Exodo 35:1-35
35 Maʉ̃be Moiseba israelerãra jũma trʉ̃peɗa nãwã jarasia:
–Naʉ̃da Ãcõrẽba bãrãa obi ɓʉa.
2 Sei ewari bãrã trajura oɗida panʉa, baribʉrʉ sietebema ewariɗe bãrãra ʉ̃nãũnida panʉa. Maʉ̃ ewarira Ãcõrẽ itea wagaɗida panʉa. Bariduaba ʉ̃nãũbada ewariɗe trajuda oibʉrʉ, idjira beaɗida panʉa.
3 Ʉ̃nãũbada ewariɗe bãrã diguiɗa tʉbʉ siɗa coaɗacara panʉa.–
Ãcõrẽ wua de oɗi careabema Moiseba enebiɗa
4 Moiseba jũma israelerãa jarasia:
–Naʉ̃ siɗa Ãcõrẽba obi ɓʉa.
5 Bãrãba eroɓeaɗebemada Ãcõrẽa diaɗadua. Soɗeba ne dia quĩrĩã ɓeaba Ãcõrẽa naʉ̃gʉda diaɗida panʉa: oroda, paratada, bronceda,
6 oveja cara nayãna pãwãrã oɗada, pursupursua oɗada, purea oɗa siɗa. Idjaɓa diaɗida panʉa wua dji biara ɓʉ lino oɗada, wua chiwatu cara oɗada,
7 oveja e purea oɗada, animarã e biada, acacia bacuruda,
8 olivo draga ĩbĩrã coaɗi careabemada, querada olivo dragaɗaa pueraɗi carea. Maʉ̃ quera olivo dragaɗaa pueraɗara oɗia ne jũma Ãcõrẽ iteabemada soaɗi carea. Idjaɓa quera baɗi careabemada,
9 ónice mõgarada, dewara mõgara bia queɗea siɗa diaɗida panʉa sacerdoteba jãare jʉ̃ida ɓʉɗe, “Ãcõrẽba quĩrĩã ɓʉ cawabibariɗe” biɗa cajuɗi carea.
Ãcõrẽ wua de carea Moiseba obiɗa
10 Ne o cawa ɓearãra jũma zeɗapeɗa ne jũma Ãcõrẽba obi ɓʉda oɗadua.
11 Ãcõrẽ wua deɗebema oɗida panʉra naʉ̃gʉa: de ãnẽɓari coɓʉɗi wuada, maʉ̃ ʉ̃rʉ̃ ãnẽɓari coɓʉɗi siɗa, wua jũẽbarida, bacuru ʉrraɗada, bacuru eraɗada orroza berajuɗi carea, bacuru tẽnada, edrebema parata oɗa uria ɓea siɗa.
12 Naʉ̃ siɗa oɗida panʉa: Ãcõrẽ baurudeda dji jira edeɗi bacuru bara, maʉ̃ baurude ʉ̃rʉ̃ coɓeida, baurude nocoare eatʉ jira ɓai wuada,
13 Ãcõrẽ quĩrãpita paʉ̃ ɓʉbada mesada dji jira edeɗi bacuru bara, jũma maʉ̃ mesaɗe ɓaida, paʉ̃ Ãcõrẽ quĩrãpita ɓʉi careabemada,
14 ĩbĩrã ɓʉbadada, ĩbĩrãda, jũma maʉ̃ ĩbĩrãnebemada, olivo dragada ĩbĩrã coaɗi carea,
15 quera bá diabadada dji ãyã jira edeɗi bacuru bara, quera baɗi careabemada, olivo draga quera bara ɓʉda jũma Ãcõrẽ iteabema soaɗi carea, Ãcõrẽ wua deɗe eɗa wãbada eatʉ jũãtrʉ ɓai wuara,
16 animarã babue diabadada dji jʉrrʉjʉrrʉa bronce oɗa bara idjaɓa dji jira edeɗi bacuru bara, jũma maʉ̃ animarã babue diabadaɗebemada, bronce oɗa ne sʉgʉbadada dji acʉ ɓʉɗi bara,
17 Ãcõrẽ wua de auɗu jũrã ɓʉ eatʉ jira ɓai wuada, maʉ̃ auɗu jũrã ɓai bacuru tẽnada, bronce oɗa uria ɓeada bacuru berajuɗi carea, dji auɗu jũrã ɓʉɗe eɗa wãbada eatʉ jũãtrʉ ɓai wuada,
18 jʉ̃carada, dji egoroɗe cachiɗi careabemada Ãcõrẽ wua de, dji auɗu jũrã ɓai siɗa erreɓari jʉ̃ni carea.
