Exodo 19:1-25
19 19:1-2 Israelerãra Repidiʉ̃neba wãbʉrʉɗapeɗa Sinai ẽjũã põãsa ewaraga ɓʉɗe jũẽne wãsiɗaa. Jũẽnapeɗa Sinai eya caita duanesiɗaa. Ãdjirã Egiptoɗeba ẽdrʉpeɗaɗacarea jeɗeco uméne mama jũẽsiɗaa.
2 –
3 19:3-4 Maʉ̃be Moisera Sinai eyaɗe ʉ̃taa wãsia Ãcõrẽ ume beɗeai carea. Maʉ̃ eyaɗe Ãcõrẽba idjira trʉ̃peɗa nãwã jarasia:
–Israelerãa nãwã jaradua: “Bãrã Jacoboɗeba yõpeɗaɗarãba unusiɗaa mʉ̃a sãwã egiptorãra cawa osida. Idjaɓa unusiɗaa sãwã mʉ̃a bãrãra nama mʉ̃maa bio waga enesida nejõbʉba idji warrarãra waga enibabari quĩrãca.
4 –
5 19:5-6 Iɗi mʉ̃a bãrã ume beɗeada ɓʉya. Maʉ̃ beɗeada ĩjã oɗibʉrʉ, mʉ̃a dewara puru ɓea cãyãbara bãrãda bio quĩrĩã eroɓaya. Jũma naʉ̃ ẽjũãne ɓeara mʉ̃remĩna mʉ̃a bãrãdrʉ ɓʉya mʉ̃ itea ɓeaɗamãrẽã idjaɓa jũmarã itea sacerdoterãda ɓeaɗamãrẽã.” Bʉa maʉ̃da israelerãa jaraɗe wãida ɓʉa.–
6 –
7 Maʉ̃be Moisera Sinai eyaɗeba eɗaa wãsia israelerã duanʉmaa. Jũẽpeɗa dji bororãra trʉ̃peɗa ãdjirãa ebuɗa nẽbʉrʉsia jũma Ãcõrẽba idjía jaraɗada.
8 Maʉ̃ne jũmarã israelerãba aɓari quĩrãca panusiɗaa:
–Ãcõrẽba jara ɓʉra dairãba jũma oɗia.–
Ara maʉ̃da Moisera Sinai eyaɗe ʉ̃taa wãpeɗa Ãcõrẽa mãwã panupeɗaɗara jarasia.
9 Maʉ̃ne Ãcõrẽba idjía jarasia:
–Mʉ̃ra jʉ̃rãrã pãĩmane bʉ ume beɗeaɗe zeya israelerãba dadji beɗeabʉdara ũrĩnamãrẽã. Mãwã ãdjirãba jũma bʉa jarabʉrʉra ĩjã panania.–
10 19:10-11 Idjaɓa Ãcõrẽba Moisea jarasia:
–Israelerãa jaraɗe wãdua nu nurẽma ãdjia acʉ duanʉne mʉ̃ra Sinai eyaɗaa zeida. Maʉ̃ bẽrã iɗi, nu biɗa ãdjirãba oɗida panʉa maʉ̃ ewariɗe mʉ̃ itea bia duanani carea. Mʉ̃ quĩrãpita duanani bẽrã wua tãtoɗada jʉ̃ pananida panʉa.
12 Idjaɓa naʉ̃ eya carra sẽyãda auɗu jũrã ɓʉdua. Israelerãra maʉ̃ sẽyã ɓʉɗeba eɗaa wãnacara panʉa. Ãdjirãa jaradua: “Naʉ̃ eyaɗe ʉ̃taa bãrãra wãnacara panʉa ni dji carraya biɗa wãnacara panʉa. Bariduada wãibʉrʉ wãrãda beuida ɓʉa.”
