Epeso 5:1-33
5 Ãcõrẽba bãrã, idji warrarãra bio quĩrĩã ɓʉa. Maʉ̃ bẽrã idji quĩrãca ɓeaɗadua.
2 Jũmarãda quĩrĩãnadua Critoba dadjirã quĩrĩã ɓʉda unubiɗa quĩrãca. Quĩrĩãneba dadjirã carea ara idjida idu beabisia Ãcõrẽa animarã babue diabʉrʉ quĩrãca. Ãcõrẽba maʉ̃da bia unusia.
3 Bãrãra Ãcõrẽ ẽberãrã bẽrã daunemaniẽ́ panʉa, auɗua nĩbaɗiẽ́ panʉa, idjaɓa djãrãneda awuaɗiẽ́ panʉa. Maʉ̃nebemada ni maãrĩ biɗa beɗeaɗiẽ́ panʉa.*
4 Beɗea cadjiruada, siriẽ́ ɓʉ beɗeada, ijaramia cadjirua siɗa beɗearãnadua mãwã beɗeaira biẽ́ ɓʉ bẽrã.* Ãtebʉrʉ Ãcõrẽa bia ɓʉaɗa aɗadua.
5 Bãrãba cawa panʉa daunemabadara, auɗua nĩbabadara, ne jũma awuabada siɗa Critoba, Ãcõrẽ biɗa ãdji puruɗe edaɗaẽ́da. Ne jũma awua ɓaira jʉwaba oɗa ãcõrẽ ẽpẽ ɓʉ quĩrãca ɓʉa, Ãcõrẽ cãyãbara idjia awua ɓʉda biara ẽpẽ ɓʉ bẽrã.
6 Aɓaʉba sewaɗeba cadjiruada oɗida panʉana aibʉrʉ, idu cũrũgabirãnadua. Cadjirua o panʉ carea Ãcõrẽba idji beɗea ĩjãẽ́ ɓeara cawa oya.
7 Maʉ̃ bẽrã cadjirua obadarã ume aɓarica orãnadua.
8 Naẽna bãrãra pãĩmanebema basía, baribʉrʉ iɗira dadjirã Boro ume panʉ bẽrã bãrãra ʉ̃naanebemaa. Maʉ̃ bẽrã ʉ̃naanebema warrarã quĩrãca nĩbaɗadua.
9 Ʉ̃naane nĩbaɗibʉrʉ sobia ɓeaɗia, jipa oɗia, idjaɓa wãrãneba nĩbaɗia.*
10 Dadjirã Boroba bia unu ɓʉda cawaɗi carea jʉrʉɗadua.
11 Pãĩmanebemarãba cadjirua obadaɗeba ne biada zecaa. Maʉ̃ bẽrã aɓarica orãnadua, ãtebʉrʉ cawabiɗadua ãdjia obadara cadjiruada.
12 Wãrãda dadjira peraɗida panʉa ãdjia cadjirua mẽrã obadaɗebemada beɗeaɗi carea.
13 5:13-14 Baribʉrʉ ne jũmada ʉ̃naane ɓʉbʉdaɗe sãwãbʉrʉ ɓʉda ebuɗa unubibadaa, ʉ̃naane ne jũmada ebuɗa unubada bẽrã. Maʉ̃ carea nãwã jarabadaa:
Ʉ̃rʉ̃madua bʉ cãĩ ɓʉra. Cadjiruaɗe beu ɓaɗada piradrʉdua. Maʉ̃be Critoba bʉra ʉ̃naane ɓʉya.
15 Maʉ̃ bẽrã quĩrãcuita nĩbaɗadua. Adua ɓea quĩrãca nĩbarãnadua, ãtebʉrʉ necawaaɗeba nĩbaɗadua.
16 Bãrãba poya obʉdaza bia oɗadua, naʉ̃ ewariɗe ẽberãrãba ne jũma cadjiruada obada bẽrã.
17 Crĩcha neẽ́ ɓea quĩrãca ɓearãnadua, ãtebʉrʉ bio cawaɗadua cãrẽda dadjirã Boroba obi ɓʉda.
18 Ituaba beu nĩbarãnadua. Maʉ̃gʉba cadjiruada wetara obibaria. Beu nĩbaɗi cãyãbara Ãcõrẽ Jaureɗeba ɓeaɗadua.
19 Ãcõrẽ Beɗeaɗe ɓʉ trʉ̃ãbida, djabarãba trʉ̃ãbadada, idjaɓa Ãcõrẽ Jaureba trʉ̃ãbi ɓʉ siɗa dji carebaɗi carea ãbaa trʉ̃ãnadua. Dadjirã Boroa soɗeba trʉ̃ãnadua bia beɗeaɗi carea.
