Exodo 2:1-25
2 Umaquĩrã Leviɗeba yõnaba wẽrãda edasia. Dji wẽrã siɗa Leviɗeba yõna basía.
2 Maʉ̃ wẽrãra ɓiogoapeɗa umaquĩrã warrada tosia. Maʉ̃ warrara quĩrãwãrẽã ununa bẽrã jeɗeco ũbea mẽrã eroɓasia.
3 Baribʉrʉ waa poya mẽrã eroɓaẽ́ bẽrã jamarada capeɗa cãdorronaba soasia. Maʉ̃be idji warrara eɗa ɓʉpeɗa Nilo do ĩchitaɗe dojoro tãẽna ũmʉsia.
4 Maʉ̃ne dji warra zaque djabawẽrãba tʉmʉba acʉ ɓasia idjira sãwãi cawaya.
5 Mãwã ɓʉɗe Egiptoɗebema boro cauda doeɗa cuiɗe wãsia. Idji nezocawẽrãrãda doya pʉrrʉa panasiɗaa. Maʉ̃ne idjia unusia dji jamarara dojoro tãẽna ũmʉda. Ara maʉ̃da idji nezocawẽrãa edaɗe wãbisia.
6 Enepeɗa Egiptoɗebema boro cauba dji jamara ewa acʉbʉrʉɗe warra zaqueda eɗa mĩã djuburi jĩã quiruda unusia. Maʉ̃ne idjia jarasia:
–Naʉ̃ra hebreo warra zaqueda jãwã quirua.–
7 Maʉ̃ne dji warra zaque djabawẽrãra caita zepeɗa Egiptoɗebema boro caua jarasia:
–¿Bʉmaarã bia ɓʉca mʉ̃a hebreo wẽrãda trʉ̃ne wãida naʉ̃ warra bʉ itea daupẽmãrẽã?–
8 Egiptoɗebema boro cauba jarasia:
–Bia ɓʉa. Trʉ̃ne wãdua.–
Ara maʉ̃da wẽrãcaura wãpeɗa dji papada enesia.
9 Maʉ̃be Egiptoɗebema boro cauba dji warra papaa jarasia:
–Naʉ̃ warrara edepeɗa mʉ̃ itea daupẽdua. Maʉ̃bari mʉ̃a bʉ́a ne diaya.–
Maʉ̃ bẽrã dji warra papaba edepeɗa daupẽsia.
10 Dji warra dawara ɓeɗacarea dji papaba Egiptoɗebema boro caua diaɗe wãsia. Maʉ̃be Egiptoɗebema boro cauba maʉ̃ warrara idjiɗe ara quĩrãca eroɓesia. Dji warrara trʉ̃ ɓʉsia Moise, nãwã jaraɗa bẽrã:
–Mʉ̃a idjira doeɗa ũmʉda edasia.–
Moise Egiptoɗeba mĩrũ wãna
11 Moise drõã baɗacarea ewari aɓa idji ẽberãrã hebreorãda acʉɗe wãsia. Maʉ̃ne unusia sãwã ãdjirãra bia mĩga traja panʉda. Idjaɓa unusia Egiptoɗebemaba hebreoda aɓa u eroɓʉda.
12 Maʉ̃ carea idjia pʉrrʉa acʉbʉrʉɗe ni aɓaʉda unuẽ́ bẽrã dji Egiptoɗebemara beatapeɗa ĩbʉɗe joutasia.
13 Nurẽma wayacusa araa wãbʉrʉɗe unusia aɓarica hebreorãda umé djõ panʉda. Maʉ̃ carea dji djõ jʉrʉɗaa iwiɗisia:
–¿Aɓarica hebreoda bʉa cãrẽ cãrẽã jãwã puo ɓʉ?–
14 Dji djõ jʉrʉɗaba panusia:
–¿Caiba bʉra dai boroda ɓʉsi? ¿Caiba bʉra dai cawa obarida ɓʉsi? ¿Mʉ̃ siɗa bʉa beaida crĩcha ɓʉca Egiptoɗebema beaɗa quĩrãca?–
Maʉ̃ ũrĩbʉrʉɗe Moisera dauperasia cawaɗa bẽrã idji mĩã beaɗara cawasiɗada.
15 Egiptoɗebema boroba Moise mĩã beaɗa cawasiɗe idjira jidabisia beabi carea. Baribʉrʉ jidaɗi naẽna Moisera Egiptoɗeba Madiaʉ̃ druaɗaa mĩrũ wãsia. Mama jũẽpeɗa Moisera baido juebada uria coroɗa caita chũmesia.
16 Maʉ̃ne wẽrãrãda siete zesiɗaa. Maʉ̃ wẽrãrãra Madiaʉ̃nebema sacerdote caurã basía. Ãdjirãra zesiɗaa animarãba baido dobadaɗe baido jueɗapeɗa ãdji zeza ovejara baido dobiɗi carea.
17 Baribʉrʉ dewara oveja wagabadarãda zeɗapeɗa maʉ̃ wẽrãrãra ãyã jʉretasiɗaa. Maʉ̃ carea Moisera araa wãpeɗa dji wẽrãrãra carebapeɗa ãdji ovejara baido dobigasia.
18 Mãwãnacarea dji wẽrãrã wayacusa ãdji zeza Reuelma jũẽsiɗaɗe idjia iwiɗisia:
–¿Iɗi bãrãra sãcua isabe zesiɗa?–
19 Ãdjirãba panusiɗaa:
–Oveja wagabadaba dai ãyã jʉretasiɗaɗe Egiptoɗebemaba daira carebasia. Maʉ̃ awara baido juepeɗa dadjirã ovejara baido dobigasia.–
20 Reuelba idji caurãa iwiɗisia:
–¿Maʉ̃ ẽberãra sãma ɓʉ? ¿Cãrẽ cãrẽã idjira ɓeesiɗa? Trʉ̃ne wãnadua ne coɗe zemãrẽã.–
21 Mãwã Moisera Reuel diguiɗa ɓesia. Mama ɓʉɗe Reuelba idji cau Seporáda Moisea diasia idji quima bamãrẽã.*
22 Mãwã ɓʉɗe dji wẽrãba umaquĩrã warrada tosia. Moiseba maʉ̃ warra trʉ̃ra ɓʉsia Gersoʉ̃, nãwã jaraɗa bẽrã: “Naʉ̃ druaɗe mʉ̃ra drua ãĩbemada jãwã ɓʉa.”
23 Mãwãnacarea dãrãbʉrʉɗe Egiptoɗebema borora beusia. Baribʉrʉ egiptorãba israelerãra waɗi zoca eropanʉ bẽrã ãduɓa mĩã sopua beɗeabadjiɗaa. Ãdjirãba Ãcõrẽa quĩrã djuburiada iwiɗibadjiɗaa. Maʉ̃ra Ãcõrẽba ũrĩsia.
24 Idjaɓa mĩã sopua beɗea panʉ siɗa ũrĩsia. Maʉ̃ne idjia Abrahaʉ̃ ume, Isa ume, idjaɓa Jacobo ume biɗa ãdji carebai carea beɗea ɓʉɗara quĩrãdoaẽ́ ɓasia.*
25 Maʉ̃ bẽrã israelerã bia mĩga panʉra acʉ ɓapeɗa carebai carea ɓesia.
