Exodo 14:1-31
14 Maʉ̃be Ãcõrẽba Moisea jarasia:
2 –Israelerãa jaradua Pi-Ajiroɗaa jẽda wãnamãrẽã. Jãma Migdol puru quĩrãpe pusa icawa ãdji wua dera Baal-Zepoʉ̃ caita ocuaɗida panʉa.
3 Mãwãra Egiptoɗebema boroba crĩchaya ẽjũã põãsa ewaraga ɓʉɗe bãrã israelerãra nocoɗaa poya wãnaẽ́ bẽrã baridua nĩnada.
4 Maʉ̃ne mʉ̃a Egiptoɗebema borora so zarea ɓʉya. Maʉ̃ bẽrã idjia bãrãra caiɗu ẽpẽya. Baribʉrʉ mʉ̃a idjira, idji sordaorã siɗa poyaya mʉ̃drʉ dji dromaara ɓʉda unubi carea. Mãwã egiptorãba cawaɗia mʉ̃ra Ãcõrẽda.–
Ara maʉ̃da israelerãra Ãcõrẽba jaraɗa quĩrãca jẽda wãsiɗaa.
5 Maʉ̃ ewariɗe Egiptoɗebema boroa israelerã mĩrũ wãsiɗada jarasiɗaa. Maʉ̃ne idjia, dji dromarã biɗa israelerã idu wãbipeɗaɗada jẽda crĩchasiɗaa. Nãwã jarasiɗaa: “¿Cãrẽ cãrẽã jãwã israelerãra idu wãbisiɗa? Dadjirãba õgo trajabibadara neẽ́ panesiɗaa.”
6 Ara maʉ̃da Egiptoɗebema boroba djõbada carretara cawayoɗe jʉ̃bicuasia israelerã caiɗu wãi carea. Idjaɓa idji sordaorãra trʉ̃bisia idji ume wãnamãrẽã.
7 Carreta dji biara ɓeada seisciento edesia. Maʉ̃ awara jũma dewara carreta siɗa pe edesia. Carretaza sordaorã boroda aɓa ɓeasia.
8 Maʉ̃ne Ãcõrẽba Egiptoɗebema borora so zarea ɓʉsia israelerã caiɗu wãmãrẽã. Ãcõrẽ ʉɓʉaɗeba israelerãra Egiptoɗeba ẽdrʉpeɗaɗamĩna Egiptoɗebema borora idji sordaorã ume caiɗu wãsiɗaa.*
9 Jũma Egiptoɗebema sordaorãra israelerã caiɗu wãsiɗaa; cawayoɗeba djõbadarãda, carretaɗeba djõbadarãda, waabema sordaorã siɗa. Israelerãra pusa icawa Pi-Ajiro caita Baal-Zepoʉ̃ quĩrãpe unune wãsiɗaa.
10 Israelerãba Egiptoɗebema boro, idji sordaorã ume ãdji caiɗu zebʉdada unusiɗaɗe bio ne wayaɗapeɗa Ãcõrẽa quĩrã djuburiada iwiɗi duanesiɗaa.
11 Maʉ̃ne ãdjirãba Moisea jarasiɗaa:
–¿Bʉa cãrẽ cãrẽã jãwã osi? ¿Cãrẽ cãrẽã Egiptoɗeba dairãra nama pe enesi? ¿Egiptoɗe dairã jouɗi carea ẽjũãra neẽ́ basica? ¿Bʉa dairãra naʉ̃ ẽjũã põãsa ewaraga ɓʉɗe beubi carea enesica?
12 ¿Egiptoɗe panasiɗaɗe dairãba bʉ́a egiptorã itea idu trajabiduaɗa aɗaẽ́ basica? Naʉ̃ ẽjũã põãsa ewaraga ɓʉɗe beuɗi cãyãbara biara ɓacasia egiptorã nezocarãda ɓeaɗida.–
13 Baribʉrʉ Moiseba ãdjirãa jarasia:
–Ne wayarãnadua. Necai duananadua. Iɗi ununia sãwã Ãcõrẽba bãrãra egiptorãba ẽpẽ panʉnebemada ẽdrʉ ɓʉida. Iɗiba ʉ̃taa bãrãba naʉ̃ egiptorã bãrã caiɗu zebʉdara waa ununaẽ́a.
14 Ãcõrẽra bãrã carea djõya. Maʉ̃ bẽrã necai pananida panʉa.–
15 Maʉ̃be Ãcõrẽba Moisea jarasia:
–¿Bʉa cãrẽ cãrẽã waɗibiɗa mʉ̃́a quĩrã djuburiada iwiɗi ɓʉ? Israelerãa jaradua nocoɗaa wãnamãrẽã.
