Exodo 12:1-51
12 Egiptoɗe panasiɗaɗe Ãcõrẽba Moisea, Aaroʉ̃a biɗa nãwã jarasia:
2 –Iɗiba ʉ̃taa naʉ̃ jeɗecora bãrã israelerã itea dji nabema jeɗeco baya.*
3 Jũma israelerãa jaraɗadua: naʉ̃ jeɗecoɗe die ewari jũẽnacarea jũma de bara ɓea umaquĩrãrãba oveja zaqueda wa chiwatu zaqueda aɓa awara ɓʉɗida panʉa ãdji deɗebemarã itea.
4 Baribʉrʉ ʉ̃cʉrʉ deɗe zocãrãẽ́be panʉ bẽrã maʉ̃ animarã djarara jũma poya coɗaẽ́a. Maʉ̃ bẽrã dji de djibariba idji caitabema de djibari ume animarãda aɓa awara ɓʉɗida panʉa. Maʉ̃ animarã beabʉda ewariɗe dji djarara ãdji deɗe ɓearãba cobada quĩrãca diaɗia.
5 Maʉ̃ animarãra jũma bia ɓaida ɓʉa, dji umaquĩrã baida ɓʉa, poa aɓa ɓaida ɓʉa.
6 Maʉ̃ animarãra ewari quĩmãrẽ bio wagaɗida panʉa.
Catorcebema ewari queubʉrʉɗe jũma israelerãba maʉ̃ animarãra beaɗida panʉa.
7 Beabʉdaɗe dji oada piaɗapeɗa maʉ̃ oaba ãdji deɗe eɗa wãbada icawa pʉrʉɗida panʉa. Ara maʉ̃ deɗe dji djarada coɗia.
8 Maʉ̃ diamasi dji djarara bá coɗida panʉa. Chirua aseada, paʉ̃ dji ẽsãbari neẽ́ ɓʉ siɗa coɗida panʉa.
9 Dji djarara õgo õgoa coɗacara panʉa idjaɓa djuɗada coɗacara panʉa. Aɓabe báɗada coɗida panʉa. Bábʉdaɗe dji boro bara, dji jĩrũ bara, idjaɓa dji jʉ̃sira sʉgʉɗapeɗa ɓiteɗa ɓʉɗapeɗa jũma báɗida panʉa.
10 Dji djarara ni maãrĩ biɗa wagaɗiẽ́ panʉa nurẽma coɗi carea. Jũma coɗaẽ́bʉrʉ nurẽma diapeɗa dji aɗubaɗara babueɗida panʉa.
11 Maʉ̃ co panʉne bãrã cacuaɗe jʉ̃badara jũma jʉ̃ ɓeaɗida panʉa, jĩrũne jʉ̃badara jʉ̃ ɓeaɗida panʉa, idjaɓa bãrã bardonara jʉwaɗe eroɓeaɗida panʉa. Isabe ne coɗida panʉa, Egiptoɗeba ẽdrʉɗida panʉ bẽrã. Maʉ̃ ewarira bãrãba trʉ̃ ɓʉɗia “Egiptoɗeba ẽdrʉpeɗaɗa quĩrãnebabada ewari.”
12 Maʉ̃ diamasi mʉ̃ra jũma Egipto druaɗe pʉrrʉaya. Maʉ̃ne mʉ̃a quinibiya jũma Egiptoɗebema umaquĩrã warra dji nabemarãda idjaɓa Egiptoɗebema animarã warra dji umaquĩrã naãrã toɗa siɗa. Mãwã mʉ̃a unubiya egiptorãba ãcõrẽ quĩrãca eroɓeara siriẽ́ ɓeada. Mʉ̃drʉ Ãcõrẽa.
13 Baribʉrʉ bãrãba pʉrʉpeɗaɗa oaba cawabiya bãrãra sãʉ̃gʉ deɗe panʉda. Maʉ̃ oa unubʉrʉɗe mʉ̃ra wãyã wãya. Mãwã mʉ̃a Egiptoɗebema warrarã quinibibʉrʉɗe bãrã umaquĩrã warra dji nabemarãda ni aɓa biɗa beuɗaẽ́a.
