Exodo 21:1-36
21 Ãcõrẽba Moisea jarasia:
–Naʉ̃ leyda israelerãa jaradua.
2 Bariduaba aɓarica hebreoda idji nezoca bamãrẽã nẽdoibʉrʉ, sei poabe idji nezoca baya. Siete poa jũẽnacarea maʉ̃ ẽberãra nezoca baɗada ẽdrʉya. Ẽdrʉbʉrʉɗe idjia ẽdrʉi careabema parata diaida ɓaɗara diaẽ́a.
3 Maʉ̃ nezoca nẽdosiɗe deu ɓasibʉrʉ, ẽdrʉbʉrʉɗe iduɓa ẽdrʉida ɓʉa. Quima bara ɓasibʉrʉ, ẽdrʉbʉrʉɗe dji quima bara ẽdrʉida ɓʉa.
4 Baribʉrʉ dji nẽdoɗaba maʉ̃ nezocada quima diaibʉrʉ, maʉ̃ne nezocaba warrarãda wa caurãda unuibʉrʉ, ẽdrʉbʉrʉɗe iduɓa ẽdrʉida ɓʉa. Idji quimara, warrarã siɗa dji nẽdoɗaba idji itea jũma peida ɓʉa.
5 Baribʉrʉ maʉ̃ nezocaba dji quimada, dji warrarãda, idji nẽdoɗa siɗa quĩrĩã ɓʉbʉrʉ, ẽdrʉ amaaba nãwã jaraida ɓʉa: “Mʉ̃ quimada, mʉ̃ warrarãda, mʉ̃ nẽdoɗa siɗa quĩrĩã ɓʉ bẽrã mʉ̃ra ẽdrʉ quĩrĩãẽ́ ɓʉa.”
6 Maʉ̃ne dji nẽdoɗaba idjira dji bororãmaa edeida ɓʉa jũmarãba cawaɗamãrẽã maʉ̃ nezocara ẽdrʉ quĩrĩãẽ́ ɓʉda.* Maʉ̃be dji nezocara deɗe eɗa wãbada icawa edepeɗa dji nẽdoɗaba idji cʉwʉrʉra cũmia ɓʉba uya suida ɓʉa. Maʉ̃be maʉ̃ nezocara idji nẽdoɗaɗe baya aɓa jaiɗabʉrʉɗaa.
7 Bariduaba idji cauda nezoca bamãrẽã nẽdobueibʉrʉ, maʉ̃ wẽrãcaura poya ẽdrʉẽ́a umaquĩrã nezoca ẽdrʉbari quĩrãca.
8 Dji nẽdoɗaba maʉ̃ wẽrãcaura edai carea nẽdosibʉrʉ, baribʉrʉ idjira biẽ́ unupeɗa edaẽ́bʉrʉ, idji ẽdrʉi careabema paratara idu diabida ɓʉa. Dji nẽdoɗaba maʉ̃ wẽrãra igarasimĩna drua ãĩbemarãa nẽdobuecara ɓʉa.*
9 Dji nẽdoɗaba maʉ̃ wẽrãcauda idji warra quima bamãrẽã nẽdosibʉrʉ, idji cau quĩrãca eroɓaida ɓʉa.
10 Dji nẽdoɗaba dewara wẽrãda edaibʉrʉ, idjia naãrã eroɓaɗara igaraiẽ́ ɓʉa. Idjia waɗibiɗa ne coi careabemada, wua siɗa dia ɓaida ɓʉa. Waɗibiɗa idji quima ara quĩrãca eroɓaida ɓʉa.
11 Idjia ne coi careabemada, wua siɗa dia ɓaẽ́bʉrʉ, idjaɓa idji quima araa quĩrãca eroɓaẽ́bʉrʉ, maʉ̃ wẽrãra ẽdrʉida ɓʉa idji ẽdrʉi careabema parata diaida ɓaɗa diaẽ́.
