Exodo 4:1-31
4 Baribʉrʉ Moiseba jarasia:
–Israelerãba mʉ̃a jarabʉrʉra ĩjãnaẽ́a idjaɓa ũrĩ quĩrĩãnaẽ́a. Ãdjirãba jaraɗia: “Ãcõrẽba ara idjida bʉ́a unubiẽ́ ɓʉa.”–
2 Maʉ̃ne Ãcõrẽba iwiɗisia:
–¿Bʉa cãrẽda jʉwaɗe eroɓʉ?–
Moiseba panusia:
–Bacuruda eroɓʉa.–
3 Ãcõrẽba jarasia:
–Egode ɓaebidua.–
Ɓaebibʉrʉɗe bacurura dama ba dogosia. Maʉ̃ unusiɗe Moisera ãyã jʉ̃drʉsia.
4 Baribʉrʉ Ãcõrẽba jarasia:
–Dji druɗe jidadua.–
Ara maʉ̃da Moiseba dji druɗe jidabʉrʉɗe waya bacuru basía.
5 Maʉ̃be Ãcõrẽba Moisea jarasia:
–Bʉa maʉ̃da osira israelerãba ĩjãnia mʉ̃a ara mʉ̃djida bʉ́a unubisida. Cawaɗia mʉ̃ra ãdji drõã naẽnabemarã Abrahaʉ̃ba, Isaba, idjaɓa Jacobo biɗa ĩjã panana Ãcõrẽda.–
6 Maʉ̃ awara Ãcõrẽba jarasia:
–Bʉ jʉwara bʉa jʉ̃ ɓʉ edre berajudua.–
Ara maʉ̃da Moiseba berajupeɗa ẽũta edabʉrʉɗe aɓeɗa idji jʉwara aiɗaba bira ɓasia.*
7 Ãcõrẽba jarasia:
–Wayacusa bʉ jʉwara bʉa jʉ̃ ɓʉ edre berajudua.–
Ara maʉ̃da Moiseba waya berajupeɗa ẽũta edabʉrʉɗe idji jʉwara aɓeɗa bia ɓasia.
8 Maʉ̃be Ãcõrẽba jarasia:
–Dji nabema ne ununaca obʉrʉɗe israelerãba bʉa jara ɓʉda ĩjãnaẽ́bʉrʉ, dji umébema ne ununaca obʉrʉɗe ĩjãnia.
9 Baribʉrʉ maʉ̃ ne ununaca umé obʉrʉɗe ãdjirãba waɗibiɗa bʉa jara ɓʉda ĩjãnaẽ́bʉrʉ, naʉ̃ quĩrãca odua. Nilo doɗe baidoda jue edapeɗa drua weatadua. Maʉ̃ne maʉ̃ baidora oa baya.–
10 Ãcõrẽba mãwã jaraɗamĩna Moiseba idjía jarasia:
–¡Ay, mʉ̃ Boro! Mʉ̃ra ẽberãrã quĩrãpita warrá beɗeacaa. Maʉ̃ra iɗibemaẽ́a. Bʉra mʉ̃ ume beɗea ɓʉmĩna mʉ̃ra ara mãwã warrá beɗeacaa. Mʉ̃ra ẽberãrã quĩrãpita cawa beɗeacaa.–
11 Baribʉrʉ Ãcõrẽba jarasia:
–¿Caiba ẽberãrã itera osi? ¿Mʉ̃abʉrʉ oẽ́ basica ẽberãrã quĩrãme cara ɓeada, cʉwʉrʉ qui ɓeada, dau bia ɓeada, idjaɓa dauɓerrea ɓea siɗa? Mʉ̃ra Ãcõrẽ bẽrã mãwã oida ɓʉa.
12 Bʉ beɗeabʉrʉɗe mʉ̃a carebaya. Mʉ̃a cawabiya bʉa cãrẽda jaraida ɓʉda. Jãʉ̃be Egiptoɗaa wãdua.–
13 Baribʉrʉ Moiseba panusia:
–¡Ay, mʉ̃ Boro! Mʉ̃ quĩrã djuburia dewara ẽberãda diabuedua.–
14 Maʉ̃ carea Ãcõrẽra Moise ume quĩrũsia. Nãwã jarasia:
–¿Bʉ djaba Aaroʉ̃ Leviɗeba yõnada ɓʉẽ́ca?* Mʉ̃a cawa ɓʉa idjira bia beɗeabarida. Idjira bʉ acʉɗe zebʉrʉa. Bʉ unubʉrʉɗe idjira ɓʉsriɗaya.
15 4:15-16 Idjira Egiptoɗe bʉ cacuabari beɗeaya. Mʉ̃a jarabi ɓʉda bʉa idjía jaraya. Maʉ̃gʉra idjia purua jaraya. Mʉ̃a bãrãra carebaya bia beɗeaɗamãrẽã idjaɓa cawabiya sãwãbʉrʉ oɗida panʉda. Bʉa ãcõrẽ quĩrãca Aaroʉ̃a beɗea ɓaya idjaɓa idjira bʉɗeba beɗea ɓaya.
