Exodo 34:1-35
34 Idjaɓa Ãcõrẽba Moisea jarasia:
–Mõgarada umé peweɗea odua mʉ̃a naãrã o diaɗa quĩrãca.* Maʉ̃ mõgaraɗe mʉ̃a mõgara naãrã o diaɗaɗe jaya ɓʉɗara wayacusa jaya ɓʉya, dji naãrãbemara bʉa jũma toɗozoabiɗa bẽrã.–
2 Jũma opeɗa nu diapeɗeɗa Sinai eya boroɗaa zedua mʉ̃ quĩrãpita ɓai carea.
3 Ni aɓaʉda bʉ ume zecara ɓʉa idjaɓa ni aɓaʉda eyaɗe ɓacara ɓʉa. Ovejara paca siɗa eya carraɗe ne coɗacara panʉa.–
4 Ara maʉ̃da Moiseba mõgarada umé peweɗea osia Ãcõrẽba naãrã o diaɗa quĩrãca. Nurẽma diapeɗeɗa Sinai eyaɗe ʉ̃taa wãsia Ãcõrẽba idjía jaraɗa quĩrãca. Mõgara umé peweɗea oɗada idji jʉwaɗe edesia.
5 Maʉ̃ne Ãcõrẽra jʉ̃rãrãne eɗaa zepeɗa Moise caita nũmesia. Mama idji trʉ̃ Jehováda Moisea jarasia.
6 Idji wãyã wãbʉrʉɗe Moisea nãwã jarasia:
–Mʉ̃ra Ãcõrẽa. Mʉ̃ra Ãcõrẽa. Mʉ̃ra quĩrã djuburiaiɗa ɓʉa idjaɓa quĩrĩãneba carebabaria. Mʉ̃ra baridua quĩrũcaa. Mʉ̃a ẽberãrãra bio quĩrĩã ɓʉa idjaɓa beɗea aɓa ɓʉa.
7 Mʉ̃ quĩrĩã jõcada zocãrã ẽberãrãa unubibaria. Ãdjia cadjirua obadara, mʉ̃ beɗea igarabadara idjaɓa ãĩ obada siɗa mʉ̃a quĩrãdoabaria. Baribʉrʉ dji beɗeaɗe ɓʉra mʉ̃a cawa obaria. Dji zezaba cadjirua oɗa carea idjida, idji warrarãda, idji wiuzaquerãda, ãdjirã warrarã siɗa cawa o ɓabaria.–
8 Ara maʉ̃da Moisera chĩrãboroɗe idji dratura egoroɗe tẽũ coɓepeɗa Ãcõrẽa bia beɗeasia.
9 Nãwã jarasia:
–Mʉ̃ Boro, bʉa mʉ̃da bia unu ɓʉbʉrʉ, dairã ume wãdua. Naʉ̃ ẽberãrãra cʉwʉrʉ zarea panʉmĩna dairãba cadjirua opeɗaɗara quĩrãdoadua idjaɓa dairãra edadua bʉ puru bamãrẽã.–
10 Ãcõrẽba panusia:
–Ũrĩdua. Mʉ̃ra bãrã puru ume beɗea ɓʉya. Bãrã quĩrãpita mʉ̃a ne ununacara o ɓaya. Maʉ̃ ne ununacara mʉ̃a waɗibiɗa ni aɓaʉ puru naʉ̃ ẽjũã ɓeaɗe ocaa. Mãwã obʉrʉɗe ẽberãrã bʉ ume panʉba bãrã israelerã carea o ɓʉda ununapeɗa mʉ̃ ʉɓʉara waya panania.*
11 Jũma mʉ̃a iɗi jara ɓʉra ĩjã oɗadua. Maʉ̃ne bãrã quĩrãpita mʉ̃a amorreorãda, cananeorãda, hititarãda, perezeorãda, heveorãda, jebuseorã siɗa jũma ãyã jʉrecuaya.
12 Quĩrãcuitaɗadua. Bãrã wãbʉda druaɗebemarã ume beɗea ɓʉrãnadua. Mãwã oɗibʉrʉ cawaẽ́ne bãrã biɗa ãdji jʉwaba oɗa ãcõrẽa bia beɗeaɗia.
