Exodo 16:1-36
16 Egiptoɗeba ẽdrʉpeɗaɗacarea jeɗeco aɓa babʉrʉɗe israelerãra Eliʉ̃ abadaɗeba ẽjũã põãsa ewaraga ɓʉ Siʉ̃ abadaɗaa wãsiɗaa. Siʉ̃ra Eliʉ̃ idjaɓa Sinai eya ẽsi ɓʉa.
2 Maʉ̃ ẽjũã põãsa ewaraga ɓʉɗe coɗi neẽ́ ɓʉ bẽrã jũma israelerãba Moisera, Aaroʉ̃ siɗa biẽ́ jarasiɗaa.
3 Quĩrũbiɗeba ãdjirãba Moisea, Aaroʉ̃a biɗa nãwã jarasiɗaa:
–Biara ɓacasia Ãcõrẽba dairãra idu Egipto druaɗe beubiɗabara. Jãma dairãra necai ne co duanabadjiɗaa. Nedjarada, paʉ̃ siɗa aɗuba eropanasiɗaa. Baribʉrʉ bãrãba dairãra naʉ̃ ẽjũã põãsa ewaraga ɓʉmaa jarrababa quenani carea enesiɗaa.–
4 Maʉ̃ne Ãcõrẽba Moisea jarasia:
–Mʉ̃a cue bajãneba zebibari quĩrãca paʉ̃da bajãneba zebiya israelerãba coɗamãrẽã. Nãwã mʉ̃a cawaya ãdjirãba jũma mʉ̃a jara ɓʉra ĩjã pananida wa ĩjã pananaẽ́da: diapeɗaza ãdjirãba ara maʉ̃ ewariɗe coɗira jʉrʉ peɗe wãnida panʉa. Ewari juesuma mãwã oɗida panʉa.
5 Baribʉrʉ seibema ewariɗe diapeɗeɗa jʉrʉ peɗida panʉa ara maʉ̃ ewariɗe coɗira idjaɓa nurẽma coɗi siɗa.–
6 16:6-8 Maʉ̃be Moiseba Aaroʉ̃ ume israelerãa jarasiɗaa:
–¿Daira mãwãra cai, bãrãba mãwã daidrʉ biẽ́ jaraɗi carea? Bãrãba daida biẽ́ jara panʉẽ́a; Ãcõrẽdrʉ biẽ́ jara panʉa. Idjia maʉ̃ra ũrĩ ɓʉa. Maʉ̃ carea nane quewara idjia bãrãa cawabiya idjiabʉrʉ bãrãra Egiptoɗeba nama ẽdrʉ enesida. Idjaɓa nu diapeɗa bãrãba ununia idjia ne ununaca waiɓʉada obʉrʉda. Nane quewara idjia nedjarada diaya idjaɓa nu diapeɗa paʉ̃da aɗuba diaya bãrãra jãwũã ne coɗamãrẽã.–
7 –
8 –
9 Maʉ̃be Moiseba Aaroʉ̃a jarasia:
–Israelerãba ne coɗi carea quĩrũbiɗeba biẽ́ jara panʉ bẽrã ãdjirãa jaradua jũmaena Ãcõrẽ quĩrãpita ãbaa dji jʉreɗida panʉda.–
10 Aaroʉ̃ba israelerãa mãwã jara ɓʉɗe jũmarãba ẽjũã põãsa ewaraga ɓʉɗaa acʉsiɗaa. Maʉ̃ne jʉ̃rãrã ãdji na jira ɓʉɗe Ãcõrẽ quĩrãwãrẽã dorrodorroada unusiɗaa.
11 Maʉ̃be Ãcõrẽba Moisea nãwã jarasia:
13 Quewara israelerã duanʉma põrãba birasia. Maʉ̃ awara diapeɗeɗa cũrãsaba ẽjũãra ɓeguea nũmesia.
14 Ẽjũã põãsabʉrʉɗe nãũcha torroa queɗeada odjacuapeɗa ecasia.
