Exodo 39:1-43
39 Bezaleelba idji ume traja panʉ biɗa Aaroʉ̃ba cacuaɗe jʉ̃ida ɓʉda osiɗaa oveja cara nayãna pãwãrã oɗaba, pursupursua oɗaba, purea oɗa biɗa Ãcõrẽba Moisea jaraɗa quĩrãca. Aaroʉ̃ba maʉ̃ra jʉ̃badjia Ãcõrẽ wua deɗe ne o ɓʉɗe.
2 39:2-3 Aaroʉ̃ba jãare jʉ̃ida ɓʉra dji biara ɓʉ lino wuaba osiɗaa. Maʉ̃ wuaɗe eɗa ãdjirãba oveja cara nayãna pãwãrã oɗada, pursupursua oɗada, purea oɗa siɗa casiɗaa. Idjaɓa oroda peweɗea berrachiɗapeɗa chõda tʉcuaɗapeɗa maʉ̃ oro siɗa dji wuaɗe eɗa biya casiɗaa.
3 –
4 Equiaza jʉ̃bari bara osiɗaa.
5 Idjaɓa cʉrrʉ trãjʉ̃barida dji biara ɓʉ lino wuaba osiɗaa. Maʉ̃ cʉrrʉ trãjʉ̃barira idjia jãare jʉ̃ida ɓʉ ume ãbaa casiɗaa aɓa ɓʉ quĩrãca ɓemãrẽã. Maʉ̃ cʉrrʉ trãjʉ̃bariɗe eɗa oro bʉrachiɗada, oveja cara nayãna pãwãrã oɗada, pursupursua oɗada, purea oɗa siɗa casiɗaa Ãcõrẽba Moisea jaraɗa quĩrãca.
6 Idjaɓa ónice mõgarada umé edaɗapeɗa maʉ̃ mõgaraɗe Israel doce warrarã trʉ̃da sẽyã quĩrãca jaya ɓʉsiɗaa. Maʉ̃ mõgarara oro oɗaɗe cara ɓʉsiɗaa.
7 Maʉ̃ mõgarara Aaroʉ̃ba jãare jʉ̃ida ɓʉ equiaza aɓa cajusiɗaa Ãcõrẽba Moisea jaraɗa quĩrãca. Maʉ̃ mõgaraɗe ɓʉɗaba Israel doce warrarãda quĩrãnebabibadjia.
8 Idjaɓa “Ãcõrẽba quĩrĩã ɓʉ cawabibarida” Bezaleelba idji ume traja panʉ biɗa osiɗaa Aaroʉ̃ba idji so ʉ̃rʉ̃ jʉ̃ ɓamãrẽã. Maʉ̃gʉra dji biara ɓʉ lino wuaba osiɗaa. Maʉ̃ wuaɗe eɗa oro bʉrachiɗada, oveja cara nayãna pãwãrã oɗada, pursupursua oɗada, purea oɗa siɗa biya casiɗaa Aaroʉ̃ba jãare jʉ̃ida ɓʉɗe capeɗaɗa quĩrãca.
9 Maʉ̃ wua caɗara ẽsidra ɓeɗa capirusiɗaa ne wagabada quĩrãca ɓamãrẽã. Mãwã dji drasoara, jouɓʉa siɗa jʉwajã ewarama aɓa ɓasia.
10 Maʉ̃ ʉ̃rʉ̃ mõgara biya queɗeada errecama quĩmãrẽ cara ɓʉcuasiɗaa. Dji nabema errecaɗe naʉ̃gʉ mõgarada ɓʉsiɗaa: rubí, crisólito, esmeralda.
11 Umébema errecaɗe ɓʉsiɗaa: granate, zapiro, jade.
12 Ũbeabema errecaɗe ɓʉsiɗaa: jacinto, ágata, amatista.
13 Quĩmãrẽbema errecaɗe ɓʉsiɗaa: topacio, ónice, jaspe. Jũma maʉ̃ mõgarara oro oɗaɗaa cara ɓʉsiɗaa.
14 Maʉ̃ doce mõgaraba jara ɓʉa Israel warrarãneba doce puru yõpeɗaɗada. Mõgaraza sẽyã quĩrãca ãdji trʉ̃ra aɓa aɓa jaya ɓʉsiɗaa.
