Epeso 4:1-32
4 Mʉ̃ra dadjirã Boro Jesu carea preso ɓʉa. Mʉ̃a bãrãa beɗea djuburiaya jipa nĩbaɗamãrẽã. Ãcõrẽba bãrãra trʉ̃sia mãwã nĩbaɗamãrẽã.
2 Crĩcharãnadua bãrãra dji dromarãda, ãtebʉrʉ sobiaɗeba ɓeaɗadua. Quĩrĩãneba aɓarica dji droaɗadua.
3 Jũma oɗadua ãbaa necai ɓeaɗi carea. Mãwã Ãcõrẽ Jaureba bãrã ãbaa bia ɓʉɗara ãrĩnaẽ́a.
4 Dadjirãra cacua aɓa panʉa. Ãcõrẽ Jaure aɓa ɓʉda eropanʉa. Ãcõrẽba bãrãra trʉ̃sia aɓarida jʉ̃ã pananamãrẽã.
5 Dadjirã Boro Jesura aɓabʉrʉ ɓʉa. Dadjirãba aɓari Jesuda ĩjã panʉa. Idjaɓa aɓari trʉ̃neba borocuesiɗaa.
6 Ãcõrẽra aɓabʉrʉ ɓʉa. Idjira jũmarã Zezaa, jũmarã Boroa. Jũma idjiɗerã soɗe ɓʉa idjaɓa dadjirãneba idjia o quĩrĩã ɓʉra obaria.
7 Baribʉrʉ Critoba dia quĩrĩã ɓaɗa quĩrãca idji biaɗeba dadjirãza idji itea ne oɗamãrẽã awara awara diasia.
8 Ãcõrẽ Beɗeaɗe nãwã ɓʉ́ ɓʉa:
Idji ʉ̃taa wãsiɗe idjia poyaɗara preso edesia. Maʉ̃be ne biada ẽberãrãa diasia.*
9 Idjira ʉ̃taa wãsiaɗa a ɓʉba ¿cãrẽda jara ɓʉ? Jara ɓʉa ʉ̃taa wãi naẽna idjira ʉ̃tʉba naʉ̃ ẽjũãnaa zesida.
10 Dji ʉ̃tʉba eɗaa zeɗadrʉ wayacusa bajã ʉ̃tʉara ɓʉmaa wãsia ne jũmada idjiɗeba ɓeaɗamãrẽã.
11 Idjiabʉrʉ ʉ̃cʉrʉ ɓʉsia idjia diabueɗarãda ɓeaɗamãrẽã, ʉ̃cʉrʉ ɓʉsia Ãcõrẽneba beɗeabadarãda ɓeaɗamãrẽã, ʉ̃cʉrʉ ɓʉsia beɗea bia Critoɗebemada jaradia nĩbaɗamãrẽã, idjaɓa ʉ̃cʉrʉ ɓʉsia idji ẽberãrã wagabadada idjaɓa jaradiabadada ɓeaɗamãrẽã.
12 4:12-13 Idjia mãwã ɓʉsia Ãcõrẽ ẽberãrã carebaɗamãrẽã, ãdjirã biɗa Ãcõrẽ itea poya bia oɗamãrẽã. Mãwã jũma Crito ẽberãrã idji cacua abadara zareara wari wãnia aɓa jũmarãda Ãcõrẽ Warra ĩjã panʉneba idjaɓa cawa panʉneba ãbaa bia panebʉdaɗaa. Maʉ̃ne dadjirãra ne jũmane Crito quĩrãca ɓeaɗia.
14 Mãwãra waa warra zaque quĩrãca ɓeaɗaẽ́a. Warra zaqueba baridua beɗeada ĩjãbaria. Maʉ̃ awara ẽberãrã cũrũga cawa ɓeaba jaradia panʉneba sewada ĩjãbibadaa nãũrãba jãba ãyã edebʉrʉ quĩrãca. Baribʉrʉ dadjirãra maʉ̃ quĩrãca ɓeaɗaẽ́a.
15 Ãtebʉrʉ quĩrĩãneba wãrã beɗeada ẽpẽnida panʉa ne jũmane dadjirã Boro Crito quĩrãca ɓeaɗi carea.
16 Idjiɗeba jũma dadjirã idji cacua abadara ãbaa cara panʉa dji carebaɗi carea. Dadjirãza oɗida panʉ quĩrãca obʉdaɗe jũmarãda quĩrĩãneba bia wari wãnia.
