Exodo 30:1-38
30 Idjaɓa Ãcõrẽba jarasia:
–Quera bá diabadada acacia bacuruɗeda oɗadua.
2 Dji drasoara, jouɓʉa siɗa bicaca aɓa ɓaida ɓʉa quĩrã quĩmãrẽena aɓarica ɓamãrẽã. Dji ʉ̃tʉara bicaca umé ɓaida ɓʉa. Iquiɗaza aɓari bacuruɗe cachu quĩrãca oɗadua.
3 Oro idji awa quiruba jũma bʉraɗadua. Icawa pʉrrʉga oroba tuca ɓʉɗadua.
4 Pĩrũ omoa ɓea oroɗeda quĩmãrẽ oɗapeɗa orroza umé cara ɓʉɗadua dji tuca ɓʉ edrecare. Maʉ̃ pĩrũne eɗa bacuruda berajuɗadua jira edeɗi carea.
5 Maʉ̃ra acacia bacuruɗeda baida ɓʉa. Biya eraɗapeɗa oroba bʉraɗadua.
6 Quera bá diabadara mʉ̃ wua deɗe eɗa ɓʉɗadua dji eɗaarebema wua eatʉ jira ɓʉ quĩrãpe. Maʉ̃ wua jẽdaare mʉ̃ baurudeda dji ʉ̃rʉ̃ coɓʉi bara ɓaya. Mama mʉ̃ra bʉ ume beɗea ɓaya.
7 Diapeɗaza Aaroʉ̃ba ĩbĩrã acʉɗe zebʉrʉɗe quera bá diabadaɗe querada bá diaida ɓʉa.
8 Quewaraza biɗa ĩbĩrã coaɗe zebʉrʉɗe querada bá diaida ɓʉa. Ara maʉ̃ quĩrãca ewariza bãrãba bãrã warrarãneba yõbʉdarã biɗa querada mʉ̃ quĩrãpita bá dia pananida panʉa.
9 Quera bá diabadaɗe baridua quera mʉ̃a jaraɗaẽ́ra bá diarãnadua. Idjaɓa animarãda, harina oɗa siɗa maʉ̃ ʉ̃rʉ̃ mʉ̃́a babue diarãnadua. Uva ɓa siɗa maʉ̃ ʉ̃rʉ̃ mʉ̃́a wea diarãnadua.
10 Quera bá diabadara mʉ̃ itea bio bia ɓaida ɓʉa. Maʉ̃ bẽrã poaza ɓarima aɓa Aaroʉ̃ba maʉ̃ quera bá diabada cachu quĩrãca ɓeaɗe oaba soaida ɓʉa mʉ̃ itea bia ɓamãrẽã. Maʉ̃ oara idjia edaida ɓʉa bãrã israelerãba cadjirua opeɗaɗa carea animarã beabʉrʉɗe. Idji warrarãneba yõbʉdarã biɗa ara maʉ̃ quĩrãca poaza o pananida panʉa.–*
Beuɗa amaaba israelerãba parata diaɗida panʉ
11 Idjaɓa Ãcõrẽba Moisea jarasia:
13 Juachabʉrʉɗe ãdjirãza paratada sei gramo mʉ̃ deɗe zabada quĩrãca mʉ̃́a diaɗida panʉa.*
14 Jũma umaquĩrã veinte poaɗeba ʉ̃taa ɓea juachabʉrʉɗe maʉ̃ paratara mʉ̃́a diaɗida panʉa.
15 Dji parata bara ɓʉba sei gramo auɗu diaiẽ́ ɓʉa idjaɓa dji parata neẽ́ quiruba sei gramo eɗaara diaiẽ́ ɓʉa. Ãdjirã juachabʉrʉɗe beuɗa amaaba jũmarãba daucha diaɗida panʉa.
