Exodo 10:1-29
10 10:1-2 Maʉ̃be Ãcõrẽba Moisea jarasia:
–Mʉ̃a Egiptoɗebema borora, dji dromarã siɗa so zarea ɓʉsia ne ununacada ãdjirã tãẽna oi carea. Mãwãra bãrã warrarãa, bãrã wiuzaquerãa biɗa nẽbʉrʉɗia sãwã maʉ̃ ne ununacaɗeba mʉ̃a unubisida egiptorãra siriẽ́ ɓeada. Mãwã bãrãba cawaɗia mʉ̃drʉ Ãcõrẽda. Jãʉ̃be Egiptoɗebema boromaa jaraɗe wãdua mʉ̃a aɗichichida zocãrã idji druaɗe ɓaebida.–
2 –
3 Ara maʉ̃da Moisera Aaroʉ̃ siɗa Egiptoɗebema boromaa wãnapeɗa nãwã jarasiɗaa:
–Dai hebreorã Ãcõrẽba nãwã jara ɓʉa: “¿Bʉa sãʉ̃bebʉrʉ mʉ̃ra wayai? Mʉ̃ purura idu wãbidua mʉ̃́a animarãda babue diaɗamãrẽã.
4 Baribʉrʉ mʉ̃ puruda idu wãbiẽ́bʉrʉ, nu mʉ̃a aɗichichida bʉ druaɗe zocãrã ɓaebiya.
5 Maʉ̃ne bʉ druara aɗichichiba jũma biraya. Egorora aɓeɗa poya ununaẽ́a. Maʉ̃ aɗichichiba bãrã néu hieloba ãrĩnaẽ́ra jũma coɗia. Bacuru quedua siɗa bãrã ẽjũãne aɗichichiba jũma coɗia.
6 Bʉ dera, dji dromarã dera, jũma waabema egiptorã de siɗa aɗichichiba biraya. Bãrã drõã naẽnabemarãba, bãrã zeza biɗa ununaca basía aɗichichira naʉ̃ quĩrãca ɓaebʉrʉda. Naʉ̃ druaɗe jũẽpeɗaɗa ewariɗeba waɗibiɗa naʉ̃ quĩrãca ununacaa.”–
Moiseba Egiptoɗebema boroa mãwã jarapeɗa wãsia.
7 Maʉ̃be Egiptoɗebema dji dromarãba dji boroa jarasiɗaa:
–¿Bʉa waɗibiɗa jãʉ̃ ẽberãa idu dadjirãra mĩã sẽbi ɓaica? Israelerãra idu wãbidua ãdji Ãcõrẽa animarãda babue diaɗamãrẽã. ¿Bʉa waɗibiɗa adua ɓʉca Egipto druara jũma ãrĩbʉrʉda?–
8 Maʉ̃be Egiptoɗebema boroba Moisera Aaroʉ̃ siɗa wayacusa trʉ̃bipeɗa nãwã jarasia:
–Bãrã Ãcõrẽa animarãda babue diaɗe wãnida panʉa. ¿Baribʉrʉ bãrãra jũmasãwã wãni?–
9 Moiseba panusia:
–Dairãra jũma wãnia. Warra zaquerãra, drõãrãra, dai warrarãra, dai caurã siɗa wãnia. Dai animarã siɗa edeɗia. Dairãra jũma wãnia Ãcõrẽa animarã babue diaɗi bẽrã.–
10 10:10-11 Baribʉrʉ Egiptoɗebema boroba panusia:
–Mãwãẽ́a. Ebuɗa ɓʉa bãrãba biẽ́ o quĩrĩã panʉda. Ãcõrẽba bãrãra careba ɓʉaɗa a panʉa. Baribʉrʉ mʉ̃a bãrãra warrarã bara idu wãbiẽ́a. Aɓabe drõãrãda wãnida panʉa Ãcõrẽa animarãda babue diaɗi carea. ¿Maʉ̃drʉ bãrãba iwiɗi panʉẽ́ca?–
Maʉ̃be Egiptoɗebema boroba Moisera Aaroʉ̃ siɗa idji quĩrãpitabemada ãyã jʉretabisia.
12 Ãcõrẽba Moisea jarasia:
–Bʉ jʉwara naʉ̃ Egipto druaɗe wadua aɗichichida zocãrã ɓaemãrẽã. Mãwã jũma Egipto druara aɗichichiba biraya. Maʉ̃ aɗichichiba jũma chirua hieloba ãrĩnaẽ́ra coɗia.–
13 Ara maʉ̃da Moiseba idji jʉwaɗe eroɓʉ bacurura Egiptoɗe wasia. Maʉ̃ne Ãcõrẽba nãũrãda ʉ̃mãdau odjabariareba tʉbisia. Ãsa, diamasi biɗa Egipto druaɗe tʉ nũmasia. Maʉ̃ nãũrãba nurẽma diapeɗa aɗichichida zocãrã ɓaebisia.
