Exodo 28:1-43
28 Bʉ djaba Aaroʉ̃ra, idji warrarã Nadára, Abiura, Eleazara, Itamar siɗa bʉmaa trʉ̃cuadua mʉ̃ sacerdoterã ɓʉmãrẽã.
2 28:2-3 Bʉ djaba Aaroʉ̃ itea djioda quĩrãwãrẽã obidua unubi carea idjidrʉ mʉ̃ sacerdote dji dromaara ɓʉda. Mãwã israelerãba idjira waya panania. Mʉ̃a ʉ̃cʉrʉa necawaada diasia maʉ̃ djiora oɗamãrẽã. Ãdjía maʉ̃ djiora obidua.
3 –
4 Naʉ̃gʉda bʉ djaba Aaroʉ̃ itea oɗida panʉa: idjia cacuaɗe wẽãju jʉ̃ida ɓʉ torro ɓʉda, aɓa pãwãrã ɓʉda, idji jãare jʉ̃ida ɓʉda, boroɗe jʉ̃ida ɓʉda, “mʉ̃a quĩrĩã ɓʉ cawabibari” idji so ʉ̃rʉ̃ jʉ̃ida ɓʉda, cʉrrʉ trãjʉ̃bari siɗa. Aaroʉ̃ warrarã itea biɗa djiora oɗadua. Mãwã Aaroʉ̃ra, idji warrarã siɗa mʉ̃ sacerdoterãda ɓeaɗia.
5 Oro bʉrachiɗada, lino wuada, oveja cara nayãna pãwãrã oɗada, pursupursua oɗada, purea oɗa siɗa edaɗapeɗa maʉ̃gʉ djiora oɗida panʉa.
6 Idji jãare jʉ̃ida ɓʉra dji biara ɓʉ lino wuaba oɗadua. Maʉ̃ wuaɗe eɗa oro bʉrachiɗada, oveja cara nayãna pãwãrã oɗada, pursupursua oɗada, purea oɗa siɗa biya caɗida panʉa.
7 Equiaza jʉ̃bari bara ɓaya.
8 Dji cʉrrʉ trãjʉ̃barida dji biara ɓʉ lino wuaba oɗadua. Maʉ̃ cʉrrʉ trãjʉ̃barira idji jãare jʉ̃ida ɓʉ ume ãbaa caɗida panʉa aɓa ɓʉ quĩrãca ɓemãrẽã. Maʉ̃ cʉrrʉ trãjʉ̃bariɗe eɗa oro bʉrachiɗada, lino nayãnada, oveja cara pãwãrã oɗada, pursupursua oɗada, purea oɗa siɗa biya caɗida panʉa.
9 28:9-10 Idjaɓa mõgara ónice abadada umé edaɗapeɗa maʉ̃ mõgaraɗe Israel doce warrarã trʉ̃ra jaya ɓʉɗadua dji nabemaneba aɓa dji tẽãbemanaa. Mõgara aɓaʉɗe trʉ̃ra sei panania. Dewarabema mõgaraɗe biɗa trʉ̃ra sei panania.
11 Djio obariba sẽyã jaya corobari quĩrãca ãdji trʉ̃ra maʉ̃ umébema mõgaraɗe biya jaya ɓʉɗida panʉa. Maʉ̃be mõgarara oro oɗaɗaa cara ɓʉɗadua.
12 Maʉ̃ mõgarara Aaroʉ̃ba jãare jʉ̃ida ɓʉ equiaza aɓa cajuɗadua. Maʉ̃ mõgaraɗe ɓʉ́ ɓʉba Israel warrarãda quĩrãnebabiya. Mãwã Ãcõrẽ quĩrãpita wãbʉrʉɗe Aaroʉ̃ba Israel warrarã trʉ̃ra idji equiaɗe edeya ãdjirãnebema quĩrãnebabi carea.
13 28:13-14 Idjaɓa oro idji awa quiruba carenada umé caɗadua. Dji quẽbʉra Aaroʉ̃ba jãare jʉ̃ida ɓʉ equiaza oro oɗaɗaa cara ɓʉɗadua.