15 Idjaɓa oro idji awa quiruba carenada umé casiɗaa “Ãcõrẽba quĩrĩã ɓʉ cawabibarira” Aaroʉ̃ba idji so ʉ̃rʉ̃ jʉ̃mãrẽã.
16 Pĩrũ oroɗeda umé oɗapeɗa “Ãcõrẽba quĩrĩã ɓʉ cawabibari” ʉ̃rʉ̃bema iquiɗaza cajusiɗaa.
17 Pĩrũza carena oro caɗa quẽbʉra aɓa aɓa cara ɓʉsiɗaa.
18 Dewarabema quẽbʉra cara ɓʉsiɗaa umébema oro oɗaɗaa Aaroʉ̃ba jãare jʉ̃ida ɓʉ equiaza.
19 Dewara pĩrũ oroɗeda umé oɗapeɗa “Ãcõrẽba quĩrĩã ɓʉ cawabibari” eɗaarebema iquiɗaza edrecare cajusiɗaa.
20 Dewara pĩrũ oroɗeda umé oɗapeɗa Aaroʉ̃ba jãare jʉ̃ida ɓʉɗe cajusiɗaa cʉrrʉ trãjʉ̃bari ʉ̃taarebe.
21 Jʉ̃cara pãwãrã oɗaba maʉ̃ pĩrũra ãbaa jʉ̃siɗaa “Ãcõrẽba quĩrĩã ɓʉ cawabibari” edre panʉ pĩrũnaa. Mãwã “Ãcõrẽba quĩrĩã ɓʉ cawabibarira” Aaroʉ̃ so ʉ̃rʉ̃ catʉ coɓesia. Ãdjirãba maʉ̃gʉra jũma osiɗaa Ãcõrẽba Moisea jaraɗa quĩrãca.
22 Idjaɓa wua pãwãrã ɓʉda edaɗapeɗa Aaroʉ̃ba djio wẽãju jʉ̃ida ɓʉda osiɗaa.
23 Maʉ̃ wuara ẽsidra uria osiɗaa. Maʉ̃ uria ira ɓeɗatʉ cajusiɗaa cõãrãmãrẽã.
24 Idjaɓa granadajõ za quĩrãca casiɗaa oveja cara nayãna pãwãrã oɗaba, pursupursua oɗaba, purea oɗa biɗa. Maʉ̃ra Aaroʉ̃ba jʉ̃ida ɓʉ pãwãrã ɓʉ eɗubema iɗe mimizua pʉrrʉga cajusiɗaa.
25 39:25-26 Idjaɓa oro idji awa quiruda edaɗapeɗa pĩrãchiruda ocuasiɗaa. Maʉ̃ siɗa mimizua pʉrrʉga cajusiɗaa Aaroʉ̃ba jʉ̃ida ɓʉ pãwãrã ɓʉ iɗe. Granadajõ za quĩrãca caɗada aɓa maʉ̃ iɗe cajuɗapeɗa maʉ̃are pĩrãchiruda aɓa cajusiɗaa. Jũma pʉrrʉga mãwã caju wãsiɗaa. Ãcõrẽba Moisea jaraɗa quĩrãca maʉ̃ djio pãwãrã ɓʉra osiɗaa Aaroʉ̃ba jʉ̃ ɓamãrẽã Ãcõrẽ wua deɗe ne o ɓʉɗe.
27 Idjaɓa Aaroʉ̃ itea, idji warrarã itea biɗa ãdjia cacuaɗe jʉ̃nida panʉ torroa ɓeada dji biara ɓʉ lino wuaba osiɗaa.
28 Idjaɓa ãdji boroɗe jʉ̃nida panʉra, ãdjia edreare jʉ̃nida panʉ siɗa dji biara ɓʉ lino wuaba osiɗaa.
29 Idjaɓa ãdji itea cʉrrʉ trãjʉ̃barida dji biara ɓʉ lino wuaba osiɗaa. Maʉ̃ wuaɗe eɗa oveja cara nayãna pãwãrã oɗada, pursupursua oɗada, purea oɗa siɗa casiɗaa. Jũma maʉ̃gʉra ãdjirãba osiɗaa Ãcõrẽba Moisea jaraɗa quĩrãca.