14 Iɗiba ʉ̃taa poaza bãrãba, bãrã warrarãneba yõbʉda biɗa ewari dromada mʉ̃ itea oɗida panʉa mʉ̃a maʉ̃ diamasi obʉrʉda quĩrãnebaɗi carea. Maʉ̃ ewari dromada nãwã oɗida panʉa:
15 siete ewari bãrãba paʉ̃ dji ẽsãbari neẽ́ ɓʉda coɗida panʉa. Maʉ̃ ewariɗe ni aɓaʉba paʉ̃ ẽsãbarida idji diguiɗa eroɓacara ɓʉa. Maʉ̃ siete ewariɗe aɓaʉba paʉ̃ ẽsãbari bara ɓʉda coibʉrʉ idjira ãyã jʉretabueɗida panʉa bãrã israelerã tãẽnabemada.
16 Maʉ̃ siete ewari o panʉne dji naãrãbema ewariɗe, dji jĩrũarebema ewariɗe biɗa jũma bãrã israelerãra ãbaa dji jʉreɗida panʉa mʉ̃́a bia beɗeaɗi carea. Maʉ̃ ewari umébemane ni aɓaʉda trajacara panʉa. Aɓabe poya ne djuɗida panʉa maʉ̃ ewariɗe ne coɗi carea.
17 Bãrãba paʉ̃ dji ẽsãbari neẽ́ cobada ewarida o pananida panʉa, maʉ̃ ewariɗe mʉ̃a bãrãra Egiptoɗeba ẽdrʉ edeɗa bẽrã sordaorã djõne wãbada quĩrãca. Poa zebʉrʉza bãrãba, bãrã warrarãneba yõbʉda biɗa maʉ̃ ewari dromara o pananida panʉa.
18 Poaza dji nabema jeɗecoɗe siete ewari bãrãba paʉ̃ dji ẽsãbari neẽ́ ɓʉda coɗida panʉa. Maʉ̃ jeɗecoɗe catorce ewari queuɗaɗeba aɓa siete ewari queubʉrʉɗaa bãrãba mãwã oɗida panʉa.*
19 Maʉ̃ siete ewariɗe bãrãba paʉ̃ ẽsãbarida bãrã diguiɗa eroɓeacara panʉa. Baridua bãrãnebemaba, ãĩbema bãrã tãẽna ɓʉ biɗa paʉ̃ ẽsãbarira coibʉrʉ, idjira ãyã jʉretabueɗida panʉa bãrã tãẽnabemada.
20 Maʉ̃ siete ewariɗe bãrãba ni cãrẽ siɗa coɗiẽ́ panʉa paʉ̃ ẽsãbari bara ɓʉda. Bãdji wãbʉdama aɓabe coɗida panʉa paʉ̃ ẽsãbari neẽ́ ɓeada.–
21 Ãcõrẽba mãwã jaraɗacarea Moiseba Israelɗebema dji bororãda trʉ̃peɗa nãwã jarasia:
–Dji de bara ɓea umaquĩrãba ãdji deɗebemarã itea oveja zaqueda wa chiwatu zaqueda edaɗapeɗa awara ɓʉɗadua. Dji ewari jũẽpeɗa queubʉrʉɗe maʉ̃gʉ animarãra beaɗida panʉa.
22 Beabʉdaɗe dji oara epeɗeco waiɓʉaɗe piaɗida panʉa. Maʉ̃be chirua hisopo abadada ãbaa cajʉ̃napeɗa maʉ̃ oaɗe ɓegueaɗapeɗa bãrã deɗe eɗa wãbada icawa pʉrʉɗadua. Ʉ̃nadrʉi naẽna ni aɓaʉda idji deɗeba ẽdrʉiẽ́ ɓʉa.
23 Ãcõrẽba Egiptoɗebema umaquĩrã warra dji nabemarãda quinibi carea pʉrrʉabʉrʉɗe maʉ̃ oa bãrã deɗe eɗa wãbada icawa pʉrʉɗara unuya. Maʉ̃ bẽrã idjira wãyã wãya. Maʉ̃ oa unubʉrʉɗe dji beabarida bãrã deɗe idu eɗa wãbiẽ́a bãrã umaquĩrã warra dji nabemarã quinibirãmãrẽã.
24 Iɗiba ʉ̃taa poaza bãrãba, bãrã warrarãneba yõbʉda biɗa maʉ̃ ewari dromada o pananida panʉa Ãcõrẽba jaraɗa quĩrãca.
25 Ãcõrẽba diai jaraɗa ẽjũãne jũẽpeɗaɗacarea bãrãba poaza maʉ̃ ewari dromara o pananida panʉa idjia jaraɗa quĩrãca.