Critoɗeba zocai ɓai djiwiɗi eroɓeara sãwã nĩbaɗida panʉ
17 Bãrãba wãrãda oɗamãrẽã mʉ̃a dadjirã Boro trʉ̃neba naʉ̃da jaraya: waa Ãcõrẽ adua ɓea quĩrãca nĩbarãnadua.* Ãdjirãra crĩcha siriẽ́ ɓeaɗeba nĩbabadaa.
18 Ãdji crĩchara pãĩmane ɓʉ bẽrã Ãcõrẽnebemada cawaɗacaa. Ãdji so zareaba Ãcõrẽra adua panʉ bẽrã idjia zocai ɓai dia ɓʉda neẽ́ panʉa.
19 Ãdjia cadjirua o panʉ carea peraɗacaa. Aɓabe cadjiruada o quĩrĩãbadaa. Ne jũma mĩã perada o panʉba sẽnacaa.
20 Baribʉrʉ bãrãba Crito ĩjãsiɗaɗe cawasiɗaa mãwã ɓeaɗiẽ́ panʉda.
21 Wãrãda bãrãba Jesucritoɗebemada ũrĩnapeɗa ĩjãsiɗaa. Ĩjãpeɗaɗacarea djabarãba wãrã beɗea idjiɗebemada biara jaradiasiɗaa.
22 Ãdjia jaradiapeɗaɗara naʉ̃gʉa: bãrã crĩcha drõãneba waa nĩbarãnadua naẽna o panana quĩrãca. Bãrã crĩcha drõãra jũma ãrĩ ɓʉa naʉ̃ cacua cadjirua o awua ɓʉba cũrũga eroɓʉ bẽrã.
23 Ãtebʉrʉ idu Ãcõrẽa bãrã crĩchara djiwiɗida obiɗadua.
24 Maʉ̃ crĩcha djiwiɗira Ãcõrẽba osia bãrãra idji quĩrãca ɓeaɗamãrẽã. Maʉ̃ bẽrã wua djiwiɗi jʉ̃ panʉ quĩrãca crĩcha djiwiɗiɗeba nĩbaɗadua. Mãwã bãrãra Ãcõrẽ quĩrãpita jipa, biya nĩbaɗia wãrã beɗeaba jara ɓʉ quĩrãca.
25 Maʉ̃ bẽrã sewara idu ɓʉɗadua. Aɓabe wãrãdrʉ djãrã ume beɗeaɗadua, jũma dadjirãra aɓari cacuaɗebema bẽrã.
26 Quĩrũnibʉrʉ cadjiruada orãnadua. Maʉ̃ quĩrũbira soɗe ewari aɓa eroɓearãnadua.*
27 Diaurua idu cũrũgabirãnadua.
28 Ne drʉabari baɗara waa ne drʉaiẽ́ ɓʉa, ãtebʉrʉ ara idji jʉwaba trajaida ɓʉa ne eroɓai carea. Mãwã idjia eroɓaya ne neẽ́ queɗeara carebai carea.
29 Beɗea cadjiruara beɗearãnadua. Ãtebʉrʉ djãrã carebaɗi carea aɓabe beɗea biadrʉ beɗeaɗadua. Mãwã bãrã beɗea ũrĩ ɓeara bia panania.
30 Cadjirua o panʉba Ãcõrẽ Jaurera sopuabirãnadua. Ãcõrẽba idji Jaureda bãrãa diasia sẽyãda ɓamãrẽã. Maʉ̃ba cawabi ɓʉa bãrãra idjiɗerãda. Idji Jaurera bãrã ume ɓaya aɓa Ãcõrẽba idji ẽberãrã jũma bia ɓʉi ewariɗaa.
31 Jũma bãrãba soɗe biẽ́ crĩchabadara, soɗeba quĩrũbadara, quẽguea beɗeabadara, caicayabadara, djãrã biẽ́ jarabadara, idjaɓa jũma djãrã biẽ́ oɗi crĩchabada siɗa ãyã ɓʉɗadua.
32 Sobia ɓeaɗadua. Quĩrã djuburiaya ɓeaɗadua. Bãrã biẽ́ opeɗaɗara quĩrãdoaɗadua Ãcõrẽba bãrã cadjirua Critoɗeba quĩrãdoaɗa quĩrãca.
