Exodo 3:1-22
3 Moise zãwãrẽ Reuel Jetro abadada Madiaʉ̃nebemarã sacerdote basía. Moiseba idji ovejara wagabadjia. Ewari aɓa Moiseba dji ovejara dewara orroare ne cobiɗe edesia. Maʉ̃ne idjira ẽjũã põãsa ewaraga ɓʉɗe Horeb eyaɗe jũẽne wãsia. Maʉ̃ eyara Ãcõrẽ eya abadaa.*
2 Mama Ãcõrẽba ara idjida unubisia bacuru zaqueɗe uruga nũmʉda.* Moiseba unusia maʉ̃ bacurura eradrʉ nũmʉmĩna baẽ́ ɓʉda.
3 Maʉ̃ carea crĩchasia: “¿Cãrẽda jãwã uruga nũmʉ? Caitaara acʉɗe wãya sãwãẽrã jãwã baẽ́ ɓʉ cawaya.”
4 Ãcõrẽba Moise caitaara zebʉrʉda unusiɗe maʉ̃ bacuru zaque uruga nũmʉneba trʉ̃ jarasia:
–Moise, Moise.–
Moiseba panusia:
–Mʉ̃ra nama ɓʉa.–
5 Maʉ̃ne Ãcõrẽba idjía jarasia:
–¡Caitaara zerãdua! Nama bʉra mʉ̃ quĩrãpita ɓʉ bẽrã bʉ jĩrũ jãne jʉ̃ ɓʉra ẽrãdua.*
6 Mʉ̃ra bʉ zezaba ĩjã ɓaɗa Ãcõrẽa. Abrahaʉ̃ba, Isaba, idjaɓa Jacoboba mʉ̃ra ĩjã panasiɗaa.–
Maʉ̃ne Moiseba Ãcõrẽra waya ɓʉ bẽrã idji quĩrãdarrara jũãtrʉsia Ãcõrẽ acʉ amaaba.
7 Ãcõrẽba jarasia:
–Mʉ̃a unu ɓʉa mʉ̃ purura Egipto druaɗe bio bia mĩga ɓʉda. Idjaɓa mʉ̃a ũrĩ ɓʉa ãdjirãba quĩrã djuburiada iwiɗi panʉda. Iwiɗi panʉa mʉ̃a ãdjirãra dji traju obibada bororã jʉwaeɗabemada ẽdrʉ ɓʉmãrẽã. Mʉ̃a cawa ɓʉa ãdjirãra wãrãda bia mĩga panʉda.
8 Maʉ̃ bẽrã mʉ̃a ãdjirãra egiptorã jʉwaeɗa panʉnebemada ẽdrʉ ɓʉi carea ze ɓʉa. Egipto druaɗebemada ẽdrʉ ɓʉpeɗa mʉ̃a dewara druaɗaa edeya. Maʉ̃ druara bio bia ɓʉa idjaɓa waiɓʉa ɓʉa. Maʉ̃ druaɗe baridua ne upeɗaɗara bia zaubaria.* Mama cananeorãda, hititarãda, amorreorãda, perezeorãda, heveorãda, idjaɓa jebuseorã siɗa duanʉa.