30 Aaroʉ̃ itea boroɓarida osiɗaa maʉ̃ jʉ̃ ɓʉɗe Ãcõrẽ itea ɓamãrẽã. Oro idji awa quiruda peweɗea berrachi oɗapeɗa naʉ̃ beɗeada jaya ɓʉsiɗaa: “Aɓa Ãcõrẽ itea ɓʉ.”
31 Maʉ̃be jʉ̃cara pãwãrã ɓʉba maʉ̃ oro peweɗea berrachi oɗara ãdjirãba jʉ̃ coɓʉsiɗaa Aaroʉ̃ba boroɗe jʉ̃ida ɓʉɗe. Jũma maʉ̃gʉra osiɗaa Ãcõrẽba Moisea jaraɗa quĩrãca.
32 Mãwã israelerãba ne jũma Ãcõrẽ wua de careabemada pãrãsiɗaa. Maʉ̃gʉra jũma osiɗaa Ãcõrẽba Moisea jaraɗa quĩrãca.
Ãcõrẽ wua de careabema Moisemaa edepeɗaɗa
33 Ãcõrẽ wua de careabemara jũma pãrãnapeɗa Moisemaa edesiɗaa. Maʉ̃ de oɗi careabema wuara edesiɗaa. Idjaɓa jũma maʉ̃ de careabema siɗa edesiɗaa: wua jũẽbarida, bacuru ʉrraɗada, bacuru eraɗa orroza berajuɗi careabemada, bacuru tẽnada, bacuru tẽna berajuɗi careabema siɗa.
34 39:34-35 Edesiɗaa Ãcõrẽ wua de ãnẽɓari ɓʉɗi oveja e purea oɗada, maʉ̃ ʉ̃rʉ̃ ãnẽɓari ɓʉɗi animarã e biada, Ãcõrẽ baurudeda dji jira edeɗi bacuru bara, maʉ̃ baurude ʉ̃rʉ̃ coɓʉɗi careabemada, baurude nocoare eatʉ jira ɓai wua siɗa.
36 Idjaɓa paʉ̃ ɓʉbada mesada, jũma maʉ̃ mesaɗe ɓaira, paʉ̃ Ãcõrẽ quĩrãpita ɓai careabema siɗa edesiɗaa.
37 Ĩbĩrã ɓʉbada oro idji awa quiru oɗada, ĩbĩrãra maʉ̃ ʉ̃rʉ̃ erreca ɓʉɗi carea, jũma maʉ̃ ĩbĩrãnebemada, idjaɓa olivo draga ĩbĩrã coaɗi careabema siɗa edesiɗaa.
38 Quera bá diabada oro oɗada, quera baɗi careabemada, olivo draga quera bara ɓʉda jũma Ãcõrẽ iteabema soaɗi carea, Ãcõrẽ wua deɗe eɗa wãbadama eatʉ jũãtrʉ ɓai wua siɗa edesiɗaa.
39 Animarã babue diabada bronce bʉraɗada, dji jʉrrʉjʉrrʉa bronce oɗada, dji jira edeɗi bacuruda, jũma maʉ̃ animarã babue diabadaɗebema siɗa edesiɗaa. Idjaɓa ne sʉgʉbadada dji acʉ ɓʉɗi bara edesiɗaa.
40 Ãcõrẽ wua de auɗu jũrã ɓʉi careabema wuada, dji bacuru tẽnada, maʉ̃ bacuru berajuɗi careabemada, dji auɗu jũrã ɓʉɗe eɗa wãbadama eatʉ jũãtrʉ ɓai wuada, dji egoroɗe cachiɗi careabemara jʉ̃cara bara edesiɗaa. Ne jũma Ãcõrẽ wua de careabemada edesiɗaa.
41 Idjaɓa Aaroʉ̃ djiora, idji warrarã djio siɗa edesiɗaa ãdjira sacerdoterãda ɓeaɗamãrẽã. Maʉ̃ djiora jʉ̃nida panʉa Ãcõrẽ wua deɗe ne oɗe wãbʉdaɗe.
42 Jũma israelerãba opeɗaɗara Ãcõrẽba Moisea obi jaraɗa quĩrãca ɓasia.
43 Maʉ̃ra Moiseba acʉpeɗa unusia ãdjirãba jũma ariɗe osiɗada Ãcõrẽba jaraɗa quĩrãca. Maʉ̃ bẽrã ãdjirãra bia jarasia.
