Exodo 33:1-23
33 Maʉ̃be Ãcõrẽba Moisea jarasia:
–Namaʉba bʉra, ẽberãrã bʉa Egiptoɗeba ẽdrʉ enena ume wãnadua mʉ̃a diai jaraɗa druaɗaa. Maʉ̃ druara mʉ̃a Abrahaʉ̃a, Isaa, Jacoboa biɗa wãrãneba jarasia ãdjiɗeba yõbʉdarãa diaida.*
2 Mʉ̃ nezoca bajãnebemada bãrã na wãbiya cananeorãda, amorreorãda, hititarãda, perezeorãda, heveorãda, jebuseorã siɗa jũma ãyã jʉrecuai carea.
3 Maʉ̃ druaɗe baridua ne upeɗaɗara bia zaubaria. Baribʉrʉ mʉ̃ra bãrã ume wãẽ́a cʉwʉrʉ zarea ɓea carea quinibi amaaba.–
4 Maʉ̃ beɗea ũrĩsiɗaɗe israelerãra sopua duanesiɗaa. Maʉ̃ bẽrã ni aɓaʉba djiora jʉ̃naẽ́ basía.
5 Mãwã osiɗaa Ãcõrẽba Moisea nãwã jaraɗa bẽrã:
–Israelerãa nãwã jaradua: “Bãrãra cʉwʉrʉ zarea ɓeaa. Mʉ̃da bãrã ume maãrĩ biɗa wãibʉrʉ, aɓeɗa jũma quinibiya. Jãʉ̃be bãrã djiora jũma ẽrãcuaɗapeɗa mʉ̃a bãrãra sãwã oida cawa jaraya.”–
6 Maʉ̃ carea israelerãba ãdji djiora jũma ẽrãcuaɗapeɗa idu ɓʉsiɗaa Horeb eya jeweɗaɗe duanasiɗaɗe.
Ãcõrẽ ume beɗeabari de
7 Maʉ̃ ewariɗe Moiseba wua deda israelerã panʉmaʉba jĩgabe obadjia. Maʉ̃ wua dera idjia trʉ̃ ɓʉsia “Ãcõrẽ ume beɗeabari de.”* Bariduaba Ãcõrẽa iwiɗi quĩrĩã ɓʉɗe israelerã panʉmaʉba maʉ̃ deɗaa wãbadjia.
8 Moise maʉ̃ deɗaa wãbʉrʉza israelerã jũmarãda ãdji wua deɗe eɗa wãbadaɗe ʉ̃ta piradrʉɗapeɗa idjira eɗa wãbʉrʉda acʉ duanabadjiɗaa.
9 Moise eɗa wãnacarea israelerã na wãbari jʉ̃rãrã ʉ̃tʉba eɗaa drasoa jira ɓʉda maʉ̃ wua deɗaa zepeɗa dji eɗa wãbada caita ɓebadjia. Maʉ̃ne Ãcõrẽra Moise ume beɗeabadjia.
10 Israelerãba jʉ̃rãrã wua deɗe eɗa wãbada caita ɓebʉrʉda unusiɗaɗe jũmarãda chĩrãboroɗe copanenapeɗa ãdji wua deɗe eɗa wãbadamaʉba Ãcõrẽa bia beɗeabadjiɗaa.
11 Maʉ̃ne Ãcõrẽra Moise ume jĩgua beɗeabadjia ẽberã umé nẽbʉrʉ panʉ quĩrãca. Nẽbʉrʉpeɗaɗacarea Moisera jẽda zebadjia israelerã duanʉmaa. Baribʉrʉ idji carebabari Josueda maʉ̃ wua deɗe ɓebadjia. Maʉ̃ cũdrara Nuʉ̃ warra basía.
Moiseba Ãcõrẽ quĩrãwãrẽã dorrodorroa unui carea iwiɗiɗa
12 Moiseba Ãcõrẽa jarasia:
–Bʉa mʉ̃́a jara ɓʉa naʉ̃ ẽberãrãra nocoɗaa edemãrẽã. Baribʉrʉ bʉa jaraẽ́ ɓʉa caida diabueida mʉ̃ carebamãrẽã. Idjaɓa bʉa jara ɓʉa mʉ̃ra bio cawa ɓʉda idjaɓa bio bia unu ɓʉda.
13 Wãrãda mãwã baibʉrʉ, bʉa oi crĩcha ɓʉda mʉ̃́a cawabidua. Mãwã mʉ̃a bʉra biara cawaya idjaɓa bʉa mʉ̃ra bia unu ɓeya. Quĩrãnebadua naʉ̃ ẽberãrãra bʉreda.–
14 Ãcõrẽba panusia:
–Mʉ̃ra bʉ ume wãya necai ɓamãrẽã.–
15 Moiseba jarasia:
–Bʉda jũmarã ume wãẽ́bʉrʉ, namaʉba ãyã wãbirãdua.
16 Bʉda dairã ume wãẽ́bʉrʉ, ¿dewararãba sãwã cawaɗi mʉ̃da, bʉ puru siɗa bʉa bia unu ɓʉda? ¿Sãwã cawaɗi dairãra jũma naʉ̃ ẽjũãne ɓea puru cãyãbara awara panʉda?–
17 Ãcõrẽba panusia:
–Bʉa jara ɓʉ quĩrãca mʉ̃a oya, bʉra bia unu ɓʉ bẽrã idjaɓa mʉ̃a bʉra bio cawa ɓʉ bẽrã.–
18 Moiseba Ãcõrẽa jarasia:
–Mʉ̃ quĩrã djuburia bʉ quĩrãwãrẽã dorrodorroada mʉ̃́a ebuɗa unubidua.–
19 Ãcõrẽba panusia:
–Mʉ̃ biada bʉ́a jũma unubiya. Mʉ̃ trʉ̃ siɗa bʉ́a jaraya. Mãwã bʉa cawaya mʉ̃a quĩrã djuburia quĩrĩã ɓʉ ẽberãda quĩrã djuburiaida, idjaɓa mʉ̃a quĩrĩãneba careba quĩrĩã ɓʉ ẽberãda quĩrĩãneba carebaida.
20 Baribʉrʉ mʉ̃ quĩrãdarrada bʉa poya unuẽ́a. Bariduaba mʉ̃da unusira beuya.–
21 Maʉ̃ne Ãcõrẽba jarasia:
–Mʉ̃ caita mõgarada ɓʉa. Maʉ̃ ʉ̃rʉ̃ nũmedua.
22 Mʉ̃ quĩrãwãrẽã dorrodorroada bʉ caita wãyã wãbʉrʉɗe mʉ̃a bʉda mõgara uriaɗe ɓʉpeɗa mʉ̃ jʉwaba jũãtrʉya.
23 Wãyã wãnacarea mʉ̃ jʉwa ãyã edabʉrʉɗe bʉa mʉ̃ ẽcarradrʉ unuya baribʉrʉ mʉ̃ quĩrãdarrara unuẽ́a.–
