Exodo 37:1-29
37 Bezaleelba baurude acacia bacuruɗeda osia. Dji drasoara bicaca umé ʉ̃rʉ̃ ẽsadra ɓasia. Dji jouɓʉara bicaca aɓa ʉ̃rʉ̃ ẽsadra ɓasia. Dji ʉ̃tʉara bicaca aɓa ʉ̃rʉ̃ ẽsadra ɓasia.
2 Dji jãra, dajadaare biɗa oro idji awa quiruba bʉrasia. Iquiɗaza jũma pʉrrʉga oroba tuca ɓʉsia.
3 Idjaɓa pĩrũ oroɗeda quĩmãrẽ omoa osia. Maʉ̃ pĩrũra baurude jĩrũza cara ɓʉsia. Mãwã orroza pĩrũra umé cara ɓʉsia.
4 Idjaɓa acacia bacuruda umé biya erapeɗa oroba bʉrasia.
5 Maʉ̃ bacurura pĩrũne eɗa beraju ɓʉsia baurude jira edeɗi carea.
6 Maʉ̃be Bezaleelba oro idji awa quiruda peweɗea baɗaa ariɗe osia baurude ʉ̃rʉ̃ coɓʉi carea. Dji drasoara bicaca umé ʉ̃rʉ̃ ẽsadra osia. Dji jouɓʉara bicaca aɓa ʉ̃rʉ̃ ẽsadra osia.
7 37:7-8 Idjaɓa oroda edapeɗa Ãcõrẽ nezoca bajãnebema i bara ɓʉ za quĩrãca umé toa chĩ osia. Maʉ̃ra dji baurude ʉ̃rʉ̃ coɓʉi carea oɗa ʉ̃rʉ̃ bio cara ɓʉsia. Quĩrãza iquiɗa aɓa ɓʉsia. Mãwã jũma maʉ̃gʉra aɓa ɓʉ oɗa quĩrãca ɓesia.
8 –
9 Ãcõrẽ nezoca bajãnebema i bara ɓʉ za quĩrãca panʉra idjia quĩrã djica eɗa ɓarru ɓʉsia. Ãdji iba dji baurude ʉ̃rʉ̃ coɓʉi carea oɗara jũãtrʉ eropanesiɗaa.
Bezaleelba Ãcõrẽ quĩrãpita paʉ̃ ɓʉbada mesa oɗa
10 Idjaɓa Bezaleelba mesa acacia bacuruɗeda osia. Dji drasoara bicaca umé osia. Dji jouɓʉara bicaca aɓa osia. Dji ʉ̃tʉara bicaca aɓa ʉ̃rʉ̃ ẽsadra osia.
11 Maʉ̃ mesara oro idji awa quiruba jũma bʉrasia. Dji icawa orroza pʉrrʉga tuca ɓʉsia.
12 Mesa ʉ̃rʉ̃ icawa bacuruda cara ɓʉsia jũgurua ɓemãrẽã. Maʉ̃ bacuru ʉ̃tʉara jʉwa jĩwĩnĩ quĩmãrẽ osia. Maʉ̃ siɗa icawa pʉrrʉga oroba tuca ɓʉsia.
13 37:13-14 Maʉ̃be pĩrũ oroɗeda quĩmãrẽ omoa osia. Maʉ̃ra mesa jĩrũza cara ɓʉsia dji jũgurua oɗa edrecarebe. Mãwã ɓʉsia maʉ̃ne eɗa bacuruda berajuɗapeɗa mesa jira edeɗi carea.
15 Maʉ̃ra acacia bacuruɗeda osia. Biya erapeɗa oroba bʉrasia.
16 Idjaɓa oro idji awa quiruda edapeɗa epeɗeco ɓeada, epeɗeco jũgurua ɓeada, taza ɓeada, zoco ɓea siɗa osia mesaɗe ɓʉi carea. Taza ɓeara, zoco ɓea siɗa osia uva ɓada Ãcõrẽa diaɗi carea.
Bezaleelba ĩbĩrã ɓʉbada oɗa
17 Idjaɓa Bezaleelba oro idji awa quiruda edapeɗa ĩbĩrã ɓʉbadada toa chĩ osia. Dji jĩrũda, dji cacuada, dji gʉ̃rʉ̃gʉ̃rʉ̃ã nepõnõ zaca ɓea siɗa aɓari oro idji awa quiruɗebemada osia.
18 Maʉ̃ ĩbĩrã ɓʉbada cacuara sei jʉwate bara osia. Orro aɓaare ũbea osia. Dewarabema orroare biɗa ũbea osia.
19 Jʉwateza dji gʉ̃rʉ̃gʉ̃rʉ̃ã nepõnõ zaca ɓeada ũbea osia.
20 Dji cacuaɗe biɗa gʉ̃rʉ̃gʉ̃rʉ̃ã nepõnõ zaca ɓeada quĩmãrẽ osia.
21 Dji jʉwate cara ɓeaza aɓa osia.
22 Dji gʉ̃rʉ̃gʉ̃rʉ̃ã nepõnõ quĩrãca ɓeara, dji jʉwate ɓeara, dji cacua siɗa aɓari oro idji awa quiruɗebemada toa chĩ osia.
23 Idjaɓa oro idji awa quiruda edapeɗa siete ĩbĩrãda, ĩbĩrã quĩrã tʉbadada, ĩbĩrã quĩrã tʉɗa ãyã edebada epeɗeco zaque siɗa osia.
24 Maʉ̃ ĩbĩrã ɓʉbada oro idji awa quiru oɗada idjaɓa ne jũma idjiɗebema siɗa ãbaa zasiɗaɗe dji zʉgʉara 75 libra ɓasia.
Bezaleelba quera bá diabada oɗa
25 Idjaɓa Bezaleelba quera bá diabadada acacia bacuruɗeda osia. Dji drasoara, jouɓʉa siɗa bicaca aɓa osia quĩrã quĩmãrẽena aɓarica ɓamãrẽã. Dji ʉ̃tʉara bicaca umé osia. Iquiɗaza aɓari bacuruɗe cachu quĩrãca osia.
26 Oro idji awa quiruba jũma bʉrasia. Icawa pʉrrʉga oroba tuca ɓʉsia.
27 Pĩrũ omoa ɓea oroɗeda quĩmãrẽ opeɗa orroza umé cara ɓʉsia dji tuca ɓʉɗa edrecare. Mãwã cara ɓʉsia maʉ̃ne eɗa bacuruda berajuɗapeɗa quera bá diabadada jira edeɗi carea.
28 Maʉ̃ra acacia bacuruɗeda osia. Biya erapeɗa oroba bʉrasia.
Olivo draga quera bara ɓʉ idjaɓa quera baɗi careabema
29 Idjaɓa Bezaleelba olivo draga quera bara ɓʉda osia ne jũma Ãcõrẽ iteabemada soaɗi carea. Quera baɗi careabema siɗa osia. Maʉ̃gʉra jũma osia quera o cawa ɓʉba obari quĩrãca.