Djãrã biẽ́ obada careabema ley
12 Bariduaba djãrã puo ɓʉɗe beaibʉrʉ, idjira beaɗida panʉa.
13 Baribʉrʉ mĩã beai crĩchaẽ́ ɓʉɗe aɓaʉba djãrãda beaibʉrʉ, idjira beaɗiẽ́ panʉa Ãcõrẽba maʉ̃gʉra iduaribiɗa bẽrã. Baribʉrʉ djãrã beaɗara mʉ̃a jara ɓʉmaa wãida ɓʉa. Mama dewararãba idjira jidaɗacara panʉa beaɗi carea.*
14 Baribʉrʉ bariduaba mĩã beai crĩcha eroɓʉɗe djãrãda beaibʉrʉ, idjira animarã babue diabadamaa mĩrũ wãbʉrʉ siɗa dji bororãba jidaɗapeɗa beaɗida panʉa.
15 Bariduaba dji zezada dji papa siɗa puoibʉrʉ, idjira beaɗida panʉa.
16 Bariduaba djãrãda nẽdobuei carea jidaibʉrʉ, idjira beaɗida panʉa. Idjia jidaɗada nẽdobuesibʉrʉ wa waɗibiɗa jida eroɓʉbʉrʉ, idjira beaɗida panʉa.
17 Bariduaba dji zezada, dji papa siɗa biẽ́ jaraibʉrʉ, idjira beaɗida panʉa.
18 21:18-19 Ijara panʉne aɓaʉba dewarabemada mõgaraba wa jʉwaba chĩbʉrʉ, baribʉrʉ beaẽ́bʉrʉ, idjira beaɗiẽ́ panʉa. Idjia puoɗara cʉɗaɗe ɓeibʉrʉ idjaɓa piraɓaribʉrʉɗe bardonaba wãida ɓʉbʉrʉ, djãrã puoɗaba idji cacua bia ɓemãrẽã diaida ɓʉa. Idji traju poya oẽ́ ɓʉ ewari siɗa jũma diaida ɓʉa.
20 Bariduaba idji nezoca wẽrãda wa nezoca umaquĩrãda bacuruba u eroɓʉɗe beaibʉrʉ, idjira cawa oɗida panʉa.
21 Baribʉrʉ ewari umé babʉrʉɗe idji nezocara waɗi zocai ɓʉbʉrʉ, idjira cawa oɗiẽ́ panʉa maʉ̃ nezocara idjiɗe bẽrã.*
22 Umaquĩrã djõ panʉne aɓaʉba wẽrã ɓiogoa ɓʉda puopeɗa warrada ʉradʉgaibʉrʉ, baribʉrʉ dji wẽrãda bia ɓesira, dji puoɗaba diaida ɓʉa dji wẽrã quimaba bãrã bororã biɗa jara panʉ quĩrãca.
23 Baribʉrʉ maʉ̃ wẽrãra beusira dji beaɗara aɓarica beaɗida panʉa. Dji wẽrãra bio cacua biẽ́ ɓesira dji mãwã oɗara nãwã oɗida panʉa.
24 Dauda ãrĩsira aɓarica dau ãrĩnida panʉa. Quiɗada ɓʉasira aɓarica quiɗa ɓʉataɗida panʉa. Jʉwada biẽ́ ɓesira aɓarica jʉwa biẽ́ ɓʉɗida panʉa. Jĩrũda biẽ́ ɓesira aɓarica jĩrũ biẽ́ ɓʉɗida panʉa.
25 Õgo bátasira aɓarica bátaɗida panʉa. Djarada cõãsira aɓarica cõãtaɗida panʉa. Idjaɓa parreba osira aɓarica parreba otaɗida panʉa.
26 Bariduaba idji nezoca wẽrã dauɗe wa nezoca umaquĩrã dauɗe chĩpeɗa ãrĩbʉrʉ, maʉ̃ nezocara ẽdrʉ ɓʉida ɓʉa idji dau ãrĩna carea.