15 Idjaɓa “mʉ̃a quĩrĩã ɓʉ cawabibarida” biya oɗadua Aaroʉ̃ba idji so ʉ̃rʉ̃ jʉ̃mãrẽã.* Maʉ̃gʉra dji biara ɓʉ lino wuaba oɗadua. Maʉ̃ wuaɗe eɗa oro bʉrachiɗada, oveja cara nayãna pãwãrã oɗada, pursupursua oɗada, purea oɗa siɗa caɗadua Aaroʉ̃ba jãare jʉ̃ida ɓʉ capeɗaɗa quĩrãca.
16 Maʉ̃ wua caɗara ẽsidra ɓeɗá capiruɗadua ne wagabari quĩrãca bamãrẽã. Dji drasoara, dji jouɓʉa siɗa jʉwajã ewarama aɓa ɓaida ɓʉa.
17 Maʉ̃ ʉ̃rʉ̃ mõgara biya queɗeada errecama quĩmãrẽ cara ɓʉɗadua.* Dji nabema errecaɗe naʉ̃gʉ mõgarada ɓʉɗadua: rubí, crisólito, esmeralda.
18 Umébema errecaɗe ɓʉɗadua: granate, zapiro, jade.
19 Ũbeabema errecaɗe ɓʉɗadua: jacinto, ágata, amatista.
20 Quĩmãrẽbema errecaɗe ɓʉɗadua: topacio, ónice, jaspe. Jũma maʉ̃ mõgarara oro oɗaɗaa caraɗadua.
21 Maʉ̃ doce mõgaraba jara ɓʉa Israel warrarãneba doce puru yõpeɗaɗada. Mõgaraza sẽyã quĩrãca ãdji trʉ̃ra aɓa aɓa jaya ɓʉɗadua.
22 Idjaɓa oro idji awa quiruba carenada umé caɗadua “mʉ̃a quĩrĩã ɓʉ cawabibarira” Aaroʉ̃ba idji so ʉ̃rʉ̃ jʉ̃mãrẽã.
23 Pĩrũ oroɗeda umé oɗapeɗa “mʉ̃a quĩrĩã ɓʉ cawabibari” ʉ̃rʉ̃bema iquiɗaza cajuɗadua.
24 Pĩrũza carena oro caɗa quẽbʉra aɓa aɓa cara ɓʉɗadua.
25 Dewarabema quẽbʉra cara ɓʉɗadua umébema oro oɗaɗaa Aaroʉ̃ba jãare jʉ̃ida ɓʉ equiaza.
26 Dewara pĩrũ oroɗeda umé oɗapeɗa “mʉ̃a quĩrĩã ɓʉ cawabibari” eɗaarebema iquiɗaza edrecare cajuɗadua.
27 Dewara pĩrũ oroɗeda umé oɗapeɗa Aaroʉ̃ba jãare jʉ̃ida ɓʉɗe cajuɗadua dji cʉrrʉ trãjʉ̃bari ʉ̃taarebe.
28 Jʉ̃cara pãwãrã oɗaba maʉ̃ pĩrũra ãbaa jʉ̃nadua “mʉ̃a quĩrĩã ɓʉ cawabibari” edre panʉ pĩrũnaa. Mãwã “mʉ̃a quĩrĩã ɓʉ cawabibarira” Aaroʉ̃ so ʉ̃rʉ̃ catʉ coɓeya.
29 “Mʉ̃a quĩrĩã ɓʉ cawabibarira” Aaroʉ̃ba jʉ̃ ɓaida ɓʉa mʉ̃ wua deɗe eɗa wãbʉrʉɗe. Mãwã mʉ̃ quĩrãpita ɓʉɗe Israel warrarã trʉ̃ra idji so ʉ̃rʉ̃ jʉ̃ eroɓaya israelerãnebemada quĩrãnebabi carea.
30 “Mʉ̃a quĩrĩã ɓʉ cawabibariɗe” Uriʉ̃ idjaɓa Tumiʉ̃ abadada eɗa ɓʉɗadua Aaroʉ̃ba idji so ʉ̃rʉ̃ jʉ̃ eroɓamãrẽã. Mãwã mʉ̃ quĩrãpita wãbʉrʉza maʉ̃ Uriʉ̃ idjaɓa Tumiʉ̃neba Aaroʉ̃ba poya cawaya mʉ̃a israelerãa obi ɓʉda.
