Exodo 15:1-27
15 Maʉ̃be Moiseba jũma israelerã biɗa Ãcõrẽa nãwã trʉ̃ãsiɗaa:
Mʉ̃a Ãcõrẽa trʉ̃ãya idjira dji dromaara ɓʉda unubiɗa bẽrã.
Pusaɗe ɓatabuebʉrʉ quĩrãca idjia Egiptoɗebema sordaorãda ãdji cawayo bara pusaɗe quinibisia.
2 Ãcõrẽba mʉ̃́a ʉɓʉada dia ɓʉa. Idji carea mʉ̃ra trʉ̃ã ɓʉa. Idjia mʉ̃ra ẽdrʉ edasia.
Idjira mʉ̃ Ãcõrẽa. Mʉ̃a idjía bia beɗeaya.
Idjira mʉ̃ zezaba ĩjã ɓaɗa Ãcõrẽa. Idjira dji dromaara ɓʉaɗa aya.
3 Ãcõrẽra djõ cawa ɓʉa. Idji trʉ̃ra Jehová abadaa.
4 Egiptoɗebema boro sordaorãda ãdji carreta bara Ãcõrẽba jũma pusaɗe ɓatacuasia.
Maʉ̃ sordaorã bororã dji biara ɓea siɗa Pusa Purruɗe jũma nãbʉrʉ quinisiɗaa.
5 Egiptorãra pusa nãbuaba ãnẽɓari edasia. Ãdjirãra mõgara quĩrãca pusa nãbuaɗe ta wãsiɗaa.
6 Ãcõrẽ, bʉ jʉwa arara bio ʉɓʉa ɓʉa. Bʉ ʉɓʉaɗeba dji quĩrũra jũma poyasia.
Bʉ jʉwa araba ãdjirãra berrachisia.
7 Bʉ ʉɓʉa waiɓʉa ɓʉɗeba jũma bʉmaa djõne zepeɗaɗara poyasia.
Bʉ quĩrũbira ãdjirãa unubisia. Maʉ̃ne jũma ãdjirãra chirua quĩrãca bá wãsia.
8 Bʉ quẽbʉba jãrãpuabʉrʉba pusa ẽsi oda ewasia.
Maʉ̃ o orroza pusara ʉ̃tʉba eɗaa jũãtrʉ nũmʉ quĩrãca nũmesia.
Pusajãne biɗa baidora maʉ̃ o orroza ipi nũmesia.
9 Maʉ̃ne dji quĩrũba crĩchasiɗaa:
“Israelerã caiɗu ẽpẽnapeɗa jidaɗia. Maʉ̃be ne jũma ãdjia eropanʉra jãrĩnapeɗa dadjirãza jeɗecaɗia.
Mãwã ne jũma dadjirãba quĩrĩã panʉra eropanania.
Dadjirã necora ẽũta edaɗapeɗa ãdjirãra beacuaɗia.”
10 Baribʉrʉ bʉa nãũrã tʉbibʉrʉɗe dji quĩrũra pusaba jũma ãnẽɓari edasia.
Ãdjirãra mõgara quĩrãca pusa quĩrũ nũmʉne ta wãsiɗaa.
11 Ãcõrẽ, ẽberãrãba ãcõrẽ abada tãẽna dewarada neẽ́a bʉ quĩrãca.
Ni aɓaʉda neẽ́a bʉ cãyãbara dji dromaara ɓʉda.
Bʉa o ɓʉ carea jũmarãba bʉra wayabadaa.
Bʉabʉrʉ ne ununaca waiɓʉa ɓeara obaria.
12 Bʉ ʉɓʉara bʉa unubisia. Maʉ̃neba pusaba dji quĩrũra mĩsia.*
13 Bʉ quĩrĩã jõcaɗeba dairã bʉa ẽdrʉ edaɗa purura cawa edeya.
Bʉ ʉɓʉaɗeba dairãra bʉ ɓabarima bia jũẽbiya.
14 Maʉ̃ ũrĩbʉdaɗe dewara puru ɓeara ne wayaaba ure duanania.
Pilisteorãra sopua duanania.
15 Edoʉ̃ druaɗebema bororãra bio ne waya duanania.
Moab druaɗebema mẽsrã ɓearãda ne wayaaba ure duanania.