20 Dadjirã Boro Jesucrito trʉ̃neba ewariza dadjirã Zeza Ãcõrẽa ne jũma carea bia ɓʉaɗa aɗadua.
Dadji quima ume sãwã ɓeaɗida panʉ
21 Crito waya panʉneba aɓarica dji ĩjãnadua.*
22 Wẽrã quima bara ɓea, bãrãba dadjirã Boro Crito beɗea ĩjã obada quĩrãca bãrã quima beɗeara ĩjã oɗadua.
23 Umaquĩrãda idji quima boroa. Ara maʉ̃ quĩrãca Critora idji ẽberãrã Boroa idjaɓa idji ẽberãrãra idji cacua quĩrãca panʉa. Idjira ãdjirã Ẽdrʉ Edabaria.
24 Crito ẽberãrãba idji beɗea ĩjã obada quĩrãca wẽrãba idji quima beɗeara jũma ĩjã ɓaida ɓʉa.
25 Umaquĩrãrã, bãrã quimara quĩrĩã ɓeaɗadua Critoba dadjirã quĩrĩã ɓʉda unubiɗa quĩrãca. Quĩrĩãneba dadjirã carea ara idjida idu beabisia.
26 Idjia mãwã osia dadjirãra Ãcõrẽ itea bia ɓʉi carea. Idji beɗeaba dadjirã cadjiruara sʉgʉsia baidoba sʉgʉɗa quĩrãca.*
27 Jũma maʉ̃gʉra osia dadjirãra idji itea bio biya ɓʉi carea, jaigua neẽ́, bidrubidrua neẽ́, ni baridua mititia neẽ́ biɗa. Idjia quĩrĩã ɓasia dadjirãra idji itea biya ɓeaɗida biẽ́ jaraɗi neẽ́.
28 Ara maʉ̃ quĩrãca umaquĩrãba idji quimara bio quĩrĩã ɓaida ɓʉa ara idji cacua quĩrĩã ɓʉ quĩrãca. Umaquĩrãba idji quimada quĩrĩã ɓʉbʉrʉ, ara idjida quĩrĩã ɓʉa.
29 5:29-30 Ni aɓaʉba ara idji cacuada quĩrãmacaa, ãtebʉrʉ bia ne co ɓʉɗeba bio wagabaria. Ara maʉ̃ quĩrãca Critoba idji ẽberãrãra wagabaria, idji cacua quĩrãca panʉ bẽrã.*
31 Ãcõrẽ Beɗeaɗe nãwã ɓʉ́ ɓʉa:
Maʉ̃ carea umaquĩrãba dji zezara, dji papa siɗa amepeɗa idji quima ume ãbaa ɓeya.
Mãwã cacua aɓa ɓʉ quĩrãca panania.*
32 Maʉ̃ beɗeaba crĩcha droma cawaẽ́ pananada cawabi ɓʉa. Mʉ̃a jara ɓʉa Crito idji ẽberãrã ume ãbaa panʉnebemada.
33 Maʉ̃nebemada cawabi ɓʉmĩna bãdjiza bãrã quimara quĩrĩã ɓeaɗida panʉa ara bãdji quĩrĩã panʉ quĩrãca. Idjaɓa wẽrãba idji quimara waya ɓaida ɓʉa.
Beɗea eɗaare
^ 5:3. Ni maãrĩ biɗa beɗeaɗiẽ́ panʉa. Maʉ̃ beɗeara idjaɓa nãwã traducida ɓʉa: “Nĩbaɗadua dewararãba ni maãrĩ biɗa poya jararãnamãrẽã bãrãba cadjiruada o panʉda.”
^ 5:4. Beɗea cadjiruada. Ʉ̃cʉrʉ cartaɗe “sewada” ɓʉ́ ɓʉa.
^ 5:9. Ʉ̃naane nĩbaɗibʉrʉ. Griego beɗeaɗe ʉ̃cʉrʉ cartaɗe ɓʉ́ ɓʉa: “Ãcõrẽ Jaureɗeba nĩbaɗibʉrʉ.”
^ 5:21. Crito waya panʉneba. Griego beɗeaɗe ʉ̃cʉrʉ cartaɗe ɓʉ́ ɓʉa: “Ãcõrẽ waya panʉneba.”
^ 5:26. Griego beɗeaɗe nãwã ɓʉ́ ɓʉa: “Dadjirã cadjiruara sʉgʉsia baidoba idjaɓa idji beɗeaba.”
^ 5:29-30. Griego beɗeaɗe ʉ̃cʉrʉ cartaɗe naʉ̃ siɗa ɓʉ́ ɓʉa: “Idji djara idjaɓa idji ɓʉwʉrʉ quĩrãca panʉ bẽrã.”
^ 5:31. Genesi 2:24.