16 Bʉa jʉwaɗe eroɓʉ bacurura pusaɗaa wadua oda pusa ẽsi ewamãrẽã. Maʉ̃ oɗe israelerãra pusa quĩrãrã chãnia.
17 14:17-18 Maʉ̃ne mʉ̃a egiptorãra so zarea ɓʉya bãrã ẽpẽnamãrẽã. Maʉ̃be mʉ̃a Egiptoɗebema borora, carretaɗeba djõbada sordaorãra, cawayoɗeba djõbada sordaorãra, waabema sordaorã siɗa jũma poyaya mʉ̃drʉ dji dromaara ɓʉda unubi carea. Mãwã egiptorãba cawaɗia mʉ̃ra Ãcõrẽda.–
19 14:19-20 Maʉ̃be Ãcõrẽ bajãnebema nezoca israelerã na nĩbaɗara ãdjirã jẽdaare ɓesia. Mãwã israelerã nocoare ɓaɗa jʉ̃rãrã ʉ̃tʉba eɗaa drasoa jira ɓʉra ãdjirã jẽdaare ɓesia idjaɓa egiptorã nocoare ɓesia. Diamasi maʉ̃ jʉ̃rãrãba israelerãma ʉ̃na eroɓasia baribʉrʉ egiptorãma pãĩsosoa eroɓasia. Maʉ̃ bẽrã maʉ̃ diamasi egiptorãra israelerãma poya jũẽnaẽ́ basía.
21 Moiseba idji jʉwara pusaɗaa ʉ̃taa wasia. Ara maʉ̃da ʉ̃mãdau odjabariareba Ãcõrẽba nãũrãda dji cãbãyã tʉbisia. Maʉ̃ diamasi nãũrãra tʉ nũmʉda ʉ̃nadrʉsia. Maʉ̃ba pusa ẽsi oda ewasia.
22 Israelerãra maʉ̃ o ewa jira ɓʉɗe chãsiɗaa. Chãbʉdaɗe pusara ãdjirã jʉwa araare idjaɓa ãdjirã jʉwa acʉare biɗa ʉ̃tʉba eɗaa jũãtrʉ nũmʉ quĩrãca nũmesia.
23 Maʉ̃be jũma Egiptoɗebema boroba edeɗa cawayoɗeba djõbada sordaorãra, carretaɗeba djõbada sordaorãra, waabema sordaorã siɗa maʉ̃ o ewa jira ɓʉɗe israelerã caiɗu wãsiɗaa.
24 Ʉ̃nadrʉboɗoɗe Ãcõrẽba egiptorãra dji jʉ̃rãrã ʉ̃tʉba eɗaa drasoa uruga jira ɓʉɗeba acʉ ɓasia. Maʉ̃ne idjia ãdjirãra cawaɗaẽ́ errunĩbabisia.
25 Idjaɓa ãdji carreta jĩrũra ẽcuabisia.* Egiptorãra nocoɗaa poya wãnaẽ́ bẽrã nãwã jara duanesiɗaa:
–¡Jẽda wãnadrʉ! ¡Israelerãra waa ẽpẽnaẽ́a! ¡Ãcõrẽra ãdjirãare dadjirã ume djõ ɓʉa!–
26 Israelerã chãpeɗaɗacarea Ãcõrẽba Moisea jarasia:
–Bʉ jʉwara pusaɗaa ʉ̃taa wadua Egiptoɗebema sordaorãra, carretaɗeba djõbada sordaorãra, cawayoɗeba djõbada sordaorã siɗa pusaba ãnẽɓari edamãrẽã.–
27 Ara maʉ̃da Moiseba idji jʉwara pusaɗaa ʉ̃taa wasia. Ʉ̃nadrʉbʉrʉɗe pusara wayacusa idji ɓaɗa quĩrãca dogosia. Maʉ̃ne egiptorãra ẽdrʉɗi carea jẽda piracuasiɗamĩna pusaba ãnẽɓari edasia. Mãwã Ãcõrẽba ãdjirãra pusaɗe quinibisia.
28 Pusa idji ɓaɗa quĩrãca ũmesiɗe Egiptoɗebema boroba edeɗa carretaɗeba djõbada sordaorãra, cawayoɗeba djõbada sordaorã siɗa jũma ãnẽɓari edasia. Aɓeɗa jũma israelerã caiɗu wãpeɗaɗara pusaba ãnẽɓari edasia. Ni aɓa biɗa zocai ɓeẽ́ basía.
29 Baribʉrʉ israelerãra pusa ẽsi o ewa jira ɓʉɗe chãsiɗaa. Chãsiɗaɗe pusara ãdjirã jʉwa araare, ãdjirã jʉwa acʉare biɗa ʉ̃tʉba eɗaa jũãtrʉ nũmʉ quĩrãca nũmesia.
30 Maʉ̃ ewariɗe Ãcõrẽba israelerãra egiptorãba ẽpẽ panananebemada ẽdrʉ edasia. Maʉ̃ne israelerãba unusiɗaa Egiptoɗebema quinipeɗaɗara pusa ĩbʉɗe taɓeada.
31 Israelerãba unusiɗaa sãwã Ãcõrẽba idji ʉɓʉaɗeba egiptorãra poyasida. Maʉ̃ bẽrã idjira wayasiɗaa. Idjia jara ɓʉra, idji nezoca Moiseba jara ɓʉ siɗa ãdjirãba ĩjãsiɗaa.
