Epeso 6:1-24
6 Warrarã, bãrã djibarirã beɗeara ĩjãnadua dadjirã Boroba quĩrĩã ɓʉ quĩrãca. Maʉ̃gʉra jipa ɓʉa.
2 6:2-3 Ãcõrẽ leyɗe nãwã jara ɓʉa: “Bãrã zezara, bãrã papa siɗa waya pananadua.”* Maʉ̃da ĩjã osiɗara Ãcõrẽba nãwã carebayaɗa asia: “Mãwã bãrãra naʉ̃ ẽjũãne dãrã bia duanania.”* Maʉ̃ basía idji leyɗe naãrã carebayaɗa aɗara.
3 –
4 Zezarã, bãrã warrarãra quĩrũbirãnadua. Ãtebʉrʉ quĩrãcuita jaradia panʉneba idjaɓa jipa obi panʉneba dadjirã Boroba quĩrĩã ɓʉ quĩrãca daupẽnadua.
Nezocarã ãdji boro ume sãwã ɓeaɗida panʉ
5 Nezocarã, bãrã boro naʉ̃ ẽjũãnebema waya panʉneba idjia jarabʉrʉra soɗeba jũma ĩjã oɗadua Crito beɗea ĩjã o panʉ quĩrãca.
6 Aɓabe idjia acʉ ɓʉɗe mãwã orãnadua idji ume bia ɓeaɗi carea. Ãtebʉrʉ soɗeba ĩjã oɗadua bãrãra Crito nezocarã bẽrã. Ãcõrẽba mãwã quĩrĩã ɓʉa.
7 Bãrã boroba jara ɓʉ o panʉne crĩcha biaɗeba oɗadua dadjirã Boro Crito itea o panʉ quĩrãca. Crĩcharãnadua aɓabe naʉ̃ duɗabema boro itea mãwã o panʉda.
8 Bãrãba cawa panʉa nezocabʉrʉ wa nezocaẽ́bʉrʉ, dadji Boro Critoba dadjirãza bajãne diaya dadjia oɗa quĩrãca.
9 Nezoca bororã, bãrã biɗa bãrã nezocara bia oɗadua. Ãdjira waragarãnadua. Quĩrãnebaɗadua ãdji Boro bajãne ɓʉra idjaɓa bãrã Boroda. Idjia jũmarãda ariɗe cawa obaria.
Dadjirã jũãtrʉɗamãrẽã Ãcõrẽba diaɗa
10 Maʉ̃ awara djabarã, dadjirã Boro ʉɓʉa waiɓʉa ɓʉɗeba zarea ɓeaɗadua.
11 Ãcõrẽba bãrãa diasia cadjiruaɗebemada jũãtrʉɗamãrẽã. Maʉ̃gʉba jũãtrʉ ɓeaɗadua sordaoba idji jũãtrʉbari jʉ̃bari quĩrãca. Mãwã bãrãra zarea ɓeaɗia diauruba cũrũgarãmãrẽã.
12 Dadjirãra ẽberãrã ume djõ panʉẽ́a.* Ãtebʉrʉ jairã cadjirua naʉ̃ ẽjũã deɗaaɗe panʉ ume djõ panʉa. Ãdjirãra dji dromaa, ʉɓʉa ɓeaa, naʉ̃ ẽjũã cadjirua bororãa.
13 Maʉ̃ carea Ãcõrẽba jũãtrʉɗamãrẽã diaɗaba jũãtrʉ ɓeaɗadua. Mãwã diauruba mĩã sẽbʉrʉɗe bãrãba poya droaɗia. Poyaɗapeɗa biara zarea ɓeaɗia.
14 Maʉ̃ bẽrã wãrã beɗea ĩjã panʉneba zarea ɓeaɗadua sordaoba jʉ̃ ɓʉ bio trãjʉ̃ eroɓʉ quĩrãca. Jipa nĩbaɗadua cadjiruaɗebemada jũãtrʉɗi carea sordaoba ne zareaba idji so ʉ̃rʉ̃ jũãtrʉbari quĩrãca.