13 Maʉ̃ bẽrã ãdji animarã babue diabadara jũma ãrĩnadua. Idjaɓa ãdji ãcõrẽ mõgara oɗada, ãdji ãcõrẽwẽrã Aserá bacuru oɗa siɗa jũma toapetacuaɗadua.
14 Dewara ãcõrẽa bia beɗearãnadua. Mʉ̃a quĩrĩã ɓʉa bãrãba aɓabe mʉ̃́a bia beɗeaɗida. Maʉ̃ carea mʉ̃ trʉ̃ra “Ãcõrẽ jiwaiɗa ɓʉ” abadaa.
15 Quĩrãcuitaɗadua. Bãrã wãbʉda druaɗebemarã ume beɗea ɓʉrãnadua. Mãwã oɗibʉrʉ ãdjirãba ãdji jʉwaba oɗa ãcõrẽa bia beɗeaɗe wãbʉdaɗe idjaɓa animarã bea diaɗe wãbʉdaɗe bãrãa jaraɗia aɓarica oɗamãrẽã. Maʉ̃ne bãrã biɗa ãdji ãcõrẽa animarã bea diapeɗaɗa djarada coɗia.
16 Idjaɓa bãrã warrarãa maʉ̃ druaɗebema wẽrãrãda idu edabiɗibʉrʉ, maʉ̃ wẽrãrãba ãdji jʉwaba oɗa ãcõrẽa bia beɗeabʉdaɗe bãrã warrarã biɗa maʉ̃ jʉwaba oɗa ãcõrẽa bia beɗeaɗia daunema panʉ quĩrãca.
17 Jʉwaba obada ãcõrẽra orãnadua.
Ewari droma Ãcõrẽba obi jaraɗa
18 Paʉ̃ ẽsãbari neẽ́ cobada ewarida oɗadua. Bãrãba siete ewari paʉ̃ ẽsãbari neẽ́ ɓʉda coɗida panʉa mʉ̃a jaraɗa quĩrãca. Maʉ̃ra oɗadua mʉ̃a jara ɓʉɗa ewari Abib jeɗecoɗe, bãrãra maʉ̃ jeɗecoɗe Egiptoɗeba ẽdrʉpeɗaɗa bẽrã.
19 Jũma bãrã umaquĩrã warra dji nabemarã, bãrã animarã dji umaquĩrã naãrã topeɗaɗa siɗa mʉ̃rea.
20 Bãrã burro warra dji nabema umaquĩrã tobʉrʉda mʉ̃remĩna bãrãba maʉ̃ animarãda poya edaɗida panʉa. Edaɗi carea ovejada wa chiwatuda maʉ̃ burro cacuabari mʉ̃́a babue diaɗida panʉa. Baribʉrʉ maʉ̃ burroda eda quĩrĩãnaẽ́bʉrʉ, otapuya beaɗida panʉa. Idjaɓa bãrã umaquĩrã warra dji nabema tobʉdara mʉ̃re bẽrã idji cacuabari ovejada wa chiwatuda mʉ̃́a babue diaɗida panʉa maʉ̃ warrara zocai ɓemãrẽã.
Maʉ̃ ewariɗe mʉ̃́a ne diai carea neẽ́ ɓʉra mʉ̃ quĩrãpita zecara ɓʉa.
21 Sei ewari bãrã trajura oɗida panʉa, baribʉrʉ sietebema ewariɗe ʉ̃nãũnida panʉa. Bãrã ẽjũã obʉdaɗe, ewabʉdaɗe biɗa sietebema ewariɗe ʉ̃nãũnida panʉa.
22 Bãrã néuɗebema naãrã ewapeɗaɗa carea ɓʉsriɗa ewarida oɗida panʉa trigo naãrã ewabʉdaɗe. Idjaɓa bãrã néu jũma ewapeɗaɗa carea ɓʉsriɗa ewarida oɗida panʉa.