17 Bʉ jʉwaɗe eroɓʉ bacurura ededua maʉ̃gʉɗeba ne ununacada oi bẽrã.–
Moise jẽda Egiptoɗaa wãna
18 Maʉ̃be Moisera idji zãwãrẽ Jetro abadamaa wãpeɗa jarasia:
–Mʉ̃ra Egiptoɗaa wãya mʉ̃ ẽberãrã acʉɗe waɗi zocai panʉ cawaya.–
Jetroba jarasia:
–Bia ɓʉa. Necai wãdua.–
19 Moise waɗi Madiaʉ̃ druaɗe ɓasiɗe Ãcõrẽba idjía jarasia:
–Egiptoɗaa wãdua. Bʉ bea quĩrĩã pananara jũma beusiɗaa.–*
20 Maʉ̃be Moiseba dji quimada, dji warrarã siɗa burro ʉ̃rʉ̃ ɓʉpeɗa Egiptoɗaa wãsiɗaa. Idji jʉwaɗe edesia Ãcõrẽba ne ununaca obi ɓaɗa bacuruda.
21 Moise wãbʉrʉɗe Ãcõrẽba idjía jarasia:
–Egiptoɗe jũẽpeɗa jũma ne ununaca mʉ̃a obi ɓʉda Egiptoɗebema boro quĩrãpita odua. Baribʉrʉ mʉ̃a idjira so zarea ɓʉya israelerã ẽdrʉ ɓʉrãmãrẽã.
22 Mãwãnacarea Egiptoɗebema boroa jaradua: “Ãcõrẽba nãwã jara ɓʉa: mʉ̃a Israel purura mʉ̃ umaquĩrã warra dji nabemaana abaria.
23 Maʉ̃ carea mʉ̃a jara ɓʉa: mʉ̃ warrara ẽdrʉ ɓʉdua mʉ̃́a animarãda babue diaɗe wãmãrẽã. Baribʉrʉ bʉa jarasia ẽdrʉ ɓʉẽ́da. Maʉ̃ carea bʉ umaquĩrã warra dji nabemada beuya.”–
24 Moise idji warrarã bara Egiptoɗaa wãbʉdaɗe ota cãĩsiɗaa. Mama Ãcõrẽra ãdjimaa zesia. Maʉ̃ne idjia Moisera beai basía.
25 4:25-26 Baribʉrʉ Moise quima Seporába ãdji warra zaque cacuara neco mõgara oɗaba wẽãgosia. Maʉ̃ e wẽãgoɗara Moise jĩrũ caita coɓʉsia. Maʉ̃ bẽrã Ãcõrẽba Moisera beaẽ́ basía. Maʉ̃ carea Seporába Moisea jarasia:
–Wãrãda bʉra mʉ̃ quima arada ɓesia warra zaque cacua wẽãgoɗa oaɗeba zocai ɓeɗa bẽrã.–*
27 Maʉ̃ naẽna Ãcõrẽba Aaroʉ̃a jarasia:
–Ẽjũã põãsa ewaraga ɓʉɗe Moise acʉɗe wãdua.–
Ara maʉ̃da Aaroʉ̃ra wãpeɗa Moisera unusia Ãcõrẽ eya abadama.* Unupeɗa ɓʉsriɗaba idji uridarraɗe isõsia.
28 Maʉ̃be Moiseba Aaroʉ̃a jũma nẽbʉrʉsia Ãcõrẽba Egiptoɗe jarabi ɓʉda idjaɓa ne ununaca obi ɓʉ siɗa.
29 Egiptoɗe jũẽnapeɗa Moisera Aaroʉ̃ siɗa israelerã bororã ume ãbaa dji jʉresiɗaa.
30 Maʉ̃ne Aaroʉ̃ba ãdjirãa nẽbʉrʉsia jũma Ãcõrẽba Moisea jaraɗada. Idjaɓa ne ununaca Ãcõrẽba obicuaɗara ãdjirã quĩrãpita osia.*
31 Maʉ̃ bẽrã Aaroʉ̃ba jaraɗara ĩjãsiɗaa. Ãcõrẽba ãdji bia mĩga panʉda unupeɗa ãdjirã carebai carea ɓʉda ĩjãsiɗaa. Maʉ̃ bẽrã chĩrãboroɗe ɓarru copanenapeɗa Ãcõrẽa bia beɗeasiɗaa.
Beɗea eɗaare
^ 4:6. Hebreo beɗeaɗe nãwã ɓʉ́ ɓʉa: “Idji jʉwara aiɗaba nieve quĩrãca ɓasia.”
^ 4:14. Exodo 6:20.
^ 4:19. Exodo 2:15.
^ 4:25-26. Seporába jaraɗara ebuɗa ɓʉẽ́a. Hebreo beɗeaɗe nãwã ɓʉ́ ɓʉa: “Wãrãda oaɗeba bʉra mʉ̃ quima basía.”
^ 4:27. Exodo 3:1. Horeb eyara Ãcõrẽ eya abadaa Ãcõrẽra mama odjaɗa bẽrã. Horeb eyara idjaɓa Sinai abadaa.
^ 4:30. Exodo 4:2-9.