Jũma Canaaʉ̃nebemarãra sozarra pananada ne waya duanania.
16 Jũma maʉ̃gʉrã ẽberãrãra bio ne waya duanania.
Ãcõrẽ, bʉ ʉɓʉa carea ãdjirãra mõgara quĩrãca chupea panania bʉ purura wãyã wãbʉrʉɗe.
Ãdjirãra chupea panania bʉa edaɗa purura wãyã wãbʉrʉɗe.
17 Ãcõrẽ, bʉa dairãra bʉ itea edaɗa eyaɗe pananamãrẽã edeya.
Bʉa dairãra edeya bʉa dairã tãẽna ɓai carea edaɗa ẽjũãnaa.
Ãcõrẽ, mama bʉ de dromara dairã tãẽna osia.
18 Ãcõrẽra ewariza jũmarã boro baya.
Mariaba trʉ̃ãna
19 Israelerãra pusa ẽsi o ewa jira ɓʉɗe chãsiɗaɗe pusa quĩrãrẽ bia jũẽsiɗaa. Baribʉrʉ Egiptoɗebema boroba edeɗa cawayoɗeba djõbada sordaorãba, carretaɗeba djõbada sordaorã biɗa israelerã caiɗu ẽpẽsiɗaɗe Ãcõrẽba pusara ãdjirã ʉ̃rʉ̃ ãnẽɓari wãbisia.
20 Maʉ̃ne Aaroʉ̃ djabawẽrã Mariada Ãcõrẽneba beɗeabari basía. Maʉ̃ Mariaba, jũma Israelɗebema wẽrãrã biɗa tõnõãda edaɗapeɗa ɓʉsriɗaba cari duanasia.
21 Mariaba ãdjirãa nãwã trʉ̃ãsia:
Trʉ̃ãnadua Ãcõrẽa, idjira dji dromaara ɓʉda unubiɗa bẽrã.
Idjia Egiptoɗebema sordaorãda ãdji cawayo bara pusaɗe ɓatacuasia.
Baido asea ɓaɗa
22 Pusa Purru abadaɗeba Moiseba israelerãra ẽjũã põãsa ewaraga ɓʉɗe pe edesia. Maʉ̃ ẽjũã põãsa ewaraga ɓʉra Sur abadaa. Ãdjirãra ewari ũbea baido ununaẽ́ nĩbasiɗaa.
23 Mãwã nĩnane baido ɓʉma jũẽsiɗaa. Baribʉrʉ maʉ̃ baidora asea ɓʉ bẽrã poya doɗaẽ́ basía. Maʉ̃ carea maʉ̃ baidora trʉ̃ ɓʉsiɗaa Mará.*
24 Maʉ̃ne ãdjirãba Moisea quĩrũbiɗeba nãwã biẽ́ jarasiɗaa:
–¿Dadjirãba nama cãrẽda doɗi?–
25 Maʉ̃ carea Moiseba Ãcõrẽa quĩrã djuburiada iwiɗisia. Maʉ̃ne Ãcõrẽba Moisea bacuru taɓʉda unubisia. Maʉ̃ bacuruda Moiseba baidoɗe ɓatabuesiɗe baido asea ɓaɗara cũã ɓesia.
Mama Ãcõrẽba naʉ̃ beɗeada ɓʉsia israelerãba ĩjãni cawaya.
26 Nãwã jarasia: “Mʉ̃ra bãrã Ãcõrẽa. Mʉ̃a jara ɓʉda bãrãba quĩrãcuita ũrĩnibʉrʉ, idjaɓa ne jũmane mʉ̃ quĩrãpita jipa oɗibʉrʉ, idjaɓa mʉ̃ leyda jũma oɗibʉrʉ, mʉ̃a bãrãra cacua biẽ́ ɓebiẽ́a egiptorã cacua biẽ́ ɓebiɗa quĩrãca. Mʉ̃ra bãrã cacua biabibari Ãcõrẽa.”
27 Maráɗeba israelerãra Eliʉ̃ abadaɗe jũẽne wãsiɗaa. Mama baido egoroɗeba ʉ̃taa bogadrʉ ɓʉda doce panasiɗaa. Idjaɓa uruta quĩrãca ɓeada setenta panasiɗaa. Maʉ̃ baido caita israelerãra duanesiɗaa.
