Exodo 23:1-33
23 Djãrãda sewaɗeba jararãnadua. Ẽberã cadjirua oɗara sewaɗeba carebarãnadua dji cawa obari quĩrãpita.
2 Dewararãba cadjirua o duanʉne aɓarica orãnadua. Dji cawa obari quĩrãpita dewararãba dji cadjirua oɗaare sewaɗeba beɗea duanʉne aɓarica orãnadua.
3 Idjaɓa dji cawa obari quĩrãpita mĩã djuburi quiruare sewaɗeba beɗearãnadua.
4 Bʉ dji quĩrũ paca aduaɗada wa burro aduaɗada unuibʉrʉ, idjía diaɗe wãdua.
5 Burroda ne zʉgʉaba ɓae taɓʉda unusira ara mãwã ɓerãdua. Djibarira bʉ ume dji quĩrũmĩna carebadua maʉ̃ animarãra piradrʉmãrẽã.
6 Mĩã djuburi quiru cawa obʉdaɗe ariɗe oɗida panʉa.
7 Sewaɗeba djãrã jara panʉra ũrĩniẽ́ panʉa. Ẽberã beɗea neẽ́ ɓʉra beaɗiẽ́ panʉa. Mãwã obʉrʉra mʉ̃ quĩrãpita beɗeaɗe ɓeya.
8 Bariduaba paratada idjiare beɗeamãrẽã diaibʉrʉ, maʉ̃ paratara edarãnadua. Edaɗibʉrʉ dauɓerrea panʉ quĩrãca panenapeɗa jipa cawa oɗaẽ́a. Mãwãra dji beɗea neẽ́ ɓʉda beɗeaɗe ɓʉɗia.
9 Ãĩbema bãrã tãẽna ɓeara biẽ́ orãnadua. Bãrãba cawa panʉa djãrã druaɗe ɓʉɗe dadjira sãwã ɓabarida, bãrãra Egiptoɗe drua ãĩbemarã basi bẽrã.
Ʉ̃nãũbada poa
10 Sei poa bãrã ẽjũãra oɗapeɗa ewaɗida panʉa.
11 Baribʉrʉ siete poa jũẽbʉrʉɗe ẽjũãra oɗiẽ́ panʉa. Maʉ̃ poaɗe bãrãnebema ne neẽ́ queɗeaa dji tununa pureabʉrʉra idu ewabiɗadua, idjaɓa ãdjia ewapeɗaɗaẽ́ra idu ɓʉɗadua animarã mẽãbemarãba coɗamãrẽã. Ara maʉ̃ quĩrãca oɗadua bãrã uvara, olivo siɗa.
Ʉ̃nãũbada ewari
12 Bãrãra sei ewari trajaɗida panʉa. Baribʉrʉ sietebema ewariɗe bãrãra ʉ̃nãũnida panʉa. Bãrã pacada, burroda, nezocada, idjaɓa drua ãĩbema bãrã tãẽna panʉ siɗa ʉ̃nãũnida panʉa wayacusa ʉɓʉaɗi carea.
13 Jũma mʉ̃a jaraɗada quĩrãcuita oɗadua. Dewara ãcõrẽca ɓeaa ni maãrĩ biɗa iwiɗirãnadua.
Ewari droma ũbea Ãcõrẽba obi jaraɗa
14 Poaza ɓarima ũbea bãrãba ewari dromada mʉ̃ itea oɗida panʉa.
15 Naãrã paʉ̃ ẽsãbari neẽ́ cobada ewarida oɗida panʉa. Bãrãba siete ewari paʉ̃ ẽsãbari neẽ́ ɓʉda coɗida panʉa mʉ̃a jaraɗa quĩrãca. Maʉ̃ra oɗadua mʉ̃a jara ɓʉɗa ewari Abib jeɗecoɗe, bãrãra maʉ̃ jeɗecoɗe Egiptoɗeba ẽdrʉpeɗaɗa bẽrã. Maʉ̃ ewariɗe mʉ̃́a ne diai carea neẽ́ ɓʉra mʉ̃ quĩrãpita wãcara ɓʉa.
16 Maʉ̃ awara bãrã néuɗebema naãrã ewapeɗaɗa carea ɓʉsriɗa ewarida oɗida panʉa.* Idjaɓa bãrã néu jũma ewapeɗaɗacarea biɗa ɓʉsriɗa ewarida oɗida panʉa.*
17 Mʉ̃ra bãrã Boroa. Poaza jũma umaquĩrãrãba mʉ̃ quĩrãpita maʉ̃ ũbeabema ewari dromara oɗe ze pananida panʉa.
18 Animarã mʉ̃́a babue diabʉdaɗe dji oada paʉ̃ ẽsãbari bara ɓʉ ume babue diarãnadua. Idjaɓa ʉ̃nadrʉi naẽna dji dragara jũma babueɗida panʉa.