27 Idji nezoca wẽrã quiɗada wa nezoca umaquĩrã quiɗada ɓʉaibʉrʉ, maʉ̃ nezocara ẽdrʉ ɓʉida ɓʉa idji quiɗa ɓʉaɗa carea.
Animarã nẽbʉra carea Ãcõrẽba obi jaraɗa
28 Pacaba umaquĩrãda wa wẽrãda cachuba su beaibʉrʉ, maʉ̃ pacara mõgaraba taɓari beaɗida panʉa. Beaɗapeɗa dji djarada cocara panʉa. Maʉ̃ne djibarira beɗeaɗe ɓaẽ́a dji ẽberã beuɗa carea.
29 Baribʉrʉ djibariba maʉ̃ pacara cadrʉa ɓʉda cawa ɓʉmĩna ẽrã eroɓaibʉrʉ, idjira beɗeaɗe ɓaya maʉ̃ pacaba wẽrãda wa umaquĩrãda beaibʉrʉ. Maʉ̃ pacara mõgaraba taɓari beaɗida panʉa. Djibari siɗa beaɗida panʉa.
30 Baribʉrʉ beabiɗi cãyãbara dji beuɗa ẽberãrãba paratada iwiɗiɗibʉrʉ, paca djibariba beu amaaba dji bororãba jarabʉda quĩrãca diaida ɓʉa.
31 Ara maʉ̃ quĩrãca oɗida panʉa pacaba umaquĩrã warrada su beaibʉrʉ wa wẽrãcauda su beaibʉrʉ.
32 Pacaba djãrã nezoca umaquĩrãda wa djãrã nezoca wẽrãda cachuba su beaibʉrʉ, maʉ̃ pacara mõgaraba taɓari beaɗida panʉa. Maʉ̃ paca djibariba nezoca djibaría parata torroda treinta diaida ɓʉa.
33 21:33-34 Bariduaba baido juebada uria coroɗa ʉ̃rʉ̃ jũãtrʉ ɓʉda ãyã ɓʉibʉrʉ, wa baido juebada uria coropeɗa ewa ɓeibʉrʉ, djãrã pacada wa burroda maʉ̃ uriaɗe eɗa ɓaepeɗa beuibʉrʉ, dji uria ewa ɓʉɗaba djibariba iwiɗibʉrʉ quĩrãca diaida ɓʉa. Maʉ̃ne maʉ̃ animarã beuɗada idjiɗe baya.
35 Pacaba djãrã pacada beaibʉrʉ, djibarirãba dji zocai ɓʉ pacada nẽdobueɗapeɗa maʉ̃ paratara ãdjiza ẽsadra edaɗida panʉa. Dji paca beuɗa siɗa ãdjiza ẽsadra edaɗida panʉa.
36 Baribʉrʉ bariduaba idji pacada cadrʉa ɓʉda cawa ɓʉmĩna ẽrã eroɓaibʉrʉ, maʉ̃ne idji pacaba djãrã pacada beaibʉrʉ, idji pacada diaida ɓʉa dji paca beuɗabari. Maʉ̃ne dji paca beuɗada idjiɗe baya.
Beɗea eɗaare
^ 21:6. Dji bororãmaa. Hebreo beɗeaɗe jara ɓʉa “Ãcõrẽ quĩrãpita.”
^ 21:8. Idjira baridua drua ãĩbemarãa nẽdobuecara ɓʉa. Ʉ̃cʉrʉ traduccioʉ̃ne idjaɓa ɓʉ́ ɓʉa: “Mãwã obʉrʉbara idjira cũrũgacasia.”
^ 21:13. Josue 20:1-9.
^ 21:21. Ʉ̃cʉrʉmaarã maʉ̃ versículoba nãwã jara ɓʉa: “Baribʉrʉ idji nezocara beuẽbʉrʉ idjaɓa ewari umé babʉrʉɗe piradrʉibʉrʉ, idjira cawa oɗiẽ́ panʉa maʉ̃ nezocara idjiɗe bẽrã.”
