Exodo 24:1-18
24 Maʉ̃be Ãcõrẽba Moisea jarasia:
–Aaroʉ̃da, Nadáda, Abiuda, idjaɓa setenta israelerã bororã siɗa bʉ ume naʉ̃ eyaɗe ʉ̃taa enedua. Ãdjirãra tʉmʉ chĩrãboroɗe ɓarru copanenapeɗa mʉ̃́a bia beɗeaɗida panʉa.
2 Ãdjirãra mʉ̃ caita zecara panʉa. Aɓabe bʉdrʉ mʉ̃ caita zeida ɓʉa. Maʉ̃ awara ni aɓaʉda bʉ ume naʉ̃ eyaɗe ʉ̃taa zecara ɓʉa.–
3 Maʉ̃be Moisera israelerãmaa eɗaa zepeɗa Ãcõrẽ leyra jũma nẽbʉrʉsia. Maʉ̃ne jũma israelerãba aɓari quĩrãca nãwã jarasiɗaa:
–Dairãba Ãcõrẽ leyra jũma ĩjã oɗia.–
4 Ara maʉ̃da Moiseba Ãcõrẽ leyra jũma ɓʉsia. Nurẽma diapeɗeɗa piraɓaripeɗa Moiseba animarã babue diabadada Sinai eya carra osia. Maʉ̃ awara animarã babue diabada caita idjia mõgara waiɓʉada doce ʉ̃ta nũmʉcuasia. Maʉ̃ doce mõgaraba jara ɓʉa Israel warrarãneba doce puru yõpeɗaɗada.
5 Maʉ̃be Moiseba cũdrarãda diabuesia paca zaquerãda Ãcõrẽa babue diacuaɗamãrẽã idjaɓa Ãcõrẽ ume necai ɓai careabema paca zaquerãda bea diacuaɗamãrẽã.
6 Maʉ̃ paca zaque oa piapeɗaɗada ẽsadra Moiseba epeɗecoɗe wea edasia. Dji ẽsadra ɓeɗada animarã babue diabada ʉ̃rʉ̃ jĩãposia.
7 Maʉ̃be Ãcõrẽ leyra edapeɗa Moiseba israelerã quĩrãpita jĩgua lesia. Maʉ̃ ũrĩnapeɗa israelerãba jarasiɗaa:
–Ãcõrẽ leyra dairãba jũma ĩjã oɗia.–
8 Maʉ̃be Moiseba epeɗecoɗe wea eroɓʉ oada edapeɗa israelerã ʉ̃rʉ̃ jĩãpo ɓʉɗe nãwã jarasia:
–Naʉ̃ oaba jara ɓʉa Ãcõrẽba dadjirã ume beɗea ɓʉɗara dadjirãba, idjia biɗa jũma oɗida.–
9 Mãwãnacarea Moisera, Aaroʉ̃ra, Nadára, Abiura, idjaɓa setenta israelerã bororã siɗa Sinai eyaɗe ʉ̃taa wãsiɗaa.
10 Maʉ̃ne israelerã Ãcõrẽda unusiɗaa. Idji jĩrũ edrera zapiro mõgara oɗa quĩrãca ɓasia. Bajã quĩrãca ẽsã pãwãrã ɓasia.
11 Israelerã bororãba Ãcõrẽra unusiɗamĩna Ãcõrẽba ãdjirãra beubiẽ́ basía. Ãcõrẽ quĩrãpita ne cosiɗaa idjaɓa baido dosiɗaa.
Moise Sinai eyaɗe ʉ̃taa wãna
12 Mãwãnacarea Ãcõrẽba Moisea jarasia:
–Sinai eyaɗe mʉ̃maa ʉ̃taa zepeɗa jʉ̃ã ɓedua. Mʉ̃a mõgara peweɗea ɓʉda umé diaya. Maʉ̃ mõgaraɗe mʉ̃a ĩjã obi ɓʉ beɗeada ɓʉ́ eroɓʉa israelerãa jaradia ɓamãrẽã.–
13 Ara maʉ̃da Moisera idji carebabari Josue ume Sinai eyaɗe ʉ̃taa wãsiɗaa Ãcõrẽ ɓʉmaa.
14 Wãni naẽna Moiseba israelerã bororãa jarasia:
–Nama pananadua aɓa dai zebʉdaɗaa. Aaroʉ̃ra, Hur siɗa bãrã ume panania. Bariduaba nẽbʉrada oibʉrʉ, ãdjimaa wãnida panʉa maʉ̃ nẽbʉra cawa oɗamãrẽã.–
15 Moise Sinai eyaɗe ʉ̃taa wãsiɗe jʉ̃rãrãba maʉ̃ eyara ãnã edasia.
16 24:16-17 Maʉ̃ne Ãcõrẽ quĩrãwãrẽã dorrodorroara Sinai eya ʉ̃rʉ̃ zesia. Dji jeweɗaɗeba israelerãba Ãcõrẽ quĩrãwãrẽã dorrodorroara maʉ̃ eya boroɗe tʉbʉ eradrʉ nũmʉ quĩrãca unusiɗaa. Jʉ̃rãrãba Sinai eyara sei ewari ãnã eroɓasia. Sietebema ewariɗe Ãcõrẽba maʉ̃ jʉ̃rãrãneba Moisera trʉ̃sia.
18 Ara maʉ̃da Moisera eyaɗe ʉ̃taara wãsia jʉ̃rãrãne eɗa. Mama ɓesia cuarenta ewari ãsa diamasi biɗa.