9 Israelerãba quĩrã djuburia iwiɗi panʉra mʉ̃a ũrĩ ɓʉa. Idjaɓa unu ɓʉa egiptorãba ãdjirãra bia mĩga eropanʉda.
10 Maʉ̃ carea mʉ̃a bʉra Egiptoɗebema boromaa diabueya. Idjía jaradua mʉ̃ puru Israel ẽdrʉ ɓʉmãrẽã. Ẽdrʉ ɓʉsira ãdjirãra Egiptoɗebemada ãyã pe ededua.–
11 Baribʉrʉ Moiseba jarasia:
–¿Mãwãra mʉ̃ra cai Egiptoɗebema boro quĩrãpita beɗeaɗe wãi carea idjaɓa israelerãra Egiptoɗeba ãyã edei carea?–
12 Maʉ̃ne Ãcõrẽba panusia:
–Wãdua. Mʉ̃ra bʉ ume ɓaya. Mʉ̃a nãwã unubiya bʉra wãrãda diabuesida. Bʉa israelerãra Egiptoɗebemada ãyã edepeɗa bãrãba naʉ̃ eyaɗe mʉ̃́a bia beɗeaɗe zeɗia.–
13 Baribʉrʉ Moiseba jarasia:
–Israelerãmaa wãpeɗa bãrã drõã naẽnabemarãba ĩjã panana Ãcõrẽba mʉ̃ra bãrãmaa diabuesiaɗa abʉrʉɗe ãdjirãba iwiɗiɗia: “¿Idjira casa trʉ̃bada?” Maʉ̃ne ¿mʉ̃a cãrẽda jarai?–
14 Ãcõrẽba panusia:
–Mʉ̃ trʉ̃ra nãwã jarabadaa: “Mʉ̃ra mʉ̃a.” Maʉ̃ bẽrã israelerãa jaradua: “Dadji Ãcõrẽ ‘Mʉ̃ra mʉ̃a’ abadaba mʉ̃ra bãrãmaa diabuesia.”–
15 Idjaɓa jarasia:
–Israelerãa jaradua: “Dadji Ãcõrẽba mʉ̃ra bãrãmaa diabuesia. Dadji drõã naẽnabema Abrahaʉ̃ba, Isaba, idjaɓa Jacobo biɗa idjira ĩjã panasiɗaa.” Mʉ̃ trʉ̃ Jehová abadara ewariza ɓaya. Maʉ̃ trʉ̃neba ẽberãrãba mʉ̃ra cawa panania.*
16 Egiptoɗaa wãdua. Jãma jũẽpeɗa israelerã bororã ume beɗeadua. Ãdjirãa jaradua: “Dadji Boro Ãcõrẽba mʉ̃́a ara idjida unubisia. Dadji drõã naẽnabema Abrahaʉ̃ba, Isaba, idjaɓa Jacoboba idjira ĩjã panasiɗaa. Idjia nãwã jarasia: mʉ̃a bãrã israelerãra acʉ ɓʉ bẽrã unu ɓʉa egiptorãba bãrãra biẽ́ o panʉda.
17 Idjia bãrãra Egiptoɗe bia mĩga panʉda ẽdrʉ ɓʉpeɗa dewara druaɗaa edeyaɗa asia. Maʉ̃ druaɗe baridua ne upeɗaɗara bia zaubaria. Mama cananeorãda, hititarãda, amorreorãda, perezeorãda, heveorãda, idjaɓa jebuseorã siɗa duanʉa.”
18 Bʉa jarabʉrʉra israelerã bororãba ĩjãnia. Maʉ̃be ãdjirãra bʉ ume ededua Egiptoɗebema boromaa. Bãrãba idjía jaraɗadua: “Dai hebreorã Ãcõrẽda daima odjapeɗa jarasia idjía animarã babue diaɗe wãnamãrẽã. Maʉ̃ bẽrã dairãra ẽjũã põãsa ewaraga ɓʉɗe ewari ũbea idu wãbidua mãwã oɗi carea.”
19 Baribʉrʉ mʉ̃a cawa ɓʉa Egiptoɗebema boroba israelerãra ẽdrʉ ɓʉẽ́da mʉ̃a idjía mãwã obiẽ́bʉrʉ.
20 Maʉ̃ bẽrã mʉ̃ ʉɓʉada egiptorãa unubiya. Zocãrã ne ununaca waiɓʉa ɓeada oya ãdjirãra cawa oi carea. Mãwãbʉrʉ Egiptoɗebema boroba israelerãra idu wãbiya.
21 Idjaɓa mʉ̃a o ɓʉ carea egiptorãba israelerãra bia ununi bẽrã ne diaɗia. Mãwã israelerãra Egiptoɗeba ẽdrʉbʉdaɗe ara jãwã ẽdrʉɗaẽ́a.
22 Jũma israelerã wẽrãrãba ãdji caita panʉ egiptorãa parata oɗada, oro oɗa siɗa iwiɗiɗida panʉa. Cacuaɗe jʉ̃bada siɗa ãdji warrarã itea, wẽrãcaurã itea biɗa iwiɗiɗida panʉa. Ara maʉ̃ quĩrãca baridua Egiptoɗebema wẽrã maʉ̃ deɗe ɓʉ́a biɗa iwiɗiɗida panʉa. Mãwã israelerãba ne jũma bia Egiptoɗebemara edaɗia.
Beɗea eɗaare
^ 3:1. Horeb eyara Ãcõrẽ eya abadaa Ãcõrẽra mama odjaɗa bẽrã. Horeb eyara idjaɓa Sinai abadaa.
^ 3:2. Ãcõrẽ. Hebreo beɗeaɗe ɓʉ́ ɓʉa “Ãcõrẽ nezoca bajãnebema.”
^ 3:5. Idji jĩrũ jãne jʉ̃ ɓʉra ẽrãida ɓasia acʉbi carea Ãcõrẽra waya ɓʉda.
^ 3:8. Hebreo beɗeaɗe nãwã ɓʉ́ ɓʉa: “Maʉ̃gʉ druaɗe juɓara, miare siɗa wea nũmʉa.”
^ 3:15. Jehová. Genesi 4:26. Hebreo beɗeaɗe ɓʉ́ ɓʉa “YHWH.” Hebreorãba maʉ̃ beɗeara sãwã jĩguabarida adua panʉa.
