Exodo 36:1-37
36 Maʉ̃ bẽrã Bezaleelba, Aholiába, idjaɓa jũma ne o cawa ɓea biɗa Ãcõrẽ wua deda, maʉ̃ wua deɗebema siɗa oɗida panʉa. Ãcõrẽba jũma ãdjirãa crĩcha cawaada, ne o cawa ɓai crĩcha siɗa diasia idjia obi jaraɗara biya oɗamãrẽã.–
Israelerãba aɗuba diapeɗaɗa
2 Maʉ̃be Moiseba Bezaleelda, Aholiáda, jũma ne o cawa ɓea siɗa trʉ̃sia Ãcõrẽ wua dera oɗamãrẽã. Ãdjirãba Ãcõrẽ wua dera careba o quĩrĩãsiɗaa. Maʉ̃ne Ãcõrẽba ãdjirãa ne o cawa ɓai crĩchada diasia.
3 Israelerãba Ãcõrẽ wua de oɗamãrẽã enepeɗaɗara Moiseba ãdjirãa jũma diasia. Baribʉrʉ israelerãba waɗibiɗa ewariza Ãcõrẽ de oɗamãrẽã diaɗe zebadjiɗaa.
4 Maʉ̃ bẽrã jũma ne o cawa ɓearãba Ãcõrẽ wua de o panʉra idu ɓʉɗapeɗa Moisemaa wãsiɗaa.
5 Idjía jarasiɗaa:
–Puruba jũmawãyã enebʉdaa Ãcõrẽba obi ɓʉ de pãrãni carea.–
6 Maʉ̃ bẽrã Moiseba deza jaracuabisia umaquĩrãrãba, wẽrãrã biɗa Ãcõrẽ wua de oɗi careabemada waa diarãnamãrẽã. Mãwã israelerãa waa idu diabiɗaẽ́ basía.
7 Ãdjia diapeɗaɗara aɗubasia Ãcõrẽ wua de pãrãni carea.
Ãcõrẽ wua de opeɗaɗa
8 Maʉ̃be jũma ne o cawa ɓeaba Ãcõrẽ wua dera osiɗaa. Dji biara ɓʉ lino wuada die edaɗapeɗa maʉ̃ wuaɗe eɗa Ãcõrẽ nezoca bajãnebema i bara ɓʉ zaca ɓeada oveja cara nayãna pãwãrã oɗaba, pursupursua oɗaba, purea oɗa biɗa biya casiɗaa.
9 Maʉ̃ die lino wuara aɓari quĩrãca ɓeasia. Dji drasoara veintiocho bicaca ɓeasia. Dji jouɓʉara bicaca quĩmãrẽ ɓeasia.
10 Maʉ̃ die wuaɗebemada juesuma edaɗapeɗa ãbaa cajusiɗaa jouɓʉa ɓemãrẽã. Aɓari quĩrãca ãbaa cajusiɗaa dewarabema juesuma panʉ siɗa.
11 36:11-12 Maʉ̃ wua jouɓʉa cajuɗaza i orro aɓaare cincuenta cʉwʉrʉ cajusiɗaa. Maʉ̃ cʉwʉrʉra wua pãwãrã ɓʉba osiɗaa. Dji cʉwʉrʉra daucha quĩrã tẽũ coɓʉsiɗaa.
13 Maʉ̃be oroda edaɗapeɗa cincuenta wua jũẽbarida osiɗaa. Maʉ̃gʉɗe cʉwʉrʉza jũẽcuasiɗaa maʉ̃ umébema wuara aɓabe ɓʉ quĩrãca ɓemãrẽã. Mãwã osiɗaa Ãcõrẽ dera ãnẽɓari coɓʉɗi carea.
14 Maʉ̃be wua chiwatu cara oɗada once edaɗapeɗa drasoa jouɓʉa cajusiɗaa dji nabema wua ʉ̃rʉ̃ ãnẽɓari coɓʉɗi carea.
15 Maʉ̃ once wua chiwatu cara oɗara aɓari quĩrãca ɓeasia. Dji drasoara treinta bicaca ɓeasia. Dji jouɓʉara bicaca quĩmãrẽ ɓeasia.
16 Maʉ̃ once wuaɗebemada sei edaɗapeɗa ãbaa cajusiɗaa jouɓʉa ɓemãrẽã. Dewarabema juesuma siɗa aɓari quĩrãca cajusiɗaa.
17 Maʉ̃ wua jouɓʉa cajuɗaza i orro aɓaare cincuenta cʉwʉrʉ cajusiɗaa.
18 Idjaɓa bronceda edaɗapeɗa wua jũẽbarida cincuenta osiɗaa. Maʉ̃gʉɗe cʉwʉrʉza jũẽcuasiɗaa maʉ̃ umébema wuara aɓabe ɓʉ quĩrãca ɓemãrẽã.
19 Maʉ̃be oveja e purea oɗada ãbaa cajusiɗaa jouɓʉa drasoa ɓemãrẽã. Maʉ̃gʉra osiɗaa chiwatu cara oɗa wua ʉ̃rʉ̃ ãnẽɓari coɓʉɗi carea. Maʉ̃ ʉ̃rʉ̃ dewarabema animarã e biada jouɓʉa drasoa cajusiɗaa ãnẽɓari coɓʉɗi carea.
