Epeso 1:1-23
1 Mʉ̃ra Pauloa. Ãcõrẽba quĩrĩãna bẽrã mʉ̃ra Jesucritoba diabueɗaa. Mʉ̃a naʉ̃ cartara ɓʉbʉrʉa jũma Ãcõrẽ ẽberãrã Jesucrito ĩjã ɓea Epeso puruɗebema itea.
2 Mʉ̃a quĩrĩã ɓʉa dadjirã Zeza Ãcõrẽba, dadjirã Boro Jesucrito biɗa ãdji biaɗeba bãrãra careba pananida idjaɓa necai ɓai siɗa bãrãa dia pananida.
Ãcõrẽba ne jũma bia dadji jaure itea dia ɓʉ
3 Dadjirã Boro Jesucrito Zeza Ãcõrẽa bia beɗeaɗida panʉa. Crito ume panʉ bẽrã idji Jaureɗeba ne jũma biada dadjirãa bajãneba dia ɓʉa.
4 Naʉ̃ ẽjũã oi naẽna Critoɗeba dadjirãra edasia idji itea bia ɓeaɗamãrẽã idjaɓa idji quĩrãpita cadjirua neẽ́ ɓeaɗamãrẽã.
5 Naẽnaeɗa Jesucritoɗeba dadjirãra edasia idji warrarãda ɓeaɗamãrẽã, mãwã o quĩrĩã ɓaɗa bẽrã idjaɓa dadjirãra quĩrĩãna bẽrã.
6 Idji bia waiɓʉa ɓʉɗeba dadjirãra bio carebasia idjia quĩrĩã ɓʉ Warraɗeba. Maʉ̃ carea idjía bia beɗeaɗida panʉa.
7 Idji Warra oa erozoaɗaɗeba Ãcõrẽba dadjirãra cadjiruaɗebemada ẽdrʉ edasia. Dadjirãba cadjirua opeɗaɗara idji biaɗeba jũma quĩrãdoasia.
8 Idji biaɗeba dadjirãra bio carebasia jũma idji necawaada, crĩcha cawaa siɗa diaɗa bẽrã.
9 1:9-10 Idjia o quĩrĩã ɓʉda naẽna cawabiẽ́ ɓasia. Baribʉrʉ dadjirãa cawabisia idji biaɗeba quĩrĩãna bẽrã. Idjia Critoɗeba naẽnaeɗa oi crĩcha ɓaɗara idjia ɓʉɗa ewariɗe jũma oya. Maʉ̃ ewariɗe ne jũma bajãnebemada, naʉ̃ ẽjũãnebema siɗa Crito jʉwaeɗa ɓʉya.
11 Ãcõrẽba naẽnaeɗa crĩcha ɓaɗa quĩrãca Critoɗeba dadjirãra edasia idjia diaiɗebemada edaɗamãrẽã.* Mãwã osia ne jũmada idjia o quĩrĩã ɓʉ quĩrãca obari bẽrã.
12 Idjia quĩrĩãsia dai judiorã dji naãrã Crito ĩjãpeɗaɗaba idji biya quiruɗebemada bia beɗeaɗida.
13 Maʉ̃ awara bãrã judiorãẽ́ biɗa wãrã beɗea bia dadji ẽdrʉɗiɗebemada ũrĩnapeɗa Critora ĩjãsiɗaa. Mãwã bãrã siɗa idji ẽberãrãda panesiɗaa. Crito ĩjãsiɗaɗe Ãcõrẽba jaraɗa quĩrãca idji Jaureda bãrãa diasia sẽyãda ɓamãrẽã. Maʉ̃ba cawabi ɓʉa bãrãra idjiɗerãda.
14 Ãcõrẽ Jaurera edapeɗaɗa bẽrã dadjirãba cawa panʉa jũma Ãcõrẽba diai jaraɗara wãrãda edaɗida idjiɗerã jũma bia ɓʉi ewariɗe. Maʉ̃ carea idji biya quiruɗebemada bia beɗeaɗida panʉa.
Pauloba Ãcõrẽa iwiɗiɗa
15 1:15-16 Maʉ̃ bẽrã mʉ̃a ewariza bãrã carea Ãcõrẽa bia ɓʉaɗa abaria. Dãrãbʉrʉa mʉ̃a ũrĩ ɓʉda bãrãba dadjirã Boro Jesura ĩjã panʉda idjaɓa jũma Ãcõrẽ ẽberãrãra quĩrĩã panʉda. Maʉ̃ ewariɗeba ʉ̃taa mʉ̃a bãrã carea Ãcõrẽa iwiɗibaria.
17 Mʉ̃a dadjirã Boro Jesucrito Ãcõrẽa, dadjirã Zeza biya quirúa iwiɗibaria idji Jaureɗeba bãrãa necawaada diamãrẽã idjaɓa idjiɗebemada cawabimãrẽã. Mãwã bãrãba idjida biara cawaɗia.
18 Idjaɓa iwiɗibaria Ãcõrẽba bãrã crĩchara ewamãrẽã. Mãwã bãrãba cawaɗia cãrẽda idjiɗeba edaɗi carea jʉ̃ã panʉda, maʉ̃ edaɗamãrẽã trʉ̃na bẽrã. Maʉ̃ne bãrãba cawaɗia idji ẽberãrãba edaɗira waiɓʉa bio biya quiruda.
19 1:19-20 Idjaɓa mʉ̃a iwiɗibaria bãrãba cawaɗamãrẽã idji ʉɓʉara jũmarã cãyãbara ʉɓʉara ɓʉda. Maʉ̃ ʉɓʉaɗeba idjia dadjirã idji ĩjã ɓeara careba ɓʉa. Ara maʉ̃ ʉɓʉa waiɓʉa ɓʉɗeba Ãcõrẽba Critora beu ɓaɗada ʉ̃rẽbabipeɗa bajãne idji jʉwa araare chumebisia.
21 Ãcõrẽba idjira jũma jai bororã cãyãbara, bajãnebema dji droma ɓea cãyãbara, dji mẽsrã ɓea cãyãbara, idjaɓa dji ʉɓʉa ɓea cãyãbara dji dromaara ɓʉsia. Naʉ̃ ewariɗe idjira jũmarã cãyãbara dji dromaara ɓʉa, tẽãbema ewariɗe biɗa mãwã ɓaya.
22 Ãcõrẽba ne jũmada Crito jʉwaeɗa ɓʉsia, idjaɓa Critora ɓʉsia ne jũmane idji ẽberãrã Boroda ɓamãrẽã.
23 Crito ẽberãrãra idji cacuaa. Ãdjirãra ne jũmane idjiɗeba panʉa. Idjaɓa ne jũmada idjiɗeba ɓʉa.
Beɗea eɗaare
^ 1:11. Edasia idjia diaiɗebemada edaɗamãrẽã. Griego beɗeaɗe maʉ̃ra ebuɗa ɓʉẽ́a. Ʉ̃cʉrʉmaarã nãwã jara ɓʉa: “Edasia idji ẽberãrãda ɓeaɗamãrẽã.”
