Exodo 38:1-30
38 Idjaɓa Bezaleelba animarã babue diabadada acacia bacuruɗeda osia. Dji drasoara bicaca juesuma osia. Dji jouɓʉa siɗa bicaca juesuma osia dji quĩrã quĩmãrẽena aɓarica ɓamãrẽã. Dji ʉ̃tʉara bicaca ũbea osia.
2 Aɓari bacuruɗe iquiɗaza cachu quĩrãca opeɗa maʉ̃ animarã babue diabadara bronceba jũma bʉrasia.
3 Idjaɓa tʉbʉ pora ãyã cuabadada, tʉbʉ pora tãĩbadada, oa piabadada, warebada mĩãsuda, tʉbʉdau edebada siɗa jũma bronceɗeda osia. Aɓeɗa ne jũma Ãcõrẽa animarã babue diabadaɗebemada bronceɗeda osia.
4 Idjaɓa jʉrrʉjʉrrʉa bronceɗeda osia. Maʉ̃ jʉrrʉjʉrrʉara animarã babue diabadaɗe dji iɗeba eɗaa ẽsidra cara ɓʉsia.
5 Maʉ̃be pĩrũ omoa bronceɗeda quĩmãrẽ oɗapeɗa jʉrrʉjʉrrʉa ɓʉmaa animarã babue diabada iquiɗaza cara ɓʉsia maʉ̃ne eɗa bacuruda berajupeɗa jira edeɗi carea.
6 Acacia bacuruda erapeɗa bronceba bʉrasia.
7 Maʉ̃ bacurura animarã babue diabada orroza pĩrũ ɓeaɗe berajusia jira edeɗi carea. Maʉ̃ animarã babue diabadara wãyã uria ɓasia. Bacuru ʉrraɗa basía.
Ne sʉgʉbada
8 Idjaɓa Bezaleelba ne sʉgʉbada epeɗeco waiɓʉada dji acʉ ɓʉbada bara bronceɗeda osia. Ãcõrẽ wua deɗe eɗa wãbadama ne obada wẽrãrãba ãdji bronce oɗa quĩrã acʉbadara diasiɗaa maʉ̃ra omãrẽã.*
Ãcõrẽ wua de auɗu jũrã ɓʉɗa
9 38:9-11 Idjaɓa Bezaleelba Ãcõrẽ wua dera auɗu jũrã ɓʉsia dji biara ɓʉ lino wuaba. Maʉ̃ auɗu jũrã ɓʉ orroza veinte bronce oɗa uria ɓeada ɓʉcuapeɗa bacuru tẽnara maʉ̃ne eɗa wẽãju nũmʉsia. Maʉ̃ bacuru quẽbʉra parataba bʉrasia idjaɓa wua jũẽbari parata oɗa siɗa cara ɓʉsia. Lino wuara maʉ̃ne eatʉ jũẽcuasia. Ãcõrẽ wua de auɗu jũrã ɓʉ drasoara cien bicaca ɓasia.
12 Jẽdaare biɗa bronce oɗa uria ɓeada die ɓʉcuapeɗa bacuru tẽnara maʉ̃ne eɗa wẽãju nũmʉsia. Maʉ̃ bacuru quẽbʉra parataba bʉrasia idjaɓa parata oɗa wua jũẽbari siɗa cara ɓʉsia. Maʉ̃ne wuara eatʉ jũẽcuasia. Ãcõrẽ wua de auɗu jũrã ɓʉ jẽdaarebemara cincuenta bicaca ɓasia idjaɓa ʉ̃mãdau ɓaebariare ɓasia.
13 Dji nocoarebemara ʉ̃mãdau odjabariare ɓasia. Maʉ̃ siɗa cincuenta bicaca ɓasia.
14 38:14-15 Maʉ̃ne dji eɗa wãbadara ẽsidra osia. Dji eɗa wãbada jʉwa acʉare bronce oɗa uria ɓeada ũbea ɓʉpeɗa bacuru tẽnara maʉ̃ne eɗa wẽãju nũmʉsia. Jʉwa araare biɗa aɓari quĩrãca osia. Maʉ̃ne lino wuara eatʉ jũẽcuasia. Dji eɗa wãbada orro aɓaare wuara quince bicaca ɓasia idjaɓa dewarabema orroare biɗa quince bicaca ɓasia.
16 Jũma Ãcõrẽ wua de auɗu jũrã ɓʉra dji biara ɓʉ lino wua basía.
17 Dji bacuru tẽnara Bezaleelba bronce oɗa uria ɓeaɗe eɗa wẽãju nũmʉsia. Bacuru quẽbʉza parataba bʉrasia idjaɓa parata oɗa wua jũẽbarida cara ɓʉsia.
