Exodo 26:1-36
26 Idjaɓa wua deda mʉ̃ itea nãwã oɗadua. Dji biara ɓʉ lino wuada die edaɗapeɗa maʉ̃ wuaɗe eɗa mʉ̃ nezoca bajãnebema i bara ɓʉ zaca ɓeada oveja cara nayãna pãwãrã oɗaba, pursupursua oɗaba, purea oɗa biɗa biya caɗadua.
2 Maʉ̃ die lino wuara aɓari quĩrãca ɓeaɗida panʉa. Dji drasoara veintiocho bicaca ɓeaɗida panʉa. Dji jouɓʉara bicaca quĩmãrẽ ɓeaɗida panʉa.
3 Maʉ̃ die wuaɗebemada juesuma edaɗapeɗa ãbaa cajuɗadua jouɓʉa ɓemãrẽã. Aɓari quĩrãca ãbaa cajuɗadua dewarabema juesuma panʉ siɗa.
4 26:4-5 Maʉ̃ wua jouɓʉa cajuɗaza i orro aɓaare cincuenta cʉwʉrʉ cajuɗadua. Maʉ̃ cʉwʉrʉra wua pãwãrã ɓʉba oɗida panʉa. Dji cʉwʉrʉra daucha quĩrã tẽũ coɓʉɗadua.
5 –
6 Maʉ̃be oroda edaɗapeɗa wua jũẽbarida cincuenta oɗadua. Maʉ̃gʉɗe cʉwʉrʉza jũẽcuaɗadua maʉ̃ umébema wuara aɓabe ɓʉ quĩrãca ɓemãrẽã. Maʉ̃ba mʉ̃ dera ãnẽɓari coɓʉɗadua.
7 Maʉ̃be wua chiwatu cara oɗada once edaɗapeɗa drasoa jouɓʉa cajuɗadua dji nabema wua ʉ̃rʉ̃ ãnẽɓari coɓʉɗi carea.
8 Maʉ̃ once wua chiwatu cara oɗara aɓari quĩrãca ɓeaɗida panʉa. Dji drasoara treinta bicaca ɓeaɗida panʉa. Dji jouɓʉara bicaca quĩmãrẽ ɓeaɗida panʉa.
9 Maʉ̃ once wuaɗebemada sei edaɗapeɗa ãbaa cajuɗadua jouɓʉa ɓemãrẽã. Dewarabema juesuma siɗa aɓari quĩrãca cajuɗadua. Dji sei wua ãbaa cajupeɗaɗa nocoare ɓʉ wuara ẽsadra ʉ̃taa ɓeɗá coɓʉɗadua.
10 Maʉ̃ wua jouɓʉa cajuɗaza i orro aɓaare cincuenta cʉwʉrʉ cajuɗadua.
11 Idjaɓa bronceda edaɗapeɗa wua jũẽbarida cincuenta oɗadua. Maʉ̃gʉɗe cʉwʉrʉza jũẽcuaɗadua maʉ̃ umébema wuara aɓabe ɓʉ quĩrãca ɓemãrẽã.
12 26:12-13 Maʉ̃ chiwatu cara oɗa wuara dji edrebema wua cãyãbara jouɓʉara ɓʉ bẽrã idjaɓa drasoara ɓʉ bẽrã, mʉ̃ de jẽdaare drasoara jira ɓʉɗadua. Idjaɓa orrozara bicaca aɓa auɗu jira ɓʉɗadua mʉ̃ dera bio ãnẽɓari ɓamãrẽã.
14 Maʉ̃be oveja e purea oɗada ãbaa cajuɗadua jouɓʉa drasoa ɓemãrẽã. Maʉ̃gʉba chiwatu cara oɗa wua ʉ̃rʉ̃ ãnẽɓari coɓʉɗadua. Maʉ̃ ʉ̃rʉ̃ dewarabema animarã e biada jouɓʉa drasoa cajuɗapeɗa ãnẽɓari coɓʉɗadua.
15 Idjaɓa mʉ̃ wua de carea acacia bacuruda ʉrraɗadua maʉ̃ba daucha ʉ̃ta catʉ pẽni carea. Maʉ̃gʉra dji wua cajuɗaba ãnẽɓariya.
16 Dji bacuru ʉrraɗa drasoara die bicaca ɓeaɗida panʉa. Dji jouɓʉara bicaca aɓa ʉ̃rʉ̃ ẽsadra ɓeaɗida panʉa.
17 Dji eɗaa ɓeira quiɗate bara oɗadua. Jũma mʉ̃ wua de carea bacuru ʉrraɗara mãwã oɗadua.
18 26 18-21 Mʉ̃ wua de orroza veinte bacuru ʉrraɗada ʉ̃ta catʉ pẽnida panʉa. Maʉ̃ bacuru ʉrraɗaza edre parata oɗa uria ɓeada umé uméa ɓʉɗadua dji quiɗatera maʉ̃ne eɗa berajuɗi carea. Mãwã orroza cuarenta parata oɗa uria ɓeara ɓʉɗia maʉ̃ bacuru ʉrraɗada daucha pẽ wãni carea.
