Exodo 40:1-38
40 Maʉ̃be Ãcõrẽba Moisea jarasia:
2 –Poa djiwiɗiɗe nabema jeɗecoɗe dji nabema ewariɗe mʉ̃ wua dera carawaɗadua.*
3 Mʉ̃ baurudeda maʉ̃ deɗe eɗaara ɓʉ dejãne ɓʉɗadua. Maʉ̃ baurude nocoare wuada eatʉ jira ɓʉɗadua.
4 Idjaɓa mesada eɗa enenapeɗa jũma maʉ̃ mesaɗe ɓaida ɓʉra ʉ̃rʉ̃ ɓʉɗadua. Ĩbĩrã ɓʉbada siɗa eɗa enenapeɗa ĩbĩrãra jʉwateza ɓʉcuaɗadua.*
5 Quera babada oro oɗada mʉ̃ wua deɗe eɗa ɓʉɗadua mʉ̃ baurude quĩrãpe. Mãwã ɓʉɗapeɗa dji eɗa wãbadara wuaba eatʉ jũãtrʉ ɓʉɗadua.
6 Mʉ̃ wua deɗe eɗa wãbada quĩrãpe animarã babue diabadara ɓʉɗadua.
7 Ne sʉgʉbadada ɓʉɗadua animarã babue diabada jẽdaare mʉ̃ wua de caita. Maʉ̃gʉɗe baidoda jue ũmʉnadua.
8 Maʉ̃be mʉ̃ dera wuaba auɗu jũrã ɓʉɗadua. Maʉ̃ auɗu jũrã ɓʉɗe eɗa wãbadara wuaba eatʉ jũãtrʉ ɓʉɗadua.
9 Maʉ̃be olivo draga quera bara ɓʉra edapeɗa mʉ̃ wua deda, jũma maʉ̃ deɗe nũmea siɗa soadua mʉ̃ itea bia ɓemãrẽã.
10 Animarã babue diabadada, jũma maʉ̃ animarã babue diabadaɗebema siɗa soadua mʉ̃ itea bio bia ɓemãrẽã.
11 Ne sʉgʉbada siɗa dji acʉ ɓʉɗi bara soadua mʉ̃ itea ɓemãrẽã.
12 Maʉ̃be Aaroʉ̃ra idji warrarã siɗa mʉ̃ wua deɗe eɗa wãbadamaa edepeɗa baidoba sʉgʉdua.
13 Sʉgʉɗacarea djio Aaroʉ̃ itea opeɗaɗara idjía jʉ̃bidua. Maʉ̃be olivo draga quera bara ɓʉda Aaroʉ̃ boro ʉ̃rʉ̃ weadua mʉ̃ sacerdote dji dromada ɓemãrẽã.
14 Aaroʉ̃ warrarãra caita zebipeɗa ãdjia jʉ̃nida panʉ torroa ɓeada jʉ̃bidua.
15 Ãdjirã boro ʉ̃rʉ̃ olivo draga quera bara ɓʉda weadua ara ãdji zeza boro ʉ̃rʉ̃ weaɗa quĩrãca. Mãwã ãdjirãra mʉ̃ sacerdoterãda ɓeaɗia. Olivo draga ãdjirã boro ʉ̃rʉ̃ weabʉrʉba ãdjirãdrʉ, ãdjiɗeba yõbʉdarã siɗa mʉ̃ sacerdoterãda ɓeaɗia.–
16 Ara maʉ̃da Moiseba jũma osia Ãcõrẽba jaraɗa quĩrãca.
17 50:17-18 Egiptoɗeba ẽdrʉpeɗaɗacarea poa aɓa babʉrʉɗe nabema jeɗecoɗe dji nabema ewariɗe Moiseba Ãcõrẽ wua dera carawabisia. Idjia parata oɗa uria ɓeara erreca ɓʉcuabisia. Maʉ̃gʉɗe eɗa bacuru ʉrraɗa quiɗatera berajucuabisia maʉ̃ bacurura ʉ̃ta catʉ pẽni carea. Orroza bacuru eraɗara pĩrũ omoa ɓeaɗe berajucuabisia maʉ̃ dera zarea coɓemãrẽã. Dji dejãnebema bacuru tẽnara, dji eɗa wãbadama bacuru tẽna siɗa ʉ̃ta nũmʉbisia.
19 Jũma maʉ̃ ʉ̃rʉ̃ idjia wuada umé ãnẽɓari ɓʉbisia. Maʉ̃ ʉ̃rʉ̃ animarã e oɗada umé ãnẽɓari ɓʉbisia Ãcõrẽba idjía jaraɗa quĩrãca.
