Colosa 4:1-18
4 Nezoca bororã, bãrã nezocarã ume jipa oɗadua. Bãrã biɗa Boroda bajãne eropanʉda cawa panʉa.
2 Ewariza Ãcõrẽa iwiɗi pananadua. Iwiɗibʉdaɗe dau ʉɓʉa ɓeaɗadua idjaɓa bia ɓʉaɗa aɗadua.
3 Dai carea iwiɗiɗadua Ãcõrẽba eɗa wãbadara ewabʉrʉ quĩrãca idu Critoɗebema naẽna cawabiẽ́ ɓaɗada jaradiabimãrẽã. Maʉ̃ jaradia ɓʉ carea mʉ̃ra preso ɓʉa.
4 Iwiɗiɗadua mʉ̃a ebuɗa jaradiai carea mʉ̃a oida ɓʉ quĩrãca.
5 Crito ĩjãẽ́ ɓea tãẽna crĩcha cawaaɗeba nĩbaɗadua. Ewariza jʉrʉɗadua idjiɗebemada ãdjirãa cawabiɗi carea.
6 Beɗea biaɗeba beɗeaɗadua jũmarãba bia ũrĩnamãrẽã. Mãwã Critoɗebema iwiɗibʉdaɗe bãrãba cawa ɓeaɗia sãwã panunida panʉda.
Pauloba naʉ̃ cartaɗe jĩrũare ɓʉɗa
7 4:7-8 Mʉ̃a quĩrĩã ɓʉ djaba Tiquicoda bãrãmaa diabuebʉrʉa mʉ̃nebemada cawaɗamãrẽã idjaɓa sobiaɗamãrẽã. Idjia mʉ̃ ume ãbaa Ãcõrẽ trajura ne jũmane bia o ɓʉa. Idjia daiɗebemada bãrãa jũma cawabiya.
8 –
9 Jãmabema djaba Onesimoda djaba Tiquico ume diabuebʉrʉa. Idjia ne jũmane jipa o ɓʉa idjaɓa daiba idjira quĩrĩã panʉa. Tiquicoba, Onesimo biɗa bãrãa nẽbʉrʉɗia jũma nama sãwã nũmʉda.
10 Djaba Aristarcoda mʉ̃ ume ãbaa preso ɓʉa. Idjia quĩrĩã ɓʉa bãrãra bia duananida. Bernabe djabawarra Marcoba quĩrĩã ɓʉa bãrãra bia duananida. Idjiɗebemada mʉ̃a naẽna cartaɗe ɓʉsia. Idjira bãrãmaa wãibʉrʉ, bia edaɗadua.
11 Idjaɓa djaba Jesu, Justo abadaba quĩrĩã ɓʉa bãrãra bia duananida. Djabarã judiorãnebema maʉ̃ ũbeabe panʉba nama mʉ̃ careba jaradia panʉa ẽberãrãba Ãcõrẽra ãdjirã Boroda ɓʉɗamãrẽã. Maʉ̃ djabarãneba mʉ̃ra sobia ɓabaria.
12 Jesucrito nezoca jãmabema Epaproba quĩrĩã ɓʉa bãrãra bia duananida. Idjia ewariza Ãcõrẽa iwiɗi ɓabaria bãrãra ne jũmane zarea ɓeaɗamãrẽã, bio ĩjã pananamãrẽã, idjaɓa jũma Ãcõrẽba obi quĩrĩã ɓʉda cawaɗapeɗa ĩjã oɗamãrẽã.
13 Mʉ̃a jaraya: djaba Epaproda wãrãda traja ɓʉa bãrãra, jũma djabarã Laodicea puruɗebemara, Hierapoli puruɗebema siɗa carebai carea.
14 Djaba nẽãrã diabari Lucaba quĩrĩã ɓʉa bãrãra bia duananida. Idjira daiba quĩrĩã panʉa. Djaba Demá biɗa quĩrĩã ɓʉa bãrãra bia duananida.
15 Dadjirã djabarã Laodicea puruɗebemarãa jaraɗadua mʉ̃a quĩrĩã ɓʉda ãdjirãra bia duananida. Dadjirã djabawẽrã Ninpaa, jũmarã djabarã idji deɗe ãbaa dji jʉrebadarãa biɗa jaraɗadua mʉ̃a quĩrĩã ɓʉda ãdjirãra bia duananida.
16 Bãrãba naʉ̃ carta acʉpeɗaɗacarea djabarã Laodicea puruɗebemarãa biɗa acʉbiɗadua. Bãrã biɗa carta mʉ̃a ãdjirãa diabueɗara acʉɗadua.
17 Djaba Arquipoa jaraɗadua: “Dadji Boroba obi ɓʉra jũma quĩrãcuita o ɓadua.”
18 Mʉ̃ra Pauloa. Ara mʉ̃dji jʉwaba ɓʉbʉrʉa mʉ̃a quĩrĩã ɓʉda bãrãra bia duananida. Mʉ̃ preso ɓʉ carea Ãcõrẽa iwiɗi pananadua. Mʉ̃a quĩrĩã ɓʉa Ãcõrẽba idji biaɗeba bãrãra careba ɓaida.