16 Ãdjirãba diapeɗaɗa paratara edapeɗa mʉ̃ wua deɗebema parataba oɗida panʉra obidua. Maʉ̃ parataba mʉ̃́a quĩrãnebabi ɓaya bãrã israelerãba maʉ̃gʉra diasiɗada beuɗa amaaba.–
Ne sʉgʉbada
17 Idjaɓa Ãcõrẽba Moisea jarasia:
19 30:19-21 Aaroʉ̃ra idji warrarã siɗa mʉ̃ wua deɗe eɗa wãni naẽna wa animarã mʉ̃́a babue diaɗi naẽna ãdji jʉwara jĩrũ siɗa maʉ̃ baidoba sʉgʉɗida panʉa. Mãwã ãdjirãra beuɗaẽ́a. Maʉ̃ sʉgʉbi jaraɗara Aaroʉ̃ba idji warrarãneba yõbʉdarã biɗa ewariza ĩjã o pananida panʉa.–
22 Idjaɓa Ãcõrẽba Moisea jarasia:
23 30:23-24 –Naʉ̃gʉ querada edaɗadua: mirra querada doce libra, canela querada sei libra, cálamo querada sei libra, casia querada doce libra. Maʉ̃ quera zʉgʉara mʉ̃ deɗe zabada quĩrãca zadua. Maʉ̃ awara olivo dragada galoʉ̃ aɓa edaɗadua.*
25 Jũma maʉ̃ querara olivo dragaɗaa pueraɗadua quera o cawa ɓʉba obari quĩrãca. Maʉ̃ olivo draga quera bara ɓʉba ne jũma mʉ̃ iteabemara soaɗia.
26 30:26-28 Maʉ̃gʉba mʉ̃ wua deda soadua: mʉ̃ baurudeda, paʉ̃ ɓʉbada mesada, jũma maʉ̃ mesaɗe ɓeada, ĩbĩrã ɓʉbadada, jũma maʉ̃ ĩbĩrãnebemada, quera bá diabadada, animarã babue diabadada, jũma maʉ̃ animarã babue diabadaɗebemada, idjaɓa ne sʉgʉbada epeɗeco waiɓʉada dji acʉ ɓʉbada bara.
29 Jũma maʉ̃gʉra mʉ̃ itea bio bia ɓʉi carea mãwã soaɗida panʉa. Mãwãnacarea bariduaba waraibʉrʉ, maʉ̃ siɗa mʉ̃ itea ɓeya.
30 Maʉ̃ olivo draga quera bara ɓʉda Aaroʉ̃ boro ʉ̃rʉ̃, idji warrarã boro ʉ̃rʉ̃ biɗa weadua mʉ̃ sacerdoterãda ɓeaɗamãrẽã.
31 Israelerãa nãwã jaradua: “Naʉ̃ ewariɗeba ʉ̃taa naʉ̃ olivo draga quera bara ɓʉba aɓabe Ãcõrẽ iteabemadrʉ soaɗida panʉa, idji itea oɗa bẽrã.
32 Baridua ẽberã ʉ̃rʉ̃ weacara panʉa. Idjaɓa ni aɓaʉba naʉ̃ olivo draga quera bara ɓʉ quĩrãca ara idji itea ocara ɓʉa. Naʉ̃ olivo draga quera bara ɓʉra aɓabe mʉ̃ itea ɓʉ bẽrã baridua quera quĩrãca eroɓeaɗiẽ́ panʉa.
33 Bariduaba naʉ̃ olivo draga quera bara ɓʉ quĩrãca ara idji itea oibʉrʉ, idjira ãyã jʉretabueɗida panʉa bãrã israelerã tãẽnabemada. Idjaɓa baridua ẽberã ʉ̃rʉ̃ naʉ̃ olivo draga quera bara ɓʉda weaibʉrʉ, dji weaɗara ãyã jʉretabueɗida panʉa.”–
Bai careabema quera
34 30:34-35 Idjaɓa Ãcõrẽba Moisea jarasia:
–Naʉ̃gʉ querada edaɗadua: estacte querada, ámbar querada, gálbano querada, idjaɓa incienso quera idji awa quiruda. Maʉ̃ quera ɓeara aɓari quĩrãca edaɗapeɗa ãbaa pueraɗadua bai careabema quera oi carea, quera o cawa ɓʉba obari quĩrãca. Ãbaa puerabʉdaɗe tãda eɗa ɓʉɗadua maʉ̃ querara mʉ̃ itea bio bia ɓemãrẽã.
36 Maʉ̃be maãrĩ edaɗapeɗa nãũcha ʉraɓaɗadua. Maʉ̃ra bá nũmʉnida panʉa quera bá diabada ʉ̃rʉ̃ mʉ̃ baurude quĩrãpe. Mama mʉ̃ra bʉ ume beɗea ɓaya. Maʉ̃ bai careabema querara aɓabe mʉ̃ itea ɓaya.
37 Ni aɓaʉba maʉ̃ quera quĩrãca ara idji itea ocara ɓʉa. Maʉ̃ra aɓabe mʉ̃ itea ɓʉ bẽrã, baridua bai careabema quera quĩrãca eroɓeaɗiẽ́ panʉa.
38 Bariduaba maʉ̃ quera quĩrãca ara idji itea oibʉrʉ, maʉ̃ ẽberãra bãrã israelerã tãẽnabemada ãyã jʉretabueɗida panʉa.–
