Exodo 11:1-10
11 Maʉ̃be Ãcõrẽba Moisea jarasia:
–Mʉ̃a Egiptoɗebema borora, egiptorã siɗa wayacusa cawa oya. Mãwã cawa oɗacarea dji boroba bãrã israelerãra idu wãbiya. Aɓeɗa bãrãra idji druaɗebemada ãyã jʉrecuaya.
2 Maʉ̃ bẽrã israelerãa jaradua ãdjirã caita ɓea egiptorãa oro oɗada, parata oɗa siɗa iwiɗiɗamãrẽã.–
3 Ãcõrẽba egiptorãa israelerãra bia unubisia. Dji dromarãba, waabema egiptorã biɗa Moisera dji dromada cawasiɗaa.
4 Egiptoɗebema boromaʉba ãyã wãi naẽna Moiseba idjía jarasia:
–Ãcõrẽba nãwã jara ɓʉa: “Ariquẽtra mʉ̃ra jũma Egipto druaɗe pʉrrʉaya.
5 Maʉ̃ne umaquĩrã warra dji nabemarãra jũma beuɗia. Egiptoɗebema boro umaquĩrã warra dji nabemara beuya. Dji eɗaara ɓʉ nezocawẽrãba eroɓʉ umaquĩrã warra dji nabema siɗa beuya.* Idjaɓa animarã warra dji umaquĩrã naãrã toɗa siɗa jũma beuɗia.
6 Maʉ̃ne jũma Egiptoɗe sopua dromaba ẽberãrãra jĩãbi ɓʉgaɗia. Maʉ̃ ewari naẽna sopuara maʉ̃ quĩrãca ununaca basía ni maʉ̃ quĩrãca waa ununaẽ́a.
7 Baribʉrʉ dai israelerã duanʉma chupea nũmaya sopuaɗaẽ́ bẽrã. Usa siɗa beruɗaẽ́a ni cãrẽ siɗa sãwãnaẽ́ bẽrã.”
Mãwã bãrã egiptorãba cawaɗia Ãcõrẽba dai israelerãra quĩrã awara obarida.
8 Mãwãbʉrʉɗe dji dromarãda mʉ̃maa zeɗia. Ãdjirãra mʉ̃ quĩrãpita chĩrãboroɗe copanenapeɗa jaraɗia: “Wãdua. Jũma israelerã siɗa pe ededua.” Bãrãba mãwã jarabʉdaɗebʉrʉ mʉ̃ra wãya.–
Moisera bio quĩrũ ɓʉda Egiptoɗebema boromaʉba ẽdrʉsia.
9 Naẽna Ãcõrẽba Moisea jaraɗoasia:
–Egiptoɗebema boroba bãrãba jara panʉra ĩjãẽ́ ɓaya. Mãwã mʉ̃a ne ununacada Egiptoɗe zocãrã ocuaya.–
10 Moiseba Aaroʉ̃ biɗa maʉ̃ ne ununaca ɓeara Egiptoɗebema boro quĩrãpita ocuasiɗaa. Baribʉrʉ Ãcõrẽba idjira so zarea ɓʉsia. Maʉ̃ bẽrã Egiptoɗebema boroba israelerãra idji druaɗebemada idu ẽdrʉbiẽ́ basía.
Beɗea eɗaare
^ 11:5. Dji eɗaara ɓʉ nezocawẽrã. Hebreo beɗeaɗe ɓʉ́ ɓʉa: “Nezocawẽrã yuɗe ne ɓa chũmʉ.”
