Epeso 2:1-22
2 Naẽna bãrãra Ãcõrẽnebemada beu ɓeasia, ĩjãnaẽ́ panʉneba cadjiruada obadjiɗa bẽrã.*
2 Mãwã nĩbasiɗaa naʉ̃ ẽjũãnebema crĩchada ẽpẽ panana bẽrã idjaɓa naʉ̃ ẽjũã deɗaaɗe panʉ jairã boro siɗa ẽpẽ panana bẽrã. Naʉ̃ ewariɗe idjia Ãcõrẽ beɗea ĩjãẽ́ ɓeara idji jʉwaeɗa eroɓʉa.
3 Naẽna jũma dadjirãda ãdji quĩrãca nĩbasiɗaa naʉ̃ cacuaba cadjirua oya ɓʉda ẽpẽ panana bẽrã. Naʉ̃ cacuaba cadjirua o quĩrĩã ɓʉda, cadjirua dadji crĩchaɗe ɓʉ siɗa o panasiɗaa. Dji cadjiruarã bẽrã Ãcõrẽba idji quĩrũbiɗeba dadjirãra cawa oida ɓasia jũma cadjirua obadarã cawa obari quĩrãca.
4 2:4-5 Baribʉrʉ Ãcõrẽba bio quĩrã djuburiabaria. Idjia dadjirãra bio quĩrĩã ɓʉ bẽrã cadjiruaɗe beu ɓeaɗada Crito ume ãbaa zocai ɓʉsia. Ãcõrẽba idji biaɗeba bãrãra ẽdrʉ edasia.
5 –
6 Jesucrito ume ãbaa panʉ bẽrã Ãcõrẽba dadjirãra idji ume ãbaa ʉ̃rẽbabisia idjaɓa idji ume ãbaa bajãne chũmebisia.
7 Maʉ̃gʉra jũma osia nocoarebema ewariɗe unubi carea sãwã idji bia waiɓʉa ɓʉɗeba carebasida dadjirãra Jesucrito ume panʉ bẽrã.
8 Jesuda ĩjãpeɗaɗa bẽrã Ãcõrẽba idji biaɗeba bãrãra ẽdrʉ edasia. Ara bãdjia opeɗaɗaɗeba ẽdrʉɗaẽ́ basía, ãtebʉrʉ Ãcõrẽbʉrʉ bari ẽdrʉ edasia.
9 Bãrãba bia o panʉ carea Ãcõrẽba ẽdrʉ edaẽ́ basía. Mãwã ni aɓaʉda ara idjiɗebemada poya bia beɗeaɗaẽ́a.
10 Ãcõrẽba dadjirãra Jesucritoɗeba djiwiɗida osia ne biada o pananamãrẽã. Maʉ̃ ne biara idjiabʉrʉ naẽna ɓʉsia dadjirãba oɗamãrẽã.
Critoɗeba judiorã, judiorãẽ́ siɗa Ãcõrẽ ume bia panena
11 Maʉ̃ carea quĩrãnebaɗadua bãrãra naʉ̃ djaraɗe judiorãẽ́ bẽrã judiorãba “cacua wẽãgoẽ́ ɓea” abadaa Ãcõrẽ neẽ́ ɓea aɗi carea. Ara ãdjida “cacua wẽãgo ɓea” abadaa Ãcõrẽ ẽberãrã aɗi carea. Baribʉrʉ ãdji cacuara wẽãgosiɗa bẽrã aɓabe naʉ̃ djaraɗe quĩrã awara ɓeaa.
12 Quĩrãnebaɗadua naẽna bãrãra Crito neẽ́ ɓeasida idjaɓa Israelɗebemaẽ́ basida. Ãcõrẽ ãdjirã ume beɗea ɓʉsiɗe idjia bãrãa ni cãrẽ siɗa diai jaraẽ́ basía. Maʉ̃ awara bãrãra sãwã bia ɓeaɗida neẽ́ panasiɗaa idjaɓa naʉ̃ ẽjũãne Ãcõrẽ neẽ́ ɓeasia.
13 Baribʉrʉ iɗira Jesucrito ume panʉ bẽrã, bãrãra naẽna tʉmʉ ɓeaɗada Ãcõrẽba Crito oaɗeba idji caita enesia.
14 Wãrãda Critoba dadjirãra necai ɓʉsia. Idjia judiorãra judiorãẽ́ ume ãbaa ɓʉsia puru aɓa ɓemãrẽã. Idji beuɗaɗeba dadjirãra awara pananada ãbaa ɓʉsia.
15 Ãcõrẽba Moisea diaɗa leyba ne zocãrã obibaria. Baribʉrʉ idji beuɗaɗeba Critoba maʉ̃ leyra ãyã ɓʉsia judiorãda, judiorãẽ́ ume ãbaa necai ɓʉi carea. Idjia puru umé pananada puru djiwiɗida aɓa osia.
16 Idji cruɗe beuɗaɗeba puru umé ɓaɗada puru aɓa opeɗa umena Ãcõrẽ ume bia ɓʉsia. Mãwã dadjirãra awara pananada idjia ãbaa bia ɓʉsia.
17 Critoba beɗea bia Ãcõrẽ ume necai ɓaiɗebemada bãrã dji Ãcõrẽnebema tʉmʉ ɓeaɗaa, dai dji Ãcõrẽ caita ɓeaa biɗa jaraɗe zesia.*
18 Critoɗeba dadji umérãba aɓarica dadjirã Zeza Ãcõrẽa idji Jaure aɓa ɓʉɗeba poya iwiɗiɗia.
19 Maʉ̃ bẽrã bãrã judiorãẽ́ra waa Ãcõrẽ puruɗebemada ãĩ ɓeaɗaẽ́a, ãtebʉrʉ Ãcõrẽ puruɗebemarã ume ãbaa panʉa. Iɗira bãrãra Ãcõrẽ ẽberãrãa.
20 Bãrãra mõgara de quĩrãca panʉa. Jesuba diabueɗarãda, Ãcõrẽneba beɗeabadarã siɗa maʉ̃ de edrebema mõgara quĩrãca panʉa. Bãrãra mõgara ãdjirã ʉ̃rʉ̃ ca wãbʉda quĩrãca panʉa. Maʉ̃ deɗebema dji biara ɓʉ mõgarara Jesucritoa.
21 Idjiɗeba maʉ̃ dera biya cara ɓebaria idjaɓa waiɓʉara wari wãbaria dadjirã Boro itea bia ɓemãrẽã.
22 Crito ume panʉ bẽrã bãrã siɗa jũma Ãcõrẽ ẽberãrã ume ãbaa de quĩrãca panʉa. Maʉ̃ deɗe Ãcõrẽra idji Jaureɗeba ɓabaria.