26 12:26-27 Bãrã warrarãba iwiɗibʉdaɗe: “¿Cãrẽ cãrẽã naʉ̃ ewari dromara jãwã o panʉ?”, bãrãba panunida panʉa: “Naʉ̃ animarãra bea panʉa Ãcõrẽa bia beɗeaɗi carea. Naʉ̃ ewariɗe quĩrãneba panʉa Ãcõrẽba Egiptoɗebema umaquĩrã warra dji nabemarã quinibisiɗe dadjirã deɗebemada wãyã wãsida dadji umaquĩrã warra dji nabemarã beurãnamãrẽã.”–
28 Maʉ̃be jũma osiɗaa Ãcõrẽba Moisea Aaroʉ̃a biɗa jaraɗa quĩrãca.
Ãcõrẽba Egiptoɗebema umaquĩrã warrarã dji nabemarã quinibiɗa
29 Maʉ̃ diamasi ariquẽtra Ãcõrẽba Egiptoɗebema umaquĩrã warra dji nabemarãda jũma quinibisia.* Egiptoɗebema boro umaquĩrã warra dji nabemada beusia. Preso ɓea umaquĩrã warra dji nabemarã siɗa beusiɗaa. Idjaɓa jũma Egiptoɗebema animarã warra dji umaquĩrã naãrã toɗa siɗa beusiɗaa.
30 Diamasi Egiptoɗebema borora, dji dromarãra, jũma waabema egiptorã siɗa piraposiɗaa. Maʉ̃ne deza jĩãbi ɓʉgasia ãdji umaquĩrã warra dji nabemara jũma quinisiɗa bẽrã.
31 Ara maʉ̃ diamasi Egiptoɗebema boroba Moisera Aaroʉ̃ siɗa trʉ̃bipeɗa nãwã jarasia:
–Bãrã israelerãra isabe mʉ̃ druaɗebemada ãyã wãbʉrʉɗadua. Ãcõrẽa animarãda babue diaɗe wãnadua bãrãba jara panʉ quĩrãca.
32 Bãrã animarã siɗa jũma edeɗadua bãrãba jara panʉ quĩrãca. Idjaɓa Ãcõrẽa iwiɗiɗadua mʉ̃ carebamãrẽã.–
33 Egiptorãba israelerãra ãdji druaɗebemada isabe ãyã wãbi panasiɗaa nãwã crĩcha panana bẽrã: “Israelerãda ãyã wãnaẽ́bʉrʉ dairãra jũma quininia.”
34 Maʉ̃ bẽrã israelerãba ãdji paʉ̃ oɗi carea bʉratʉpeɗaɗada epeɗecoɗe ɓʉsiɗaa. Maʉ̃ bʉratʉpeɗaɗara ẽsãbari neẽ́ ɓasia. Jũma maʉ̃gʉra wuaɗe bʉraɗapeɗa equiaɗe edaɗapeɗa edesiɗaa.
35 Ẽdrʉbʉdaɗe israelerãba Moiseba jaraɗa quĩrãca osiɗaa. Ãdjirãba parata oɗada, oro oɗada, cacuaɗe jʉ̃bada siɗa egiptorãa iwiɗisiɗaa.
36 Ãcõrẽba egiptorãa israelerãra bia unubiɗa bẽrã ne jũma israelerãba iwiɗipeɗaɗara ãdjirãba diasiɗaa. Mãwã ne jũma egiptorãba eropananada israelerãba edasiɗaa.*
Israelerã Egiptoɗeba ẽdrʉpeɗaɗa
37 Egiptoɗeba ẽdrʉsiɗaɗe israelerãra Ramese puruɗeba Suco puruɗaa wãsiɗaa. Seisciento mil drõãrãda jĩrũba wãsiɗaa wẽrãrã, warrarã siɗa juachaɗaẽ́.
38 Ãdji animarã zocãrã eropanʉ siɗa jũma edesiɗaa. Israelerã ume dewara ẽberãrã siɗa zocãrã wãsiɗaa.