19 Idjaɓa Aaroʉ̃ba cacuaɗe jʉ̃ida ɓʉda, idji warrarãba cacuaɗe jʉ̃nida panʉ siɗa oɗida panʉa ãdjirãra sacerdoterãda ɓeaɗamãrẽã. Maʉ̃ra ãdjia jʉ̃nida panʉa Ãcõrẽ wua deɗe ne obʉdaɗe.–
Israelerãba Ãcõrẽ wua de carea enepeɗaɗa
20 Moiseba mãwã jaraɗacarea jũma israelerãra idji ume pananada wãbʉrʉsiɗaa.
21 Maʉ̃be ãdji soɗeba wãrãda dia quĩrĩã panʉba Ãcõrẽ itea ne enesiɗaa idji wua de, maʉ̃ deɗe eɗa ɓeaɗi siɗa oɗi carea. Idjaɓa enesiɗaa Aaroʉ̃ba cacuaɗe jʉ̃ida ɓʉ, idji warrarãba cacuaɗe jʉ̃nida panʉ siɗa oɗi carea.
22 Umaquĩrãrãba, wẽrãrã biɗa ara ãdji soɗeba dia quĩrĩã panʉ quĩrãca quĩrãtanoa djio oro oɗada Ãcõrẽa diaɗe zesiɗaa: carenada, chiɗichiɗida, jʉwa jĩwĩnĩne jʉ̃badada, dewara djio siɗa.* Jũmarãba oro oɗara Ãcõrẽa diasiɗaa.
23 Maʉ̃ awara dji eroɓeaba oveja cara nayãna pãwãrã oɗada, pursupursua oɗada, purea oɗa siɗa diaɗe zesiɗaa. Idjaɓa wua dji biara ɓʉ lino oɗada, wua chiwatu cara oɗada, oveja e purea oɗada, dewara animarã e bia siɗa diaɗe zesiɗaa.
24 Maʉ̃ awara dji eroɓeaba paratada, bronce siɗa Ãcõrẽa diaɗe zesiɗaa. Acacia bacuru eroɓeaba Ãcõrẽ wua de oɗi carea diaɗe zesiɗaa.
25 Jũma wẽrãrã ne ca cawa ɓeaba oveja cara pãwãrã oɗada, pursupursua oɗada, purea oɗa siɗa nayãnapeɗa diaɗe zesiɗaa. Dji biara ɓʉ lino wua siɗa caɗapeɗa diaɗe zesiɗaa.
26 Jũma wẽrãrã ne ca cawa ɓeaba soɗeba careba quĩrĩã panʉneba chiwatu cara nayãnapeɗa wuada osiɗaa Ãcõrẽa diaɗi carea.
27 Maʉ̃ awara israelerã bororãba ónice mõgarada, dewara mõgara biya queɗea siɗa diaɗe zesiɗaa sacerdoteba jãare jʉ̃ida ɓʉɗe, “Ãcõrẽba quĩrĩã ɓʉ cawabibariɗe” biɗa cajuɗi carea.
28 Idjaɓa olivo dragada ĩbĩrã coaɗi carea diaɗe zesiɗaa. Quera siɗa diaɗe zesiɗaa olivo dragaɗaa pueraɗapeɗa ne jũma Ãcõrẽ iteabemada soaɗi carea. Quera baɗi careabema siɗa diaɗe zesiɗaa.
29 Mãwã jũma Israelɗebema umaquĩrãrãba wẽrãrã biɗa ara ãdji soɗeba dia quĩrĩã panʉ quĩrãca Ãcõrẽa diasiɗaa idji wua de, jũma maʉ̃ wua deɗebema siɗa oɗi carea Ãcõrẽba Moiseɗeba jaraɗa quĩrãca.
Ãcõrẽ wua de oɗi ẽberãrã
30 Maʉ̃be Moiseba israelerãa jarasia:
–Ũrĩnadua. Ãcõrẽba Uri warra Bezaleelda edasia idji wua de oɗi ẽberãrã boro bamãrẽã. Idjira Judaɗeba yõna Hur wiuzaquea.
31 Ãcõrẽba idji Jaureda, necawaada, crĩcha cawaada, idjaɓa ne o cawa ɓai siɗa Bezaleelea diasia.
32 Mãwã oroɗebemada, parataɗebemada, bronceɗebema siɗa biya o cawa ɓʉa.
33 Mõgara biya queɗeaɗebemada o cawa ɓʉa idjaɓa cara cawa ɓʉa. Bacuruɗebema siɗa o cawa ɓʉa. Aɓeɗa ne jũmada o cawa ɓʉa.
34 Maʉ̃ awara Ãcõrẽba necawaara diasia jaradia ɓamãrẽã. Daʉ̃neba yõna Ahisamá warra Aholiáa biɗa necawaara diasia jaradia ɓamãrẽã.
35 Maʉ̃ umébemarãa Ãcõrẽba ne o cawa ɓai crĩchada diasia. Mãwã ãdjirãba dji biara ɓʉ lino wuaɗe oveja cara nayãna pãwãrã oɗada, pursupursua oɗada, purea oɗa siɗa eɗa ca cawa panʉa. Aɓeɗa ne jũmada biya o cawa panʉa.
Beɗea eɗaare
^ 35:22. Hebreo beɗeaɗe maʉ̃ versículora ebuɗa ɓʉẽ́a.
