Exodo 20:1-26
20 Ãcõrẽba naʉ̃gʉda jũma jarasia:
2 –Mʉ̃ra Ãcõrẽa. Mʉ̃abʉrʉ bãrãra Egiptoɗe nezoca ɓeaɗada ẽdrʉ enesia.
3 Mʉ̃ awara bãrãba bariduada ãcõrẽ quĩrãca eroɓearãnadua.
4 Baridua bajãnebema za quĩrãca, naʉ̃ ẽjũãnebema za quĩrãca, doeɗabema za quĩrãca biɗa orãnadua maʉ́a iwiɗiɗi carea.
5 Baridua jʉwaba oɗa quĩrãpita quĩrã eɗaa ɓarruɗapeɗa maʉ́a iwiɗirãnadua idjaɓa bia beɗearãnadua. Mʉ̃drʉ Ãcõrẽ bẽrã mʉ̃a quĩrĩã ɓʉa bãrãba aɓabe mʉ́abʉrʉ iwiɗiɗida idjaɓa bia beɗeaɗida. Maʉ̃ bẽrã bãrãba mʉ̃da igaraɗapeɗa cadjiruada o pananibʉrʉ, mʉ̃a bãrãda, bãrã warrarãda, bãrã wiuzaquerãda, ãdjirã warrarã siɗa cawa o ɓaya.
6 Baribʉrʉ bãrãba mʉ̃da quĩrĩã panananibʉrʉ, idjaɓa mʉ̃ leyra ĩjã o pananibʉrʉ, mʉ̃a bãrãra, jũma bãrã warrarãneba yõbʉdarã siɗa ewariza quĩrĩã ɓaya.
7 Mʉ̃ra bãrã Ãcõrẽa. Mʉ̃ trʉ̃ra bariduaɗe trʉ̃ jararãnadua. Aɓaʉba mʉ̃ trʉ̃da bariduaɗe trʉ̃ jaraibʉrʉ, mʉ̃a maʉ̃ ẽberãra cawa oya.
8 Quĩrãnebaɗadua ʉ̃nãũbada ewarira mʉ̃ itea wagaɗi carea.
9 Bãrãba oɗida panʉra sei ewariɗe jũma oɗadua.
10 Sietebema ewarira ʉ̃nãũbada ewaria. Maʉ̃ ewarira mʉ̃ itea wagaɗida panʉa. Maʉ̃ ewariɗe bãrãba ni cãrẽ trajura oɗacara panʉa. Bãrã warrarãba, bãrã caurãba, bãrã nezoca umaquĩrãrãba, bãrã nezoca wẽrãrãba, bãrã animarãba, ãĩbemarã bãrã tãẽna ɓea biɗa ni cãrẽ trajura oɗacara panʉa.
11 Mʉ̃a bajãda, ẽjũãda, pusada, jũma ãdjiɗe ɓea siɗa sei ewariɗe jũma opeɗa sietebema ewariɗe ʉ̃nãũna bẽrã, maʉ̃ ewarira dji biara ɓʉda ɓʉsia idjaɓa mʉ̃ itea wagaɗamãrẽã ɓʉsia.*
12 Bãrã zezara, bãrã papa siɗa waya pananadua. Mãwã bãrãra dãrã duanania mʉ̃a bãrãa diai ẽjũãne.
13 Mĩã bearãnadua.
14 Daunemarãnadua.
15 Ne drʉarãnadua.
16 Djãrãda sewaɗeba beɗeaɗe ɓʉrãnadua.
17 Djãrã dera awuarãnadua. Djãrã quimara awuarãnadua. Djãrã nezoca umaquĩrãda, djãrã nezoca wẽrãda, djãrã pacada, burro siɗa awuarãnadua. Aɓeɗa ne jũma djãrãba eroɓʉra awuarãnadua.–
Israelerãba Ãcõrẽ wayapeɗaɗa
18 Israelerãba cachiru quĩrãca jĩgua nũmʉda, baa siɗa ũrĩsiɗaa. Idjaɓa Sinai eyaɗe cowaga nũmʉda unusiɗaa. Maʉ̃ne ne wayaaba ure duanʉda tʉmʉ jĩga duanesiɗaa.
19 Ãdjirãba Moisea jarasiɗaa:
–Dairãba quĩrĩãnaẽ́a Ãcõrẽra dairã ume beɗeaida. Idjida dairã ume beɗeaibʉrʉ, beuɗia. Bʉabʉrʉ dairãa beɗeadua. Maʉ̃drʉ quĩrãcuita ũrĩnia.–
20 Moiseba panusia:
–Ne wayarãnadua. Ãcõrẽra nãwã ze ɓʉa bãrãba sãwã oɗi cawaya. Idjia quĩrĩã ɓʉa bãrãba idji wayaaɗeba cadjiruara o pananaẽ́da.–
21 Maʉ̃be Moisera Sinai eyaɗe ʉ̃taa wãsia jʉ̃rãrã pãĩma cowaga nũmʉne eɗa Ãcõrẽ ɓʉmaa. Baribʉrʉ israelerãra tʉmʉ jĩga duanesiɗaa.
Ãcõrẽa animarã babue diabada
22 Maʉ̃ne Ãcõrẽba Moisea jarasia:
–Israelerãa nãwã jaradua: “Bãrã cʉwʉrʉba ũrĩsiɗaa mʉ̃a bajãneba bãrãa beɗea ɓʉda.
23 Maʉ̃ bẽrã oro oɗada idjaɓa parata oɗada baridua za quĩrãca orãnadua maʉ́a iwiɗiɗi carea.
24 Animarã babue diabada mʉ̃ itea oɗi carea egoroda ʉ̃tʉ boromea bueɗadua. Bãrã ovejada, chiwatuda, paca siɗa beaɗapeɗa maʉ̃ ʉ̃rʉ̃ mʉ̃́a babue diaɗida panʉa. Maʉ̃ awara mʉ̃ ume necai ɓai careabema animarãda maʉ̃ ʉ̃rʉ̃ diaɗida panʉa.* Mʉ̃a bãrãa jarabʉrʉma ara maʉ̃ quĩrãca oɗadua mʉ̃da bia jaraɗi carea. Mama mʉ̃ra zeya bãrã carebai carea.
25 Mʉ̃ itea animarã babue diabada obʉdaɗe mõgarada ʉ̃tʉ pã bueɗibʉrʉ, maʉ̃ mõgarara daucha chĩ orãnadua. Bãrãba mõgarada daucha chĩ oɗibʉrʉ maʉ̃ mõgarara mʉ̃ quĩrãpita biẽ́ ɓʉa.
26 Idjaɓa animarã babue diabadaɗe ʉ̃taa dumeneba wãrãnadua dewararãba bãrãra ãcaɗa jira ɓʉ quĩrãca unurãnamãrẽã.”–