15 Beɗea bia Ãcõrẽ ume necai ɓaiɗebema jaraɗe wãni carea ɓeaɗadua sordaoba djõne wãi carea idji jĩrũne jʉ̃bari quĩrãca.*
16 Maʉ̃ awara ne jũmane Critora ĩjã pananadua. Maʉ̃ra sordaoba jũãtrʉbari idji jʉwaɗe eroɓʉ quĩrãca ɓʉa. Diauruba mĩã sẽbʉrʉɗe cha uruaba drʉbʉrʉ quĩrãca ɓʉa. Baribʉrʉ bãrãba Critoda ĩjã pananibʉrʉ, droaɗia jũãtrʉbariba cha urua quiabʉda quĩrãca.
17 Idjaɓa soɗeba bio cawaɗadua Ãcõrẽba bãrãra wãrãda ẽdrʉ edasida. Maʉ̃ cawa ɓʉra sordaoba ne zarea idji boroɗe jʉ̃bari quĩrãca ɓʉa. Maʉ̃ awara Ãcõrẽ beɗeara idji Jaureɗeba bio cawaɗadua. Ãcõrẽ beɗeaba cadjiruara poyabari bẽrã djõbada neco quĩrãca ɓʉa.
18 Ewariza ne jũma carea Ãcõrẽ Jaureɗeba idjía iwiɗi pananadua. Jũma idji ẽberãrã carea quĩrãcuita sẽnaẽ́ idjía iwiɗi pananadua.
19 Idjaɓa mʉ̃ carea Ãcõrẽa iwiɗi pananadua. Idjía iwiɗiɗadua mʉ̃́a cawabimãrẽã sãwã Critoɗebemada beɗeaida ɓʉda. Mãwã mʉ̃a ne wayaa neẽ́ ẽberãrãa cawabiya beɗea bia Critoɗebema Ãcõrẽba naẽna cawabiẽ́ ɓaɗada.
20 Critoba mʉ̃ra diabuesia maʉ̃ beɗea jaradiamãrẽã. Jaradia ɓʉ carea iɗira mʉ̃ra preso ɓʉa. Ãcõrẽa iwiɗiɗadua mʉ̃a ne wayaa neẽ́ Critoɗebemada beɗeai carea mʉ̃a oida ɓʉ quĩrãca.
Naʉ̃ cartaɗe Pauloba jĩrũare ɓʉɗa
21 Dadjia quĩrĩã panʉ djaba Tiquicoba mʉ̃nebemada bãrãa jũma nẽbʉrʉya cawaɗamãrẽã mʉ̃ra sãwã ɓʉda idjaɓa cãrẽda o ɓʉda. Idjira dadjirã Boro nezocaa. Dadjirã Boro trajura ne jũmane bia obaria.
22 Idjira mʉ̃a bãrãmaa diabuebʉrʉa cawaɗamãrẽã daira sãwã panʉda. Idjia bãrãra sobiabiya.
23 Djabarã, mʉ̃a quĩrĩã ɓʉa dadjirã Zeza Ãcõrẽba, dadjirã Boro Jesucrito biɗa bãrãra carebaɗida dji quĩrĩã pananamãrẽã idjaɓa biara ĩjã pananamãrẽã. Idjaɓa quĩrĩã ɓʉa ãdji necai ɓai siɗa bãrãa dia pananida.
24 Mʉ̃a quĩrĩã ɓʉa Ãcõrẽba idji biaɗeba jũma dadjirã Boro Jesucrito wãrãda bio quĩrĩã ɓeara careba ɓaida. Bia ɓʉa mãwã ɓaida.
Beɗea eɗaare
^ 6:2-3. Exodo 20:12.
^ 6:2-3. Deuteronomio 5:16.
^ 6:12. Ẽberãrã ume djõ panʉẽ́a. Griego beɗeaɗe nãwã ɓʉ́ ɓʉa: “Djara bara ɓea ume, oa bara ɓea ume djõ panʉẽ́a.”
^ 6:15. Maʉ̃ versículora idjaɓa nãwã traducida ɓʉa: “Beɗea bia Ãcõrẽ ume necai ɓaiɗebemada bio ĩjã pananadua zarea panani carea, sordaoba chiradʉga amaaba idji jĩrũne jʉ̃bari quĩrãca.”