19 Bãrã néu naãrã ewabʉdaɗebemada dji biara ɓʉdrʉ mʉ̃ deɗaa diaɗe zeɗadua.
Chiwatu zaquera dji papa juɓaɗe djurãnadua.
Ãcõrẽba bajãnebema nezoca israelerã na wãbiɗa
20 Ũrĩnadua. Mʉ̃ nezoca bajãnebemada bãrã na wãbiya bia waga edemãrẽã mʉ̃a bãrã itea eroɓʉ ẽjũãnaa.
21 Jũma idjia jara ɓʉra ĩjã oɗadua. Ĩjã oɗaẽ́bʉrʉ idjia bãrãra quĩrã djuburiaẽ́a, mʉ̃ trʉ̃neba beɗea ɓʉ bẽrã.
22 Baribʉrʉ idjia jara ɓʉda quĩrãcuita ĩjã oɗibʉrʉ idjaɓa mʉ̃a obi jaraɗada jũma ĩjã oɗibʉrʉ, bãrã dji quĩrũ ume mʉ̃ra dji quĩrũ baya. Bãrã ume djõne zebʉdaɗe mʉ̃drʉ ãdjirã ume djõya.
23 Mʉ̃ nezoca bajãnebemada bãrã na wãya. Idjia bãrãra edeya amorreorã, hititarã, perezeorã, cananeorã, heveorã, jebuseorã druaɗaa. Maʉ̃rã ẽberãrãra mʉ̃a jũma jõbiya.
24 Mama jũẽbʉdaɗe ãdjirãba obada quĩrãca orãnadua. Ãdji jʉwaba ocuaɗa ãcõrẽ quĩrãpita quĩrã eɗaa ɓarruɗapeɗa iwiɗirãnadua ni bia beɗearãnadua. Ãdji jʉwaba ocuaɗa ãcõrẽra idjaɓa maʉ̃ ãcõrẽa bia beɗeaɗi carea eropanʉ siɗa aɓeɗa jũma ãrĩnadua.
25 Aɓabe mʉ́abʉrʉ bia beɗeaɗadua. Maʉ̃ne mʉ̃a bãrãra carebaya. Mʉ̃a baidoda, coɗi siɗa diaya. Mʉ̃a iduaribiẽ́a bãrãra cacua biẽ́ ɓeaɗida.
26 Bãrã druaɗe wẽrãrãra warra ʉradʉgaɗaẽ́a. Wẽrãrã warra toɗacara neẽ́ baya. Idjaɓa mʉ̃a bãrãra dãrã zocai ɓʉya.
27 Bãrã wãbʉdaza mʉ̃a maʉ̃ druaɗebemarãra ne wayabiya. Ãdjirãba sãwã oɗida cawaẽ́ panania. Maʉ̃ba bãrã jũẽbʉdaɗe ãyã mĩrũ pirapoɗia.
28 Mʉ̃a heveorãra, hititarãra, cananeorã siɗa ãyã pirapobiya nedʉrrʉba ãdjirã ãyã pirapobibari quĩrãca.
29 Baribʉrʉ poa aɓaʉɗe mʉ̃a ãdjirãra jũma ãyã jʉretaẽ́a. Mãwã obʉrʉbara maʉ̃ druara ẽberã neẽ́ ɓepeɗa mẽãbema animarãra jũmawãyã yõnapeɗa bãrãra biẽ́ ocasiɗaa.
30 Maʉ̃ carea mʉ̃a maʉ̃ druaɗebemarãra pĩãca ãyã jʉrecuaya. Maʉ̃ne bãrã yõ wãnane maʉ̃ ẽjũãra jũma edaɗia.
31 Mʉ̃a bãrãa dia ɓʉ ẽjũãra ɓʉa Pusa Purru abadaɗeba aɓa Pusa Mediterraneo abadaɗaa idjaɓa ẽjũã põãsa ewaraga ɓʉɗeba aɓa Euprate doɗaa.* Mʉ̃a bãrãra carebaya jũma ẽberãrã maʉ̃ ẽjũãne panʉra poyaɗapeɗa ãyã jʉrecuaɗamãrẽã.
32 Maʉ̃ ẽberãrã ume beɗea ɓʉrãnadua. Ãdji ãcõrẽca ɓeada bãrã druaɗe eroɓearãnadua.
33 Maʉ̃ ẽberãrãra bãrã druaɗe idu ɓebirãnadua. Iduaribiɗibʉrʉ ãdjirãba bãrãa ãdji ãcõrẽca ɓeara ẽpẽbiɗia. Mãwã bãrãba cadjiruara oɗapeɗa biẽ́ panania.–