20 Idjaɓa Ãcõrẽ wua de carea acacia bacuruda ʉrrasiɗaa maʉ̃ba daucha ʉ̃ta catʉ pẽni carea.*
21 Dji bacuru ʉrraɗa drasoara die bicaca ɓeasia. Dji jouɓʉara bicaca aɓa ʉ̃rʉ̃ ẽsidra ɓeasia.
22 Dji eɗaa ɓeira quiɗate bara osiɗaa. Jũma Ãcõrẽ wua de carea bacuru ʉrraɗara mãwã osiɗaa.
23 36:23-26 Ãcõrẽ wua de orroza veinte bacuru ʉrraɗada ʉ̃ta catʉ pẽsiɗaa. Maʉ̃ bacuru ʉrraɗaza edre parata oɗa uria ɓeada umé uméa ɓʉsiɗaa dji quiɗatera maʉ̃ne eɗa berajuɗi carea. Mãwã orroza cuarenta parata oɗa uria ɓeara ɓʉsiɗaa maʉ̃ bacuru ʉrraɗada daucha pẽ wãni carea.
27 Ãcõrẽ wua de jẽdaarebemara ʉ̃mãdau ɓaebariare ɓebadjia. Maʉ̃are sei bacuru ʉrraɗada ʉ̃ta catʉ pẽsiɗaa.
28 Maʉ̃ awara bacuru ʉrraɗada umé iquiɗaza ʉ̃ta catʉ pẽsiɗaa.
29 Dji quẽbʉra jũẽbari bara osiɗaa ʉ̃tʉba eɗaa ara catʉ coɓemãrẽã. Iquiɗaza mãwã osiɗaa.
30 Jũma ãbaa ocho bacuru ʉrraɗada ʉ̃ta catʉ pẽsiɗaa. Maʉ̃ bacuru ʉrraɗaza edre parata oɗa uria ɓeada umé uméa ɓʉsiɗaa dji quiɗatera maʉ̃ne eɗa berajuɗi carea. Mãwã jẽdaarebema parata oɗa uria ɓeara diecisei ɓʉsiɗaa.
31 36:31-32 Idjaɓa acacia bacuruda juesuma erasiɗaa de orroza pĩrũ omoa ɓeaɗe berajuɗi carea. Jẽdaare ʉ̃mãdau ɓaebariare biɗa acacia bacuruda juesuma pĩrũ omoa ɓeaɗe berajusiɗaa Ãcõrẽ wua dera zarea coɓemãrẽã.
33 Orroza dji ẽsibema bacuru berajuɗara dji de drasoa daucha ɓasia. Dji jẽdaare ɓʉ bacuru ẽsi berajuɗara dji de jeɗea daucha ɓasia.
34 Ãcõrẽ wua de carea bacuru ʉrraɗara oroba jũma bʉracuasiɗaa. Idjaɓa pĩrũ omoa ɓeara oroɗeda jũma osiɗaa. Maʉ̃ pĩrũra bacuru ʉrraɗaɗaa cara ɓʉsiɗaa maʉ̃ne eɗa bacuru eraɗara berajuɗi carea. Bacuru eraɗara oroba jũma bʉracuasiɗaa.
35 Idjaɓa wuada osiɗaa Ãcõrẽ dejãne eatʉ jira ɓʉɗi carea. Dji biara ɓʉ lino wuada edaɗapeɗa maʉ̃ wuaɗe eɗa Ãcõrẽ nezoca bajãnebema i bara ɓʉ zaca ɓeada oveja cara nayãna pãwãrã oɗaba, pursupursua oɗaba, purea oɗa biɗa biya casiɗaa.
36 Maʉ̃be acacia bacuruda quĩmãrẽ tẽnapeɗa oroba bʉracuasiɗaa. Maʉ̃ bacurura parata oɗa uria ɓeaɗe berajusiɗaa Ãcõrẽ dejãne ʉ̃ta nũmeanamãrẽã. Bacuruza wua jũẽbari oro oɗada cara ɓʉsiɗaa wua capeɗaɗara eatʉ jira ɓʉɗi carea.
37 36:37-38 Idjaɓa dji biara ɓʉ lino wuada edaɗapeɗa maʉ̃ wuaɗe eɗa oveja cara nayãna pãwãrã oɗada, pursupursua oɗada, purea oɗa siɗa biya casiɗaa. Maʉ̃be acacia bacuruda juesuma tẽnapeɗa dji quẽbʉɗe oroba bʉracuasiɗaa. Maʉ̃ bacurura bronce oɗa uria ɓeaɗe berajusiɗaa Ãcõrẽ wua deɗe eɗa wãbadamaa ʉ̃ta nũmeanamãrẽã. Bacuruza wua jũẽbari oro oɗada cara ɓʉsiɗaa wuara dji eɗa wãbada jũãtrʉ jira ɓʉɗi carea.
Beɗea eɗaare
^ 36:20. Maʉ̃ bacuruba daucha ʉ̃ta catʉ pẽnapeɗa dji cajuɗa wuaba ãnẽɓari coɓʉbadjiɗaa.
