Exodo 29:1-46
29 Aaroʉ̃ra, idji warrarã siɗa mʉ̃ sacerdoterãda ɓʉi carea bʉa nãwã oida ɓʉa: paca zaque dji umaquĩrãda aɓa, oveja dji umaquĩrãda umé edadua. Maʉ̃ animarãra dji biara ɓʉdrʉ ɓeaɗida panʉa.
2 Idjaɓa dji biara ɓʉ harina trigoɗeda edapeɗa paʉ̃ ẽsãbari neẽ́ ɓeada quĩrã cacua ũbea odua; ʉ̃cʉrʉ harina awa queɗeada, ʉ̃cʉrʉ nedraga bara ɓeada, idjaɓa ʉ̃cʉrʉ nedragaba ʉ̃rʉ̃ pʉrʉɗada.
3 Maʉ̃ paʉ̃ra jamaraɗe ɓʉpeɗa mʉ̃ wua deɗaa ededua. Paca zaquera, oveja siɗa ededua.
4 Aaroʉ̃ra idji warrarã siɗa mʉ̃ wua deɗe eɗa wãbadamaa ededua.* Mama ãdjirãra baidoba sʉgʉdua.
5 Maʉ̃be Aaroʉ̃ba jʉ̃mãrẽã opeɗaɗara idjía jʉ̃bidua. Idjia wẽãju jʉ̃ida ɓʉ torroa ɓʉda naãrã jʉ̃bidua. Maʉ̃ ʉ̃rʉ̃ dji pãwãrã ɓʉda jʉ̃bidua. Maʉ̃ ʉ̃rʉ̃ idji jãare jʉ̃ida ɓʉra jʉ̃bipeɗa cʉrrʉ trãjʉ̃bariba trãjʉ̃ coɓʉdua. Maʉ̃be idji so ʉ̃rʉ̃ “mʉ̃a quĩrĩã ɓʉ cawabibarida” jʉ̃ coɓʉdua.
6 Idji boroɗe jʉ̃ida ɓʉra jʉ̃bipeɗa idji dratuɗe jʉ̃ida ɓʉ oro peweɗea oɗada jʉ̃ coɓʉdua.
7 Maʉ̃be Aaroʉ̃ boro ʉ̃rʉ̃ olivo draga quera bara ɓʉda weadua sacerdote dji dromada ɓʉi carea.
8 Idjaɓa Aaroʉ̃ warrarã siɗa trʉ̃peɗa ãdjia jʉ̃namãrẽã opeɗaɗa torroa ɓeada wẽãju jʉ̃bidua.
9 Ãdjia jʉ̃ panʉra, Aaroʉ̃ba jʉ̃ ɓʉ siɗa cʉrrʉ trãjʉ̃bariba trãjʉ̃ coɓʉdua. Ãdjia boroɗe jʉ̃nida panʉ siɗa jʉ̃bidua. Mãwã oida ɓʉa ãdjirãra sacerdoterãda ɓʉbʉrʉɗe. Ãdjirãdrʉ, ãdji warrarãneba yõbʉdarã siɗa ewariza mʉ̃ sacerdoterãda ɓeaɗia.
10 Maʉ̃be paca zaqueda mʉ̃ wua deɗe eɗa wãbada quĩrãpe enepeɗa Aaroʉ̃ba idji warrarã biɗa ãdji jʉwara maʉ̃ paca zaque boro ʉ̃rʉ̃ ɓʉɗida panʉa.
11 Mama paca zaquera mʉ̃ quĩrãpita beadua.
12 Maʉ̃be dji oara piapeɗa bʉ jʉwa jĩwĩnĩra maãrĩ ɓegueapeɗa animarã babue diabada cachu quĩrãca ɓeaɗe soadua. Mãwã soapeɗa oa ɓeɗara animarã babue diabada coɓʉ caita weadua.
13 Maʉ̃be paca zaque ɓiteɗabemada edadua: dji tʉrida, nequimada, idjaɓa cotrua umena dji draga bara. Maʉ̃ra jũma babuedua animarã babue diabadaɗe.
14 Maʉ̃ paca zaque cacuara, dji era, dji ã siɗa ãyã tʉmʉ edepeɗa jũma babuedua. Maʉ̃ animarãra mãwã oida ɓʉa Aaroʉ̃ba idji warrarã biɗa cadjirua opeɗaɗara mʉ̃a quĩrãdoamãrẽã.
15 Mãwãnacarea umébema oveja mʉ̃ wua deɗe enenada aɓa edapeɗa Aaroʉ̃ba idji warrarã biɗa ãdji jʉwara maʉ̃ oveja boro ʉ̃rʉ̃ ɓʉɗida panʉa.