18 38:18-19 Idjaɓa Ãcõrẽ wua de auɗu jũrã ɓʉɗe eɗa wãbadara osia. Bronce oɗa uria ɓeada quĩmãrẽ dji eɗa wãbadama ɓʉpeɗa maʉ̃ne eɗa bacuru tẽnara wẽãju nũmʉsia. Maʉ̃ bacuru quẽbʉra parataba bʉrasia idjaɓa parata oɗa wua jũẽbari siɗa cara ɓʉsia. Maʉ̃be dji biara ɓʉ lino wuada edaɗapeɗa maʉ̃ wuaɗe eɗa oveja cara nayãna pãwãrã oɗada, pursupursua oɗada, purea oɗa siɗa biya casía. Maʉ̃ wuaba dji eɗa wãbadara jũãtrʉ ɓʉsia. Maʉ̃ wua jũãtrʉ jira ɓʉ drasoara veinte bicaca ɓasia. Dji jouɓʉara bicaca juesuma ɓasia. Jũma Ãcõrẽ wua de auɗu jũrã ɓʉ eatʉ jira ɓʉ wuara ara maʉ̃ jouɓʉaɗe ɓeasia.
20 Jũma Ãcõrẽ wua de egoroɗe cachiɗi careabemara, maʉ̃ de auɗu jũrã ɓʉ egoroɗe cachiɗi careabema siɗa bronce oɗa basía.
Ãcõrẽ wua de oɗi careabema zʉgʉa
21 38:21-23 Uri warra Bezaleelba ne jũma Ãcõrẽba Moisea obi jaraɗara osia. Idjira Judaɗeba yõna Hur wiuzaque basía. Ahisamá warra Aholiába idjira carebabadjia. Aholiára Daʉ̃neba yõna basía. Idjia ne jũmada biya o cawa ɓasia idjaɓa dji biara ɓʉ lino wuaɗe eɗa oveja cara nayãna pãwãrã oɗada, pursupursua oɗada, purea oɗa siɗa ca cawa ɓasia. Maʉ̃ de opeɗaɗacarea Ãcõrẽ baurudeda eɗa wagabadjiɗaa.
Israelerãba maʉ̃ wua de oɗi carea diapeɗaɗara levitarãba juachasiɗaa Moiseba jaraɗa quĩrãca. Dji juacha panʉ borora sacerdote Aaroʉ̃ warra Itamar basía.
24 Ãdjia Ãcõrẽa diapeɗaɗa oro zʉgʉara jũma ãbaa 2,000 libra auɗu ɓasia Ãcõrẽ deɗe zabada quĩrãca. Maʉ̃gʉba Ãcõrẽ wua deɗe oroɗebema oida ɓaɗara jũma osiɗaa.
25 38:25-26 Israelɗebema umaquĩrãrã veinte poaɗeba ʉ̃taa ɓeada juachasiɗaɗe 603,550 panasiɗaa. Juachasiɗaɗe ãdjirãza sei gramo paratada diasiɗaa Ãcõrẽ deɗe zabada quĩrãca. Jũma ãbaa ãdjia diapeɗaɗa parata zʉgʉara 7,550 libra ɓasia.
27 Maʉ̃ parataɗebemada 7,500 libra edapeɗa Bezaleelba parata oɗa uria ɓeada 100 ocuasia maʉ̃ne eɗa Ãcõrẽ wua de bacuru ʉrraɗara ʉ̃ta wẽãju pẽi carea idjaɓa Ãcõrẽ wua dejãnebema bacuru tẽnara ʉ̃ta wẽãju nũmʉi carea. Maʉ̃ bacuruɗe dji eɗaarebema wuara eatʉ jira ɓʉsia. Parata oɗa uria ɓeaza dji zʉgʉara 75 libra ɓasia.
28 Parata oɗa uria ɓea oɗacarea israelerãba diapeɗaɗa parata aɗubaɗada 50 libra ɓasia. Maʉ̃ra edapeɗa wua jũẽbari ɓeada ocuasia idjaɓa bacuru tẽna quẽbʉra jũma bʉracuasia.
29 Israelerãba Ãcõrẽa diapeɗaɗa bronce zʉgʉara jũma ãbaa 5,300 libra ɓasia.
30 38:30-31 Maʉ̃ bronce edapeɗa Bezaleelba bronce oɗa uria ɓeada ocuasia Ãcõrẽ wua deɗe eɗa wãbadama bacuru tẽnara ʉ̃ta wẽãju nũmʉi carea, Ãcõrẽ wua de auɗu jũrã ɓʉ bacuru tẽnara ʉ̃ta wẽãju nũmʉi carea, idjaɓa dji auɗu jũrã ɓʉɗe eɗa wãbadama bacuru tẽnara ʉ̃ta wẽãju nũmʉi carea. Idjaɓa maʉ̃ bronceba idjia osia animarã babue diabadada dji jʉrrʉjʉrrʉa bara idjaɓa jũma maʉ̃ animarã babue diabadaɗebema siɗa. Idjaɓa maʉ̃ bronceba idjia osia jũma Ãcõrẽ wua dera egoroɗaa erreɓari cachiɗi careabemara, maʉ̃ de auɗu jũrã ɓʉra egoroɗaa erreɓari cachiɗi careabema siɗa.
Beɗea eɗaare
^ 38:8. Ãcõrẽ wua deɗe eɗa wãbadama ne obada wẽrãrã. Hebreo beɗeaɗe jara ɓʉẽ́a maʉ̃ wẽrãrãba oɓabadaɗebemada.