14 10:14-15 Maʉ̃ne jũma Egipto druara aɗichichiba birasia. Aɓeɗa egorora poya ununaca basía. Maʉ̃ ewari naẽna aɗichichira maʉ̃ quĩrãca Egipto druaɗe ununaca basía idjaɓa waa maʉ̃ quĩrãca ununaẽ́a. Hieloba ãrĩnaẽ́ chiruara, nejõ ɓea siɗa aɗichichiba jũma cosiɗaa. Jũma Egipto druaɗe chiruada, bacuru quedua siɗa aɓeɗa neẽ́ ɓesia.
16 Maʉ̃be Egiptoɗebema boroba Moisera, Aaroʉ̃ siɗa isabe trʉ̃bipeɗa nãwã jarasia:
–Iɗibʉrʉ bãrã Ãcõrẽ quĩrãpita, bãrã quĩrãpita biɗa mʉ̃a biẽ́ osia.
17 Maʉ̃ bẽrã mʉ̃a bãrãa beɗea djuburiaya mʉ̃a biẽ́ oɗada quĩrãdoaɗamãrẽã. Idjaɓa bãrã Ãcõrẽa iwiɗiɗadua naʉ̃ aɗichichira mʉ̃ druaɗe jõbimãrẽã. Mãwã oɗaẽ́bʉrʉ dairãra jarrababa quininia.–
18 Ara maʉ̃da Moisera Egiptoɗebema boromaʉba ẽdrʉpeɗa Ãcõrẽa iwiɗisia.
19 Iwiɗibʉrʉɗe Ãcõrẽba nãũrãda dji cãbãyã ʉ̃mãdau ɓaebariareba tʉbisia.* Maʉ̃ nãũrãba aɗichichira Pusa Purru abadaɗe jũma ɓatabuesia. Aɓeɗa aɗichichira Egipto druaɗe ni aɓa biɗa ɓeẽ́ basía.
20 Baribʉrʉ Ãcõrẽba Egiptoɗebema borora so zarea ɓʉɗa bẽrã idjia israelerãra idu wãbiẽ́ basía.
Ãcõrẽba ewari quibiɗa
21 Maʉ̃be Ãcõrẽba Moisea jarasia:
–Bʉ jʉwara ʉ̃taa bajãnaa wadua. Maʉ̃ne ewarira qui dogoya. Jũma Egipto druaɗe aɓeɗa pãĩsosoa nũmeya.–
22 Ara maʉ̃da Moiseba idji jʉwara ʉ̃taa bajãnaa wasia. Maʉ̃ne ewarira qui dogopeɗa ewari ũbea Egipto druaɗe bio pãĩsosoa nũmesia.
23 Maʉ̃ ewari ũbeaɗe ni aɓaʉda idji diguiɗaʉba poya ãyã wãnaẽ́ basía. Ni ãdji caita ɓea siɗa poya ununaẽ́ basía. Baribʉrʉ israelerã panʉma ʉ̃na ɓasia.
24 Maʉ̃be Egiptoɗebema boroba Moisera trʉ̃bipeɗa nãwã jarasia:
–Bãrãra bãdji warrarã bara wãnida panʉa Ãcõrẽa animarãda babue diaɗi carea. Baribʉrʉ bãrã animarãra amenida panʉa.–
25 Moiseba panusia:
–Mãwãẽ́a. Bʉa dai animarãra idu edebida ɓʉa ʉ̃cʉrʉ dai Ãcõrẽa bea diaɗida panʉ bẽrã idjaɓa ʉ̃cʉrʉ idjía babue diaɗida panʉ bẽrã.*
26 Maʉ̃ bẽrã dai animarã siɗa edeɗia. Ni aɓa biɗa amenaẽ́a. Dai animarãnebemada ʉ̃cʉrʉ dai Ãcõrẽa babue diaɗida panʉmĩna ara nawena adua panʉa sãʉ̃gʉdrʉ mãwã oɗida panʉda. Araa jũẽpeɗaɗacarea cawaɗia.–
27 Baribʉrʉ Ãcõrẽba Egiptoɗebema borora so zarea ɓʉsia. Maʉ̃ bẽrã Egiptoɗebema boroba israelerãra idu wãbiẽ́ basía.
28 Maʉ̃ne idjia Moisea jarasia:
–Mʉ̃ quĩrãpitabemada ãyã wãdua. Mʉ̃maa waa zerãdua. Bʉda mʉ̃maa zeibʉrʉ, mʉ̃a bʉra beaya.–
29 Moiseba panusia:
–Bia ɓʉa. Mʉ̃ra bʉmaa waa zeẽ́a.–
Beɗea eɗaare
^ 10:19. Ãcõrẽba nãũrãda dji cãbãyã tʉbisia ʉ̃mãdau ɓaebariareba. Hebreo beɗeaɗe nãwã ɓʉ́ ɓʉa: “Ãcõrẽba nãũrã ʉ̃mãdau odjabariareba tʉbi ɓaɗara dji cãbãyã ʉ̃mãdau ɓaebariareba tʉbisia.”
^ 10:25. Bʉa dai animarãra idu edebida ɓʉa ʉ̃cʉrʉ dai Ãcõrẽa bea diaɗida panʉ bẽrã. Ʉ̃cʉrʉmaarã maʉ̃ hebreo beɗeaba jara ɓʉa: “Mãwãra ¿bʉdji animarãnebemada diaica dai Ãcõrẽa bea diaɗamãrẽã?”
