Exodo 18:1-27
18 Moise zãwãrẽ Jetro abadara Madiaʉ̃nebemarã sacerdote basía.* Jetroba ũrĩsia sãwã Ãcõrẽba israelerãra Egiptoɗeba ẽdrʉ enesida. Idjaɓa ũrĩsia sãwã Ãcõrẽba idji puru Israelera, Moise siɗa carebasida.
2 Naẽna Moiseba idji quima Seporáda ãdji warrarã siɗa dji zezamaa diabuesia. Maʉ̃ne Jetroba idji caura, dji warrarã umé panʉ siɗa idji deɗe bia edasia.
3 Idji warra nabema tosiɗaɗe Moiseba jarasia: “Naʉ̃ druaɗe mʉ̃ra drua ãĩbemada jãwã ɓʉa.” Mãwã dji warrara trʉ̃ ɓʉsia Gersoʉ̃.*
4 Dji tẽãbema tosiɗaɗe Moiseba jarasia: “Mʉ̃ zezaba ĩjã ɓaɗa Ãcõrẽba mʉ̃ra carebasia. Egiptoɗebema boroba beai baɗada idjia mʉ̃ra ẽdrʉ ɓʉsia.” Mãwã dji warrara trʉ̃ ɓʉsia Elieze.*
5 18:5-6 Ẽjũã põãsa ewaraga ɓʉɗe Moisera israelerã ume Ãcõrẽ eya caita duanasiɗaa.* Maʉ̃ne Moise zãwãrẽ Jetroba idjía naʉ̃ beɗeada diabuesia: “Mʉ̃da, bʉ quimada, bʉ warrarã siɗa bʉmaa wãnia.”
Maʉ̃ beɗea diabueɗacarea ãdjirãra Moisemaa wãsiɗaa.
6 –
7 Jũẽbʉdaɗe Moiseba idji zãwãrẽra bio ɓʉsriɗa audiaɓariɗe wãsia. Idji zãwãrẽ quĩrãpita quĩrã eɗaa ɓarrupeɗa idji uridarraɗe isõsia. Maʉ̃ne sãwã ɓʉ cawaya dji iwiɗiɗapeɗa Moise wua deɗe eɗa wãsiɗaa.
8 Maʉ̃be Moiseba idji zãwãrẽa Ãcõrẽba israelerã itea oɗada jũma nẽbʉrʉsia. Ãcõrẽba Egiptoɗebema boro, jũma egiptorã siɗa cawa oɗaɗebemada, ãdjirã oɗe zesiɗaɗe bia mĩga panananebemada, idjaɓa Ãcõrẽba ãdjirã ne jũmane carebaɗaɗebema siɗa jũma nẽbʉrʉsia.
9 Maʉ̃ ũrĩpeɗa Jetrora bio ɓʉsriɗasia Ãcõrẽba israelerãra ne jũmane carebaɗa bẽrã idjaɓa ãdjirãra egiptorã jʉwaeɗabemada ẽdrʉ edaɗa bẽrã.
10 Jetroba nãwã jarasia:
–Bio biya quirua Ãcõrẽra, idjia bãrã israelerãra egiptorã jʉwaeɗabemada, ãdjirã boro jʉwaeɗabema siɗa ẽdrʉ edaɗa bẽrã.
11 Iɗibʉrʉ mʉ̃a cawasia Ãcõrẽra dji dromaara ɓʉda. Dewara ãcõrẽda idji quĩrãca neẽ́a. Mãwã cawa ɓʉa Ãcõrẽba israelerã biẽ́ o eropananarã poyasi bẽrã.–
12 Mãwã jarapeɗa Moise zãwãrẽ Jetroba Ãcõrẽa animarãda babue diasia. Dewara animarã siɗa Ãcõrẽa bea diasiɗe Aaroʉ̃ra, jũma israelerã bororã siɗa idji ume ãbaa dji jʉreɗapeɗa Ãcõrẽ quĩrãpita maʉ̃ animarã djarara cosiɗaa.
Moiseba israelerã bororã ɓʉcuaɗa
13 Nurẽma Moisera chũmesia israelerã nẽbʉra cawa oi carea. Diapeɗabemada aɓa queubʉrʉɗaa israelerãra Moisema powua duanasiɗaa ãdji nẽbʉrada cawa omãrẽã.
14 Moise zãwãrẽba maʉ̃ unusiɗe idjía jarasia:
–¿Cãrẽ cãrẽã jãwã bʉduɓaʉba naʉ̃ ẽberãrã nẽbʉrara cawa o ɓʉ? Bʉduɓa ɓʉ bẽrã ãdjirãra bʉma ʉ̃ta powua duanʉa diapeɗabemada aɓa queubʉrʉɗaa.–
15 Moiseba idji zãwãrẽa panusia:
–Jãwã o ɓʉa naʉ̃ ẽberãrãra mʉ̃maa zebada bẽrã Ãcõrẽba obi ɓʉra cawaɗi carea.