23 Mʉ̃ra Ãcõrẽa, bãrã israelerã Boroa. Poaza ɓarima ũbea umaquĩrãrãra mʉ̃ quĩrãpita jũma zeɗida panʉa.*
24 Bãrã quĩrãpita mʉ̃a Canaaʉ̃ druaɗebemarãra jũma ãyã jʉrecuaya idjaɓa bãrãa druara waiɓʉa diaya. Maʉ̃ bẽrã poaza ɓarima ũbea bãrã mʉ̃ quĩrãpita wãbʉdaɗe ni aɓaʉba bãrã ẽjũãra jãrĩne zeɗaẽ́a.
25 Animarã mʉ̃́a babue diabʉdaɗe dji oada paʉ̃ ẽsãbari bara ɓʉ ume babue diarãnadua. Bãrã Egiptoɗeba ẽdrʉpeɗaɗa quĩrãnebaɗi carea ne cobadara obʉdaɗe oveja mʉ̃́a bea diapeɗaɗa djarara ni maãrĩ biɗa wagaɗiẽ́ panʉa nurẽma carea.
26 Bãrã néu naãrã ewabʉdaɗebemada dji biara ɓʉdrʉ mʉ̃ deɗaa diaɗe zeɗadua.
Chiwatu zaquera dji papa juɓaɗe djurãnadua.–
Moise quĩrãdarra dorrodorroa ɓeɗa
27 Maʉ̃be Ãcõrẽba Moisea jarasia:
–Mʉ̃a jaraɗara jũma ɓʉdua, maʉ̃neba mʉ̃ra bʉ ume idjaɓa israelerã ume beɗea ɓʉbʉrʉ bẽrã.–
28 Maʉ̃ne Moisera Ãcõrẽ ume Sinai eyaɗe ɓasia cuarenta ewari ãsa diamasi biɗa. Idjira ne coẽ́ ɓasia idjaɓa baido siɗa doẽ́ ɓasia. Mõgara umé peweɗea oɗaɗe Ãcõrẽba ĩjã obi ɓʉ beɗea die diaɗara jũma jaya ɓʉsia.*
29 Maʉ̃be Moisera Sinai eyaɗeba eɗaa zesia. Ãcõrẽ ley mõgara umé peweɗeaɗe jaya ɓʉ́ ɓʉda idji jʉwaɗe enesia. Ãcõrẽ ume beɗea ɓaɗa bẽrã idji quĩrãdarrara dorrodorroa ɓasia baribʉrʉ maʉ̃nebemada adua ɓasia.
30 Moise quĩrãdarra dorrodorroa ɓʉda Aaroʉ̃ba israelerã biɗa unusiɗaɗe idji caita wãnida wayasiɗaa.
31 Baribʉrʉ Moiseba ãdjirãra trʉ̃cuasia. Ara maʉ̃da Aaroʉ̃ra israelerã bororã siɗa wãnapeɗa Moisera ãdjirã ume beɗeasia.
32 Mãwãnacarea jũma israelerã siɗa idjimaa wãsiɗaa. Maʉ̃be Ãcõrẽba Sinai eyaɗe jaraɗara Moiseba ãdjirãa jũma jarasia.
33 Ãdjirãa jaraɗacarea Moiseba idji quĩrãdarrara quẽbʉ daucha wuaba bʉrasia idji quĩrãdarra dorrodorroa ɓʉda unurãnamãrẽã.
34 Baribʉrʉ Ãcõrẽ ume beɗeabari deɗaa wãbʉrʉza Ãcõrẽ ume beɗea ɓʉɗe Moiseba maʉ̃ wuara ẽrãbadjia. Mamaʉba ẽdrʉɗacarea idjia israelerãa Ãcõrẽba obi jaraɗada jarabadjia.
35 Maʉ̃ne israelerãba unubadjiɗaa Moise quĩrãdarrara dorrodorroa nũmʉda. Jũma jaraɗacarea Moiseba idji quĩrãdarrara wayacusa quẽbʉ daucha wuaba bʉrasia. Mãwã bʉrá ɓesia aɓa wayacusa Ãcõrẽ ume beɗeaɗe wãbʉrʉɗaa.