20 Ãcõrẽba ĩjã obi ɓʉ beɗea mõgaraɗe ɓʉ́ ɓʉda Moiseba baurudeɗe eɗa waga ɓʉsia. Waga ɓʉpeɗa maʉ̃ baurude ʉ̃rʉ̃ coɓeira coɓʉsia. Bacuru eraɗara pĩrũ omoa ɓeaɗe eɗa beraju ɓʉsia jira edeɗi carea.
21 Baurudera Ãcõrẽ wua deɗe eɗa ɓʉbisia. Ɓʉɗapeɗa wuada eatʉ jira ɓʉbisia baurude jũãtrʉ eroɓamãrẽã Ãcõrẽba idjía jaraɗa quĩrãca.
22 Maʉ̃ wua eatʉ jira ɓʉ nocoare Moiseba mesada Ãcõrẽ wua deɗe jʉwa araare ɓʉbisia.
23 Maʉ̃ mesa ʉ̃rʉ̃ paʉ̃da Ãcõrẽ quĩrãpita ɓʉsia Ãcõrẽba idjía jaraɗa quĩrãca.
24 Ãcõrẽ wua deɗe jʉwa acʉare dji mesa quĩrãpe Moiseba ĩbĩrã ɓʉbadara ɓʉbisia.
25 Maʉ̃ ĩbĩrã ɓʉbada jʉwateza ĩbĩrãda ɓʉcuabisia Ãcõrẽ quĩrãpita coai carea Ãcõrẽba idjía jaraɗa quĩrãca.
26 Ãcõrẽ dejãne eatʉ jira ɓʉ wua nocoare Moiseba quera bá diabadada ɓʉbisia.
27 Maʉ̃ ʉ̃rʉ̃ querada bá diasia Ãcõrẽba idjía jaraɗa quĩrãca.
28 Dji eɗa wãbadara Moiseba wuaba eatʉ jũãtrʉ ɓʉbisia.
29 Ãcõrẽ wua deɗe eɗa wãbada quĩrãpe Moiseba animarã babue diabadara ɓʉbisia. Maʉ̃ ʉ̃rʉ̃ animarãda, harina oɗa siɗa Ãcõrẽa babue diasia Ãcõrẽba idjía jaraɗa quĩrãca.
30 Animarã babue diabada jẽdaare Ãcõrẽ wua de caita Moiseba ne sʉgʉbadada ɓʉbisia. Maʉ̃gʉɗe baidoda jue ũmʉbisia.
31 Moiseba, Aaroʉ̃ba, Aaroʉ̃ warrarã biɗa ãdji jʉwara, jĩrũ siɗa maʉ̃ baidoba sʉgʉbadjiɗaa.
32 Mãwã sʉgʉbadjiɗaa Ãcõrẽ wua deɗe eɗa wãbʉdaza idjaɓa Ãcõrẽa animarã babue diabʉdaza Ãcõrẽba Moisea jaraɗa quĩrãca.
33 Moiseba Ãcõrẽ wua dera, animarã babue diabada siɗa wuaba auɗu jũrã ɓʉbisia. Maʉ̃ne eɗa wãbadara wuaba eatʉ jũãtrʉ ɓʉbisia. Mãwã Moiseba Ãcõrẽ wua dera pãrãsia.
Ãcõrẽ wua de ʉ̃rʉ̃ jʉ̃rãrã ɓeɗa
34 40:34-35 Jũma pãrãnacarea jʉ̃rãrã ʉ̃tʉba eɗaa jira ɓʉba Ãcõrẽ wua dera ãnã edasia. Maʉ̃ne Ãcõrẽ quĩrãwãrẽã dorrodorroada maʉ̃ deɗe eɗa wãsia. Maʉ̃ba Moisera eɗa poya wãẽ́ basía.
36 Maʉ̃ ewariɗeba ʉ̃taa maʉ̃ jʉ̃rãrã Ãcõrẽ wua de ʉ̃rʉ̃ ɓʉda nocoɗaa wãbʉrʉɗe israelerã siɗa nocoɗaa wãbadjiɗaa.
37 Baribʉrʉ jʉ̃rãrãra Ãcõrẽ wua de ʉ̃rʉ̃ ɓesira israelerã siɗa aria panebadjiɗaa aɓa jʉ̃rãrã wayacusa nocoɗaa wãbʉrʉɗaa.
38 Jũma israelerãba acʉ panʉ daiɗe ãsa Ãcõrẽ jʉ̃rãrãra idji wua de ʉ̃rʉ̃ ɓabadjia. Diamasi tʉbʉ quĩrãca uruga jira ɓabadjia. Mãwã ɓasia ãdjirã wãbʉdaza.