15 Maʉ̃ unusiɗaɗe israelerãba cawaẽ́ panasiɗaa cãrẽda mãwã ɓʉda. Maʉ̃ bẽrã ãdjiduɓa iwiɗi duanasiɗaa:
–¿Jãʉ̃ra cãrẽ?–
Maʉ̃ne Moiseba ãdjirãa jarasia:
–Jãʉ̃ra Ãcõrẽba dia ɓʉ paʉ̃a. Idjia dia ɓʉa dadjirãba coɗamãrẽã.
16 Ãcõrẽba nãwã obi ɓʉa: jãʉ̃ paʉ̃ra dadjirãba dadji diguiɗabemarã itea jʉrʉ peɗida panʉa ara dadjia ewari aɓaʉɗe cobada quĩrãca. Ãdjiza epeɗeco jũgurua aɓa edeɗida panʉa.–*
17 16:17-18 Ara maʉ̃da israelerãba ãdji diguiɗabemarãba cobada quĩrãca jʉrʉ pesiɗaa. Ʉ̃cʉrʉba waitabeara jʉrʉ pesiɗaa idjaɓa ʉ̃cʉrʉba maãrĩara jʉrʉ pesiɗaa. Maʉ̃be ãdji diguiɗabemarã itea epeɗeco jũguruaɗe zasiɗaa. Dji waitabeara jʉrʉ peɗaba aɗuba eroɓaẽ́ basía idjaɓa dji maãrĩara jʉrʉ peɗaba cʉrebaeẽ́ basía.
19 Maʉ̃be Moiseba ãdjirãa jarasia:
–Ni aɓaʉba nurẽmabema carea wagaiẽ́ ɓʉa.–
20 Baribʉrʉ Moiseba jaraɗara ʉ̃cʉrʉba ĩjãnaẽ́ basía. Ãdjirãba waga ɓʉsiɗaa nurẽma coɗi carea. Baribʉrʉ ãdjia waga ɓʉpeɗaɗara oregueapeɗa qui barasia. Ĩjãnaẽ́ panʉ carea Moisera ãdjirã ume quĩrũsia.
21 Nurẽmaza maʉ̃ paʉ̃ra jʉrʉ pebadjiɗaa ãdji diguiɗabemarãba ewari aɓaʉɗe cobada quĩrãca daucha. Diapeɗeɗa jʉrʉ pebadjiɗaa besea jʉ̃wʉ̃rʉ̃ãba maʉ̃ paʉ̃ra dorraɓaripeɗa nẽbabadji bẽrã.
22 Seibema ewariɗe ãdjirãba ewari umé carea jʉrʉ pesiɗaa. Ãdji diguiɗabemarã itea epeɗeco jũgurua umé edasiɗaa. Maʉ̃be israelerã bororãba Moisea jaraɗe wãsiɗaa ãdjia ariɗe osiɗada.
23 Maʉ̃ne Moiseba ãdjirãa jarasia:
–Ara maʉ̃ quĩrãca Ãcõrẽba obi ɓʉa. Ãcõrẽba jarasia: “Nubema ewarira bãrã ʉ̃nãũbada ewaria. Mʉ̃ itea maʉ̃ ewarira bãrãba wagaɗida panʉa. Ʉ̃nãũbada ewariɗe bãrãra ne djuɗiẽ́ panʉ bẽrã, nane oɗadua bãrãba nu co quĩrĩã panʉ quĩrãca. Ne djuɗibʉrʉ nane ne djuɗadua. Ãbuɗibʉrʉ nane ãbuɗadua. Maʉ̃gʉra nubema carea waga ɓʉɗadua.”–
24 Moiseba jaraɗa quĩrãca israelerãba jũma oɗapeɗa waga ɓʉsiɗaa nurẽma coɗi carea. Nurẽma maʉ̃ djico waga ɓʉpeɗaɗara oregueaẽ́ ɓasia idjaɓa qui neẽ́ ɓasia.
25 Maʉ̃ne Moiseba israelerãa jarasia:
–Bãrãba waga ɓʉpeɗaɗa djicora iɗi coɗadua ʉ̃nãũbada ewari bẽrã. Naʉ̃ ewarira Ãcõrẽ itea wagaɗida panʉa. Maʉ̃ bẽrã iɗira Ãcõrẽba dia ɓʉ paʉ̃ra neẽ́ baya.