39 Egiptorãba isabe wãbisiɗa bẽrã israelerãra poya ne djuɗaẽ́ basía edeɗi carea. Maʉ̃ bẽrã ãdjia Egiptoɗe bʉratʉpeɗaɗa paʉ̃ dji ẽsãbari neẽ́ ɓʉda ota ãbusiɗaa.
40 Egiptoɗe israelerãra cuatrociento treinta poa panasiɗaa.*
41 Maʉ̃ cuatrociento treinta poa daucha jũẽsiɗe israelerãra Ãcõrẽ sordaorã quĩrãca Egipto druaɗeba jũma ẽdrʉsiɗaa.
42 Maʉ̃ diamasi Ãcõrẽba israelerãra waga ɓasia Egiptoɗeba ẽdrʉ edei carea. Maʉ̃ bẽrã poaza israelerãba, ãdji warrarãneba yõbʉda biɗa aɓari ewari quĩrãca diamasi idji itea wagaɗida panʉa.
Egiptoɗeba ẽdrʉpeɗaɗa quĩrãnebabada ewari
43 Ãcõrẽba Moisea Aaroʉ̃a biɗa jarasia:
–Bãrã Egiptoɗeba ẽdrʉpeɗaɗa quĩrãnebaɗi carea ne cobadara nãwã oɗida panʉa. Ni aɓaʉ ãĩbema israelerã tãẽna ɓʉba maʉ̃ cobadara cocara ɓʉa.
44 Baribʉrʉ Israelɗebema aɓaʉba ãĩbemada idji nezoca bamãrẽã nẽdoibʉrʉ, maʉ̃ nezocara cacua wẽãgosira ne cobadara coida ɓʉa.
45 Baribʉrʉ parata carea traja ɓʉ ãĩbemaba maʉ̃ cobadara cocara ɓʉa. Idjaɓa baridua bãrã tãẽna ɓʉ ãĩbemaba maʉ̃ cobadara cocara ɓʉa.
46 Maʉ̃ ne cobadara bãdji deɗe eɗa coɗida panʉa. Maʉ̃ne dji djarada ni maãrĩ biɗa dajadaa edeɗacara panʉa. Idjaɓa dji ɓʉwʉrʉra ɓʉaweɗacara panʉa.
47 Jũma israelerãba maʉ̃ cobadara coɗida panʉa.
48 Bãrã tãẽna ɓʉ ãĩbemaba maʉ̃ ne cobadara co quĩrĩã ɓʉbʉrʉ, naãrã idji cacuara wẽãgoida ɓʉa. Idjaɓa jũma umaquĩrã idji ẽberãrã siɗa mãwã oɗida panʉa. Maʉ̃bebʉrʉ idjia maʉ̃ cobadara coida ɓʉa, israelerã quĩrãca ɓʉ bẽrã. Baribʉrʉ cacua wẽãgoẽ́ ɓʉba maʉ̃ cobadara cocara ɓʉa.
49 Maʉ̃ ne cobadara bãrã israelerãba, ãĩbema bãrã tãẽna panʉ biɗa ara mʉ̃a jara ɓʉ quĩrãca oɗida panʉa.–
50 Israelerãba Ãcõrẽba Moisea Aaroʉ̃a biɗa jaraɗa quĩrãca jũma osiɗaa.
51 Ara maʉ̃ ewariɗe Ãcõrẽba israelerãra Egiptoɗeba jũma ẽdrʉ edesia sordaorã djõne wãbada quĩrãca.
Beɗea eɗaare
^ 12:2. Hebreorãba jeɗeco juachabadara dadjirãba juachabada quĩrãca ɓʉẽ́a. Jeɗeco zaque odjabʉrʉza aɓa dewarabema odjabʉrʉɗaa jeɗeco aɓa abadaa. Maʉ̃za trʉ̃ bara ɓʉa. Ãdjia jeɗeco juachabada quĩrãca dji nabema jeɗecora marzoɗe wa abrilɗe odjabaria. Exodo 12:5ɗe maʉ̃ jeɗecora Abib abadaa. Nehemia 2:1ɗe Nisaʉ̃ abadaa.
^ 12:18. Catorce ewari queuɗaɗeba aɓa siete ewari queubʉrʉɗaa. Cãpũrĩã beɗeaɗe ɓʉ́ ɓʉa “el día catorce hasta el día veintiuno.”
^ 12:29. Exodo 4:23.
^ 12:36. Exodo 3:21-22.
^ 12:40. Genesi 15:13-15.