13 Bariduada maʉ̃ sẽyã ɓʉɗeba eɗaa wãibʉrʉ ni aɓaʉba idjira jidaɗe wãcara ɓʉa, ãtebʉrʉ mõgaraba taɓari beaɗida panʉa wa chaba drʉ beaɗida panʉa. Animarãda wa ẽberã siɗa eɗaa wãibʉrʉ idjira beaɗida panʉa. Aɓabe cachiru dãrã jĩguabʉrʉɗe bãrãra naʉ̃ eya carra sẽyã jũrã ɓʉ caita wãnida panʉa.–
14 Maʉ̃be Moisera Sinai eyaɗeba eɗaa wãsia israelerãmaa. Jũẽpeɗa ãdjirãa jarasia:
–Bãrãba oɗida panʉa nu nurẽma Ãcõrẽ itea bia duanani carea.–
Ara maʉ̃da ãdji wuara tãtosiɗaa.
15 Idjaɓa Moiseba ãdjirãa jarasia:
–Nu nurẽmabema carea bãrãra bãdji quima ume quĩrãipa cãĩnida panʉa.–
16 Ewari ũbeaɗe diapeɗa baada ɓae nũmesia. Maʉ̃ne jʉ̃rãrã pãĩmaba Sinai eyara ãnã eronũmesia idjaɓa cachiru quĩrãca dãrã jĩgua nũmesia. Maʉ̃ carea jũma israelerãra dauperabʉdaba ure duanesiɗaa.
17 Maʉ̃be Moiseba israelerãra ãdjirã duanʉmaʉba Sinai eya carraɗaa edesia Ãcõrẽra beɗea ɓʉda ũrĩnamãrẽã.
18 Sinai eyara cowaga nũmesia Ãcõrẽra tʉbʉ urua bara zeɗa bẽrã. Maʉ̃ cowaara pea baɗa cowa quĩrãca nũmasia.* Idjaɓa jũma maʉ̃ eyara minijĩchia ure nũmesia.
19 Maʉ̃ne cachiru quĩrãca jĩguabarira jĩguaara nũmesia. Moiseba Ãcõrẽa beɗeabʉrʉza Ãcõrẽba panubadjia baa jĩguabʉrʉ quĩrãca.
20 Ãcõrẽ Sinai eya boroɗaa zesiɗe Moisera trʉ̃sia ʉ̃taa zemãrẽã. Ara maʉ̃da Moisera ʉ̃taa wãsia.
21 Maʉ̃ne Ãcõrẽba Moisea jarasia:
–Israelerãmaa eɗaa wãdua. Ãdjirãa jaradua naʉ̃ eya carra auɗu jũrã ɓʉ sẽyãneba eɗaa zecara panʉda mʉ̃ acʉɗi carea. Mãwã oɗibʉrʉ beuɗia.
22 Sacerdoterãba ẽberãrã carea mʉ̃́a beɗeabadamĩna maʉ̃ sẽyãneba eɗaa zeɗacara panʉa mʉ̃ acʉɗi carea. Ãdjirã biɗa oɗida panʉa mʉ̃ itea bia duanani carea. Mãwã oɗaẽ́bʉrʉ mʉ̃a ãdjirãra quinibiya.–
23 Moiseba Ãcõrẽa jarasia:
–Israelerãra naʉ̃ Sinai eyaɗe ʉ̃taa poya zeɗaẽ́a, bʉa dairãa mãwã jara ɓʉɗa bẽrã. Bʉa naʉ̃ eya carra auɗu jũrã dairãa sẽyãda ɓʉbisia, naʉ̃ eyara aɓabe bʉ itea ɓamãrẽã.–
24 Ãcõrẽba idjía jarasia:
–Israelerãmaa eɗaa wãdua. Maʉ̃be Aaroʉ̃da nama ʉ̃taa enedua. Baribʉrʉ sacerdoterãra, dewararã siɗa naʉ̃ eya carra auɗu jũrã ɓʉ sẽyãneba eɗaa zeɗacara panʉa ʉ̃taa mʉ̃maa zeɗi carea. Mãwã oɗibʉrʉ mʉ̃a ãdjirãra quinibiya.–
25 Ara maʉ̃da Moisera eɗaa wãpeɗa israelerãa Ãcõrẽba jaraɗara jũma nẽbʉrʉsia.
Beɗea eɗaare
^ 19:18. Pea baɗa cowa quĩrãca. Hebreo beɗeaɗe nãwã ɓʉ́ ɓʉa: “Egoro caɗa zareabibari tʉbʉ urua cowabari quĩrãca.”