26 Domiaza sei ewariɗe bãrãba paʉ̃ra jʉrʉ peɗida panʉa. Baribʉrʉ sietebema ewariɗera neẽ́ baya, Ãcõrẽba maʉ̃ ewarira bãrã ʉ̃nãũnamãrẽã ɓʉɗa bẽrã.–*
27 Moiseba mãwã jaraɗamĩna ʉ̃cʉrʉra maʉ̃ ʉ̃nãũbada ewariɗe Ãcõrẽba dia ɓʉ paʉ̃ra jʉrʉ peɗe wãsiɗaa. Mãwãmĩna ununaẽ́ basía.
28 Maʉ̃ carea Ãcõrẽba Moisea jarasia:
–¿Aɓa sãʉ̃be israelerãba mʉ̃a jara ɓʉra ĩjãnaẽ́ panani?
29 Bio cawaɗadua mʉ̃abʉrʉ bãrãa ʉ̃nãũbada ewarida diasida. Maʉ̃ carea domiaza seibema ewariɗe paʉ̃ra ewari umébema carea diabaria. Baribʉrʉ sietebema ewariɗe bãrãra diguiɗa ʉ̃nãũnida panʉa. Maʉ̃ ewariɗe mʉ̃a dia ɓʉ paʉ̃ra jʉrʉ peɗe wãniẽ́ panʉa.–
30 Maʉ̃ bẽrã israelerãra sietebema ewariɗe ʉ̃nãũbadjiɗaa.
31 Ãcõrẽba dia ɓʉ paʉ̃ra israelerãba trʉ̃ ɓʉsiɗaa “maná.” Culãdrʉ ta quĩrãca pichia querasia. Torroa ɓasia idjaɓa cũã ɓasia urrajõnaa oɗa quĩrãca.
32 Maʉ̃be Moiseba israelerãa jarasia:
–Ãcõrẽba nãwã jarasia: “Manára epeɗeco jũgurua aɓa zaɗapeɗa waga ɓʉɗadua bãrã warrarãneba yõbʉdarãba ununamãrẽã. Mãwã ãdjirãba cawaɗia mʉ̃a bãrã Egiptoɗeba ẽdrʉ enesiɗe cãrẽda naʉ̃ ẽjũã põãsa ewaraga ɓʉɗe cobisida.”–
33 Maʉ̃be Moiseba Aaroʉ̃a jarasia:
–Manára epeɗeco jũgurua aɓa zapeɗa zocoɗe wagadua. Maʉ̃ra Ãcõrẽ quĩrãpita ɓʉdua.* Jãma waga eropanania dadji warrarãneba yõbʉdarãba ununamãrẽã.–
34 Ara maʉ̃da Aaroʉ̃ba manáda zapeɗa waga ɓʉsia Ãcõrẽba Moisea jaraɗa quĩrãca. (Nocoarebema ewariɗe maʉ̃ manára Ãcõrẽ baurudeɗe waga ɓʉsiɗaa.)*
35 Israelerãba manáda cuarenta poa cosiɗaa Canaaʉ̃ druaɗe jũẽbʉdamisa. Canaaʉ̃ druaɗe jũẽsiɗaɗe manára waa coɗaẽ́ basía maʉ̃ druaɗebemarãba upeɗaɗada baraaɗa bẽrã.*
36 (Ãdji epeɗeco jũgurua aɓa ẽberã aɓaʉba ewari aɓaʉɗe cobari quĩrãca daucha poya ɓʉa.)*
Beɗea eɗaare
^ 16:16. Epeɗeco jũgurua. Hebreo beɗeaɗe jara ɓʉa “gomer.” Cãpũrĩã beɗeaɗe jara ɓʉa “litro umé.”
^ 16:26. Genesi 2:3.
^ 16:33. Ãcõrẽ quĩrãpita. Zocãrãmaarã maʉ̃ba jara ɓʉa: “Ãcõrẽ baurude quĩrãpita.”
^ 16:34. Hebreo 9:4.
^ 16:35. Josue 5:12.
^ 16:36. Hebreo beɗeaɗe, cãpũrĩãne biɗa nãwã ɓʉ́ ɓʉa: “Un gomer es la décima parte de un efa.”