16 Maʉ̃be beabʉrʉɗe dji oara piadua. Maʉ̃ oaba jĩãpodua animarã babue diabada ʉ̃rʉ̃ idjaɓa orrocawa biɗa.
17 Maʉ̃be ovejara drapetapeɗa tʉcuadua. Dji jĩrũra, dji jʉ̃si siɗa sʉgʉpeɗa jũma ãbaa buedua dji boro bara.
18 Maʉ̃be animarã babue diabadaɗe jũma mʉ̃́a babue diadua. Maʉ̃ra mʉ̃a bia unuya.*
19 Oveja ɓeɗara edapeɗa Aaroʉ̃ba idji warrarã biɗa ãdji jʉwara oveja boro ʉ̃rʉ̃ ɓʉɗida panʉa.
20 Maʉ̃be beabʉrʉɗe dji oara piapeɗa soadua Aaroʉ̃ jʉwa araarebema cʉwʉrʉ iɗe, idji jʉwa araarebema jʉwapapaɗe, idjaɓa idji jʉwa araarebema jĩrũpapaɗe biɗa. Ara maʉ̃ quĩrãca idji warrarã siɗa odua. Oa ɓeɗara animarã babue diabada orroza jĩãpodua.
21 Maʉ̃ oa dji animarã babue diabadaɗe jĩãpoɗada maãrĩ edapeɗa pueradua olivo draga quera bara ɓʉɗaa. Maʉ̃gʉba Aaroʉ̃ ʉ̃rʉ̃, idji warrarã ʉ̃rʉ̃, ãdjia jʉ̃ panʉ ʉ̃rʉ̃ biɗa jĩãpodua. Mãwã Aaroʉ̃ra, idji warrarãra, ãdjia jʉ̃ panʉ siɗa mʉ̃ itea ɓeaɗia.
22 Maʉ̃be dji oveja dragada, dji druda,* dji tʉrida, nequimada, cotruada umena dji draga bara, idjaɓa jʉwa araarebema chĩde siɗa edadua. (Bʉa maʉ̃ ovejara beaya Aaroʉ̃ra, idji warrarã siɗa mʉ̃ sacerdoterãda ɓʉcuai carea.)
23 Idjaɓa mʉ̃ quĩrãpita enena jamaraɗe ɓʉ paʉ̃ ẽsãbari neẽ́ ɓeada ũbea edadua; aɓa harina awa oɗada, aɓa nedraga bara oɗada, idjaɓa nedragaba ʉ̃rʉ̃ pʉrʉɗada.
24 Maʉ̃ paʉ̃ra, dji oveja ɓiteɗabema edaɗara, dji chĩde siɗa ɓʉdua Aaroʉ̃ jʉwaɗe, idji warrarã jʉwaɗe biɗa. Jũma ãdji jʉwaɗe ɓʉɗara ãdjirãba ʉ̃taa waɗida panʉa mʉ̃́a diaɗi carea.
25 Ʉ̃taa wapeɗaɗacarea wayacusa edapeɗa jũma babuedua dji animarã babue diabadaɗe oveja naãrã babueɗa ʉ̃rʉ̃. Maʉ̃ babue diabʉrʉra mʉ̃a bia unuya.
26 Maʉ̃be oveja jã nocoarebema djarada bʉ jʉwaɗe edapeɗa ʉ̃taa wadua mʉ̃́a diai carea. Ʉ̃taa wapeɗa maʉ̃ djarara bʉre baya.
27 29:27-28 Iɗiba ʉ̃taa bãrã israelerãba mʉ̃ ume necai ɓai careabema oveja mʉ̃́a diaɗe zebʉdaza dji jã nocoarebema djarada, jʉwa araarebema chĩde siɗa Aaroʉ̃ba idji warrarã biɗa ʉ̃taa waɗapeɗa ãdji itea edaɗida panʉa.
29 29:29-30 Aaroʉ̃ jaiɗaɗacarea idjiɗeba yõbʉdarãba idjia jʉ̃ ɓaɗara eropanania. Ãdjiɗebemada aɓa edaɗapeɗa maʉ̃ra domia aɓa jʉ̃ ɓaida ɓʉa sacerdote dji droma bai carea. Mãwãnacarea mʉ̃ wua deɗe Aaroʉ̃ba oɓabada quĩrãca o ɓaida ɓʉa.
31 Aaroʉ̃ra mʉ̃ sacerdoteda ɓʉbʉrʉɗe oveja jã nocoarebema djarada edapeɗa mʉ̃ wua de auɗu jũrã ɓʉɗe eɗa djudua.
32 Djupeɗa Aaroʉ̃ba idji warrarã biɗa maʉ̃ oveja djarara, paʉ̃ jamaraɗe ɓeɗa siɗa coɗida panʉa mʉ̃ wua deɗe eɗa wãbada caita.
33 Maʉ̃ djaraɗebemada, paʉ̃nebema siɗa mʉ̃́a babue diaya ãdjirãra mʉ̃ itea ɓʉi carea idjaɓa ãdjirãba cadjirua opeɗaɗara mʉ̃a quĩrãdoamãrẽã. Maʉ̃ bẽrã aɓabe ãdjiabʉrʉ maʉ̃ aɗubaɗara coɗida panʉa. Maʉ̃ra mʉ̃́a diaɗa bẽrã dewara ẽberãba cocara ɓʉa.