16 Ãdjirã nẽbʉraɗe panebʉdaɗe mʉ̃maa zebadaa cawa omãrẽã. Cawa obʉrʉɗe mʉ̃a ãdjirãa Ãcõrẽ leyda cawabibaria.–
17 Moise zãwãrẽba jarasia:
–Mʉ̃maarã bʉa o ɓʉra bia ɓʉẽ́a.
18 Diapeɗaʉba aɓa queubʉrʉɗaa bʉa cawa o ɓʉ bẽrã sẽya. Ẽberãrã bʉmaa ze panʉ siɗa jũma sẽnia. Bʉa o ɓʉra jũmawãyã ɓʉa. Naʉ̃ra bʉduɓaʉba jũma poya oẽ́a.
19 Maʉ̃ bẽrã mʉ̃ beɗeada quĩrãcuita ũrĩdua. Mʉ̃a jarabʉrʉ quĩrãca oibʉrʉ Ãcõrẽba bʉra carebaya. Mʉ̃a jara ɓʉra naʉ̃gʉa: bʉabʉrʉ naʉ̃ ẽberãrã nẽbʉrara Ãcõrẽa jaraida ɓʉa idjia cawa omãrẽã.
20 Maʉ̃ne Ãcõrẽ leyda bʉa ãdjirãa jaradiaida ɓʉa. Idjaɓa bʉa ãdjirãa cawabida ɓʉa cãrẽda oɗida panʉda quĩrãipa nĩbaɗamãrẽã.
21 Maʉ̃ awara bʉ carebaɗamãrẽã ʉ̃cʉrʉ umaquĩrã poya cawa oɗida ɓeada edadua. Maʉ̃gʉrãba Ãcõrẽra waya ɓeaɗida panʉa, beɗea aɓa ɓeaɗida panʉa, idjaɓa paratada awua ɓeaɗiẽ́ panʉa. Mãwã ɓeadrʉ ɓʉdua israelerã bororãda ɓeaɗamãrẽã. Mil ẽberãrã juachabʉdaza dji boroda aɓa ɓʉdua. Cien ẽberãrã juachabʉdaza aɓa ɓʉdua. Cincuenta ẽberãrã juachabʉdaza aɓa ɓʉdua. Idjaɓa die ẽberãrã juachabʉdaza aɓa ɓʉdua.
22 Maʉ̃ bororãba ẽberãrã nẽbʉrara cawa oɗida panʉa. Baridua nẽbʉrada ãduɓa poya cawa oɗaẽ́bʉrʉ, bʉmaa zeɗida panʉa bʉa cawa omãrẽã. Baribʉrʉ jũma nẽbʉra mãcua zareaẽ́ ɓeara ãduɓa cawa oɗida panʉa. Maʉ̃ bororãba careba cawa o panʉ bẽrã bʉra jũmawãyã sẽ ɓaẽ́a.
23 Mʉ̃a jara ɓʉra Ãcõrẽba obi ɓʉa. Maʉ̃ bẽrã bʉa mãwã oibʉrʉ naʉ̃ ẽberãrã cawa o ɓʉɗebemada biara ʉ̃nãũya. Idjaɓa dji nẽbʉraɗe pananara ãdji deɗaa necai wãnia.–
24 Moiseba idji zãwãrẽba jaraɗara jũma ĩjã osia.
25 Idjia Israelɗebema umaquĩrã poya cawa oɗida ɓeada edapeɗa israelerã bororãda ɓʉcuasia. Mil ẽberãrã juachabʉdaza dji boroda aɓa ɓʉsia. Cien ẽberãrã juachabʉdaza aɓa ɓʉsia. Cincuenta ẽberãrã juachabʉdaza aɓa ɓʉsia. Idjaɓa die ẽberãrã juachabʉdaza aɓa ɓʉsia.
26 Maʉ̃ bororãba ẽberãrã nẽbʉrada cawa obadjiɗaa. Baridua nẽbʉrada ãduɓa poya cawa oɗaẽ́ panebʉdaɗe Moisemaa wãbadjiɗaa cawa omãrẽã. Baribʉrʉ jũma nẽbʉra mãcua zareaẽ́ ɓeara maʉ̃ bororãba ãduɓa cawa obadjiɗaa.
27 Mãwãnacarea Moiseba bia wãduaɗa apeɗa dji zãwãrẽra idji druaɗaa jẽda wãsia.
