Esdra 1:1-11
1 Persia druaɗebema boro Ciroba babiloniarã poyaɗacarea Ãcõrẽba Jeremianeba jaraɗa quĩrãca osia.* Ara maʉ̃ poaɗe Ciro soɗe ɓʉsia idji de dromada wayacusa omãrẽã. Maʉ̃da Ciroba cartaɗe ɓʉpeɗa jũma drua idji jʉwaeɗa ɓeaa jarabisia. Nãwã ɓʉsia:
2 Persiaɗebema boro Ciroba nãwã jara ɓʉa: Ãcõrẽ bajãne ɓʉba jũma naʉ̃ ẽjũãne ɓea druada mʉ̃ jʉwaeɗa ɓʉsia. Maʉ̃ awara mʉ̃ra ɓʉsia idji de dromada Juda druaɗe Jerusaleʉ̃ puruɗe omãrẽã.
3 Maʉ̃ bẽrã jũma Ãcõrẽ ẽberãrãda Juda druaɗaa wãnida panʉa Jerusaleʉ̃ puruɗe israelerã Ãcõrẽ de dromada oɗi carea. Maʉ̃ne Ãcõrẽba carebaya.
4 Idjaɓa ãdji caita panʉ ẽberãrãba dji wãbʉdarãa paratada, oroda, baridua nebiada, animarã ɓea siɗa diaɗida panʉa. Maʉ̃ awara ãdjirãba soɗeba dia quĩrĩã panʉ quĩrãca diaɗida panʉa Ãcõrẽ de dromada Jerusaleʉ̃ne oɗamãrẽã.
Judiorã Jerusaleʉ̃naa jẽda wãpeɗaɗa
5 Maʉ̃be Judaɗeba yõpeɗaɗa bororãda, Benjamiʉ̃neba yõpeɗaɗa bororãda, levitarãda, sacerdoterãda, dewararã siɗa Jerusaleʉ̃naa Ãcõrẽ de droma oɗe wãni carea panasiɗaa Ãcõrẽba maʉ̃ crĩchara ãdjirã soɗe ɓʉɗa bẽrã.
6 Maʉ̃ne jũma ãdji caita panʉ ẽberãrãba oroda, paratada, netatada, animarãda, nebia nẽbʉa ɓea siɗa diacuasiɗaa. Maʉ̃ awara soɗeba dia quĩrĩã panʉ quĩrãca ne diasiɗaa.
7 Maʉ̃ne Persiaɗebema boro Ciroba Ãcõrẽ de dromane ɓaɗada diabisia. Naẽna Babilonianebema boro Nabucodonosóba maʉ̃gʉra Jerusaleʉ̃neba enepeɗa idji ãcõrẽ deɗe ɓʉsia.
8 Baribʉrʉ Persiaɗebema boro Ciroba idji parata wagabari Mitridate abadaa jũma diabisia. Mitridateba juachapeɗa Juda druaɗebema boro Sesbasáa jũma diasia.
9 Idjia diaɗara naʉ̃gʉ basía: epeɗeco jũgurua oro oɗada 30; epeɗeco jũgurua parata oɗada 1000; neco zaqueda 29;
10 taza oro oɗada 30; taza parata oɗada 410; dewara nebiada 1000.
11 Jũma ãbaa oro oɗara, parata oɗa siɗa 5400 ɓasia. Sesbasára, babiloniarãba jida edepeɗaɗarã siɗa Jerusaleʉ̃naa jẽda wãsiɗaɗe jũma maʉ̃gʉra edesiɗaa.
Beɗea eɗaare
^ 1:1 Jeremia 25:9-11; 29:10-11
