʉra jũma ĩjã oɗadua. Aɓabe idjia acʉ ɓʉɗe idji ume bia ɓeaɗi carea orãnadua. Ãtebʉrʉ Ãcõrẽra waya panʉ bẽrã biaɗeba jũma oɗadua.
23 3:23-24 Jũma bãrãba o panʉra zoqueaɗeba oɗadua dadjirã Boro itea o panʉ quĩrãca. Aɓabe ẽberãrãba bia ununamãrẽã orãnadua. Bãrãra dadjirã Boro Crito nezocarãa. Bãrãba cawa panʉa idji itea bia o panʉbari idjia bãrãa ne diaida.
25 Baribʉrʉ dji biẽ́ o ɓʉra Ãcõrẽba cawa oya. Ãcõrẽba jũmarãda ariɗe cawa obaria.
