Exodo 1:1-22
1 Israel warrarã idji ume ãdji warrarã bara Egiptoɗaa ɓaɗe wãpeɗaɗara naʉ̃gʉrã basía:
2 Rubeʉ̃, Simeoʉ̃, Levi, Juda,
3 Isacar, Zabuloʉ̃, Benjamiʉ̃,
4 Daʉ̃, Neptali, Ga, Aser siɗa.
5 Israel warra Josera dãrãbʉrʉ basía Egiptoɗe ɓʉda. Maʉ̃ ewariɗe Jacobo Israel abadaɗeba yõpeɗaɗara Egiptoɗe setentabe panasiɗaa.*
6 Mãwã ɓʉɗe Josera, idji djabarãra idjaɓa jũma idji daucha ɓeaɗa siɗa jaiɗasiɗaa.
7 Baribʉrʉ ãdjirãza warrarã zocãrã unubadjiɗa bẽrã isabe yõnapeɗa bio cãbana panesiɗaa. Maʉ̃ bẽrã dji druara ãdjirãba birasiɗaa.
8 Mãwã ɓʉɗe dewara ẽberãda Egiptoɗebema boroda ɓesia. Maʉ̃gʉba Joseɗebemada adua ɓaɗa bẽrã idji purua nãwã jarasia:
9 –¡Quĩrãcuitaɗadua! Jãʉ̃ israelerãra dadjirã cãyãbara cãbanaara panʉ bẽrã ʉɓʉara panʉa.
10 Maʉ̃ bẽrã crĩcha cawaaɗeba dadjirãba oɗia ãdjirãra auɗuara yõrãnamãrẽã. Mãwã oɗaẽ́bʉrʉ, dji quĩrũda dadjirã ume djõbʉdaɗe israelerãra ãdjirãare djõnia. Mãwãra naʉ̃ druaɗebemada ẽdrʉɗia.–
11 Maʉ̃ carea egiptorãba israelerãa traju zareada õgo obiɗi carea dji bororãda ɓʉcuasiɗaa. Maʉ̃gʉrãba israelerãa Egiptoɗebema boro itea puruda umé obisiɗaa. Aɓa Pitoʉ̃, aɓa Ramese abadjiɗaa. Maʉ̃ puru umé panʉne dji boroba idji itea ewapeɗaɗara wagabadjia.
12 Egiptorãba wetara mĩgabibadjiɗamĩna israelerãra auɗuara yõ wãsiɗaa. Maʉ̃ bẽrã egiptorãba israelerãra waya panesiɗaa.
13 Maʉ̃ carea egiptorãba quĩrã djuburia neẽ́ israelerãra wetara trajabibadjiɗaa.
14 Traju zarea obi panʉneba israelerãra bio bia mĩgabibadjiɗaa. Egoroda chiruaɗaa pueraɗapeɗa de obada mõgarara obibadjiɗaa. Idjaɓa jũma ãdji ẽjũãnebema trajuda obibadjiɗaa. Jũma maʉ̃gʉra ãdjirãba quĩrã djuburia neẽ́ israelerãa obibadjiɗaa.
15 Maʉ̃ ewariɗe wẽrãda umé panasiɗaa, Siprada idjaɓa Púada. Maʉ̃gʉrãba hebreo wẽrãrãda careba warra tobibadjiɗaa.* Egiptoɗebema boroba ãdjía jarasia:
17 Baribʉrʉ dji wẽrãrã careba warra tobibadarãba Ãcõrẽda wayasiɗaa. Maʉ̃ bẽrã Egiptoɗebema boroba jaraɗa quĩrãca oɗaẽ́ basía, ãtebʉrʉ umaquĩrã warra zaquerãra zocai ɓʉbadjiɗaa.
18 Maʉ̃ carea Egiptoɗebema boroba ãdjira trʉ̃peɗa iwiɗisia:
–¿Cãrẽã bãrãba jãwã o panʉ? ¿Cãrẽã umaquĩrã warra zaquerãra zocai ɓʉ panʉ?–
19 Ãdjirãba panusiɗaa:
–Hebreo wẽrãrãra dai Egiptoɗebema wẽrãrã quĩrãca ɓeaẽ́a. Ãdjirãra warra to bia ɓea bẽrã dai jũẽbʉdabara ãdji warrara to eropanabadaa.–
20 Maʉ̃ bẽrã israelerãra waɗibiɗa auɗuara yõ wãsiɗaa. Maʉ̃ba ʉɓʉara panesiɗaa. Ãcõrẽba dji wẽrãrã careba warra tobibadarãra carebasia.
21 Idjida wayapeɗaɗa bẽrã ãdjía warrarãda zocãrã unubisia.
22 Maʉ̃be Egiptoɗebema boroba idji purua jarasia:
–Hebreorãba umaquĩrã warrada toɗibʉrʉ daiɗu ɓatacuaɗadua, baribʉrʉ wẽrãcauda toɗibʉrʉ zocai ɓʉɗadua.–
