Epeso 3:1-20
3 Maʉ̃ bẽrã mʉ̃a [bãrã carea Ãcõrẽa iwiɗibaria.]* Mʉ̃ra Pauloa. Bãrã judiorãẽ́a Jesucritoɗebemada jaradia ɓʉ carea preso ɓʉa.
2 Mʉ̃maarã bãrãba bio cawa panʉa Ãcõrẽba idji biaɗeba mʉ̃ra ɓʉsida bãrãa jaradiamãrẽã.
3 Idjia naẽna cawabiẽ́ ɓaɗada mʉ̃́a cawabisia. Maʉ̃gʉɗebemada mʉ̃a naʉ̃ cartaɗe maãrĩ ɓʉsia.
4 Naʉ̃ carta acʉ panʉne bãrãba cawaɗia Ãcõrẽba Critoɗebema cawabiẽ́ ɓaɗara mʉ̃a cawa ɓʉda.
5 Naãrãeɗa Ãcõrẽba ẽberãrãa maʉ̃ra cawabiẽ́ ɓasia, baribʉrʉ iɗira idjiɗeba beɗeabadarãa, Jesucritoba diabueɗarãa biɗa idji Jaureɗeba cawabisia.
6 Idjia cawabiẽ́ ɓaɗara naʉ̃gʉa: judiorãẽ́ba beɗea bia Critoɗebemada ĩjã panʉneba judiorã ume ãbaa Ãcõrẽba diaiɗebemada edaɗia, aɓari cacuaɗe duanʉa, idjaɓa Ãcõrẽba Jesucritoɗeba diai jaraɗada ãbaa eropanʉa.
7 Ãcõrẽba idji biaɗeba mʉ̃ra idji nezocada ɓʉsia beɗea bia Critoɗebemada jaradiamãrẽã. Idji ʉɓʉaɗeba mãwã osia.
8 Jũma Ãcõrẽ ẽberãrã tãẽna eɗaara ɓʉmĩna Ãcõrẽba idji biaɗeba mʉ̃ra ɓʉsia judiorãẽ́ma Critoba bio careba ɓʉɗebemada jaradiamãrẽã. Critoba bio careba ɓʉra dadjirãba poya jũma cawa jaraɗaẽ́a.
9 Ãcõrẽ ne jũma oɗaba mʉ̃ra ɓʉsia jũmarãa ebuɗa cawabimãrẽã sãwã osida idjia naẽna oi crĩcha ɓaɗara. Maʉ̃ oi crĩcha ɓaɗara naẽna cawabiẽ́ ɓasia.
10 Iɗira judiorãra judiorãẽ́ ume ãbaa ɓʉɗa bẽrã ãdjirãneba bajãnebema dji droma ɓeaa, dji ʉɓʉa ɓeaa biɗa cawabisia idjira ne jũmane bio ne cawa ɓʉda.
11 Mãwã osia idjia naãrãeɗa dadjirã Boro Jesucritoɗeba oida crĩcha ɓaɗa bẽrã.
12 Dadjirãba ara maʉ̃ Jesucritora ĩjã panʉ bẽrã idjaɓa idji ume ãbaa panʉ bẽrã Ãcõrẽa ne wayaa neẽ́ iwiɗiɗida panʉa.
13 Maʉ̃ carea mʉ̃a bãrãa nãwã beɗea djuburiaya: mʉ̃ra bãrã carea bia mĩga ɓʉmĩna jũmawãyã sopuarãnadua. Mãwã bia mĩga ɓʉa bãrãra Ãcõrẽ ume bia ɓeaɗamãrẽã.
Pauloba Epesoɗebema djabarã carea Ãcõrẽa iwiɗiɗa
14 Maʉ̃ carea mʉ̃ra dadjirã Boro Jesucrito Zeza quĩrãpita chĩrãboroɗe coɓebaria.*
15 Idjia jũma bajãne ɓeara, naʉ̃ ẽjũãne ɓea siɗa osia idjaɓa idjiɗeba panʉa.*
16 Idjiɗerã itea ne eroɓʉra bio biya quirua. Maʉ̃ bẽrã mʉ̃a iwiɗi ɓʉa idji Jaureɗeba idji ʉɓʉara bãrãa soɗe diamãrẽã. Mãwã bãrãra zarea ɓeaɗia.
17 Idjaɓa iwiɗi ɓʉa ĩjã panʉ bẽrã Critora bãrã soɗe ɓamãrẽã. Iwiɗi ɓʉa bãrãra ne jũmane quĩrĩãneba pananamãrẽã. Mãwã zarea ɓeaɗia bio carra jida panʉ quĩrãca.
18 Maʉ̃ne bãrãba jũma Ãcõrẽ ẽberãrã ume poya cawaɗia Crito quĩrĩãra waiɓʉa ɓʉda, jeɗea ɓʉda, drasoa ɓʉda, ʉ̃tʉ ɓʉda, idjaɓa nãbua ɓʉda.
19 Ara dadji crĩchaɗeba poya cawaɗacamĩna mʉ̃a iwiɗi ɓʉa bãrãba maʉ̃ quĩrĩãra cawaɗamãrẽã. Cawasiɗara ne jũmane Ãcõrẽ quĩrãca ɓeaɗia.
20 3:20-21 ¡Ãcõrẽra bio bia quirua! Idji ʉɓʉa dadjirã soɗe ɓʉɗeba waiɓʉara poya oya dadjirãba crĩchabada cãyãbara wa idjía iwiɗibada cãyãbara. Djabarã, Jesucrito ume panʉ bẽrã ¡ewariza Ãcõrẽa bia beɗeaɗadua! Bia ɓʉa mãwã ɓaida.
Beɗea eɗaare
^ 3:1. Bãrã carea Ãcõrẽa iwiɗibaria. Maʉ̃ra griego beɗeaɗe neẽ́a. Pauloba jarai ɓaɗada jũma jaraẽ́ basía, ãtebʉrʉ dewara crĩchada jaradia ɓesia. Baribʉrʉ zocãrãmaarã idjia jarai basía maʉ̃ djabarã carea Ãcõrẽa iwiɗibarida 3:14ɗe jara ɓʉ quĩrãca.
^ 3:14. Dadjirã Boro Jesucrito. Griego beɗeaɗe ʉ̃cʉrʉ cartaɗe maʉ̃ra neẽ́a.
^ 3:15. Griego beɗeaɗe maʉ̃ versículoda nãwã ɓʉ́ ɓʉa: “Idjiɗeba jũma bajãnebemarãba, naʉ̃ ẽjũãnebemarã biɗa ãdji trʉ̃ra edabadaa.”
