Esdra 3:1-13
3 Juda druaɗe jũẽnapeɗa israelerãra ãdji puruza panesiɗaa. Mãwãnacarea sietebema jeɗecoɗe jũmarãda Jerusaleʉ̃ne ãbaa dji jʉresiɗaa.
2 Maʉ̃ne Josadá warra Jesúaba, waabema sacerdoterãba, Salatiel warra Zorobabelba, idji ẽberãrã biɗa jʉwa ɓʉsiɗaa animarã babue diabadada oɗi carea. Mãwã osiɗaa israelerã Ãcõrẽa animarãda babue diaɗi carea idji nezoca Moiseba diaɗa leyɗe ɓʉ́ ɓʉ quĩrãca.
3 Ãdji caita ɓea ẽberãrãra waya panʉmĩna dji animarã babue diabadara naãrã ɓaɗama osiɗaa.* Oɗapeɗa animarãda diapeɗa, quewara biɗa Ãcõrẽa babue dia panesiɗaa.
4 Idjaɓa Ãcõrẽ leyɗe ɓʉ́ ɓʉ quĩrãca warrewarreabema de zaqueɗe panabada ewarida osiɗaa.* Maʉ̃ne idji leyɗe ɓʉ́ ɓʉ quĩrãca ewariza animarãda idjía babue diasiɗaa.
5 Mamaʉba ʉ̃taa ãdjirãba animarã babue diaɗida panʉ quĩrãca babue diabadjiɗaa: ewarizabemada, jeɗeco djiwiɗiɗebemada, idjaɓa Ãcõrẽba obi ɓʉ ewari droma ɓeazabemada. Maʉ̃ awara ãdji soɗeba dia quĩrĩã panʉ siɗa Ãcõrẽa babue diabadjiɗaa.
6 Ãdjirãba Ãcõrẽ de droma oɗi carea waɗi jʉwa ɓʉɗaẽ́mĩna sietebema jeɗecoɗe nabema ewariɗe animarãda Ãcõrẽa babue dia panesiɗaa.
Ãcõrẽ de droma wayacusa opeɗaɗa
7 Maʉ̃be israelerãba mõgara de o cawa ɓearãa, bacuru de o cawa ɓearãa biɗa paratada diasiɗaa Ãcõrẽ de droma oɗamãrẽã. Idjaɓa Sidoʉ̃nebemarãa, Tiroɗebemarãa biɗa uva ɓada, coɗi careabemada, nedraga siɗa diasiɗaa dji biara ɓʉ bacuruda Libanoneba Jope puruɗaa pusaare enenamãrẽã.* Persiaɗebema boro Ciroba maʉ̃ bacurura enebisia.
8 Israelerã Jerusaleʉ̃ne jũẽpeɗaɗacarea dewarabema poaɗe umébema jeɗecoɗe Salatiel warra Zorobabelba, Josadá warra Jesúaba, waabema sacerdoterãba, levitarãba, jũma Babilonianeba Jerusaleʉ̃naa zepeɗaɗarã biɗa jʉwa ɓʉsiɗaa Ãcõrẽ de dromara oɗi carea. Maʉ̃ne levitarã veinte poa ʉ̃taa ɓeada ɓʉsiɗaa Ãcõrẽ de droma o panʉ bororãda ɓeaɗamãrẽã.
9 Naʉ̃gʉrãda ɓʉsiɗaa: Jesúada, idji warrarãda, idji djabarã siɗa; Hodavíaɗeba yõna Cadmielda, idji warrarã siɗa;* Henadaɗeba yõpeɗaɗa ẽberãrãda, ãdji warrarãda, ãdji djabarã siɗa. Ãdjirãra jũmaena levitarã basía.
10 Ãcõrẽ de droma o panʉba dji edrebema mõgara jũma ɓʉpeɗaɗacarea sacerdoterãra djioɗapeɗa cachiru bara araa wãsiɗaa Ãcõrẽa bia jara trʉ̃ãni carea Israelɗebema boro ɓasi Daviba obi jaraɗa quĩrãca.* Asáɗeba yõpeɗaɗa levitarã siɗa címbalo bara araa wãsiɗaa.
11 Maʉ̃be nãwã trʉ̃ã duanesiɗaa Ãcõrẽa bia beɗeaɗi carea idjaɓa bia ɓʉaɗa aɗi carea:
Ãcõrẽra bio biya quirua.Idjia dai israelerãra ewariza bio quĩrĩã ɓʉa.
Ãcõrẽ de droma edrebema mõgarara ɓʉpeɗaɗa bẽrã jũmarãba Ãcõrẽa bia jara duanʉda ɓʉga duanasiɗaa.
12 Zocãrã sacerdoterã dji drõãrãba, levitarãba, dewara bororã biɗa Ãcõrẽ de droma naãrã ɓaɗada unusiɗaa. Maʉ̃ bẽrã edrebema mõgara djiwiɗi ɓʉpeɗaɗa unusiɗaɗe jĩã duanesiɗaa. Baribʉrʉ dewararãda ɓʉsriɗaba ɓia duanesiɗaa.
13 Mãwã ɓʉga duanʉ bẽrã ni aɓaʉba poya cawaẽ́ basía jĩã duanʉda wa ɓʉsriɗaba ɓia duanʉda. Maʉ̃ ɓʉgaara tʉmʉba ũrĩsiɗaa.