22 Mʉ̃ wua de jẽdaarebemara ʉ̃mãdau ɓaebariare ɓeida ɓʉa. Maʉ̃are sei bacuru ʉrraɗada ʉ̃ta catʉ pẽnida panʉa.
23 Maʉ̃ awara bacuru ʉrraɗada umé iquiɗaza ʉ̃ta catʉ pẽnida panʉa.
24 Dji quẽbʉra jũẽbari bara oɗadua ʉ̃tʉba eɗaa ara catʉ coɓemãrẽã. Iquiɗaza mãwã ɓaida ɓʉa.
25 Jũma ãbaa ocho bacuru ʉrraɗada ʉ̃ta catʉ pẽnida panʉa. Maʉ̃ bacuru ʉrraɗaza edre parata oɗa uria ɓeada umé uméa ɓʉɗadua dji quiɗatera maʉ̃ne eɗa berajuɗi carea. Mãwã jẽdaarebema parata oɗa uria ɓeara diecisei ɓʉɗia.
26 26:26-27 Idjaɓa acacia bacuruda juesuma eraɗadua de orroza pĩrũ omoa ɓeaɗe berajuɗi carea. Jẽdaare ʉ̃mãdau ɓaebariare biɗa acacia bacuruda juesuma pĩrũ omoa ɓeaɗe berajuɗadua mʉ̃ wua dera zarea coɓemãrẽã.
28 Orroza dji ẽsibema bacuru berajuɗara dji de drasoa daucha ɓaida ɓʉa. Dji jẽdaare ɓʉ bacuru ẽsi berajuɗara dji de jeɗea daucha ɓaida ɓʉa.
29 Mʉ̃ wua de carea bacuru ʉrraɗara oroba jũma bʉracuaɗadua. Idjaɓa pĩrũ omoa ɓeara oroɗeda oɗadua. Maʉ̃ pĩrũ ɓeara bacuru ʉrraɗaɗaa cara ɓʉɗadua maʉ̃ne eɗa bacuru eraɗara berajuɗi carea. Bacuru eraɗara oroba jũma bʉraɗadua.
30 Mʉ̃ wua dera oɗadua mʉ̃a naʉ̃ eyaɗe unubiɗa quĩrãca.
31 Idjaɓa wuada oɗadua mʉ̃ dejãne eatʉ jira ɓʉɗi carea. Dji biara ɓʉ lino wuada edaɗapeɗa maʉ̃ wuaɗe eɗa mʉ̃ nezoca bajãnebema i bara ɓʉ zaca ɓeada oveja cara nayãna pãwãrã oɗaba, pursupursua oɗaba, purea oɗa biɗa biya caɗadua.
32 26:32-33 Maʉ̃be acacia bacuruda quĩmãrẽ tẽnapeɗa oroba bʉracuaɗadua. Maʉ̃ bacurura parata oɗa uria ɓeaɗe berajuɗadua mʉ̃ dejãne ʉ̃ta nũmeanamãrẽã. Bacuruza wua jũẽbari oro oɗada cara ɓʉɗadua. Maʉ̃gʉɗe wua capeɗaɗara eatʉ jira ɓʉɗadua mʉ̃ dejãra tʉaju ɓemãrẽã. Mãwã mʉ̃ wua dera dejã umé eroɓaya. Dji nocoarebema dejãra “Ãcõrẽ itea ɓʉ dejã” aɗia. Dji eɗaare ɓʉ dejãra “Ãcõrẽ itea biara ɓʉ dejã” aɗia. Mʉ̃ baurudera dji mʉ̃ itea biara ɓʉ dejãne ɓʉɗadua.
34 Mama dji oro peweɗea ɓaɗaa ariɗe oɗapeɗaɗara baurude ʉ̃rʉ̃ coɓʉɗadua.
35 Idjaɓa wua eatʉ jira ɓʉ nocoare ɓʉ dejãne paʉ̃ ɓʉbada mesara jʉwa araare ɓʉɗadua. Jʉwa acʉare ĩbĩrã ɓʉbadada dji mesa quĩrãpe ɓʉɗadua.
36 26:36-37 Idjaɓa dji biara ɓʉ lino wuada edaɗapeɗa maʉ̃ wuaɗe eɗa oveja cara nayãna pãwãrã oɗada, pursupursua oɗada, purea oɗa siɗa biya caɗadua. Maʉ̃be acacia bacuruda juesuma tẽnapeɗa oroba bʉracuaɗadua. Maʉ̃ bacurura bronce oɗa uria ɓeaɗe berajuɗadua mʉ̃ wua deɗe eɗa wãbadamaa ʉ̃ta nũmeanamãrẽã. Bacuruza wua jũẽbari oro oɗada cara ɓʉɗadua. Maʉ̃gʉɗe wua caɗara dji eɗa wãbadaɗe jũãtrʉ jira ɓʉɗadua.