31 Idjaɓa wua pãwãrã ɓʉda edaɗapeɗa Aaroʉ̃ba djio wẽãju jʉ̃ida ɓʉda oɗadua.
32 Maʉ̃ wuara idji boro berajumãrẽã ẽsidra uria oɗadua. Maʉ̃ uria ira ɓeɗatʉ cajuɗadua cõãrãmãrẽã.
33 28:33-34 Idjaɓa granadajõ za quĩrãca caɗadua oveja cara nayãna pãwãrã oɗaba, pursupursua oɗaba, purea oɗa biɗa. Maʉ̃ra Aaroʉ̃ba jʉ̃ida ɓʉ pãwãrã ɓʉ eɗubema iɗe mimizua pʉrrʉga cajuɗadua. Idjaɓa mimizua pʉrrʉga cajuɗadua pĩrãchiru oro oɗada. Granadajõ za quĩrãca caɗada aɓa iɗe cajuɗapeɗa maʉ̃are pĩrãchiru oro oɗada aɓa cajuɗadua. Jũma pʉrrʉga mãwã cajuɗadua.
35 Maʉ̃ djio pãwãrã ɓʉra Aaroʉ̃ba jʉ̃ ɓaida ɓʉa mʉ̃ wua deɗe ne oɗe wãbʉrʉza. Mʉ̃ wua deɗe eɗa mʉ̃ quĩrãpita wãbʉrʉɗe aɓa ẽdrʉbʉrʉɗaa pĩrãchirura jĩguaɗia. Mãwã idjira beuẽ́a.
36 Idjaɓa oroda peweɗea berrachiɗadua. Maʉ̃ne naʉ̃ beɗeada jaya ɓʉɗadua: “Aɓa Ãcõrẽ itea ɓʉ.”
37 Maʉ̃ oro peweɗea berrachiɗara Aaroʉ̃ba boroɗe jʉ̃ida ɓʉ dratuare jʉ̃cara pãwãrã ɓʉba jʉ̃ coɓʉɗadua.
38 Maʉ̃ra idji dratuɗe jʉ̃ ɓaida ɓʉa jũma israelerãba dia panʉda mʉ̃a bia edai carea. Idjaɓa israelerãba mʉ̃́a ne diabʉdaɗe mʉ̃ quĩrãpita biẽ́ oɗibʉrʉ, maʉ̃ biẽ́ opeɗaɗara Aaroʉ̃ba edaya.
39 Idjaɓa Aaroʉ̃ba djio wẽãju jʉ̃ida ɓʉ torroa ɓʉda dji biara ɓʉ linoba caɗadua. Cʉrrʉ trãjʉ̃bari siɗa biya caɗadua. Idji boroɗe jʉ̃ida ɓʉ siɗa dji biara ɓʉ lino wuaba caɗadua.
40 Aaroʉ̃ warrarã itea biɗa djio torroa ɓʉda, cʉrrʉ trãjʉ̃barida, ãdji boroɗe jʉ̃nida panʉ siɗa oɗadua. Maʉ̃ djio quĩrãwãrẽã ɓʉda jʉ̃ panʉne israelerãba ãdjirãra waya panania.
41 Bãrãba jũma opeɗaɗacarea bʉ djaba Aaroʉ̃a idji warrarãa biɗa maʉ̃ djiora jʉ̃bidua. Jʉ̃napeɗa olivo dragada ãdjirã boro ʉ̃rʉ̃ weadua unubi carea bʉa ãdjirãra mʉ̃ sacerdoterãda ɓʉbʉrʉda.
42 Ãdjirãba edre jʉ̃nida panʉra lino wuaɗeda oɗadua. Maʉ̃ra cʉrrʉɗeba aɓa ɓacara daucha ɓaida ɓʉa.
43 Aaroʉ̃ba, idji warrarã biɗa maʉ̃ edrebemara jʉ̃nida panʉa mʉ̃ wua deɗe eɗa wãbʉdaza idjaɓa mʉ̃́a animarã babue diabʉdaza. Mãwã jʉ̃naẽ́bʉrʉ, ãdjirãra beuɗia cadjiruada o panʉ bẽrã. Maʉ̃ djio jʉ̃bi ɓʉ beɗeara Aaroʉ̃ba, idji warrarãba, idji warrarãneba yõbʉdarã biɗa ewariza ĩjã o pananida panʉa.