34 Maʉ̃ oveja djara djuɗara, paʉ̃ siɗa jũma coɗaẽ́bʉrʉ nurẽma diapeɗeɗa dji aɗubaɗara jũma babueɗida panʉa. Dji aɗubaɗara cocara panʉa maʉ̃ ovejara mʉ̃́a diapeɗaɗa bẽrã.
35 Domia aɓa mʉ̃a jaraɗa quĩrãca odua Aaroʉ̃ra idji warrarã siɗa mʉ̃ sacerdoterãda ɓʉi carea.
36 29:36-37 Maʉ̃ne ewariza paca zaque dji umaquĩrãda aɓa beapeɗa mʉ̃́a babue diadua Aaroʉ̃ba idji warrarã biɗa cadjirua opeɗaɗara mʉ̃a quĩrãdoamãrẽã idjaɓa animarã babue diabadara mʉ̃ quĩrãpita bia ɓʉmãrẽã. Ewariza animarã babue diabadara olivo draga quera bara ɓʉba soadua mʉ̃ itea bia ɓʉmãrẽã. Mãwã animarã babue diabadara mʉ̃ itea bio bia ɓepeɗa bariduaba waraibʉrʉ maʉ̃ siɗa mʉ̃ itea ɓeya.
38 Ewariza sacerdoterãba animarã babue diabadaɗe oveja zaque poa aɓa ɓeada umé babue diaɗida panʉa.
39 Diapeɗeɗa aɓa babue diaɗida panʉa, dewarabemara queubʉrʉɗe babue diaɗida panʉa.
40 29:40-41 Diapeɗeɗa oveja babue diabʉdaɗe dji biara ɓʉ harinada epeɗeco jũgurua umé edaɗapeɗa olivo dragaɗaa boteya aɓa bʉratʉɗapeɗa maʉ̃ siɗa mʉ̃́a babue diaɗida panʉa.* Maʉ̃ awara animarã babue diabada ʉ̃rʉ̃ uva ɓada boteya aɓa weaɗida panʉa. Queubʉrʉɗe oveja babue diabʉdaɗe ara maʉ̃ quĩrãca oɗida panʉa. Maʉ̃ra mʉ̃a bia unuya.
42 29:42-43 Aaroʉ̃ warrarãneba yõbʉdarã biɗa ara maʉ̃ quĩrãca ovejara mʉ̃ quĩrãpita babue diaɗida panʉa mʉ̃ wua deɗe eɗa wãbada quĩrãpe. Mama mʉ̃ra bãrã israelerãmaa zepeɗa bʉ ume beɗea ɓaya. Maʉ̃ne mʉ̃ quĩrãwãrẽã dorrodorroaba jũma mʉ̃ wua de auɗu jũrã ɓʉɗe eɗa ɓʉra mʉ̃ itea eroɓaya.
44 Mãwã wua dera, animarã babue diabada siɗa mʉ̃ itea bia ɓʉya. Aaroʉ̃ra, idji warrarã siɗa mʉ̃ itea bia ɓʉya mʉ̃ sacerdoterãda ɓeaɗamãrẽã.
45 Mʉ̃ra bãrã israelerã tãẽna ɓaya idjaɓa bãrã Ãcõrẽ baya.
46 Maʉ̃ne bãrãba cawaɗia mʉ̃ra bãrã Ãcõrẽda. Cawaɗia mʉ̃abʉrʉ bãrãra Egiptoɗeba ẽdrʉ enesida bãrã tãẽna ɓai carea. Mʉ̃ra bãrã Ãcõrẽa.–
Beɗea eɗaare
^ 29:4. Mʉ̃ wua deɗe. Hebreo beɗeaɗe ɓʉ́ ɓʉa “dji jʉrebada wua deɗe.” Maʉ̃ dera mãwã trʉ̃ jarabadjiɗaa mama Ãcõrẽra Moise ume beɗeabadji bẽrã. Maʉ̃ deɗe israelerãra ãbaa dji jʉreɗaca basía.
^ 29:18. Maʉ̃ra mʉ̃a bia unuya. Hebreo beɗeaɗe nãwã ɓʉ́ ɓʉa: “Maʉ̃ babue diabʉrʉra bia ʉ̃baria.”
^ 29:22. Dji druda. Maʉ̃ beɗeaba idjaɓa jara ɓʉa “dji animarã druɗe ɓʉ dragada.”
^ 29:40-41. Epeɗeco jũgurua umé. Hebreo beɗeaɗe ɓʉ́ ɓʉa “una décima de un efa.” Boteya aɓa. Hebreo beɗeaɗe ɓʉ́ ɓʉa “un cuarto de hin.”
